Muthiyana Naamukhweli oSarefa Aahitthuveliwa Mwaha wa Waamini Wawe

MUTHIYANA naamukhweli oohaawa onnimukhupaarela mwammiravo, mwanawe mmosa paahi. Owo khunikupali etthu eniweha awe. Okathi vakhaani paahi ottuli, ariki munla muthiyana ole aahiteexa murutthu wa mwana awe mmatatani akhupaarela. Masi vano, muthiyana ola onninweha mwana awe ahihimuxiwe nto onnitheya moohakalala. Muletto onimuxekhurya onihimya so: ‘Mwaniny’ula mukumi’.

Yowiiraneya ela yookuxa murima yaakhumelenle etthu yowiiraka iyaakha 3.000 sivinre. Wira musome mmansinyu mwaha owo munwehe 1 Mamwene ekapitulu 17. Muletto onixukurya ti Eliya, profeta a Muluku. Nto ti pani ori maama awe mwammiravo ola? Naamukhweli ola onikhala muttetthe wa oSarefa khonihimmwa nsina nawe. Masi ohihimuxiwa wa mwanawe yaari etthu emosa yaamwiiranenle yaatempe olipiha nroromelo nawe. Okathi onitokosa ahu okumi awe, nnimwiixutta itthu sootepa otthuneya.

ELIYA ONNIMPHWANYA NAAMUKHWELI ORINA WAAMINI

Yehova aahilakela wira momweneni wa Akhabi mwene ootakhala a wIsarayeli ehirupe epula mpakha ovira iyaakha sinci. Nuumala Eliya ohimya wira epula khiyaarowa orupa, Muluku aahinvitha Eliya wira ahooniwe ni Akhabi, nto mwa mutikiniho Muluku aaninvaha ephaawu ni enama yaruuhiwa ni anakhuku. Nuumala-vo, Yehova aahimuruma Eliya oriki: ‘Nvenye, murowe oSarefa, elapo ya oSidoni, nto mwakhale weiwo. Miyo kinomuruma muthiyana naamukhweli wira òvaheni solya’.​—1 Mam. 17:1-9.

Nuumala Eliya ophiya oSarefa, owo onnimoona muthiyana naamukhweli oothoiwa athayaka ikhuni. Niireke ola ti muthiyana onrowa onvahaka yoolya profeta? Muthiyana ola onrowa owerya sai ovaha yoolya oryeene masikhini? Nnaamwi Eliya aarina mukhino-khino owo, owo onnirowa olavula ni muthiyana ole. Eliya onihimya so: ‘Xontte, mukiruhele màsi vakhani mukahini, kiwurye’. Nto okathi muthiyana ole onirowela awe maasi, Eliya onihimya-tho so: ‘Xontte, mukiruhele-tho yolya vakhani’. (1 Mam. 17:10, 11) Onvaha muletto maasi oowurya khoninvila namukhweli ole, masi onvaha ephaawu onnoona okhala etthu yoovila.

Tivonto onnaakhula ariki: ‘Mwa Yehova Muluku anyu mukumi, nkirina yolya, kirina nikuphi nimosa n’otthú mmwapuni ni makhura vakhanene mmurinkini. Vano kathaya ikhuni vakhani, kinrowa owani, koxe otth’uwo ohanle, kikhure miyo ni mwan’aka, numalá nikhwaseke’. (1 Mam. 17:12) Nrowe vano nuupuwele saana ele enitaphulela aya ovaanela wa atthu awo.

Masu a muthiyana ole naamukhweli oowi ‘mwa Yehova Muluku anyu mukumi’ anooniherya wira aanimusuwela Eliya okhala murumeyi a Muluku a wIsarayeli. Nto vanikhala wira nnaamwi aasuwela itthu sikina sa Muluku wa Isarayeli, owo khoona oreerela orumeela nuulumo noowi “Muluku aka” omuhimyaka Yehova. Owo aakhala oSarefa muttetthe ‘wa elapo ya oSidoni’, wala waalipa ni muttetthe wa oFeniisio elapo ya oSidoni. Woonasa wene, muttetthe wa oSarefa waakhaliwa ni atthu yaamukokhorela muluku Bayali. Hata vaari siiso, Yehova ahoona etthu yooreera wa muthiyana ola naamukhweli.

Nnaamwi naamukhweli ole oohaawa oSarefa aakhala eriyari ya atthu yaakokhorela amuluku eethiru, owo animwaamini Muluku. Yehova aahimuruma Eliya orowa wa muthiyana ole mwaha wophavela omukhaliherya muthiyana ole vamosa ni Eliya. Mmwaha ola hiyo nihaana wiixutta etthu yuulupale.

Khahiyo wira atthu otheene yaale yaakokhorela amuluku oSarefa, yaari ootakhalexa. Mwaha woomuruma Eliya orowa wa namukhweli ole, Yehova aahooniherya wira onniwerya woona etthu yoreera enipakiwa ni mutthu yoole nlelo ohinimurumeela. Aayo, “tthiri Muluku onnaphenta atthu a nloko ti nloko, yale animuttittimiha, enettela exariya”.​—Mit. 10:35.

Nkuupuwelani so: atthu xeeni anikhala mmuttettheni mwanyu anilikana ni naamukhweli oSarefa? Nnaamwi arukureriwe ene ni atthu aneettela etiini yoowoka, pooti wira awo anniphavela wiiwa ekeekhai. Akina anisuwela vakhaani wala khanimusuwela Yehova, tivonto ahaana okhaliheriwa wira yeemye okokhorela wekeekhai. Nto niireke munniwaavya atthu awo wira mwaakhaliherye?

MPACERYE WOXA MUKATTHE OWO MUKIRUUHELE

Nkavareryani saana ele Eliya eninvekela awe naamukhweli wira opake. Muthiyana ole iira ohimmye ene wira aarowa opaka yoolya wira olye owo ni mwanawe, nuumala-vo akhwaaseke. Nto, Eliya onihimya exeeni? Owo onihimya so: ‘Muhové etthu! Murowé, mwireke ntoko sihimyalyanyu. Nto mpajeryeke woxa mukatthe owo, mukiruhele. Numalá, moxeke ole ohanle wawinyu ni wa mwan’inyu. Tthiri Yehova, Muluku a Isarayeli, t’onihimya wira: ‘Otthú ori mmwapuni khunimala, makhura ari mmurinkini khanivukuwa mpakha nihiku Yehova nintthuna awe orupihela epula elapo ela yothene’’.​—1 Mam. 17:11-14.

Akina pooti wuupuwelaka so: ‘ovaha yoolya yookiserya mutthu erinaawe? Eyo kheniireya’. Masi naamukhweli ole khuupuwela siiso. Nnaamwi ahaamusuwela saana Yehova, owo aahikupali moolumo a Eliya khupaka ntoko saahimyale awe. Tthiri owo waari okathi woweehereriwa waamini wawe, masi muthiyana ole aahipaka etthu yooloka!

Muluku khaamunyanyanle naamukhweli ole oohaawa. Tivonto ntoko saahimyale awe Eliya, Yehova ahincererya soolya sawe mpakha ophiyerya olya Eliya, naamukhweli ole ni mwanawe, khuhimala okathi wotheene wahaarupa ephula. Aayo, ‘otthú khiwàmanle mmwapuni, makhura khiyàvukunwe mmurinkini, sisale sahimyalya awe Yehova ni molumo a Èliya’. (1 Mam. 17:16; 18:1) Vakhanle wira muthiyana ole aapakale etthu yoovirikana, woonasa wene yoolya yaarina awe yaarowa okhala yookiserya tthiri. Masi owo aahipaka itthu ottharihelaka waamini wawe, aamuroromela Yehova, tivonto aapacenrye onvaha yoolya Eliya.

Etthu eniixutta ahu tiila, Muluku onnaareeliha atthu yaale animwaamini. Akhala wira okathi woolupatthiwa munnooniherya waamini wanyu, Yehova onrowa wookhaliheryani. Owo onrowa woolyihani, wookhapelelani ni okhala Mpatthani anyu wira ookhaliheryeni ovikana muxankiho orina anyu.​—Okhum. 3:13-15.

Voohimya sa mwaha ola wa naamukhweli, mwaakha wa 1898, erevista Zion’s Watch Tower, yaahimyale so: “Akhala wira waamini wa naamukhweli ole wanimwiiriha wiiwelela, nto owo aarowa ophentiwa ni ophwanela okhaliheriwa ni Pwiya orweela mwa Profeta; akhala wira khaarowa waamini, woonasa wene amphwanyaneya naamukhweli aarowa waamini. Eyo ti etthu eniiraneya ni hiyo, mwa inamuna sinceene sa okumi ahu Apwiya anninroiha opuro onrowa weehereriwa waamini wahu. Nto akhala wira waamini wahu ti woolipa nnoophwanya mareeliho, masi akhala wira waamini wahu kholimpe nnopweteiwa mareeliho awo”.

Okathi oneehereriwa ahu, nihaana ovekaka nikhaliheryo na Muluku orweela mwa Soolempwa ni iliivuru sahu sinimutthokiherya Biibiliya. Nuumala-vo nihaana opakaka itthu nittharihelaka malakiheryo a Yehova, voohicala etthu sa ovila waya weemya etthu eyo. Tthiri ninrowa oreelihiwa akhala wira ninneettela miruku iya: ‘Mmuroromeleke Yehova ni murim’anyu wothene, muhiroromelé osuwela wanyu pahi! Nwupuwele Apwiya mothene munettanyu, awo anolokiha iphiro sanyu’.​—Mir. 3:5, 6.

MURWENLE OMWIIVA MWANAKA?

Waamini wa naamukhweli ole wahaana-tho weehereriwa mwa enamuna ekina. Biibiliya onihimya so: ‘Vaviralya aya mahiku vakhani, ahiwereiwa mwaana a muthiyan’owo, anvahale opuro Eliya. Ekwerere eyo yahimutepelela mpakha mwanamwane ole okhwa’. Ophavelaka osuwela nthowa naya, oriki wunla muthiyana ole aahimmye so: ‘Nyuwo mulopwana a Muluku, murina exeeni ni miyo? Khino mukirwenle okùpuxerya sottheka saka, n’ukipahulela mwan’aka?’ (1 Mam. 17:17, 18) Anitaphulela exeeni masu ala oowereya?

Niireke muthiyana ole uupuwela etampi yaapanke awe? Niireke okhwa wa mwanawe waari ophukela wa Muluku ni wira Eliya aruuhale mitthaka sa Muluku voohimya sa okhwa wa mwaana ole? Biibiliya khonihimya, masi ehaavo etthu emosa: Naamukhweli ole khaahimmye wira Muluku aahipaka etthu yoohixariya.

Woonasa wene Eliya aahixanka mwaha wookhwa mwaana a naamukhweli, ni mwaha wowuupuwela wira okhala wawe muletto vatthokoni vale waahikumiherya maxakha ale. Nuumala oteexa erutthu yoohilipalipa ya mwammiravo ole aroihaka okwaartu wawe ya osulu, Eliya onnikhuwela wa Yehova oriki: ‘Yehova Muluku aka, munnitthuna tthiri omuhaxa namukhweli ula vatthokoni vawe vamakalyaka? Munnitthuna wira akhweliwe-tho ni mwan’awe?’ Profeta ole khivaamusivela wuupuwela wira nsina na Muluku naarowa onyoholiwa, akhala wira Muluku aamweemya wira muthiyana ole oosuwela owaakhela aletto ahaawe-tho. Tivonto Eliya vaaxonttela awe ariki: ‘Xontte, Yehova Muluku aka, mmwiirihe mwaana ola otthikele okhala mukumi-tho’.​—1 Mam. 17:20, 21.

‘NKANWEHEENI, MWANINYU OLA MUKUMI’

Yehova aaniiwa sotheene siireya. Ahoona wira naamukhweli ole ahimwaamini profeta nto khunvaha yoolya. Vanikhala ntoko wira Muluku aheemya wira oretta ole omwiirihe mmiravo ole okhwa, osuwelaka wira ohihimuwa wawe, weiwo waari woopacerya olempwa mBiibiliyani, waarowa olipiha nlipelelo na atthu a muhoolo. Nuumala Eliya omuxonttelela, Yehova aahittikiherya okumi wa mwammiravo ole. Nkahaya muupuwele ohakalala wa naamukhweli, okathi Eliya aahimmye awe so: ‘Nkanweheeni, mwaninyu ola mukumi’! Nto naamukhweli aahimmye so wa Eliya: ‘Vano kosuwela tthiri wira nyuwo mwá mulopwana a Muluku, nave kokupali wira molumo a Yehova ari mwano mwanyu’.​—1 Mam. 17:22-24.

Yowiiraneya ela eri va 1 Mamwene ekapiitulu 17 khenihimya itthu sikina sa muthiyana ola. Masi okhala wira Yesu aahimulavula mwa enamuna yooreera, woonasa wene owo aahivikaniha okhala owaamini ntoko murumeyi a Yehova. (Luka 4:25, 26) Mwaha ola onniixuttiha wira Muluku onnaareeliha atthu anipaka itthu sooreera wa arumeyi awe. (Math. 25:34-40) Onnooniherya-tho wira Muluku onnaavaha ale ari oororomeleya itthu sinitthuneya, ikwaha sikina mwa inamuna sooxankiha. (Math. 6:25-34) Yowiiraneya ela ennooniherya-tho wira Yehova onniphavela ni onniwerya waahihimuxa alipa-ookhwa. (Mit. 24:15) Tthiri awo mathowa ookhalela anniiriha omuupuwelaka muthiyana naamukhweli oSarefa.