Yehova Tonnivaha Itthu ni Tonnikhapelela

‘Miyo kinniwòpola ankiroromela, kinniwettiherya anromola nsina naka’.​—Esal. 91:14.

MWAAROWA WAAKHULA SAI?

Xeeni ohimmwaka wira Yehova namavaha itthu soreera?

Etthu xeeni Yesu opanka awe wira apinaatamu yataane-tho ni Muluku?

Yehova onaakhapelela sai ale animphenta ni omwiiwelela?

1, 2. Ovirikana xeeni okhanle mweemusini mwahu, ni moota oxuttale ahu ekeekhai?

YEHOVA tonipaka marehereryo wira sikhaleke imusi sa maloko otheene. (aÉf. 3:14, 15) Okhalawene, mutthu ti mutthu onnivirikana ni atthu akina mweemusini mwawe, murima awe wala makhalelo awe. Woonasa wene okhuma onamwane anyu mpakha wunnuwa nyuwo mwaakhala ni anamuyari anyu. Akina anamuyari aya ahookhwa, waaniheryasa mwaha wa oretta, yowiiraneya yootutuxerya wala ehasara ekina. Nlelo akina khanaasuwela anamuyari aya.

² Ntoko atthu a emusi ya arumeyi a Yehova, moota sixuttale ahu ekeekhai onnivirikana ni akina. Waaniheryasa nyuwo ‘munnunwe mwekeekhaini’ ntoko sinihimya aya atthu akina, nto anamuyari anyu aawiixuttihani malakiheryo a Muluku. (Otum. 6:6, 7) Aahiiso, nyuwo mwa atthu yaale axuttale ekeekhai mwaha wolaleeriwa ni arumeyi akina a Yehova.​—aRom. 10:13-15; 1 Tim. 2:3, 4.

3. Itthu xeeni otheene sahu sinilikana ahu?

³ Nnaamwi sikhanle ene itthu iyo sinniiriha ovirikana, otheene sahu nookhalana itthu sinilikana ahu. Otheene ahu ninnihaawa mwaha wa etampi ya ohiiwelela wa Adamu, maana noovara ohimalela, ottheka, ni okhwa. (aRom. 5:12) Hata vari siiso, ntoko arumeyi ekeekhai, vannikhalela omwiitthana Yehova okhala ‘Tiithi ahu’. Olavulaka sa nloko na Muluku noothanliwa okathi wa khalai, Yesaya 64:8 onihimya so: ‘Nto nyuwo Yehova mwá Tith’ihu’. Ohiya-vo, Yesu aahipacerya nivekelo nawe na ntakiheryo ni masu ala: “Tith’ihu, muri wirimu! Nsina nanyu nivuwihiwe”.​—Math. 6:9.

4, 5. Okathi onivarerya ahu saana wataana wahu ni Tiithi ahu, Yehova, etthu xeeni enitthuneya ahu wuupuwelaka?

⁴ Tiithi ahu a wiirimu onninikhapelela, ni onivaha itthu sinitthuneya ntoko atthu a nloko nawe aniromola nsina nawe ni waamini. Nasalimo aahimulavula Yehova oriki: ‘Miyo kinniwòpola ankiroromela ni ekeekhai, kinniwettiherya anromola nsina naka’. (Esal. 91:14) Aayo, Yehova yoowo ori tonnivaha itthu moophenta, onninoopola mwa awanani ahu ni onninikhapelela ntoko atthu a nloko nawe, wira nihimala-malihiwe.

⁵ Wira ninnuuherye osiveliwa wahu ni Tiithi ahu a wiirimu, nrowe nithokorerye inamuna tthaaru sootthuneya: (1) Tiithi ahu tonnivaha itthu. (2) Yehova Tonnikhapelela. (3) Nave Muluku tori mpatthani ahu muulupale. Okathi onithokorerya ahu iponto iya, vanooreera wuupuwelela saana ompatthani orina ahu ni Muluku wira niphwanye enamuna yonvuwiha owo ntoko Tiithi ahu. Vanooreera-tho otthokelela mareeliho Yehova onaasukerya awe ale anaataana ni yena.​—Yak. 4:8.

YEHOVA, TONNIVAHA ITTHU

6. Enamuna xeeni Yehova okhanle awe namavaha a ‘eparakha yophaveleya’?

⁶ Yakobo olempe so: ‘Eparakha yothene yophaveleya ni sovahiwa sothene sorera sinkhuma osulú; sinikhuruwa w’Atithi, yawo apattunxe itheneri’. (Yak. 1:17) Okumi orina ahu, ti yoovaha yooreerexa enikhuma wa Yehova. (Esal. 36:10) Orumeela okumi ahu wira nipake otthuna wa Muluku, onooniphwanyiha mareeliho manci vano ni olipelela okumi ohinimala elapo esya. (Mir. 10:22; 2 Ped. 3:13) Nto okhala wira Adamu ooniphwanyiha ehasara ya ohiiwelela wawe, ninrowa owerya sai opaka eyo?

7. Muluku opacenrye sai onooniherya ephiro wira nataane ni yena?

⁷ Aayo, Yehova tonnivaha itthu sinci mwa inamuna ehinikontareya. Mwa ntakiheryo, onireerela wawe murima onninaakiherya. Aayo, otheene ahu noottheka ni noorava ohimalela wa Adamu. (aRom. 3:23) Hata vari siiso, mwaha wa ophenta wa Yehova, owo tonipacerya onooniherya ephiro wira naataane ni yena. Murummwa Yohani aalempe so: “Mota Muluku ònihenryawe oniphenta wawe t’ula; Owo òmuruma Mwan’awe mmosene orwa vathí-va, wira hiyo nikhalane ekumi mwa yowo. Vano, ophenta ti nno, khanihiyó hiyo nimphentale Muluku, nto yowo toniphentale, khomuruma Mwan’awe, ntoko mukuttho w’olivela itampi sahu”.​—1 Yoh. 4:9, 10.

8, 9. Moota xeeni Yehova sarya awe Namakumiherya Itthu okathi wa Abrahamu ni Isakhi? (Nwehe elatarato yoopacerya.)

⁸ Eseekulu 19 AEC, yowiiraneya emosa ya eprofesia yahooniherya wira ophenta wa Yehova waarowa omwiiriha waavaha apinaatamu owiiwelela eparakha ya okumi wa mahiku otheene. Eliivuru ya aHéberi 11:17-19 enitthokiherya so: ‘Mwaha wo wamini, Abrahamu èhereriwaka ni Muluku, ahimpaka mwan’awe Isakhi mukuttho, owo khakhontte onvelela Muluku mwana’we mmosene anamwi avahiwe yolaiherya, alèliwaka wira: ‘Mwa Isakhi onokhumelela osùlu anyu’. Vano Abrahamu ahamini wira Muluku anwerya hatá omuhihimuxa mutthu mokhwani; tivó ahimwakhela-tho mwan’awe ari mukumi. Itthu iya sari ethonyeryo ya itthu sarowa okhumelela’. Tthiri khivanivila woona etthu yaathoonyerya aya. Yehova aahinvaha Mwanawe, Yesu Kristu mwaha wa apinaatamu valaponi.​—Mmusome Yohani 3:16, 36.

⁹ Ninnikupali wira Isakhi aahihakalala woopoliwa wawe nto khuhiiviwa ntoko mukuttho! Tthiri aanimuxukhuru vanci Muluku aakumihenrye epwittipwitthi ele yaphanre inyaka vamiwani, wira ekhale mukuttho, voohikhala Isakhi. (Maph. 22:10-13) Tivonto nipuro nle vaitthaniwa aya ‘Yehova yire’ eyo enitaphulela wira “Yehova Onokumiherya”.​—Maph. 22:14,Tradução do Novo Mundo; enoota.

YEHOVA ONNIKUMIHERYA ETTHU WIRA NITTHIKELE WATAANA

10, 11. Ti pani akhanle a mahoolela a ‘muteko wowataniha atthu’, nto anivara sai muteko aya?

¹⁰ Okathi onuupuwela ahu moota Yehava sirya awe Namavaha Itthu sinitthuneya, ninnixukhurela osuwela moota Yesu Kristu sinivara awe muteko mmureerelo ahu; ntoko siisale Paulo aalempe awe oriki: ‘Kosuwela wira mutthu mmosá ohakhwela atthu othene, ni siso atthu othene ahòkhwa mwaha wa yowo. Kristu ohakhwela atthu othene, wira ale ari akumi ehìkhalele mmansaya, nto emukhaleleke ole àkhwenle, àhihimuwenle yawo’.​—2 aKor. 5:14, 15.

¹¹ Mwaha womphenta waya Muluku ni oxukhurela eparakha ehimphwanela aya ya omurumeela, maKristau a khalai moohakalala yaheemya ‘muteko wowataniha atthu’. Muteko aya woolaleerya ni waapaka awiixutti, waahihulam ukhora wira mutthu ti mutthu a murima saana okhalane murettele ni Muluku, okhale mpatthani awe, nto wanimala waya okhale mwanawe omunepani. Olelo-va, arumeyi oothanliwa a Yehova annivara muteko mmosaru owo. Muteko onivara aya ntoko alipa-oorummwa ni Muluku vamosa ni Kristu, onniiriha oweryaneya wa atthu yaale aniphavela tthiri, wiitthaniwa ni Yehova wira akhale owaamini.​—Mmusome 2 aKor. 5:18-20; Yoh. 6:44; Mit. 13:48.

12, 13. Ninrowa wooniherya sai omuxukhurela wahu Yehova itthu sinceene sinikumiherya awe?

¹² Yooniheryaka omuxukhurela waya Yehova, ntoko Namakumiherya Itthu sinitthuneya, maKristau otheene anilipelela okhala valaponi, annivara muteko woolaleerya Omwene yaakhaliheryaka maKristau owoottihiwa. Mmuteko owo hiyo ninnimurumeela saana Biibiliya, yoowo onikumiheriwa-tho ni Muluku. (2 Tim. 3:16, 17) Ovarela wahu muteko saana Nuulumo nowuupuxeriwa ni Muluku naalaleeryaka, onnaavaha akina eparakha ya ophwanya ekumi ehinimala. Wira onikhaliherye muteko ahu ola, Yehova ookumiherya-tho munepa awe wootteela. (Zak. 4:6 NM; Luka 11:13) Nto mwaha waivaavo, sinnikhumelela itthu soohakalaliha ntoko sinooneya aya ni Anuário das Testemunhas de Jeová khuta mwaakha. Tthiri, eparakha yuulupale ovara muteko ola oninvuwiha Tiithi ahu Onivaha itthu sooreera!

¹³ Nto wuupuwela itthu sotheene Muluku sinnivaha awe, ohaana oniirihaka wiikoha so: ‘Kiireke kinnipaka itthu sotheene siniwerya aka mmuteko wa Muluku, wira kimooniherye Yehova moota kinitepaaka omuxukhurela itthu sinnivaha awe? Inamuna xeeni sinireerela aka olokiherya wira kilaleeryeke saana ihapari sooreera?’ Opweha nipuro noopacerya miteko sa Omwene ti etthu enooniherya wira ninnimuxukhuru Muluku mwaha wa itthu sooreera sinikumiherya awe. Niira siiso, Yehova onrowa omaleliha itthu sinnithowa. (Math. 6:25-33) Mwaha wooniphenta wawe, hiyo nihaana omananihaka opaka itthu siniwerya ahu wira nihakalalihe murima awe.​—Mir. 27:11.

14. Moota xeeni Yehova sinikhala awe Moopoli wa atthu awe?

¹⁴ Nasalimo Davidi aalempe so: ‘Wehani ohawa waka. Apwiya mukakuvele. Nyuwo ntthyawelo naka ni mòpoli aka’. (Esal. 40:18) Ikwaha sinceene Yehova onnikhala Moopoli wa atthu awe ari ekrupu ene, vanceenexa okathi anilupatthiwa aya ni othara-tthariwa vootakhala-vo ni anyokhani aya. Okathi owo hiyo ninnimuxukhurela tthiri Muluku mwaha woonikhaliherya ni omakelaka onivaha yoolya yomunepani!

YEHOVA ONNINIKHAPELELA

15. Mulikanyiherye moota tiithi oophenta sinimananiha awe omukhapelela mwanawe.

¹⁵ Tiithi oophenta, khahiyo onaavaha anaawe itthu sooreera paahi, masi onnaakhapelela-tho. Owo onnimananiha owoopola akhala wira ennakhumelela etthu yowoopiha. Munna mmosa onnuupuwela etthu yaamwiiranenle oryeene mwammiravo. Owo ni paapa awe yaatthikela owaani nuumala olaleerya, nto mwaha wa epula yinceene yaarumpe mootutuxerya, yeettaka yaahiphwanya muro mwaamukhaani waasanrye maasi ootupa. Wira elapuwe awo yahaana otupha anyakelaka maluku maalupale. Paapa awe aryeene ottuli, mwammiravo ole aanitupha wira olapuwe, nto khutherekuwa, khumorela mmaasini, khupwinihiwa ni maasi ikwaha piili. Mwammiravo ole aahimuxukhurela paapa awe, okhala wira aahinvara moono khumoopola! Tiithi ahu a wiirimu onninoopola mixankiho sinilikana ni maasi a muro wootupa wa olumwenku ola wootakhala onilamuleliwa ni Satana. Aayo, tthiri Yehova toniwerya onoopola voohikhala etthu ekina.​—Math. 6:13; 1 Yoh. 5:19.

16, 17. Yehova aakhalihenrye sai aIsarayeli okathi yaawana aya ni atthu a wAmaleki?

¹⁶ Moota Yehova sinikhapelela awe saana, onnooneya mwa ele yaawiiranenle aIsarayeli nuumala woopoliwa wepotthani wEjitu, nto mwa mwiriira owo ahaakhapelela okathi yaalapuwa aya Ephareya Yoxeerya, mwaakha wa 1513 AEC. Nuumala weetta mutakhwani arowaka omwaako Sinayi, aIsarayeli yaahiphiya oRefidimi.

¹⁷ Ntoko silempwale aya mwa eprofesia ya Maphattuwelo 3:15, Satana aanimananiha ottottela muraarelo wira aatuphele aIsarayeli yeetta mutakhwani. Owo aahipaka eyo aarumeelaka atthu a wAmaleki, yaawo yaari awanani aatthu a Muluku. (Moth. 24:20) Vano nkahaya moone ele Yehova yaapakale awe aarumeelaka alopwana axexe oororomeleya: Yoxuwa, Moise, Aroni ni Huri. Okathi Yoxuwa aawana awe ni Amaleki, Moise, Aroni ni Huri yaahemela vamwaako owaattamela. Okathi Moise aatexerya awe musulu matata awe, aIsarayeli yanaxintta awanani aya. Masi, okathi matata awe yaamulemela aya, Aroni ni Huri yaanivarelela. Tivonto akhaliheriwaka ni Yehova, ‘Yoxuwa ahimuxintta Amaleki ni atthu awe’. (Okhum. 17:8-13). Nto Moise aahimuteka altari, khunvaha nsina noowi ‘Yehova nisiʼ nsina nenlo eHeberi enitaphulela wira ‘Yehova Ntthyawelo Naka’.​—Mmusome Okhuma 17:14, 15, NM.

MWEEMYE WIRA YEHOVA OWAAKIHENI MMAKARIKHWANI MWA SATANA

18, 19. Olelo-va, Yehova onaakhapelela sai arumeyi awe?

¹⁸ Yehova onniwaakiherya atthu yaale animphenta ni omwiiwelela. Moolikanasa ni aIsarayeli oRefidimi, nimmuroromela Muluku, wira onoopole mwa awanani ahu. Mwa ikwaha sinceene Yehova onninikhapelela ntoko ekrupu, ohiya mutthu ekhawe paahi; nto onninaakiherya mmakarikhwani a Diabo. Nkahaya muupuwele ikwaha sinceene seiye Muluku saakhapelenle awe annihu yaalupatthiwa mwaha wohiirela mpantta epoliitika. Mwa ntakiheryo, eyo yahiiraneya okathi wa maNazista wAlemanya ni ilapo sikina, iyaakha sa 1930 ni sa 1940. Osoma ni otthokelela saana sowiiraneya siri mwa Anuário sinooniherya okhapelela wa Muluku okathi woolupatthiwa, onrowa olipiha omukupaleela wahu Yehova nto ntthyawelo nahu.​—Esal. 91:2.

¹⁹ Orweela mwa nikhuuru na Yehova, vamosa ni iliivuru sinikumiheriwa, ninnivahiwa sowuupuxerya sinnikhapelela. Nkathokoreryani moota eyo ekhalihenrya aya mahiku ala. Vaavo olumwenku ola wa itampi onivikaniha awe onanara mmyaha sa mweettelo weelolo ni epornografia, Yehova onninivaha malakiheryo ooreerela wira onikhaliheryeke mwa itthu iyo soohiloka. Mwa ntakiheryo, noovahiwa soolopola sooreera voohimya sa otakhala waya, weetta ni apatthani oohiloka aniphwanyaneya mwinterneti.a​—1 aKor. 15:33.

20. Yehova onirumeela sai muloko wa eKristau wira onilakiherye ni onikhapelela?

²⁰ Nto ninrowa wooniherya sai wira tthiri Yehova tonniixuttiha? Neettelaka sooruma sawe. (Yes. 54:13) Mmulokoni, yoowo ori ntthyawelo nahu, ninniphwanya malakiheryo anitthuneya, maana mmulokoni axitokweene annivaha nikhaliheryo ni miruku sinikhuma mBiibiliyani. (aGal. 6:1) Ikwaha sinceene Yehova onnaarumeela axitokweene wira onooniherye onikhapelela wawe woophenta. (aÉf. 4:7, 8) Nto nooneleke sai miruku iyo? Wiiwelela vohinlaseya onnikumiherya mareeliho a Muluku.​—aHéb. 13:17.

21. (a) Nihaana wiimananiha opaka exeeni? (b) Etthu xeeni enrowa othokoreriwa mmwaha onittharelana?

²¹ Nto nrowe niimananihe weettihiwa ni munepa wowaarya, ni weemya malakiheryo anikhuma wa Tiithi ahu a wiirimu. Nihaana-tho otthokolelaka mweettelo wa Yesu Kristu, Mwaana a Muluku, ni omananiha otthara vakhiviru vene ntakiheryo nawe nooreera. Maana mwaha wa wiiwelela wawe mpakha okhwa, Yesu ootthuveliwa vanceenexa. (aFil. 2:5-11) Namutakiha Yesu, nnoreelihiwa mwaha woomuroromela Yehova ni murima ahu wotheene. (Mir. 3:5, 6) Tivonto khuta okathi nimooneke Yehova okhala tonnivaha itthu ni onikhapelela vaalupalexa. Tthiri etthu yoohakalaliha ni eparakha yuulupale omurumeela Yehova! Omphenta wahu onimunnuwaka akhala wira ninnuupuwela enamuna ya neeraru ya okhapelela wa Yehova, eyo piiyo, opatthaneya wawe. Mwaha onittharelana onrowa othokorerya moota Yehova sinikhala awe mpatthani ahu oororomeleya.

[Enoota]