Mutakiheke Nroromelo na Moise

“Mwaha wowamini, Moise vannuwalyawe, khatthunne wireliwaka mwana a mwana muthiyana a mwené a wEjitu”.​—AHÉB. 11:24.

EXEENI ENNIIXUTTIHA AYA NTAKIHERYO NA MOISE VOOHIMYA SA . . .

ovirikana okhanle eriyari ya mihakhu sa werutthuni ni mihakhu somunepani?

moota Yehova onnikhaliherya awe waakhwaniherya miteko sahu sa eKristau?

moota wowehexexa etthuvo ahu?

1, 2. (a) Okathi aarina awe iyaakha 40, yoothanla xeeni Moise aapanke awe? (Nwehe elatarato yoopacerya.) (b) Xeeni Moise aathanlale awe ohasuliwa vamosa ni atthu a Muluku?

MOISE aanisuwela wira wEjiitu saahikhala mihakhu sinceene. Owo aanoona ipa suulupale saasaren’ye muhakhu. Owo aari mwaana a emusi ya mwene. “Siso, Moise ahixuttihiwa osuwela wothene w’atthu a wEjitu, khukhala mulopwana òwerya ni molumo ni miteko sawe”. (Mit. 7:22) Moise anwerya okhalana itthu ntoko muhakhu, ni omwene seiyo sihaaweryaneya okhalaniwa ni mutthu pure a wEjiitu!

² Masi, nuumala ophiyeriha iyaakha 40, Moise aahipaka yoothanla yaaxankinhe atthu a etthoko ya mwene a wEjiitu yaawo yaamoona okhala mwanaya. Owo khaathanlale okhala ntoko atthu a wEjiitu, masi aathanlale okhala ntoko epottha. Mwaha wa xeeni? Mwaha woowi Moise aahikhalana nroromelo. (Mmusome aHéberi 11:24-26.) Orumeelaka maitho a nroromelo, Moise aaniwerya woona ottaiwene ovikana itthu iye saamurukurenrye. Okhala wira owo aari mutthu oolipa omunepani, Moise aanimwaamini Ole “ohinòneya”, Yehova, ni anaamini wiiraneya wa anatiri a Muluku.​—aHéb. 11:27.

3. Makoho xeeni mararu anrowa waakhuliwa mmwaha ola?

³ Hiyo-tho nihaana owehaka itthu seiye sihinooneya ni maitho ahu. Nihaana okhala atthu “òwamini”. (aHéb. 10:38, 39) Wira nilipihe nroromelo nahu, nrowe nitokose ele elempwale voohimya sa Moise va aHéberi 11:24-26. Okathi ninrowa ahu otokosaka mwaha ola, mmananihe waakhula makoho ala: Moota xeeni nroromelo naamukhalihenrye aya Moise okhootta sootthuna sa erutthu? Okathi aasakaleeliwa awe, moota xeeni nroromelo naamukhalihenrye aya ovaha efaita muteko aavahiwa awe? Nave moota xeeni Moise ‘awehexenxa awe otthuveliwa w’oholo’?

OWO AAHIKHOOTTA SOOTTHUNA SA ERUTTHU

4. Exeeni Moise yaasuwenle awe, voohimya sa ophavela “opuha okathi vakhani n’itthu sotakhala”?

⁴ Mwaha wa waamini, Moise aahikhootta “opuha okathi vakhani n’itthu sotakhala”. Atthu akina pooti wuupuwelaka so, nnaamwi wEjiitu yaakokhoreliwa amuluku eethiru ni onammunepani, masi omwene wa wEjiitu ti waalamulela olumwenku wotheene, vaavo atthu a Yehova yahaaxiwa aya mweepotthani! Hata vaari siiso Moise aahisuwela wira Muluku aamurukunuxa makhalelo ale. Nnaamwi atthu yaarina mihakhu sinceene okathi ole, Moise aaniroromela wira atakhali yaarowa opwetexiwa. Eyo yaahimukhaliherya okhootta ophavela “opuha okathi vakhani n’itthu sotakhala”.

5. Exeeni enirowa onikhaliherya okhoottela ophavelasa “opuha okathi vakhani n’itthu sotakhala”?

⁵ Nyuwo munrowa okhootta sai ophavela “opuha okathi vakhani n’itthu sotakhala”? Hiyo nihikhala-khale niliyalaka wira opuha nimutthekelaka Muluku etthu yowaakuva omala. Murumeelaka maitho a waamini mooneke wira “makhalelo ala anomala vamosá n’itthu simphavelexaya”. (1 Yoh. 2:15-17) Muupuwele ele enrowa owiiraneela muhoolo ale atthenke ni ahimphavela ottharuwa. Awo ari “ephiro y’okwattuliha . . . annihononiwa n’ihasara yowopiha”. (Esal. 73:18, 19) Okathi oneehereriwa ahu opaka yoottheka, niikoheke so: ‘etthu xeeni eniphavela aka waakhela muhoolo?’

6. (a) Xeeni Moise ahaatthunne awe “wireliwaka mwana a mwana muthiyana a mwene a wEjiitu?” (b) Xeeni vanoona anyu wira Moise aahipaka yoothanla yooloka?

⁶ Waamini wahimwiiriha Moise osuwela muteko wooreera ovara. ‘Mwaha wo wamini, Moise vannuwalyawe, khatthunne wireliwaka mwana a mwana muthiyana a mwené a wEjitu Farawo’. (aHéb. 11:24) Moise khaatonko wuupuwela wira vanweryaneya omurumeela Muluku okhalaka vatthokoni va mwene, nto khiyarumeela muhakhu ni owerya waarina awe wira aakhaliheryeke annawe aIsarayeli. Tivonto, Moise aathanlale omphenta Yehova ni murima awe wotheene, ekumi awe ni ikuru sawe sotheene. (Otum. 6:5) Yoothanla ya Moise yaahimwiiriha ohikumanana masooso mancene. Mihakhu sotheene sa atthu a wEjiitu, seiyo Moise aalenve awe, nananoru saahikuxiwa ni aIsarayeli! (Okhum. 12:35, 36) Farawo aahiramuseya nto kukhwa. (Esal. 136:15) Masi Moise aahoopoliwa nto khirummwa ni Muluku wira oweettiheke atthu nloko notheene akhumaka wEjiitu. Okumi awe waahisareya itthu soohakalaliha.

7. (a) Moovarihana ni Matheyo 6:19-21, xeeni vanireerela ahu owehaka itthu sihinimala siri ohoolo? (b) Muhimye yowiiraneya emosa enooniherya ovirikana okhanle eriyari ya mihakhu sa werutthuni ni mihakhu somunepani.

⁷ Akhala wira nyuwo mwa mmiravo onimurumeela Yehova, moota xeeni nroromelo ninrowa aya wookhaliheryani othanla muteko woovara? Ti vamiruku opaka soothanla sanyu sa muhoolo. Masi niireke waaroromela anatiri a Muluku anoowiirihani othukumanya mihakhu soowaakuva omala wala munirowa othukumanya iye sinikhala okathi wotheene? (Mmusome Matheyo 6:19-21.) Nikoho nno naahimukhumelela mulipa oomurattela omwiina balé oniitthaniwa Sofia. Mwaha wa eyo, muthiyana owo aahisoma ixikola suulupale ni aahiphwanya musurukhu munceene aaliviwa awe ni axineene ikompanyia sa balé wEstados Unidos. Sofia onihimya so: “Vanikhala vootteeliha murima mutthu otthapeliwa iinaka. Nto kaaniixoona okhala ooraattexa waavikana akina yaamwiinanaka. Masi nkaahakalala”. Nuumala-vo Sofia aahiweha eviidiyu eni: Os Jovens Perguntam​—O Que Fazer da Minha Vida? Owo onihimya so: “Kaahoona wira nnaamwi atthu ale yaakitthapela wala okikokhorela, eyo yaanikooceeliha omurumeela Yehova ni murima aka wotheene. Kaahinvekela Yehova mooluttuweliwa. Naananoru kaahihiya muteko aka wowiina”. Vano, owo onoona sai yoothanla epanka awe? “Khonikinkhela mweettelo aka wa khalai. Olelo-va koophwanya ohakalala woomalela. Miyo ni iyaka na mapioneero. Hiyo khahiyo atthu oovuwa, nave nirina itthu vakhaani paahi. Masi nookhalana Yehova, atthu anaasomiha ahu Biibiliya, ni soolukama sahu somunepani. Nto nkirina etthu enikiiriha wiikhupanyerya”.

8. Miruku xeeni sa mBiibiliyani sikhanle owaakhaliherya amiravo othanla mweettelo wa ekumi aya?

⁸ Yehova onnisuwela etthu ennireerela. Moise aahimmye so: “Vano, nyuwo atthu a Isarayeli, mwiwe etthu enovekelayani Apwiya Muluku anyu. Etthu ene t’ila pahi: mwattittimihe Apwiya Muluku anyu ni wova, mutthareke iphiro saya sothene, mwaphenteke Apwiya Muluku anyu, mwarumeleke ni murim’anyu wothene n’ikuru sanyu sothene; mwiweleleke soruma s’Apwiya n’ikano sinovahakani olelo: mwirá siso, munoreriwa”. (Otum. 10:12, 13) Nlelo muryeene mmiravo, muthanleke muteko onrowa anyu ovaraka, onirowa oweemereryani omphenta ni omurumeela Yehova ni “murim’anyu wothene n’ikuru sanyu sothene”. Mwiira siiso “munoreriwa”.

OWO AAHIVAHA EFAITA MUTEKO AAVAHIWE AWE

9. Mutthokiherye etthu xeeni yaakhanle oomwiiriha Moise ohisiveliwa muteko awe?

⁹ Moise ‘ahòna wira othanyiwa ntoko sarowawe othanyiwa Kristu, yari etthu yotepexa orera ovikana muhakhu wothene wa wEjitu’. (aHéb. 11:26) Moise aahirummwa okhala ntoko “Kristu” aahiiso ‘Mutthu Oowoottihiwa’, okathi yoole aathanliwe awe ni Yehova wira aahoolele aIsarayeli akhumaka wEjiitu. Moise aanisuwela wira waakhwaniherya muteko awe ole waarowa okhala wooxankiha wala aarowa ‘oramusiwa’. Mukwaha mmosa Moise ohinatthi othanliwa ni Muluku aahiramusiwa ni muIsarayeli wira: “Othanlenleni pani okhala mulupal’ihu n’uphuka milattu sahu?” (Okhum. 2:13, 14) Nuuvira okathi, Moise mwaneene aahimukoha Yehova wira: ‘Onrowa okìwa sai mwené, Farawo’? (Okhum. 6:12) Ophavelaka wiilokiherya ni oxintta oramusiwa, Moise aahinvekela Yehova amuleelaka itthu saamoopiha, vamosa ni mixankiho sawe. Yehova aamukhalihenrye sai Moise wira owerye ovara muteko awe?

10. Yehova aamukhalihenrye sai Moise wira owerye waakhwaniherya muteko awe?

¹⁰ Etthu yoopacerya, Yehova aahimuroromeliha Moise wira: “Miyo kinokhala ni nyuwo”. (Okhum. 3:12) Etthu ya nenli, Yehova aahimphwanyiha nroromelo Moise, vaavo aamutthokihenrye awe yootaphulela ya nsina nawe wira ‘Miyo t’ule Onikhala Ele Enithanla Awe Okhala’.a (Okhum. 3:14) Etthu ya neeraru, owo aahinvaha ikuru Moise sa opaka miiriirya ntoko ethoonyeryo yoowi orummwale ni Muluku. (Okhum. 4:2-5) Etthu ya neexexe, Yehova aahimukumiherya Aroni wira amukhaliheryeke Moise olavula, vamosa ni muteko aarummwale awe. (Okhum. 4:14-16) Wookiseryani wa okumi awe, Moise aanisuwelexa wira tthiri Muluku onnaakhaliherya arummwa Awe owerya ovara miteko sinaaruma awe, tivonto Moise moohihoverya aamulenle awe Yoxuwa aamuranttenle wira: ‘Yehova onorowa oholo wanyu, onokhala ni nyuwo: owo khonohiyani mojeyaka, nnákhala khononyanyalani. Tivó, muhoveké, muhojeyé’.​—Otum. 31:8.

11. Exeeni yaamwiirinhe Moise ovaha efaita vanceene muteko awe?

¹¹ Okhaliheriwaka ni Yehova, Moise aahisiveliwa vanceene ni muteko aavahiwe awe khiyoona okhala ‘wotepexa orera ovikana okhalana muhakhu wothene wa wEjitu’. Tthiri omurumeela Farawo khiwaarina efaita ovikana omurumeela Muluku Oowerya Sotheene. Mureerelo xeeni aarowa awe ophwanya mwaha wookhala mpewe a wEjiitu, ovikana okhala “Kristu” wala okhala mutthu oowoottihiwa a Yehova? Moise aahitthuveliwa mwaha wa ovaha wawe efaita itthu somunepani. Owo aahikhalana wataana wa vameekh’aya ni Yehova, yoowo anvanhe ikuru wira opake ‘miteko sotikiniha’ okathi aaweettiha awe aIsarayeli arowaka Elapo Yoolaiheriwa.​—Otum. 34:10-12.

12. Miteko xeeni sa Yehova nintthuneya ahu ovaha efaita?

¹² Hiyo-tho noovahiwa muteko. Omurumaka Mwanawe, Yehova oonivaha muteko, ntoko sanvahale awe murummwa Paulo ni atthu akina. (Mmusome 1 Timótheyo 1:12-14) Otheene ahu noovahiwa muteko wa olaleya ihapari sooreera. (Math. 24:14; 28:19, 20) Akina annivara muteko owo ntoko arumeyi a okathi wotheene. Anna oobatiziwa ni oolipa omunepani annaarumeela annaya mmulokoni akhalaka arumeyi oorumeela wala axitokweene. Masi, amusi anyu ahikhanle Anamoona a Yehova ni atthu akina pooti ohoonaka efaita sirinaaya miteko iyo, wala wooramusakani mwaha wa wiivahererya wanyu. (Math. 10:34-37) Akhala wira nyuwo munneemya wira awo yookhulumuleni, nto munoopacerya woonaka wira wiimananiha wanyu khurina efaita wala munrowa woolowelaka miteko sa Muluku. Nto akhala wira eyo enniwiiraneelani, moota xeeni nroromelo ninrowa aya wookhaliheryani ovilela?

13. Moota xeeni Yehova onnikhaliherya awe waakhwaniherya miteko sahu sa eKristau?

¹³ Mmuxonttele Yehova muroromelaka wira onimookhaliheryani. Mmuleeleke itthu siniwoopihani ni sinooxankihani. Tthiri ti Yehova oovanheni muteko, ni tonrowa wookhaliheryani wira mukhumele saana. Moota xeeni? Mwa enamuna emosaru aamukhalihenrye awe Moise. Wanipacerya, Yehova ohoororomelihani wira: “Miyo kinnolipihani: kinnokhaliheryani. Ayo! Kinnovarelani ni ntata naka: kinniwakihani, kinniwòpolani”. (Yes. 41:10) Yanenli, owo oowuupuxeryani nyuwo wira sooleiherya sawe ti soororomeleya vaavo vanihimya awe wira: ‘Miyo kohimya wira itthu sintthunaka sinokhala, itthu sinkisivela, kinimwira’. (Yes. 46:11) Yaneeraru, okhala wira Yehova onnoovahani nyuwo “owerya nno wulupalexa” wira nwerye waakhwaniherya muteko anyu. (2 aKor. 4:7) Yaneexexe, owo onnookhaliheryani ovikaniha ovara muteko anyu, okhala wira Tiithi ahu onninivaha anna anceene anikhala olumwenku wotheene animurumeela mwekeekhai vaavo vanaaruma awe otheene wira: “mulipihaneke murima, mukhaliheryaneke”. (1 aTes. 5:11) Vaavo Yehova vanirowa awe wookhaliheryakani ovara muteko anyu, nroromelo nanyu ninrowa wunnuwa, nto nyuwo munrowa ovahaka efaita muteko anyu ovikana khula muhakhu wa molumwenkuni.

“OWO AHIWEHEXEXA OTTHUVELIWA W’OHOLO”

14. Exeeni yaamwiiriha Moise okupaleelaka wira aamutthuveliwa?

¹⁴ Moise “ahiwehexexa otthuveliwa w’oholo”. (aHéb. 11:26) Aayo, Moise aaheemya wira osuwela wawe itthu sa muhoolo omukhaliherye, nnaamwi osuwela iwo waari woohimalela. Ntoko muhavinre awe Abrahamu, Moise aanikupali wira Yehova onniwerya omuhihimuxa mutthu mookhwaani. (Luka 20:37, 38; aHéb. 11:17-19) Osuwela wawe wira yaahikhala mareeliho muhoolo waahimukhaliherya Moise ohoonaka okhala sa mahala iyaakha iye 40 aavirinhe awe omutthyawaka Farawo ni 40 aavirinhe awe moothakoni. Nnaamwi owo ahaasuwelexa oratteene moota yaarowa aya waakhwanela anatiri a Muluku, mwa nroromelo owo aaniwerya woona etthuvo awe muhoolo.

15, 16. (a) Xeeni vanitthuneya ahu owehexexaka etthuvo ahu? (b) Mareeliho xeeni a moMweneni aninlela anyu ophwanya?

¹⁵ Niireke nyuwo munniwerya ‘owehexexa etthuvo’ anyu ya muhoolo? Moolikana ni Moise, hiyo khannisuwela itthu sotheene voohimya sa anatiri a Yehova. Mwa ntakiheryo “khavo onsuwela vanrwaya nihiku nlo walá okathi uwo” wa maxakha maalupale. (Mar. 13:32, 33) Masi, hiyo ninnisuwela wira ookhala Parayiisu muhoolo, eyo ennivikana osuwela wa Moise. Hata nihisuwelexaka saana, hiyo nihiiwa sooleiherya sinceene sa Omwene wa Muluku vaniweryaneya aya “owehexexa” itthu iyo. Omakela wuupuwelela elapo esya onniniiriha opacerya ophavelasa Omwene owo. Moota xeeni? Nkuupuwelani ela: Niireke nyuwo mwaamwaakhulela othuma empa ehinawehe anyu? Owehasa wene nnaari! Hiyo nave khinaarowa ohonona okathi ahu niimananihaka waakhela etthu ehinafaita. Orweela mwa waamini wahu, hiyo nihaana okhalana mmuupuweloni ekumi enirowa ahu okhalana moMweneni.

¹⁶ Wira muhele mmuupuwelelo anyu Omwene wa Muluku “nwehexexeke” moota ekumi anyu enrowa aya okhala mParayiisu. Nvarihele muteko muupuwelelo anyu. Mwa ntakiheryo, mwakhala wira munisoma voohimya sa atthu aromoliwe mBiibiliyani a khalai, mmananihe wuupuwela etthu xeeni yaarowa anyu waakoha awo yahihimuxiwa. Muupuwele etthu awo akhanle aya owookohani voohimya sa ekumi ya mahiku ookiserya. Mmananihe wuupuwela moota vanirowa aya okhala vookuxa murima waaweha amuhavinre anyu akhwiiye khalai ni owiixuttiha voohimya sa Muluku ni ele epanke awe. Moone moota onirowa anyu ohakalala okathi onirowa anyu wiixuttaka itthu voohimya sa inama ni oweha murettele onirowa woorukureryani. Muupuwele moota onirowa anyu wataana ni Yehova, okathi onirowa anyu okhalaka mutthu oomalela khula nihiku.

17. Moota xeeni okhalana mmuupuweleloni etthuvo ahu ehinooneya onnikhaliherya aya olelo-va?

¹⁷ Ohela mmuupuweloni mwahu etthuvo ehinooneya onoonikhaliherya ovikaniha orowa ohoolo, okhala oohakalala, ni opaka soothanla sinooniherya wira ninniphavela okhala woohimala muhoolo. Paulo aahaalepela maKristau oowoottihiwa wira: “Vano, hiyo nalipelelaka etthu ehinònahu, ninniroromela ni nthiti”. (aRom. 8:25) Eyo ennivareleya muteko wa maKristau otheene yaawo aniwehererya okumi woohimala. Nnaamwi nlelo nihaakhenle etthuvo ahu, nroromelo nahu ninkhala noolipa vaavo vaniwehererya ahu moopixa murima ‘etthuvo ya oholo’. Moolikana ni Moise, hiyo khaninrowa woonaka iyaakha siniviriha ahu nimurumeelaka Yehova okhala okathi woohononeya. Ohiya-vo, hiyo ninnikupali wira “Itthu sinòneya khasinlekela, masi itthu sihinòneya sinnikhala vohimala-tho”.​—Mmusome 2 aKorinto 4:16-18

18, 19. (a) Xeeni vanitthuneya ahu wiimananiha okhala oororomeleya? (b) Ninrowa othokorerya exeeni muru onittharelana?

¹⁸ Waamini onniniiriha hiyo woona ‘itthu sinlipelela ahu, ni osuwelexa itthu sihinònahu’. (aHéb. 11:1) Mutthu ohimmukupali Muluku, khonivaha efaita itthu sa Yehova. Atthu moota owo, mihakhu somunepani anoonela okhala “itthu s’ololo”. (1 aKor. 2:14) Masi hiyo ninniwehererya woona ekumi yoohimala, ni waaweha atthu ahihimuxiwaka, itthu seiyo sihinooniwa ni atthu a mulaponi. Moolikana ni awiixuttihi akina a okathi wa Paulo, yaale yaamuhimmye owo okhala “namalavulasa” ohinsuwela enihimya awe, anamunceene olelo-va anuupuwela wira nlipelelo ninlaleya ahu etthu yeethiru pahi.​—Mit. 17:18

¹⁹ Okhala wira olumwenku onikhala ahu, woosareya atthu ahinaamini, hiyo nihaana wiimananiha okhala oororomeleya. Munvekele Yehova wira “wamini wanyu ohihononeyé”. (Luka 22:32) Mutthukule maitho anyu wira musyake ohaawa mwaha wa yoottheka, ni mukhalele nthiti itthu sa efaita ntoko omurumeela Yehova ni yoolipelela ya ekumi yoohimala. Aayo, nroromelo na Moise naahimukhaliherya woona ottaiwene ovikana itthu iye sa wEjiitu. Muru onittharelana ninrowa othokorerya moota nroromelo na Moise naamukhalihenrye aya ‘omona Muluku ohinòneya’.​—aHéb. 11:27

[Enoota]