“Mwetteleke Iphiro Soloka Pahi” Murowaka Vahoolo

OKATHI atthu a Muluku yaakhumme aya oBabilonia mwaakha wa 537 AEC, Yehova aahilokiherya ephiro yaarowa aya ovira arowaka oYerusalemu. Owo aahimeeryale so: “Mwarerihele ephiro atthu anrowa otthika, . . . mwapatthihe ephiro ni maluku”. (Yes. 62:10) Nkahaya mmananihe woona moota aYuda akina yaarowa aya ovara muteko owo. Ohiya opacerya otthapa, yaahaana opaka iphiro, owehasa wene wuhweela malitti ni waapattha ni maluku. Wira siiso waamwaakhweiherya annaya yaarowa oviraka ephiro ele atthikelaka elapo aya.

Hiyo nihaana ovarihela muteko nlikanyiho nlo voohimya sa ephiro mutthu onitthara awe wira ophwanye iparakha mmulokoni. Yehova oniphavela wira arumeyi awe atthareke ephiro eyo ehikhanle etthu eniwooceeliha. Nuulumo nawe ninnitumererya so: “Mwetteke iphiro soloka pahi”. (Mir. 4:26) Hata nyuwo muryeene mmiravo wala nnaari, miruku iya sinnivareleya muteko wa atthu otheene.

MULOKIHERYE EPIRO ANYU MPAKAKA SOOTHANLA SOOLOKA

Owehasa wene mootoko owiiwa atthu alavulaka voohimya sa amiravo wira: ‘mwali wala mmiravo ola osuwela itthu sinceene’. Amiravo okhala wene aakhalana ekumi yooloka, waakuva wuupuwela itthu ni waasivela okhumela saana. Nto Biibiliya onnihimya mooreerela vaavo vaniira awe so: “Otupa ovuwa w’amiravo”. (Mir. 20:29) Amiravo yaale anivarihela muteko osuwela ni owerya waya wira amurumeele Yehova anoophwanya iparakha sinceene ni ohakalala wa ekeekhai.

Akhala wira munimuupuwela saana, munnoona wira osuwela ni ikuru sa amiravo sinnitepa ovahiwa efaita olumwenku ola. Vaavo amiravo yaawo ari anamoona a Yehova anikhumela saana oxikola, alipa anaavaha miruku anaxikola, maprisori hata anaxikola akhwaaya annaakhanyererya amiravo awo orowa osoma ixikola suulupale wira akhumele saana mmakhalelo ala a itthu. Wala amiravo yaale arina owerya wa owiira axooku anikhumela saana annitumereriwa wiimananiha waapaka axooku okhala muteko aya. Niireke eyo yootoko wookhumelelani, wala munnimusuwela mutthu onikumanana muxankiho owo? Exeeni enirowa omukhaliherya muKristau opaka yoothanla yooloka?

Biibiliya onoowerya oniixuttiha othanla ephiro yooloka. Musuweli 12:1, oni “Muhimuliyaleké Muluku òpattuxaleni nlelo muri mmiravo”. Moota xeeni nyuwo wala amiravo anirowa aya ‘ohimuliyala Muluku aapattunxe?’

Nkahaya muupuwele ele yamwiiranenle mmiravo oniireliwa Erica mpantta Onikela Nsuwa wa Afrika. Owo waanimusivela ommana boola. Okathi Eric aarina awe iyaakha 15, aahithanliwa orowa ommanaka boola ni ekiipa yuulupale ya elapo awe. Eyo yaataphulela wira moohipisa Eric aarowa wiinihiwa nikuruta wEuropa wira okhale mulipa ommana boola oovuwa. Masi aavarihenle sai muteko miruku soowi ‘mmuupuweleke Muluku Oopattunxeni’? Ni etthu xeeni amiravo ni atthu akina eniixutta aya mu yowiiraneya ela?

Nlelo eettaka oxikola, Eric aahipacerya omusoma Biibiliya ni Anamoona a Yehova. Owo aahipacerya wiixutta wira Mpattuxa tonirowa omaliha mixankiho sotheene sa apinaatamu. Eric aahoona wira vaamureerela ovarihela muteko okathi ni ikuru sawe wira omurumeele Muluku. Mwaha wa yoothanla awe eyo yooloka, Eric aahithanla omuhiya ommana boola. Owo aahibatiziwa ni aahikhalela nthiti miteko sa Muluku. Nuuvira okathi aahikhala murummwa oorumeela ni aahilattuliwa orowa Exikola ya Biibiliya ya Anna Ohithela.

Vaakhanle wira Eric aahithara muteko awe ole wommana boola amphwanya musurukhu munceene ni ovuwa. Masi owo aahiiwexexa miruku sa Biibiliya sini: “Mihakhu s’athajiri, ntthyawelo naya: annupuwela wira siri makokoro òlipihiwa”. (Mir. 18:11) Tthiri ovareleleya mutthu okhanle awe ophwanya mwaha wa muhakhu onnooniherya okhala ethiru. Okhala wira ale aniphavela okhala atthaaciri ‘anniphwanya ohawa wulupale’.​—1 Tim. 6:9, 10.

Ti voohakalaliha osuwela wira amiravo anceene aaphwanya ovareleleya ohinimala mwaha wookela muteko wa orummwa wa okathi wotheene. Eric onihimya so: “Vano kiniirela mpantta ‘ekiipa yuulupa’ ya arummwa a okathi wotheene a Yehova. Eyo ti etthu yootepexa oloka, nto kinnimuxukhurela Yehova, okhala wira eyo ti enamuna ya ophwanya ohakalala wa ekeekhai mweekumini”.

Vano nyuwo munoonela sai? Ohiya ophavelaka iparakha sa mulaponi, xeeni ohiphavelaka olokiherya “iphiro sanyu” ohoolo wa Yehova mukelaka muteko wa epioneero?​—Nwehe ekaaxa eni “Mphwanye Mireerelo Sihiniphwanyaneya wUniversidade”.

MUKUMIHE ITTHU SOOXANKIHA MPHIRONI MWANYU

Namathelana mmosa, yoowo aaxukunrye eBetheli ya wEstados Unidos, aahivariwa murima mwaha wa ohakalala wa atthu anirumeela weiwo. Amuthiyana aalempe so: “Hiyo naahikhalana mukhalelo wa okumi yooloka waalimalenle ahu”. Anamathelana ale, yaahilakela waavya okathi ni ikuru, wira amurumeele Yehova moomalela.

Masi waahiphiya okathi, anamathelana ale yaaphwannye aya muxankiho yoona aya wira khiyaawerya oxintta. Nihiku nimosa, awo yaahisoma ni otthokelela yoolepa ya nihiku. Yoolepa ene, yaari Yohani 8:31, yaasomme aya masu a Yesu oowi: “Nyuwo, mwakhalela nthiti molumo aka, vekekhai munokhala awixutti aka”. Mwaha wa yoolepa eyo, awo yaahuupuwela so: “Wa khula murukunuxo onipaka ahu wira nimurumeele Yehova, nnootthuveliwa”. Awo yaahitumiha enupa yuulupale yaarina aya, yaahihiya miritti sa mulaponi saarina aya, ni yaahithaamela muloko waatthuneya anamalaleerya. Awo olelo-va mapioneero, nave annikhaliherya-tho oteka Ipa sa Omwene, ni anniivahererya okhaliherya mapuro aniiriwa akongresu. Nto vaakohiwa aya wira anoonela sai muteko aya, yaakhunle so: “Hiyo nootteeliwa murima vanceene mwaha wookhweiherya ekumi ahu, ni osuwela wira ninnipaka ele Yehova ni mulokiheryo awe, ennitumererya aya opaka”.

MUTTHAREKE EPHIRO ENIROIHA OHOOLO MOMUNEPANI

Salomoni aalempe so: “Maitho anyu eweheke oholo itthu soloka, nwehe oholo ni murima wowokololowa”. (Mir. 4:25). Moolikana ni mulipa oneettiha ekaaro yoowo oniweha ohoolo okathi wotheene, hiyo nihaana osyaka owehexexa itthu sikhanle oonooceeliha ophwanya iparakha sa omunepani.

Iparakha xeeni sa omunepani mukhanle anyu oothanla ni omananiha ophwanya? Okela orummwa wa okathi wotheene tthiri eparakha yooloka. Eparakha ekina ori okhaliherya muloko wa vakhiviru, yoowo ohirina anamalaleerya anceene, wira amaliherye olaleerya muttetthe aya. Wala muloko mukina pooti okhalana anamalaleerya ooloka anceene masi khuhikhalana axitokweene hata arummwa oorumeela aniphiyerya. Niireke nyuwo mwanwerya okhaliherya mwa enamuna eyo? Xeeni nyuwo ohilavulanaka ni mutokweene a esirkwitu wira ooleeleni mapuro anitthuneya anamakhaliherya? Akhala wira nyuwo munniwerya orowa olaleerya ottaiwene, nto nveke malakiheryo voohimya sa miloko sinitthuneya okhaliheriwa.b

Vano nrowe ntthikele othokorerya mwaha yoole olavuliwe va Yesaya 62:10. Owehasa wene aYuda anceene yaahivara muteko muulupale wa waapattha ni olokiherya ephiro wira avireke atthu a Muluku yaatthikela elapo aya. Vakhala wira nyuwo munniimananiha wira mphwanye iparakha sa omurumeela Yehova, muhooceye. Mukhaliheriwaka ni Muluku, nyuwo munoowerya ophwanya iparakha iyo. Nvikanihe onvekela Yehova wira oovaheeni osuwela vaavo vanimananiha anyu oxintta mixankiho siri ohoolo wanyu. Waphiya okathi aya, munimoona moota Yehova onrowa awe olokiherya ephiro anyu.​—Mir. 4:26.

[Inoota]

[Ekaaxa epaaxina 6]

Mphwanye Mireerelo Sihiniphwanyaneya wUniversidade

OKATHI Flavia aari awe mwaamukhaani, apiipi awe yiira aryeene Namoona a Yehova, yaahimulaleerya. Masi apapawe yaari prisoori, ni yaaniphavela wira owo osome myaha sa ephattu ni orowa ixikola suulupale. Atthu akina yaahimuleela wira, “Nloko nanyu nnoowerya woopola elapo ela”. Okhaliheriwaka ni apapawe, aahirowa osoma wuniversidade oovuwa, weiwo waapacenrye awe otokosa inamuna sa ompaka diisele ohinihonona elapo.

Flavia moohipisa ahoona wira anaxikola anceene aasomana awe khiyaphavela ‘woopola elapo’. Ohiya-vo iprograma sikina sa wuniversidade ole saakhaliheriwa ni alipa a nakoso, nto anaxikola ale yaahaana owiiwelelaka alipa a nakoso awo. Eyo yaanimunyoonya Flavia. Okathi axukuriwe awe ni Anamoona a Yehova, ahoona omusivela ele Biibiliya onihimya awe sa ele enirowa wiiraneya muhoolo.

Flavia aaheemererya omusoma Biibiliya ni aahibatiziwa. Masi okhala wira nlelo iira osomaka wira wuncererye osuwela wawe, khaarina okathi woorowa olaleerya. Nihiku nimosa owo aahiwiriyana mwaha wa mutokweene a esirkwitu yoowo aatthokiherya yoolepa ya Yakobo 4:17, yeeyo eni: “ale ansuwela sorera, ehinira, annittheka”. Eyo yaahimwiiriha Flavia otthokelela makhalelo awe. Owo onihimya so: “Okathi omosaru kaaphavela aka oreelihiwa ni Yehova kaaniphavela-tho okhumela saana muteko aka wa esientista. Nto kahaana othanla”.

Flavia aahipaka yoothanla ya ohiya osoma wuniversidade. Nto niireke eyo ennimwiiriha wiikhupanyiha? Owo onihimya so:

“Vano vanimurumeela aka Yehova koophwanya mireerelo sihiniphwanyaneya wuniversidade. Yehova ookireerela murima. Owo okixuttiha okhala oreera murima, ophenta ni waakhaliherya atthu akina omunepani. Olelo-va kookhalana etthoko yoohakalala ni kinniwehererya mareeliho manceene yaawo ahiniphwanya aya ale animuroromela siensia. Tthiri ti Yehova paahi oniwerya woopola elapo ela. Nkinikhala-khala kimuhiyaka”. Flavia ni aiyawe anirumeela oseedi wa olumwenku wotheene wa Anamoona a Yehova oNova York.