OVAANELA VOOHIMYA SA BIIBILIYA

Xeeni Vanitthuneya Ahu Omutokosa Biibiliya?

Moolumo anittharelana, ori ovaanela okhanle owiiraneya eriyari ya Namoona a Yehova ni mwaneene etthoko. Nilikanyihe wira Namoona oniitthaniwa Phitaanya oomulaleerya mulopwana oniitthaniwa Filipe.

BIIBILIYA OOKHALANA SOOHIMMWA SEKEEKHAI

Filipe: Mukiswaamihe, masi miyo nkinthokoreya myaha sa etiini.

Phitaanya: Kooxukhuru mwaha woolavula ekeekhai. Miyo kiniihaniwa Phitaanya, ankhi nyuwo?

Filipe: Filipe.

Phitaanya: Vaareera woosuwelani.

Filipe: Kooxukhuru.

Phitaanya: Kiireke khalai mwaaneetta okerexa?

Filipe: Aayo. Masi, nuumala opacerya osoma universidade, nkinarowe-tho.

Phitaanya: Aahe. Epantte xeeni ya faculdade musomme anyu?

Filipe: História. Okhuma khalai okisivela myaha sa atthu, kiire so, moota apinaatamu aronwe aya vahoolo mwa iyaakha sinceene sivinre.

Phitaanya: Eyo etthu yooreera. Woonasa wene, munnisuwela wira Biibiliya ti eliivuru ya história. Mootoko omurumeela Biibiliya wira mpake sootokosa?

Filipe: Nnaari. Koosuwela wira Biibiliya eliivuru yooloka, masi nkitonko wuupuwela wira Biibiliya ti eliivuru ya história.

Phitaanya: Kinoona wira nyuwo mwa mutthu oniphavela osuwela itthu. Mwakhalana okathi vakhaani, kiniphavela owooniheryani matakiheryo vakhaani anooniherya wira Biibiliya ookhalana myaha sa ekeekhai.

Filipe: Khiva mwaha. Masi nkirina Biibiliya.

Phitaanya: Aayo. Nnoomurumeelaka awaka. Ntakiheryo noopacerya niri va 1 Wahala 29:26, 27. Iveersu iyo sinihimya so: “Davidi ahiwettiherya atthu othene a Isarayeli mpakha iyakha miloko mixexé: ahiruma oHebroni iyakha thanu na pili, n’oYerusalemu iyakha miloko miraru ni ttharu”.

Filipe: Masi, yoolepa ela enooniherya exeeni?

Phitaanya: Ohaavo okathi atthu akina yaahimya aya wira Mwene Davidi khonakhale.

Filipe: Ekeekhai? Xeeni yahaakupali aya?

Phitaanya: Omuhiya Biibiliya, saaphwanyaneya itthu vakhaani paahi sooniherya wira Davidi aahitoko okhala. Masi eyaakha ya 1993, nikhuuru nimosa na atthu anithipa mapuro yaakhaliwa khalai yaahiphwanya nluku na khalai nilempwale masu anitaphulela so: “Empa ya Davidi”.

Filipe: Nkaasuwela!

Phitaanya: Mutthu mukina oniromoliwa mBiibiliyani yoowo atthu akina yahaakupali aya wira aahinto okhala, aari Ponsio Pilato, guvernatoro aalamulela okathi wa Yesu. Owo onniromoliwa va Luka 3:1, eriyari ya makhulupale makina yaalamulela okathi owo.

Filipe: Aayo, kooweha. Enihimya wira “Ponsio Pilato ari guvernatoro òYudeya, Herodi ari mwené òGalileya”.

Phitaanya: Kooxukhuru. Khalai atthu akina yaanihoverya wira Pilato aari mutthu eekeekhai. Nto, mwa iyaakha sowiiraka 50 sivinre, naahiphwanyiwa nluku wAsia, naalempwale so: Ponsio Pilato.

Filipe: Hmm. Nkaatonko wiiwa mwaha owo.

Phitaanya: Vaakisivela ovaanela ni nyuwo.

Filipe: Ohimya ekeekhai, miyo kinnimuttittimiha Biibiliya ntoko eliivuru yooloka, masi nkitonko wuupuwela wira owo onnivareleya muteko olelo-va. Pooti orina ene myaha sekeekhai, masi kinoona wira owo khorina efaita.

BIIBILIYA TA KHALAI, MASI ONNIVARELEYA MUTEKO OLELO-VA

Phitaanya: Atthu anceene annikupali moolumo awo. Masi miyo nkinkupali. Mwaha woowi, sootthuneya sa apinaatamu khasituruken’ye okhuma khalai. Mwa ntakiheryo, hiyo nihaana okhalana yoolya, ikuwo ni opuro wookhala. Nave, vanninsivela ovaanela ni okhalana emusi yoohakalala. Kiira hiyo ninnivaha efaita itthu iyo?

Filipe: Ekeekhai.

Phitaanya: Nto Biibiliya onninikhaliherya mwa myaha iyo sotheene. Ti maana aya, hata Biibiliya oryeene a khalai, onnivareleya muteko olelo-va.

Filipe: Muniphavela ohimyani?

Phitaanya: Kiire so: Biibiliya ookhalana malakiheryo oovareleya muteko olelo-va ntoko saavareleya aya muteko okathi wa khalai.

Filipe: Moota xeeni?

Phitaanya: Biibiliya onninikhaliherya okhalana moonelo wooloka voohimya sa musurukhu, emusi yoohakalala, wala okhalana apatthani ooloka. Owo ori ntoko manual animukhaliherya mutthu. Mwa ntakiheryo, niireke khamunikupali wira mahiku ala ti vooxankiha okhala muhooleli a etthoko?

Filipe: Ekeekhai, kinnikupali. Miyo ni amwaaraka nooviriha mwaakha mmosa nithelanne ene, masi ikwaha sikina vannivila wiiwanana.

Phitaanya: Aayo. Masi Biibiliya ookhalana malakiheryo anikhaliherya. Mwa ntakiheryo, ninwehe aÉfeso 5:22, 23, ni 28. Munoowerya omusoma?

Filipe: Khiva mwaha. Onihimya so: ‘Muthiyana amwiweleleke iy’awe, ntoko t’Apwiya. Mulopwana ti murima wa mwar’awe, sisale Kristu sikhanlyawe murima wa muloko, nave-tho ti Mopoli a muloko, ori erutthu awe’. Eveersu 28 enihimya so: “Siso ole othenle ohana omphenta mwar’awe ntoko erutthu awe. Ole onimphenta mwar’awe, onnìphenta mmansawe”.

Phitaanya: Kooxukhuru. Munoonela sai, akhala wira ale athelanne animweettela malakiheryo ala, khanrowa okhalana etthoko yoohakalala?

Filipe: Kinoona wira aayo. Masi ovila weettela.

Phitaanya: Ekeekhai. Ti maana aya mwa ekapiitulu emosaru ehaavo eversiikulu ekina ennitumererya okhala ooreera murima.a Nto ale athelanne ahaana ovahaka efaita soophavela sa mukina. Miyo ni amwaaraka nihoona wira Biibiliya onninikhaliherya.

Filipe: Ela etthu yookhalela.

Phitaanya: Anamoona a Yehova aakhalana Web saite orina myaha sinikhaliherya imusi. Kiniphavela owooniheryani vakhaani paahi.

Filipe: Aayo pooti okooniherya.

Phitaanya: Web saite ahu tuula: www.pr2711.com/vmw. Ela epaaxina yoopacerya.

Filipe: Ifootu iya sookisivela.

Phitaanya: Iya ifootu sa muteko woolaleerya yoowo onivariwa olumwenku wotheene. Wookhala mpantta oniira “Iliivuru”. Vathi vaya, sookhala irevista sa niinano ni iliivuru sikina sinithokorerya myaha soovirikana ohela muhina myaha sinilavula sa emusi. Mwa ntakiheryo, niwehe ebroxura ela eni: Ihapari Sooreera Sinikhuma wa Muluku! Wookhala mwaha oni: “Etthoko Anyu Enrowa Ophwanya Sai Ohakalala?”

Filipe: Ola mwaha wooreera. Kinniphavela osuwela waakhuliwa waya!

Phitaanya: Mwaha ola onnihimya itthu kamosa-kamosa sinikhaliherya emusi okhala yoohakalala. Moone ettima ela vathi va nikoho 2. Pooti osoma ifrase piili sookiserya?

Filipe: Aayo. Enihimya so: “Atthu athelanne ahaana ophentanaka ni ottittimihana. Okhala wira mulopwana ni muthiyana annivonya, wala ottheka, olevelelana teri etthu eniphwanyiha ohakalala vatthokoni”. Hmm, kinnikupali.

Phitaanya: Kooxukhurela. Enniromoliwa yoolepa ya aÉfeso 5:33. Munoowerya osoma yoolepa eyo mBiibiliyani mwaka-mu?

Filipe: Aayo, aÉfeso 5:33, onihimya so: “Mulopwana amphenteke mwar’awe ntoko sinìphentawe, ni wira muthiyana amuttittimiheke iy’awe”.

Phitaanya: Mooweha wira ale athelanne ahaana opakaka yeele eniphavela aya wiireliwa ni mukhwaaya?

Filipe: Moota xeeni?

Phitaanya: Kiira mulopwana oniphavela wira ottittimihiweke ni amwaarawe? Ni wira nave, muthiyana oniphavela wira ophentiweke ni iyawe?

Filipe: Ekeekhai.

Phitaanya: Akhala wira mulopwana onnaavya inamuna sa waaphenta amwaarawe, nto vanookhala vookhweya muthiyana omuttittimiha iyawe.

Filipe: Kinnikupali.

Phitaanya: Nto eveersu emosa paahi ya Biibiliya nnaamwi elempwale ene mwa iyaakha sowiiraka 2.000 sivinre, ennivaha miruku soovareleya muteko seiyo sinaakhaliherya ale athelanne, akhala wira animweettela.

Filipe: Vano kinnikupali wira Biibiliya ookhalana myaha sinceene ovikana ele kuupuwela aka.

Phitaanya: Kinnihakalala wiiwa moolumo ntoko awo, Filipe. Nihiku nikina kiniphavela osuwela moonelo anyu voohimya sa nikoho nla 3 na ebroxura ahu nni: “Niireke ti vooloka omwalana mwaha woohiiwanana paahi?”b

Filipe: Vaareera. Miyo ni mwaaraka ninrowa osoma mwaha ola munternetini.

Niireke nyuwo muhaana mwaha mukina a Biibiliya onootikinihani? Wala muniphavela osuwela sookupali ni sowiira sa Anamoona a Yehova? Akhala wira ti siiso, muhoovelele omukoha Namoona a Yehova. Owo onrowa osiveliwa othokorerya myaha iyo ni nyuwo.

[Inoota]

[Eponto yuulupale epaaxina 9]

Biibiliya ookhalana malakiheryo oovareleya muteko olelo-va ntoko saavareleya aya muteko okathi waalempwale aya