Naakhwa, Nwanani Ookiserya, Onrowa Opwetexiwa

“Nwanani onrowa okiserya opwetexiwa, okhwá”.​—1 AKOR. 15:26.

MWAAROWA WAAKHULA SAI?

Nlamulo xeeni nuulupale na Yehova nooniherya ophenta naavanhe awe Adamu?

Opacerenye sai okhwa wa apinaatamu?

‘Nwanani ahu muulupale’ onrowa opwetexiwa silini?

1, 2. Makhalelo xeeni yaarina aya Adamu ni Eva wanipacerya, ni makoho xeeni anikhumelela?

OKATHI waapattuxiwe aya Adamu ni Eva khiyaarina munyokhani hata mmosa. Awo yaari apinaatamu oomalela yaakhala mparayiisu. Awo yaari owataana vanceene ni Mpattuxa aya ntoko mutthu ni anaawe mwaamulopwana ni mwaamuthiyana. (Maph. 2:7-9; Luka 3:38) Ekumi aya yaalipa ni muteko yaavahiwe aya ni Muluku. (Musome Maphattuwelo 1:28.) Muteko ene waari waayara anamwane mpakha ‘osareya mulaponi mothene’ ni eyo ennooniherya wira waatthuneya okathi munceene wira amalelihe ovara muteko owo. Masi wira avikanihe ‘okhala axinene ihopa sa mphareya n’axipalame a musulu n’inama sothene sinetta vathí’, Adamu ni Eva yaatthuneya okhalana ekumi yoohimala, mwa enamuna eyo awo khiyaarowa ohiya muritti aya mwaha wa okhwa.

² Nto xeeni makhalelo aryaaya oovirikana olelo-va? Xeeni apinaatamu olelo-va arinaya anyokhani anceene anihonona ohakalala waya ni munyokhani muulupale khukhala naakhwa? Exeeni Muluku enirowa awe opaka wira ompwetexe moomalela munyokhani ola? Waakhuliwa wa makoho ala ni makina oniphwanyaneya mwa yowiiraneya emosa eri mBiibiliyani. Vano nrowe nithokorerye yowiiraneya eyo.

YOOLOPOLA ENOONIHERYA NIPHENTO

3, 4. (a) Yooruma xeeni Muluku aavanhe awe Adamu ni Eva? (b) Xeeni vaarya aya vootthuneya wiiwelela yooruma ele?

³ Nnaamwi Adamu ni Eva yaarina eparakha ya okhalana ekumi yoohimala, nlelo vanweryaneya okhwa. Wira avikanihe okhala akumi awo yaahaana omumula, owurya maasi, orupa ni olya. Etthu yuulupale yaarowa waakhaliherya ovikaniha okhala akumi waari omwiiwelela Namavaha-Ekumi. (Otum. 8:3) Weemererya ohooleliwa ni Muluku waari wootthuneya wira awo akhale akumi. Yehova aahimutthokiherya Adamu ohalaka ohinatthi opattuxiwa Eva. Mwa enamuna xeeni? Yehova Muluku, “ahimulaka mutthu, omwirelaka: ‘Munowerya olya mihokorokho sothene siri mmatta-mu, muhilyé pahi mihokorokho sa mwiri onsuweliha oreriwa ni otakhaliwa. Mwalyá vale mihokorokho iya, tthiri munimokhwa’”.​—Maph. 2:16, 17.

⁴ “Mwiri onsuweliha oreriwa ni otakhaliwa” waataphulela ehakhi ya olamulela wa Muluku ya okhalaka tonihimya ele ekhanle yooloka ni yoohiloka. Tthiri Adamu aanisuwela ele yaari yooloka ni ele yoohiloka, owo aapakiwe olattanihiwaka ni Muluku ni aahikhalana yowuupuxerya ya vamurimani. Mwiri ole waarowa owooniheryaka Adamu ni Eva wira khula okathi yaahaana wiiwelela malakiheryo a Yehova. Olya waya mihokorokho sa mwiri ole waarowa wooniherya wira khaniiwelela malamulo a Muluku , ni eyo yaarowa okumiherya maxakha manceene wa awo ni anamwane yaarowa aya waayara. Nlamulo na Muluku ni ehukhumu aya yooniherya wunnuwa wa mwaha ole.

OPACERENYE SAI OKHWA WA APINAATAMU?

5. Diabo aawenrye sai owiiriha Adamu ni Eva okhala oohiiwelela?

⁵ Nuumala opattuxiwa Eva, Adamu aahimuleela nlamulo na Muluku. Eva aanisuwela saana nlamulo nlo, tivonto vaawerya awe ohimya khula nuulumo na nlamulo nlo. (Maph. 3:1-3) Owo aahimuhimeerya ole aihimya okhala enowa, yeeyo yaari mulavilavi. Ole aalavula orumeelaka enowa aari Satana Diabo, yoowo aari mwaana omunepani a Muluku, eemerenrye muupuwelelo woohiloka wa ommwareela Muluku. (Mulikanyiherye ni Yakobo 1:14, 15.) Wira owerye opaka eyo Diabo aahimootherya Muluku. Owo aahimuhimeerya Eva wira ommwareela Muluku khiwaarowa okumiherya okhwa, masi waarowa owiiriha olikanaka ni Muluku. (Maph. 3:4, 5) Eva aahimukupali, khuphavela ohiya ohooleliwa ni Muluku alyaaka muhokorokho wa mwiri ole ni khimutumererya Adamu wira olye nave. (Maph. 3:6, 17) Diabo aamootha. (Mmusome 1 Timótheyo 2:14.) Hata vari siiso, Adamu ‘ahimwiwelela mwarawe’. Nnaamwi okathi ole, enowa yaakhala ntoko mpatthani aya Eva, Satana Diabo taari munyokhani ootakhala yoowo aasuwela wira Eva yamwiiwelela yaamwaakhumelela maxakha.

6, 7. Yehova aaphunke sai mulattu wa anamattheka ale?

⁶ Adamu ni Eva, yaaroothanla ohimwiiwelela Ole aavanhe itthu sotheene yaarina aya ni ekumi yoohimala. Tthiri Yehova, aanoona itthu sotheene saakhumelenle. (1 Wah. 28:9; musome Miruku 15:3.) Owo aahaavaha okathi atthu ale araru wira yooniherye ele yuupuwela aya voohimya sa yena. Ntoko Tiithi, ele yaapakiwe yaahinwereya vanceene Yehova. (Mulikanyihe ni Maphattuwelo 6:6.) Nuumala–vo aahikhala Namaphuka, aattharihenle malamulo awe ni ele yaarowa okhumelela.

⁷ Muluku aahimuhimeerya Adamu: “Mwalyá vale [mihokorokho sa mwiri onisuweliha oreriwa ni otakhaliwa] munimokhwa”. Woonasa wene Adamu uupuwela wira “nihiku” nle naahimmwa naari na iwoora 24. Nuumala ohiiwelela nlamulo na Muluku owo aanilipelela wira Yehova aarowa omwiiva vahinatthi wiila. “Makaripi variryalene” Yehova aahirwa olavula ni atthu ale. (Maph. 3:8) Owo aahiphuka milattu, moovarihana ni ele Adamu ni Eva yaakhunle aya. (Maph. 3:9-13) Nuumala-vo aahaahimeerya ele yaarowa waakhumelela anamattheka ale. (Maph. 3:14-19) Vaakhanle wira Yehova aahiwiiva tthiri nihiku nenle, yoolakela ya Yehova voohimya sa osuulu wa Adamu ni Eva khiyaarowa wiiraneya. (Yes. 55:11) Nnaamwi owo aahimmye wira yaarowa okhwa ni wira yaamwaakhumelela maxakha manceene, owo aahiweemererya Adamu ni Eva waayara anamwane yaawo yaarowa ottottela mureerelo marehereryo aarowa awe opaka. Mweekeekhai, vamaithoni va Muluku, Adamu ni Eva yaahikhwa nihiku nenle yaatthenke aya ni tthiri awo ahookhwa ahiphiyerinhe “nihiku” nimosa na iyaakha 1.000.​—2 Ped. 3:8.

8, 9. Etampi ya Adamu enihasula sai osuulu aya? (Nwehe elatarato yoopacerya.)

⁸ Niireke ele yaapanke aya Adamu ni Eva yaarowa waaphwanya anamwane yaarowa aya waayara? Aayo. Yoolepa ya aRoma 5:12 enitthokiherya so: “Mutthu mmosá pahi t’oruhale etampi mulaponi: etamp’iyo yoruha okhwa. Siso okhwa ohaphwanya atthu othene, okhala wira atthu othene àttheka”. Mutthu oopacerya okhwa ti Abeli. (Maph. 4:8) Muhoolo mwaya anamwane akina a Adamu yaahipacerya wuuluvala ni okhwa. Niireke awo aarava etampi ni okhwa? Murummwa Paulo onaakhula so: “Vamosamosaru, ntoko ohìwelela wa mutthu mmosá wakhalihalyaya anatampi atthu othene, siso-tho wiwelela wa mutthu mmosá onnakhaliha anaxariya atthu yawo othene”. (aRom. 5:19) Etampi ni okhwa oravihiwe ahu ni Adamu, woopakeya munyokhani muulupale a apinaatamu, ni ohiniweryaneya osyakiwa ni atthu oohimalela. Hiyo khanniwerya otthokiherya oratteene moota etampi ni itthu sooriipiha murima sinikumiherya aya saaphwanye aya anamwane a Adamu, masi etthu enisuwela ahu wira awo tthiri yahaaraviha etampi eyo.

⁹ Mooreerela, Biibiliya onnihimya etampi okhala ‘mukhumi onaakhuneela atthu otheene ni mukhoi ootthaviwa onsipheela maloko otheene’. (Yes. 25:7) Mukhumi owo, wala mukhoi owo onnaaphinyaka atthu a maloko otheene. Nto ekeekhai ti ela ‘atthu othene annokhwa mwaha wa Adamu’. (1 aKor. 15:22) Nto nikoho nnitthuneya waakhuliwa ti nle Paulo aapanke awe oriki: “T’ani ontthuna okakiha makhalelo ala ankiruhela okhwa?” Niireke ookhala tthiri oniwerya?a​—aRom. 7:24.

OMALA-MALIHIWA WA YOTTHEKA YA ADAMU NI NAAKHWA

10. (a) Soolepa xeeni sa mBiibiliyani sinooniherya wira Yehova tthiri onoomalamaliha okhwa okumiheriwe ni Adamu? (b) Nto exeeni iversu iya sinooniherya aya voohimya sa Yehova ni Mwanawe?

¹⁰ Tthiri, Yehova anwerya omwaakiha Paulo. Nuumala Yesaya oromola “mukhumi”, owo aahilavula mooluluwanya oriki: “Apwiya anomaliha khuluwí okhwa. Apwiya Muluku animukuttha maithori owitho wothene”. (Yes. 25:8) Ntoko siisaale tiithi onimananiha awe okumiha ele enimuxankiha mwanawe ni wuukuttha maithori awe, Yehova onrowa omalamaliha okhwa okumiheriwe ni Adamu! Owo ookhalana ole onimukhaliherya ovara muteko owo. Yoolepa ya 1 aKorinto 15:22 ninsoma so: “Ntoko atthu othene sinkhwaya mw’Adamu, siso-tho othene anokhalihiwa-tho akumi mwa Kristu”. Moolikana ni eyo, nuumala Paulo okoha wira: “T’ani ontthuna okakiha makhalelo ala ankiruhela okhwa?” owo aahihimya-tho so: “Kinnimuxukhuru Muluku, onikopola mwa Yesu Kristu Pwiy’ahu!”. (Rom. 7:24b) Moohaaniherya ophenta weiwo waamwiirinhe Yehova waapattuxa apinaatamu, khonamalamale hata nuumala otthekeliwa ni Adamu ni Eva. Ni ole aavara muteko ni Yehova wa waapattuxa atthu awo, khohiiye osiveliwa ni osuulu aya Adamu. (Mir. 8:30, 31) Nto apinaatamu anrowa woopoliwa sai?

11. Yoovaha xeeni Yehova okumihenrye awe wira aakhaliherye apinaatamu?

¹¹ Ohimalela ni okhwa wa apinaatamu, onihela muhina itthu piili, etampi Adamu yaapanke aya, ni ophukela wa xariya wa Yehova. (Rom. 5:12, 16). Hiyo ninsoma so: “Sisale yottheka ya mutthu mmosá pahi, yaphwanyihalyaya ehukhumu atthu othene, siso-tho miteko sorera sa mutthu mmosá pahi, sihaphwanyiha exariya atthu othene, khwavaha ekumi”. (aRom. 5:18) Vano Yehova onrowa owerya sai omalamaliha ehukhumu ele voohivonyola malamulo awe? Waakhuliwa waya nimphwanya mmasu yaalavuliwe ni Yesu yoowo iirale so: “Tthiri Mwana a Mutthu kharwenle orumeliwa, orwenlé warumela atthu n’uleva ekumi awe, wira awopole atthu othene”. (Math. 20:28) Ole okhanle mwaana oopacerya oomunepani a Yehova, aahiiwanyeiha wira oyariwa wawe valaponi ntoko pinaatamu oomalela, waarowa owopola “atthu othene”. Mukuttho owo onivarihana sai ni exariya ya Muluku?​—1 Tim. 2:5, 6.

12. Mukuttho xeeni waavahiwe moovarihana ni exariya ya Yehova?

¹² Ntoko yoopattuxiwa yoomalela, Yesu aahikhalana makhalelo yaale yaarina aya Adamu ahinatthi ottheka. Yoolakela ya Yehova yaari osarya atthu mulaponi-mu, osuulu wa Adamu woohittheka. Mwaha wa owiiwelela aTithi awe ni waaphenta apinaatamu, Yesu oovaha okumi awe wira owoopole. Tthiri Yesu oovaha okumi awe woomalela yoowo waalikana ni ele Adamu yaayelenle awe. Ohoolo waya, Yehova aahimuttikiherya Mwanawe ekumi yomunepani. (1 Ped. 3:18) Yehova aahaakhulela mukuttho ole waavahiwe ni mulopwana ole oomalela Yesu Kristu, khuliva esisapo wala khuthuma emusi yotheene ya Adamu ni khwaavaha nlipelelo na ekumi yeeyo yaakhoottiheriwe aya ni Adamu. Mwa enamuna eyo, Yesu oomuranttela Adamu. Paulo onitthokiherya so: ‘Ti siso silempwaya wira: ‘Mutthu òpajerya, Adamu, òpakiwa mutthu mukumi’. Adamu òkiserya, ori Kristu, ti munepa onivaha ekumi’.​—1 aKor. 15:45.

13. Moota xeeni “Adamu òkiserya” onrowa awe waakhaliherya atthu yaale akhwiiye?

¹³ Ohanle ophiya okathi “Adamu òkiserya” vanirowa awe okhala ‘munepa onivaha ekumi’ wa apinaatamu otheene. Anamuceene a osuulu wa Adamu, anoottikiheriwa okumi. Nthowa xeeni? Okhala wira awo aatoko okhala akumi, masi khukhwa. Awo anrowa otthuneya ohihimuxiwa, eyo piiyo otthikela okhala akumi valaponi.​—Yoh. 5:28, 29.

14. Yoovaha xeeni ya Yehova enrowa okhaliherya omalamaliha ohimalela weiwo Adamu yaaravinhe aya anaaya?

¹⁴ Apinaatamu anrowa woopoliwa sai ohimalela oravihiwe aya? Yehova ookumiherya Omwene yoowo onrowa olamuleliwaka ni “Adamu òkiserya” ni apinaatamu athanliwe valaponi. (Mmusome Wisupulula 5:9, 10.) Ale anrowa okhala vamosa ni Yesu wiirimu annisuwela makhalelo oohiloka a valaponi. Mwa iyaakha ekonto emosa, mamwene awo, anrowa ovara muteko valaponi ni waakhaliherya atthu oxintta ohimalela waya okhala wira yaahikhaliheriweru awo khaniwerya.​—Wis. 20:6.

15, 16. (a) Tuuvi okhanle “nwanani ahu okiserya”, ni onrowa opwetexiwa silini? (b) Moovarihana ni 1 aKorinto 15:28, exeeni Yesu enrowa awe opaka ohoolo?

¹⁵ Wuukiseryani wa iyaakha ekonto emosa sa Omwene ole, apinaatamu oowiiwelela anrowa wiiraka yoopoliwe ene awanani aya otheene yaale yaakumiheriwe ni ohiiwananeya wa Adamu. Biibiliya onihimya so: “Ntoko atthu othene sinikhwaya mw’Adamu, siso-tho othene anokhalihiwa-tho akumi mwa Kristu. Vano, atthu anohihimuwa khula mutthu ntoko simphwanelawe: òpajerya ti Kristu; ottuli waya ehihimuweke ale ari a Kristu [anamalamulela akhwaawe, nihiku na orwa wawe]. Numalá, ophiyeke womalelani. Kristu onimwapwetexa makhulupale othene n’ikuru sothene n’uwerya wothene; numalá, ononvahererya Muluku Tithi omwene awe. Vekekhai Kristu ohana okhala mwené, mpakha Muluku wapweha awanani othene vathí va inawu sawe. Nwanani onrowa okiserya opwetexiwa, okhwá”. (1 aKor. 15:22-26) Tthiri okhwa oravihiwe ahu ni Adamu, onrowa omalamalihiwa. “Mukhumi” yoowo onaakhuneela apinaatamu otheene, onrowa okhunuliwa woohimala.​—Yes. 25:7, 8.

¹⁶ Murummwa Paulo aahimaliherya masu awe oowuupuxeriwa oriki so: “Nave itthu sothene samwìwelelakaru Kristu, vano Kristu yowo, Mwana a Muluku, onomurumela Tithi awe, onvaherenrye sothene. Siso Muluku onomaliherya oruma sothene”. (1 aKor. 15:28) Okathi owo, yoolakela ya Omwene wa Kristu onoomaliherya muteko awe. Nuumala-vo, otteeliwene murima vanceene, onrowa omuttikiherya emwene Yehova ni onvahererya apinaatamu oomalela oloka.

17. Onirowa wiirihiwa exeeni Satana wuukiseryani?

¹⁷ Ankhi Satana, yoowo okhanle tokumihenrye ohaawa nno wotheene wa apinaatamu onrowa wiirihiwa exeeni? Wisupulula 20:7-15 onnaakhula nikoho nla. Mwa weehereriwa wookiserya wa apinaatamu, Satana onrowa weemereriwa omananiha waathweeleliha atthu awo. Vano Diabo ni atthu otheene yaale anrowa omutthara, anrowa opwetexiwa woohimala eyo piiyo “okhwa wanenli”. (Wis. 21:8) Okhala wira ale anrowa wiiviwa mwaha wa onvarexexa Diabo onrowa okhala woohimala, okhwa wa atthu ala khonitthikiwa wala khonirowa omalamalihiwa. “Okhwa wanenli” khoniwoopiha apinaatamu ale animphenta ni animurumeela Mpattuxa aya.

18. Onirowa waakhwaniheriwa sai muteko yoole Muluku anvanhe awe Adamu?

¹⁸ Apinaatamu otheene oomalela anrowa weemela ohoolo wa Yehova ni weemereriwa waakhela ekumi, vahikhanle-tho etthu enirowa waakumiherya muxankiho. Muteko yoole yaavahiwe aya Adamu wuupaceryani onrowa omalelihiwa aneene awo ahikhanle. Elapo enrowa osareiwa ni osuulu wa Adamu yoowo onrowa oweheryaka ni okhapelela soopattuxiwa sotheene sikumi. Hiyo nihikhala-khale niliyalaka oxukhurela enamuna Yehova orumeelale awe wira ommalamalihe nwanani ahu muulupale, naakhwa!

[Enoota]