MWAHA WA VAKAAPANI | YESU TI MOOPOLI MOOTA XEENI?
Mureerelo Xeeni Onniphwanyiha Aya Okhwa ni Ohihimuxiwa wa Yesu?
“Mmwaminiki Pwiya Yesu: [nto] munimopowa”.—Miteko 16:31.
Murummwa Paulo vamosa ni Sila yaahilavula masu awo ahinliyaleya wa mulipa oolipelela ekhatteya ya oMasedonia, epooma ya oFilipi. Paulo ni Sila yaaphavela ohimyani? Wira niiwexexe moota omwaamini Yesu onnoopola aya voohimya sa okhwa, nihaana osuwela toko nthowa naya ninkhwa ahu. Moone ele Biibiliya onixuttiha awe.
Apinaatamu khapattuxiwe wira ekhweeke
“Apwiya Muluku yahimukuxa mutthu, khumukhaliha mmatta mwa wEdeni, wira alimeke, asukeke. Vano Apwiya Muluku yahimulaka mutthu, emwìrelaka: ‘Munowerya olya mihokorokho sothene siri mmatta-mu: muhilyé pahi mihokorokho sa mwirí onsuweliha oreriwa n’utakhaliwa. Mwalyá vale mihokorokho iya, tthiri munimokhwa’”.—Maphattuwelo 2:15-17.
Muluku aahimpweha mulopwana oopacerya, Adamu, oJardim wa Edeni, eyo piiyo, eparayiisu ya valaponi weiwo saari inama ni miri sooreera. Nto saahikhala miri saima mihokorokho wira Adamu elyeeke vootaphuwa. Masi, Muluku aahaakhoottiherya mwiri mmosa. Akhala wira yaamoolya, yaamookhwa.
Niireke Adamu aaniiwexexa nlamulo nlo? Owo aanisuwela ele yaataphulela aya okhwa, maana aanoona inama sikhwaaka. Vaakhanle wira Adamu aapakiwe wira okhwe, nto yoolopola ya Muluku, khiyaarowa okhalana efaita. Masi, Adamu aanisuwela wira akhala wira aarowa omwiiwelela Muluku, ni khuhilya muhokorokho wa mwiri wookhoottihiwa, aamukhala mahiku otheene.
Akina anikupali wira mwiri ole waataphulela orupihana, masi eyo khahiyo ekeekhai. Adamu ni Eva ahinatthi ottheka, Yehova aahaaleela wira ‘yayareke anaya, yincerereyeke ni esareyeke mulaponi mothene’. (Maphattuwelo 1:28) Tthiri mwiri waakhoottihiwe waari wekeekhai. Yehova aahiitthana okhala “mwirí onsuweliha oreriwa n’utakhaliwa”, maana mwiri ole waathoonyerya ehakhi Awe ya ohimya ele eri yooloka ni yoohiloka wa apinaatamu. Vaakhanle wira Adamu khalyaale muhokorokho wa mwiri ole, yaamooniherya omwiiwelela ni onvaha efaita Ole waapattunxe ni aavanhe mareeliho manceene.
Adamu akhwiiye mwaha wa ohimwiiwelela Muluku
‘Muluku aahimuhimeerya Adamu wira: “Okhala wira [muholya] muhokorokho wa mwirí ule wokhottihenryakani, . . . munophwanyaka yolya n’uretthela w’owitho wanyu mpakha nihiku ninrowa anyu otthikela mutthayani, okhala wira mùpiwé n’ithaya yeyo. Tthiri nyuwo mw’ètthayá, munotthikela-tho mutthayani memmo”’.—Maphattuwelo 3:17, 19.
Adamu aahilya mwiri aakhoottiheriwe awe. Nto ohiiwelela iwe waari mwaha muulupale. Adamu yaahimmwareela Muluku ni khiyoonihenrye oxukhuru mwaha wa itthu sotheene sooreera saavanhe awe. Mwaha woolya muhokorokho ole, Adamu yaahimukhootta Yehova, nto eyo khokumiherya mixankiho sinceene.
Ntoko Yehova aalenle awe, Adamu yaahikhwa muhoolo. Muluku aapanke orumeelaka “etthaya vakhani ya vathí” nto ‘yamutthikela mutthayani’. Wookhwani, Adamu khaaronwe wiirimu wala opakeya etthu ekina. Owo aapakeyale etthaya yeeyo yaapakaniwe awe.—Maphatuwelo 2:7; Musuweli 9:5, 10.
Hiyo ninnookhwa mwaha woowi na osuulu wa Adamu
“Mutthu mmosá pahi t’oruhale etampi mulaponi: etamp’iyo yoruha okhwa. Siso okhwa ohaphwanya atthu othene, okhala wira atthu othene àttheka”.—aRoma 5:12.
Ohiiwelela wa Adamu, wala etampi, yookumiherya maxakha manceene. Mwaha woottheka, Adamu khahiyo ayelenle okumi wa iyaakha 70 wala 80 paahi, masi ayelenle ekumi ehinimala. Ohiya-vo vaavo Adamu yaatthenke aya, yaahiyeleela okumi woomalela, ni aaraviha ohimalela iwo osuulu aya wotheene.
Hiyo na osuulu wa Adamu. Nto noorava erutthu yoohimalela, yeeyo enittheka ni muhoolo mwaya enikhwa. Paulo aalempe so: “Miyo ki mutthu òhilipalipa; kitumihiwe ntoko epottha y’etampi. . . . Miyo nkirere otakhaliwa! T’ani ontthuna okakiha makhalelo ala ankiruhela okhwa?” Nto Paulo aahaakhula wira: “Kinnimuxukhuru Muluku, onikòpola mwa Yesu Kristu Pwiy’ahu!”—aRoma 7:14, 24, 25.
Yesu oovaha okumi awe wira niwerye okhala mahiku otheene
“Muluku Tithi òmuruma Mwan’awe orwa vathí-va, wira awòpole atthu”.—1 Yohani 4:14.
Yehova Muluku oopaka marehereryo wira omalihe etampi, ni onoopole voohimya sa okhwa woohimala. Moota xeeni? Owo aahimuruma Mwanawe onimphentexa awe wira orwe ayariwe valaponi ntoko pinaatamu oomalela oolikanasa ni Adamu. Masi, moovirikana ni Adamu, Yesu “khatonko wira etampi”. (1 Pedru 2:22) Ti maana aya ahaaranve awe ehukhumu ya okhwa; nto anwerya okhala mahiku otheene.
Masi, Yehova aaheemya wira Yesu iiviwe ni awanani awe. Nuuvira mahiku mararu, Yehova aahimuttikiherya okumi ntoko yoopattuxiwa ya omunepani, nto khutthikela wiirimu. Yesu aahinvahererya Muluku esisapo ya okumi awe woomalela wira ophwanye ele Adamu ni osuulu aya yaayelenle aya. Yehova aaheemya mukuttho owo; nto ale animwaamini Yesu animwaakhela ekumi ehinimala.—aRoma 3:23, 24; 1 Yohani 2:2.
Yesu aahilokiherya ele Adamu yaayelenle aya. Owo aahikhwa mwaha wa hiyo wira niwerye ophwanya ekumi ehinimala. Biibiliya onihimya wira ‘Yesu mwaha w’ohawa n’ukhwa wawe ahakhwela atthu othene, vomoriwa ikharari ni Muluku’.—aHéberi 2:9.
Yoovaha eyo ennooniherya ophenta wa Yehova. Malamulo awe maalupale a xariya khiyaaweemererya atthu oohimalela wiisoopola mmensaya. Masi, ophenta wawe ni omoriwa ikharari woomwiiriha waakhwaniherya malamulo awe. Nto hata vaari vooxankiha, aahinvaha Mwanawe mmoseene wira awoopole apinaatamu.—aRoma 5:6-8.
Yesu oohihimuxiwa mwa alipa-ookhwa, nto atthu akina anrowa ohihimuxiwa-tho
“Kristu òhihimuwa, ni ti mulipu w’ohihimuwa w’alipa-òkhwa. Ntoko okhwa sirwiyaya mwaha wa mutthu mmosá, siso-tho ohihimuwa w’alipaòkhwa orwiye mwaha wa mutthu mmosá. Ntoko atthu othene sinkhwaya mw’Adamu, siso-tho othene anokhalihiwa-tho akumi mwa Kristu”.—1 aKorinto 15:20-22.
Tthiri Yesu ootoko okhala ni okhwa. Masi exeeni ennikupaliha wira oohihimuxiwa? Sookhala itthu sinceene sinnikupaliha. Mwa ntakiheryo, nuumala Yesu ohihimuxiwa, aahaakhumelela atthu anci mwa mapuro ni okathi woovirikana. Ekwaha emosa, aahaakhumelela atthu yaavikana 500. Murummwa Paulo aahiromola mwaha owo mwa epaphelo aalepenle awe aKorinto, ohimyaka wira anamoona akina nlelo yiira ehikhwiiye, nto yanwerya ovaha onaamona ele yoonale aya ni wiiwa.—1 aKorinto 15:3-8.
Nto, vaavo Paulo aalempe awe wira Kristu “ti mulipu” wa ale anirowa ohihimuxiwa, owo ooniherya wira yaamukhala akina-tho yaarowa ohihimuxiwa. Yesu aahihimya wira wamphiya okathi “atthu othene ari mmahiye” yaarowa aya ‘okhuma’.—Yohani 5:28, 29.
Wira nikhale mahiku otheene, nihaana omwaamini Yesu
“Muluku, ohaphentexa atthu mpakha wavaha Mwan’awe mmosene, wira othene ale animwamini yowo, ehirimelé, masi ekhalane ekumi ehinimala”.—Yohani 3:16.
Ipaaxina soopacerya sa Biibiliya, sinnihimya okathi okhwa waapacenrye aya ni moota eparayiisu yaarimenle aya. Ipaaxina sookiserya sinnihimya okathi okhwa onrowa aya opwetexiwa ni wira Muluku olokiherye-tho elapo ekhale eparayiisu. Atthu anrowa okhalaka moohakalala mahiku otheene. Eliivuru ya Wisupulula 21:4 eni: “Khunrowa okhala-tho okhwa”. Ettittimiheryaka yooleiherya eyo, eversu 5 enihimya so: “Molumo aka t’òroromeleya ni t’èkekhai”. Ele Yehova oleihenrye awe, enimwiiraneya tthiri.
Niireke munnikupali wira moolumo a Muluku “t’òroromeleya ni t’èkekhai”? Nto, mwiixutte itthu sikina voohimya sa Yesu ni omwaamini. Mwapaka eyo munoopatthana ni Yehova. Nto khahiyo paahi munrowa ophwanya mareeliho manceene olelo-va, masi-tho munoophwanya okumi ohinimala oparayiisu, weiwo ohinrowa aya okhala-tho okhwa, “nnákhala oripiwa murima, walá ikuttho nnákhala ohawa”.