MWAHA WOOPACERYA | OMWENE WA MULUKU​—ONROWA OPAKA EXEENI

Xeeni Yesu Onivaha Awe Efaita Owene wa Muluku?

Okathi aalaleerya awe valaponi, Yesu aanilavula itthu sinceene. Mwa ntakiheryo, owo aahiwiixuttiha atthareli awe moota woovekela, moota woomuhakalaliha Muluku, ni moota woophwanya ohakalala wekeekhai. (Matheyo 6:5-13; Marko 12:17; Luka 11:28) Masi, mwaha muulupale waamusivela olavula ovikana myaha sotheene, waari Omwene wa Muluku.​—Luka 6:45.

Ntoko moonale anyu mmwaha woopacerya, Yesu aaniluttuweliwa ‘olaleya ihapari sorera sa Omwene’. (Luka 8:1) Owo aaheetta ikilometuru sinci wIsarayeli wira owiixuttihe atthu Omwene wa Muluku. Ivangelyo 4 sinnooniherya muteko woolaleerya wa Yesu, nave sinniromola Omwene wa Muluku ikwaha sinivikana 100; nto ipantte sinceene sa ikwaha iya 100, saalavuliwe ni Yesu. Masi, sihaavo ikwaha sikina Yesu aalavunle awe sa Omwene sihilempwale!​—Yohani 21:25.

Xeeni Yesu aavaha awe efaita Omwene wa Muluku? Owo aanisuwela wira aahithanliwa ni Muluku wira okhale Namalamulela. (Yesaya 9:5; Luka 22:28-30) Masi Yesu khaaphavela ophwanya okhulupale wala ovuwa. (Matheyo 11:29; Marko 10:17, 18) Owo aahikhalana mathowa maalupale yaamwiiriha olaleya Omwene wa Muluku. Yesu aanisuwela, nave-tho onnisuwelaa wira Omwene ola onoopaka itthu sooreera wa atthu onaaphenta awe, eyo piiyo, Tiithi awe, ni atthareli awe.

OMWENE ONOOTTEELIHA NSINA NA TIITHI AWE YESU

Yesu onnimphenta vanci Tiithi awe. (Miruku 8:30; Yohani 14:31) Nave onnisiveliwa ni mikhalelo Sawe, ntoko: ophenta, othunku ni exariya. (Otumererya 32:4; Yesaya 49:15; 1 Yohani 4:8) Nto, Yesu khivanimusivela wiiwa itthu sowoothiwa voohimya sa Muluku. Mwa ntakiheryo, akina anihimya wira Muluku khonoona othunku, wala vannimuivela atthu yaahaawaka. Nla nthowa nuulupale naamwiiriha Yesu oluttuweliwa olaleya ‘ihapari sorera sa Omwene’. Owo aanisuwela wira Omwene onootteeliha nsina na Tiithi awe. (Matheyo 4:23; 6:9, 10) Moota xeeni?

Yehova orumeelaka Omwene awe, onoopaka marukunuxo anrowa waakhaliherya apinaatamu. “Owo onopuputtha maithori” a atthu owaamini. Nave onoomaliha ele enikumiherya wunla, maana “khonrowa okhala-tho okhwa, nnákhala oripiwa murima, walá ikuttho nnákhala ohawa”. (Wisupulula 21:3, 4) Orumeelaka Omwene awe, Muluku onoomaliha ohaawa wotheene.b

Tivonto Yesu aaphavela awe waaleela atthu voohimya sa Omwene! Owo aanisuwela wira Omwene ola onimooniherya wira Muluku toowerya ni oomoriwa ikharari. (Yakobo 5:​11) Nave, Yesu aanisuwela wira Omwene ola onimwaakhaliherya ale onaaphenta awe, niire so, atthareli awe.

OMWENE ONIMWAAKHALIHERYA APINAATAMU OWAAMINI

Okathi munceene Yesu ohinatthi orwa valaponi, aakhala wiirimu ni Tiithi awe. Tiithi aahimurumeela Mwanawe wira opattuxe itthu sotheene: okhuma erimu erina itheneeri soohikontareya ni igalaaxia, mpakha elapo ni inama sotheene. (aKolosi 1:15, 16) Masi, etthu yaatepa omusivela yaari apinaatamu.​—Miruku 8:31.

Muteko woolaleerya wa Yesu waanooniherya waaphenta wawe atthu. Okhuma wanipacerya, owo aahimyale wira aahirwa valaponi wira ‘alaleerye alipa-òhawa ihapari sorera’. (Luka 4:18) Masi, Yesu aanipaka etthu wira aakhaliherye akina. Mwa ntakiheryo, okathi atthu anceene yaathukumanne aya wira enwiriyane, Yesu “ahamorela ikharari, khwavoniha arett’aya”. (Matheyo 14:14) Okathi mukina, mulopwana mmosa aarina eretta yoowereya aahinvekela Yesu oriki: ‘Mwaatthunaka, mukireerihe’. Mwaha wa niphento ni othunku, Yesu aahinvoniha mulopwana ole oriki: “Kinnitthuna: murerihiwe!” (Luka 5:12, 13) Nave, okathi aamoonale awe mpatthani awe, Maria, anlaka mwaha wa okhwa wa munnawe, Laazaro, owo “ahiripiwa murima”, “winiwa”, ni “ahinla”. (Yohani 11:32-36) Moottharelana, Yesu aahipaka etthu yootikiniha: owo aahimuttikiherya ekumi Laazaro yoole aavirinhe mahiku 4 okhwiiye ene!​—Yohani 11:38-44.

Yesu aanisuwela wira nikhaliheryo naavaha awe naari na okathi vakhaani. Muhoolo, otheene yaale yaapenunxe awe yaamutthikela owereiwa, nave ale yaahihimuxale awe yaamookhwa-tho. Masi, Yesu aanisuwela wira Omwene wa Muluku ti waarowa omaliha voomalela mixankiho iyo. Ti maana aya Yesu khahiyo aapaka miiriirya paahi; masi-tho aaniluttuweliwa ‘olaleya ihapari sorera sa Omwene’. (Matheyo 9:​35) Miiriirya sawe saahooniherya ele Omwene wa Muluku onrowa aya opaka moohipisa mulaponi motheene. Muthokorerye ele Biibiliya onileiherya awe voohimya sa okathi owo.

Iretta sinoomala.

“Mahiku awo anotthukuwa maitho àlipa-òhona, anotthukuwa màru àlipa-òhiwa; alipa-òtuthunya anotupha ntoko nahe: alipa-òhilavula anokhuwela n’utteliwa murima”. Nave-tho, “khavo-tho onkela ohimya wira: ‘Miyo ki muretta’”.​—Yesaya 33:24; 35:5, 6.

Khunrowa-tho okhala okhwa.

“Anaxariya animwakhela elapo yohiyeriw’aya: anrowa okhalaka-mo mahiku othene”.​—Esalimo 37:29.

“Apwiya anomaliha khuluwí okhwa. Apwiya Muluku animukuttha maithori owitho wothene”.​—Yesaya 25:8.

Ale akhwiiye anookhala-tho akumi.

“Onophiya okathi onìraya atthu othene ale ari mmahiye, yiwe nsu na Mwana a Mutthu, ekhume mmahiye”.​—Yohani 5:28, 29.

Ale akhwiiye “anohihimuwa mokhwani”.​—Miteko 24:15.

Atthu otheene anookhalana enupa ni muteko.

“Atthu awo anrowa oteka ipa saya, ekhaleke memmo; anrowa ophatteya miri s’evidera, elyeke mihokorokho saya: khanrowa oteka ipa saya, vano akina ekhaleke-mo: khanrowa ophatteya miri saya, vano akina elyeke mihokorokho sene. . . . Atthu aka animolya mihokorokho sihawenlyaya”.​—Yesaya 65:21, 22.

Ikhotto sotheene sinoomala.

‘Owo oomaliha ikhotto mulaponi mothene’.​—Esalimo 46:10.

“Nloko nimosa khininvenya-tho otuphela nloko nikina: amiravo khanrowa-tho wixuttihiwa owana ekhotto”.​—Yesaya 2:4.

Khenrowa-tho othowa yoolya.

“Etthaya ehìmiha mihokorokho sowatta: Apwiya Muluku ahu ànireriha”.​—Esalimo 67:7.

“Mmatta mothene moruwerye solya sinjene: mattumuxa esareye ipyó”.​—Esalimo 72:16.

Ohaawa wotheene onoomala.

“Alipa-òthoiwa khanliyaliwa wa mahiku othene”.​—Esalimo 9:19.

“Owo onowòpola alipa-òhawa animukhuwelela: onowòpola òthoiwa ahinimona òwakiha. Onimwamorela ikharari alipa-òthanyiwa: onowòpola atthu òhawa ni òwiyeviha”.​—Esalimo 72:12, 13.

Vaavo munaathokorerya anyu anatiri ala voohimya sa Omwene wa Muluku, niireke munnoona nthowa naya Yesu aavaha awe efaita Omwene? Okathi aari awe valaponi, owo aaniphavela vanceene olaleya Omwene; maana aanisuwela wira Omwene owo tonrowa omaliha mixankiho sahu sotheene.

Niireke sooleiherya sa Biibiliya voohimya sa Omwene sinnoosivelani? Akhala wira ti siiso, munrowa wiixutta sai itthu sikina voohimya sa Omwene owo? Mpakeke exeeni wira mwaakhele mareeliho aya? Muru onittharelana onimwaakhula makoho awo.

[Inoota]