MAKOHO ANIKOHIWA NI ALE ANISOMA IREVISTA SAHU

Exeeni ekhanle oopakiwa wira naakhweiherye anna ni arokora ahinilikanana ixeero sa iperfume?

▪ Khula mutthu ohinilikanana ixeero soovirikana ookhalana muxankiho muulupale. Okhala wene awo khaniwerya osyaka ixeero iyo okathi onivara aya miteko sa khula nihiku vanceenexa ni atthu ahinaasuwela aya. Masi, aakhala atthu akonhe vakhala wira vaamureerela anna ni arokora ohiya orumeela iperfume ni ixeero soovirikana okathi onirowa aya omuthukumanoni, asembeleya wala kongresu.

Tthiri khuuvo Kristau onrowa wiiraka osuwelaka, olakeleleke waakumiherya muxankiho atthu akina anirowa mithukumano sa eKristau. Otheene ahu ninnitthuneya olipihiwa omuthukumanoni. (aHéb. 10:24, 25) Nto vakhala wira ookhala mutthu ohinilikanana ixeero iyo khiyapacerya ohirowa mithukumano sa mmulokoni woonasa wene pooti olavula ni axitokweene. Nnaamwi Biibiliya ohihimyaka ni vahireerelaka okumiherya nlamulo wira atthu otheene anirwa mithukumano ahiyeke orumeela iperfume, axitokweene pooti ovaha malakiheryo anoona aya oreerela wira yaakhaliherye atthu otheene a mmulokoni mwaya voohimya sa mwaha ola. Moovarihana ni makhalelo a khula nipuro, axitokweene pooti othokoreya malakiheryo anivahiwa ni iliivuru sahu wira apake mwaha mpantta wa sootthuneya sa mmulokoni okathi wa Muthukumano wa Orummwa, wala pooti opaka yoohimmwa mwa miruku wira yaakhaliherye anna.a Masi axitokweene khanitthuneya omakela olavula mwaha ola. Okhala wene omuthukumanoni wahu annoorwa atthu asya ni akina annixukurya, awo khasuwenle wira wookhala muxankiho ola, nto atthu awo ahaana waakheliwa saana. Ohikhale mutthu onrowa woonaka wira onooramusiwa mwaha wa orumeela wawe iperfume.

Mapuro yaale akhanle aya atthu moota owo, vakhala wira makhalelo anneemererya axitokweene pooti opaka marehereryo wira atthu yaale arina muxankiho owo akilaathiki varyaayaru otteiwene ni ixeero iyo woonasa wene esaala ekina muhina mwa Empa ya Omwene yeeyo. Mwa ntakiheryo, pooti wiiraka yookhala esaala eniira aya yakilaathi anawerya wiiwa ele enihimmwa mmuthukumanoni. Vakhala wira khula etthu enipakiwa khenimaliha muxankiho owo ni woonasa wene aakhala atthu aniwereiwa vanceene mwaha wa ixeero iyo, muloko owo pooti ogravari mithukumano, wala opaka marehereryo wira awiriyaneke mithukumano iyo amurumeelaka telefoni aryeene owannyeya ntoko siniiriwa aya ni ale ahinikhuma owaani mwaha wa oretta.

Mwa iyaakha vakhaani sivinre, Orummwa Ahu wa Omwene, waahaatumererya anna ni arokora wira akhalaneke ephoole okathi onirowa aya owiriyana mithukumano suulupale sa muttetthe. Vanceenexa okhala wira ikwaha sinceene mithukumano iyo sinipakiwa mpaani moowaliwa anirumeeliwa maakina anikumiherya epheyo, anna anirowa mapuro moota owo annivekeliwa ovukula iperfume ni ixeero sinootta aya. Mweettelo owo onnitepa otthuneya vanceene mapuro yaale oniiriwa muthukumano wa muttetthe okhala wira khonikhala opuro wookilaathi anna ahinilikanana ixeero iyo. Masi, khanniphavela wira nla nikhale nlamulo mmulokoni, ni khivanitthuneya wiiriwa siiso.

Okhala wira hiyo ninkhala wanikisa wa makhalelo ala a itthu sootakhala, ninnihaawa mwaha wa ohimalela oranve ahu. Tthiri ninnaaxukhurela atthu animananiha onivukula maxakha! Okathi mukina ti voovila atthu yaale alimalenle orumeela iperfume ni ixeero sikina oleva itthu iyo wira yaahakalalihe annaya anirwa omuthukumanoni sa eKristau. Masi niphento nnoonikhaliherya opaka eyo.

Niireke sookhala iliivuru sikina omuhiya Biibiliya sinimuromola Ponsio Pilato?

▪ Atthu anceene animusoma Biibiliya annimusuwela Ponsio Pilato mwaha wa wiirela wawe mpantta ophukeliwa ni wiiviwa wa Yesu. (Math. 27:1, 2, 24-26) Masi nsina nawe ninniphwanyaneya iliivuru sikina sinihimya sowiiraneya sa okathi ole. Moovarihana ni eliivuru The Anchor Bible Dictionary, ipaaxina sa iliivuru sinihimya sookhumelela sinimuromola Pilato “ti soowaatta ni sinnitthokiherya itthu sinceene voohimya sa yena onvikana khula mutthu a oRoma aatonko okhala Governatoro a oYudeya”.

Nsina na Pilato ninniphwanyaneya ikwaha sinceene iliivuru silempwale ni muYuda yoowo aalepa sowiiraneya oniireliwa Josefo, onimuhimya wahala a Pilato ikwaha tthaaru saamukhumelenle aya mixankiho olamulelaka oYudeya. Yowiiraneya ya neexexe yaalavuliwe ni mulipa oolepa sowiiraneya a oYudeya, Filo. Mulipa oolepa a oRoma Tacito, yoowo olempe sowiiraneya sa olamulelo wa omwene wa oRoma, onnilipiherya ohimya wira Ponsio Pilato teemerenrye wira Yesu iiviweke okathi wa olamulelo wa Tiberio.

Mwaakha wa 1961, alipa oothipa milepe sa khalai yaawo yaathimpe nipuro naari eteatro ya oKesareya, wIsarayeli, yaahiphwanya nluku nimosa naarumeeliwe nilempwale ene nsina na Pilato nttaava na eLatim. Masu ene alempwale (ntoko sinooniherya aya) nipasuwela nla anuupuweliwa wira yaasommwa so: “Wa muluku ottittimiheya (onihimmwa) Tiberio Ponsio Pilato, Mukhulupale a oYudeya, yoowo aatthukulenle nipuro nle”. Empa ele yaahimmwa yaari ntoko etemplo yaavuwihiwa Namalamulela a oRoma, Tiberio.

Niireke vannitthuneya murokora owaraka nleeso okathi oniiriha awe yoosoma oryeene ni munna?

▪“Makoho Anikohiwa ni Ale Anisoma Irevista Sahu” yaakumiheriwe erevista Owehaweha ya 15 a Julyo 2002, vaahihimmwa wira murokora ohaana owara nleeso khula okathi oniiriha awe yoosoma ya Biibiliya oryeene ni munna, okhale oobatiziwa wala nnaari. Nuumala othokoreriwa saana mwaha ola vahooniwa wira vannitthuneya opaka marukunuxo.

Vakhala wira munna ori ni murokora owo okathi oniiriha awe yoosoma ya Biibiliya toobatiziwa, murokora owo ohaana owara nleeso. Murokora owo onnooniherya ottittimiha marehereryo a Yehova voohimya sa okhulupale mmulokoni wa eKristau okhala wira owo onivara muteko yoole okhala wene waarowa ovariwa ni munna. (1 aKor. 11:5, 6, 10) Okathi mukina owo pooti onvekela munna orina awe wira omurantteleke wiiriha yoosoma eyo vakhala wira munna owo onniwerya opaka eyo.

Vakhala wira murokora owo oniiriha yoosoma ya Biibiliya ya khalai masi oryeene ni namaleleerya oohibatiziwa mulopwana yoowo ohikhanle iyawe, Biibiliya khonimukhanyererya murokora owo owara nleeso. Masi, yowuupuxerya ya murima ya arokora akina pooti waatumereryaka owara nleeso khula okathi aryaaya ni munna.

[Enoota]