Mukhaleke Moovarihana ni Nivekelo na Ntakiheryo​—Mpantta I

“Nsina nanyu nivuwihiwe”.​—MATH. 6:9.

NIIREKE MUNNUUPUWELA?

Exeeni enniixuttiha aya nuulumo noowi “Tith’ihu”?

Xeeni vanitthuneya ahu ovekelaka wira nsina na Muluku nivuwihiwe?

Xeeni vanitthuneya ahu okhala moovarihana ni yoovekela yoowi yootthuna ya Muluku yiiraneya valaponi?

1. Moota xeeni okathi mukina ninrumeela ahu nivekelo nilempwale eliivuru ya Matheyo 6:9-13 naalaleeryaka?

ATTHU anceene anniwerya wuupuwela ni oromola masu a Nivekelo na Tiithi Muri Wiirimu. Okathi onilaleerya ahu empa ti empa, ninniromola masu a nivekelo nla wira nimukhaliherye mutthu onimphwanya ahu osuwela wira Omwene wa Muluku eguvernu ya ekeekhai yeeyo enrowa oruuha marukunuxo oovara murima valaponi. Okathi mukina ninnirumeela yoovekela yoopacerya ya nivekelo nla wira nooniherye wira Muluku ookhalana nsina nawe, nenno nintthuneya ovuwihiwa wala ‘othokoreriwa ntoko etthu yowaarya’.​—Math. 6:9.

2. Ninsuwela sai wira Yesu khaaphavela wira masu a nivekelo na ntakiheryo amakeleke otthikeliwa oromoliwa khula okathi onivekela ahu?

² Niireke Yesu aaphavela wira masu a nivekelo nla atthikeliweke oromoliwa khula okathi atthu anivekela aya, ntoko siniira aya atthu anceene anitthara eKristau Yoowootha? Nnaari. Yesu ohinatthi wiixuttiha nivekelo nla na ntakiheryo, owo aahimmye so: “Mwalompaka, muhattiheké molumo anyu”. (Math. 6:7) Okathi mukina muhoolo mwaya, Yesu aahitthikela opaka nivekelo nla, masi orumeelaka moolumo oovirikana. (Luka 11:1-4) Tthiri vannooneya wira Yesu aaphavela onikhaliherya osuwela itthu sinitthuneya ahu ovekela ni otthuneya wa khula etthu eniveka ahu. Tivonto vanireerela aya wiireliwa nivekelo na ntakiheryo.

3. Makoho xeeni anireerela ahu wuupuwelela okathi onrowa ahu othokoreryaka nivekelo na ntakiheryo?

³ Muru ola ni onittharelana ninrowa othokorerya masu a nivekelo na ntakiheryo. Okathi onrowa ahu opakaka eyo, mwiikoheke so ‘Nivekelo nla na ntakiheryo ninrowa okikhaliherya sai olokiherya mavekelo aka? Nikoho nikina nootthuneyexa ti nla, kinnikhala moovarihana ni nivekelo nla’?

“TITH’IHU, MURI WIRIMU”

4. Ninnuupuxerya exeeni nuulumo noowi “Tith’ihu”, ni enamuna xeeni Yehova okhanle awe “Tiithi” a maKristau arina nlipelelo na okhala valaponi?

⁴ Nuulumo noowi “Tith’ihu”, ohiya “Tiithi aka” ninninuupuxerya wira hiyo nniirela mpantta nikhuuru na annihu ‘òwamini’ yaawo aniphentana mukina ni mukhwaawe. (1 Ped. 2:17) Tthiri eyo eparakha yuulupale erina ahu! MaKristau oowoottihiwa, yaawo akhalihiwe aana a Muluku anirowa wiirimu, nto aakhalana ehakhi ya omwiirela Yehova “Tiithi” mwa enamuna yoomalela. (aRom. 8:15-17) MaKristau ale arina nlipelelo na okhala valaponi voohimala anniwerya nave omwiirela Yehova “Tiithi”. Owo Tonivanhe Ekumi, ni onnaaphwanyiha ale animukokhorela mwa ekeekhai itthu sotheene sinaathowa. Ale arina nlipelelo na okhala valaponi anrowa okhala aana a Muluku nuumala otthikela okhala oomalela ni ovikaniha okhala oororomeleya okathi wa weehereriwa wookiserya.​—aRom. 8:21; Wis. 20:7, 8.

5, 6. Yoovaha xeeni yuulupale anamuyari aniwerya aya waavaha anaaya, nto exeeni enitthuneya awe opaka khula mwaana ni ele enivahiwa awe? (Nwehe elatarato yoopacerya.)

⁵ Anamuyari annaahiyerya etthu yooloka anaaya vaavo vaniwiixuttiha aya ovekela ni waakhaliherya omoona Yehova ntoko Tiithi aya oophenta a wiirimu. Munna mmosa yoowo ori mutokweene a esirkwitu wÁfrica do Sul onnuupuwela oriki: “Okhuma nihiku ayariwe aya aniihu axithiyana, kaanipaka nivekelo naawo khula ohiyu, vahikhanle wira kaarimweetta. Aniihu awo okathi mukina annihimya wira khanuupuwela masu yaalavula ahu khula ohiyu naavekelaka. Masi awo annuupuwelela makhalelo a okathi ole, okhala waya vootthuneya olavula ni Tiithi ahu, Yehova, ni mmaaleleyo ni ovareleleya waakhumelela nuumala opaka eyo. Nto nuumala awo owerya opaka nivekelo, kaahaatumererya wira alavuleke moowiiwanyeya wira miyo kiiweke ele yuupuwela aya ni moonelo aya voohimya sa Yehova. Ela yaari enamuna ya vameekhaaya ya osuwela itthu saari vamurimani vayasa. Nto kaanaakhaliherya wira asuweleke itthu sooreerela ohela mmavekeloni mwaya kiwooniheryaka nivekelo na ntakiheryo”.

⁶ Nto anaawe munna owo yaaninnuwa oratteene omunepani. Awo aatheliwa ni annitteeliwa murima ni axiiyaya ni anninvarela Muluku muteko wa orummwa wa okathi wotheene. Anamuyari anoowerya waavaha anaaya etthu yuulupale vaavo vanaakhaliherya aya okhalana ompatthani muulupale ni wooloka ni Yehova. Ekeekhai wira khula mutthu ohaana olipiha mmensawe wataana wawe ni Yehova. Eyo enihela muhina osuwela ni ophenta nsina na Muluku okhapelelaka ni nttittimiho nuulupale.​—Esal. 5:12, 13; 91:14.

“NSINA NANYU NIVUWIHIWE”

7. Eparakha xeeni erina aya atthu a Muluku, masi eyo ennivekela opaka exeeni?

⁷ Tthiri eparakha yuulupale erina ahu ya ohiya osuwela paahi nsina na Muluku, masi hiyo na ‘nloko nnìhaneliwa nsina nawe’. (Mit. 15:14; Yes. 43:10) Hiyo ninninvekela Tiithi ahu a wiirimu wira: “Nsina nanyu nivuwihiwe”. Okathi onipaka anyu yoovekela eyo enoowiirihani onvekela Yehova wira wookhaliheryeni osyaka opaka wala olavula etthu yaarowa onyohola nsina nawe noowaarya. Hiyo khanniphavela olikanaka ni atthu a eseekulu yoopacerya yahaattharihela ele yaalaleya aya. Murummwa Paulo aahilepa aahimyaka yaawo oriki: “Mwaha wa nyuwo, aYuda, nsina na Muluku ninnivehiwa n’amalapo”.​—aRom. 2:21-24.

8, 9. Nvahe ntakiheryo nnooniherya moota Yehova onaareeliha awe ale aniphavelasa ovuwiha nsina nawe.

⁸ Hiyo ninniphavela ovuwiha nsina na Muluku. Nuumala okhweliwa iyawe mootutuxerya, murokora mmosa oNoruega aahihiyeriwa mwaana mwaamulopwana aarina iyaakha piili paahi. Murokora owo onihimya so: “Ole waari okathi wooxankiha vanceene wa ekumi aka. Kaaninvekela Yehova khula nihiku, khula ewoora, wira okilipihe mmuupuweloni mwaka wira kihimphwanyihe Satana enamuna ya omuramusa Yehova mwaha wa opaka yoothanla yoohiloka wala ohiya waamini waka. Miyo kaaphavela ovuwiha nsina na Yehova ni kaaphavela wira mwanaka owerye owoona apapawe mParayiisu”.​—Mir. 27:11.

⁹ Niireke Yehova aahaakhula mavekelo ale a murima wotheene? Aayo. Murokora ole aahivahiwa nikhaliheryo na anna ooreera murima yaamukhapelela. Nuuvira iyaakha thanu, owo aahitheliwa ni mutokweene a mmulokoni. Mwanawe ole, olelo-va orina iyaakha 20 ni munna oobatiziwa. Murokora owo onihimya so: “Miyo kootteeliwa murima mwaha wa aiyaka okikhaliherya omuhuwa mwanaka”.

10. Exeeni enitthuneya wira nsina na Muluku nivuwihiwe voomalela?

¹⁰ Exeeni enitthuneya wira nsina na Muluku nivuwihiwe voomalela ni omala-malihiwa khula etthu eninyohola nsina nlo? Wira eyo yiiraneye, Yehova ohaana waamalamaliha atthu otheene yaale anilakela ohiiwelela okhulupale awe. (Mmusome Ezekiyeli 38:22, 23.) Okathi owo apinaatamu anrowa ottikiheriwa okhala oomalela. Tthiri ninniwehererya okathi soopattuxiwa sotheene sirina ankhili sinrowa aya woonaka nsina na Yehova okhala noowaarya! Nto wookiseryani, Tiithi ahu oophenta a wiirimu onrowa omaliherya “oruma itthu sothene”.​—1 aKor. 15:28.

‘OMWENE ANYU ORWE’

11, 12. Ankhili xeeni yaavahiwe aya maKristau a ekeekhai, wookiseryani wa eseekulu 19?

¹¹ Yesu ohinatthi orowa wiirimu, arummwa awe yaahimukoha ariki: “Pwiya, ti yola okathi onrowanyu otthikiherya omwene wa Isarayeli”? Waakhula wa Yesu waahiwooniherya wira awo khiyareerela osuwela okathi Omwene wa Muluku waarowa awe opacerya olamulela. Owo aahaahimeerya awiixutti awe wira yaahaana okhalela nthiti muteko wootthuneyexa wa olaleerya waavahiwe aya. (Musome Miteko 1:6-8.) Masi, Yesu aahiwiixuttiha atthareli awe wira awehereryeke orwa wa Omwene wa Muluku. Nto okhuma okathi wa arummwa a Yesu, maKristau annivekela wira Omwene orwe.

¹² Vaavo waaphin’ye awe okathi wa Omwene wa Muluku opacerya olamuleliwa ni Yesu wiirimu, Yehova aahaakhaliherya atthu awe wira asuwele itthu saarowa okhumelela saathoonya okathi owo. Mwaakha wa 1876, Munna Charles Taze Russell aahilepa mwaha waakumiheriwe erevista Bible Examiner. Mwaha owo waarina muru oni “Os Tempos dos Gentios: Quando Terminam?”, waahihimya wira mwaakha wa 1914 waari wa vameekhaaya. Mwaha ole waanooniherya ovarihana wa eprofesia ya Daniyeli ya “iyakha thanu na pili” ni ele yaalavuliwe ni Yesu voohimya sa “okathi” wa amalapo.a​—Dan. 4:16; Luka 21:24.

13. Exeeni yaakhumelenle mwaakha wa 1914, nto sooniherya exeeni itthu saakhumelela mulaponi okhuma okathi ole?

¹³ Mwaakhala 1914, yaahikhumelela ekhotto yaawaniwa ni maloko a wEuropa, masi ekhotto eyo yaahuulaana elapo yotheene. Okathi yaamanle aya, mwaakha wa 1918, yaahikhumelela etala yuulupale ehinakhumelele ni waahikhumelela oretta wa kamasi yoowo waawiivale atthu anceene ovikana ale yaakhwiiye okhottoni. Nto “ethonyeryo” Yesu yaahimmye awe wira yaamooniherya orwa wawe wohooneya ntoko Mwene musya a elapo, yaahipacerya waakhwanela. (Math. 24:3-8; Luka 21:10, 11) Sihaavo itthu sinceene sinooniherya wira mwaakha wa 1914 ti okathi Pwiya Yesu Kristu ovahereriwe awe “ekhara y’ovuwa”. Nto “Owo ahivenya wira axintteke nlelo”. (Wis. 6:2) Owo aahikwesa wiirimu okathi waawana awe ni Satana ni malaikha awe, nto khwaavonyerya vathi waattamana ni elapo. Okhuma vaavale, apinaatamu sinnaakhumelela itthu sinooniherya waakhwanela wa masu ala yuupuxeriwe ni Muluku ani: “Nyuwo, elapo ni ephareya, motakhaliwa, mana Satana òkhuruwela wa nyuwo ananariwe ene vanjene, okhala wira òsuwela wira orina okathi vakhani pahi”.​—Wis. 12:7-12.

14. (a) Xeeni nlelo varyaaya vootthuneya ovekelaka wira Omwene wa Muluku orwe? (b) Eparakha xeeni ya muteko erina ahu?

¹⁴ Eprofesia elempwale eliivuru ya Wisupulula 12:7-12 ennitthokiherya etthu eniiriha Omwene wa Muluku okhumelelaka okathi omosaru ni mixankiho sinaahaaxa apinaatamu. Yesu, yoowo ori Mwene a Omwene wa Muluku, aarowa opacerya olamulela eriyari ya awanani awe. Mpakha okathi onirowa awe waaxintta awani awe otheene ni waamaliha atakhali valaponi, hiyo ninrowa ovikanihaka ovekela wira Omwene wa Muluku orwe. Okathi omosaru, hiyo nihaana okhala moovarihana ni masu a nivekelo nlo nikhaliheryaka muteko onittittimiherya “ekanyeryo”. Yesu aahihimya vahinatthi wira: “Ehapar’ila Yorera y’omwene wa wirimu enolaleiwa mulaponi mothene, wira maloko othene esuwele, yamini. Vano-nto, olumwenk’ula omaleke”.​—Math. 24:14.

“OTTHUNA WANYU WIREYE . . . VATHÍ-VA”

15, 16. Ninrowa okhala sai moovarihana ni yoovekela yoowi yootthuna ya Muluku yiiraneya valaponi?

¹⁵ Etthu yowiiraka iyaakha 6.000 sivinre, yootthuna ya Muluku yaaniiriwa voomalela valaponi vaava. Tivonto Yehova nuumala woona itthu sotheene saapattunxe awe khwaavaha apinaatamu vaalavunle awe wira: “sothene sari sorera sana”. (Maph. 1:31) Nuuvira okathi Satana aahimmwareela Muluku, nto okhuma vaavale, atthu vakhaani paahi tanipaka yootthuna ya Muluku valaponi. Masi hiyo olelo-va nooreeriwa okhala wira nnikhala okathi oniphwanyaneya aya Anamoona anivikana imilyau 8, ahinivekela paahi wira Omwene owo orwe masi animananiha okhala moovarihana ni nivekelo nla. Awo annipaka eyo mwa enamuna anikhala aya ni okhalela waya nthiti muteko wowaapaka awiixutti.

¹⁶ Mwa ntakiheryo murokora mmosa obatiziwe mwaakha wa 1948, ni aavara muteko wa omisionaario wÁfrica onihimya so: “Moovarihana ni masu a nivekelo na ntakiheryo, ikwaha sinceene kinnaavekelela atthu anilikana ni ipwittipwitthi wira alaleeriwe ni amusuwele Yehova ohinatthi omala okathi. Ohiya-vo, okathi oniphavela aka omulaleerya mutthu, kinnipacerya ovekela wira Yehova okivahe ankhili anrowa onvara murima mutthu ole. Nto voohimya sa ale anilikana ni ipwittipwitthi yaawo aphwannye ekeekhai, kinninvekela Yehova wira oreelihe wiimananiha waya ni aakhapelele”. Nto khivanitikiniha osuwela wira murokora ola orina iyaakha 80, onnikhumela saana okathi onilaleerya awe, nave okhaliheriwaka ni anna akina ohaakhaliherya atthu anceene okhala Anamoona a Yehova. Moohaaniherya nyuwo munnuupuwelela matakiheryo makina a atthu aniivahererya opaka yootthuna ya Muluku hata arineene mixankiho sa wunnuwela.​—Mmusome aFilipi 2:17.

17. Munoonela sai okathi Yehova onrowa awe waakhula nivekelo noowi otthuna wawe wiireye valaponi?

¹⁷ Mpakha awanani a Omwene wa Muluku opwetexiwa valaponi, hiyo ninrowa ovikaniha ovekela wira yootthuna ya Muluku yiiriweke valaponi. Nto ninrowa woona yootthuna ya Muluku yiiraneyaka moomalela okathi atthu ibilyau sinceene anrowa aya ohihimuxiwa wira yakhaleke mparayiisu. “Itthu iya sihotikiniheni, okhala wira onophiya okathi onìraya atthu othene ari mmahiye, yiwe nsu na Mwana a Mutthu, ekhume mmahiye”. (Yoh. 5:28, 29) Tthiri vanrowa okhala voohakalaliha otthikela owaakhela ale anaaphenta ahu akhwiiye! Muluku “onopuputtha maithori aya othene”. (Wis. 21:4) Anamunceene anrowa ohihimuxiwa anrowa okhala ale “òtakhala murima”, anihimmwa atthu yaale yaakhanle mpakha okhwa ahisuwenle etthu voohimya sa Yehova Muluku ni Mwanawe. Enrowa okhala eparakha yuulupale owiixuttiha atthu yootthuna ya Muluku ni soolakela sawe, ni waakhaliherya wira aphwanelele “ekumi ehinimala”.​—Mit. 24:15; Yoh. 17:3.

18. Tiivi sikhanle itthu suulupalexa sinaathowa apinaatamu?

¹⁸ Elapo yotheene onrowa okhala murettele ni wiiraana mwaha wa ovuwihiwa nsina na Yehova, orumeeliwaka Omwene wa Muluku. Nto waakhuliwa wa itthu soopacerya tthaaru sa nivekelo na ntakiheryo sinrowa waaphwanyiha apinaatamu itthu suulupale sinaathowa. Hata vari siiso, sookhala itthu sikina siniphavela ahu siromoliwe nivekelo na ntakiheryo naapakiwe ni Yesu. Iyo sinrowa othokoreriwa muru onittharelana.

[Enoota]