“Wopoliwa Wanyu Ori Vakhiviru”!

“Mulipihe murima, nvenxe muru, okhala wira wopoliwa wanyu ori vakhiviru”.​—LUKA 21:28.

ISIPO: 133, 43

MWAAROWA WAAKHULA SAI?

Itthu xeeni soolikana ni iye saakhumelenle mwaakha wa 66 EC. sinrowa onikhumelela voohipisa?

Okathi xeeni wooxankiha onrowa okhumelela nuumala opwetexiwa “Babilonia Muulupale”?

Muteko xeeni wa othukumanya onihimmwa eliivuru ya Matheyo 24:31?

1. Itthu xeeni saakhumelenle mwaakha wa 66 EC? (Nwehe elatarato yoopacerya.)

MUUPUWELE vaakhanle wira nyuwo Kristau onikhala oYerusalemu mwaakha wa 66 EC. Nto itthu sinceene sinnikhumelela vakhiviru vanyu. Yoopacerya, guvernatoro a oRoma Floro, aahikuxa muhakhu waakhala empa ya Muluku waaphiyerya italento 17. Voohipisa, aYuda yaahinanariwa, anapacerya owiivakasa anakhotto a oRoma yaari oYerusalemu avekelaka wira ahiye opakiwa ipottha ni aRoma. Masi aRoma yaahixakhiherya mowaakuveya. Muhina mwa myeeri miraru paahi, yaahirwa anakhotto 30.000, yaahooleliwa ni guvernatoro a oRoma wa oSiria, Céstio Galo. Anakhotto ale mowaakuveya yaahimwareela mittetthe sowaattamela oYerusalemu, nto aYuda ale oomwareya yaahitthyawela nipuro noolipexa na empa ya Muluku. Nto, anakhotto a oRoma yaahipacerya ohonona ixiri sa muttetthe ole waattamela otemplo! Muhina mwa muttetthe ole atthu yaari oowoova. Mwaarowa opaka exeeni okathi waarowa anyu woonaka itthu iyo sikhumelelaka?

2. Etthu xeeni yaapanke aya maKristau mwaakha wa 66 EC, nto eyo yaaweryanen’ye sai?

² Moohaaniherya nyuwo munnuupuwela masu a Yesu alempwale ni mulipa oolepa Evagelyo, Luka ani: “Moná vale o Yerusalemu orukureriwene n’anakhotto, okathi uwo musuwele wira ohononiwa waya wophiya”. (Luka 21:20) Masi, nyuwo pooti wiikohaka so: ‘Kinrowa owerya sai wiiwelela malakiheryo a yoolopola ela’? Yesu aahihimya-tho oriki: “Okathi ene yowo, ale ari elapo y’oYudeya, etthyawele omwako. Ale ankhala mmuttettheni, ekhume-mo, ale ari mmatta ehihokolowelé omuttettheni”. (Luka 21:21) Nto mwaarowa okhuma sai oYerusalemu variki aarukureriwe ni anakhotto anceene? Masi, yaahikhumelela etthu yootikiniha. Nto nyuwo munniwoona anakhotto a oRoma atthikelaka elapo aya! Ntoko saahimmwale aya vahinatthi, otuphela waya waahivukuliwa mahiku. (Math. 24:22) Vano waahikhumelela okathi wa wiiwelela malakiheryo a Yesu. Nto voohipisa munnilapuwa murowaka myaako siri okhopela wa Muro Yordani, vamosa ni maKristau makina oororomeleya anikhala mittetthe sowaattamela oYerusalemu.a Vano, mwaakha wa 70 EC, anakhotto akina a oRoma annoorwa opwetexa muttetthe wa oYerusalemu. Masi ekumi anyu ennoopowa mwaha wa wiiwelela malakiheryo a Yesu.

3. Makhalelo xeeni oolikana ni ale yaakhumelenle khalai, anrowa waakhumelela maKristau, nto ninrowa othokorerya exeeni muru ola?

³ Nto voohipisa, voowaakuveya vaavo, khula mmosa a hiyo enoomukhumelela etthu yoolikana ni eyo. Yesu khaaloponle maKristau mwaha wa opwetexiwa wa Yerusalemu paahi, masi owo aahirumeela itthu iye saakhumelenle eseekulu yoopacerya wira olikanyihe ni ele yaarowa okhumelela okathi wa “maxakha malupale” yaawo anrowa opacereya mootutuxerya. (Math. 24:3, 21, 29) Ti vootteeliha murina osuwela wira wookhala “muttitthi mulupalexa” wa atthu anrowa woopowa okathi wa ehasara enrowa okhumelela olumwenku wotheene. (Mmusome Wisupulula 7:9, 13, 14.) Nto exeeni ennihimeerya awe Biibiliya voohimya sa itthu iyo sinrowa okhumelela voohipisa? Hiyo nihaana ophavelaka osuwela waakhuliwa wa nikoho nla okhala wira woopowa wahu onlipa ni waakhula iwo. Vano nrowe nithokorerye soohimmwa kamosa-kamosa sa itthu iye sinrowa okhumelela muhoolo ni woona moota sinimuhela aya muhina khula mutthu.

IPACERERYO SA MAXAKHA MAALUPALE

4. Ekanyero xeeni enrowa wooniherya wira maxakha maalupale aapacerya, ni eyo enrowa wiiraneya sai?

⁴ Maxakha maalupale anrowa opacereya sai? Eliivuru ya Wisupulula ennaakhula etthokiheryaka moota sinirowa awe opwetexiwa ‘Babilonia Mulupale’. (Wis. 17:5-7) Tthiri ti vooreerela okhala wira itiini sotheene soowoka sinilikanyihiwa ni muthiyana namararuwa! Ahooleli a itiini anniraruwa ni makhulupale a olumwenku ola wootakhala. Ohiya omukhaliheryaka Yesu ni Omwene awe, awo annaakhaliherya apinaatamu anilamulela elapo ni aapahula malakiheryo a Muluku wira yooniweke saana ni anapoliitika. Awo ari oovirikana vanceene ni alipa-oowoottihiwa a Muluku anilikana ni imwali soohipaceriwa. (2 aKor. 11:2; Yak. 1:27; Wis. 14:4) Masi ti pani onrowa opwetexa mutthenkeso owo onilikana ni muthiyana namararuwa? Yehova Muluku onrowa ohela mmuruni mwa “manyaka mulokó” ni “nxeni noxerya” “otthuna” wawe. Manyaka awo anithoonyerya olamulelo wotheene wa anapoliitika yaawo animukhaliherya Nações Unidas, mutthenkeso yoowo onilikanyihiwa ni “nxeni noxerya”.​—Mmusome Wisupulula 17:3, 16-18.

5, 6. Ninsuwela sai wira opwetexiwa wa Babilonia Muulupale khonitaphulela wiiviwa wa atthu otheene yeettela itiini iyo?

⁵ Niireke opwetexiwa wa itiini sotheene sa Babilonia muulupale, onitaphulela wiiviwa wa atthu otheene yeetta itiini iyo? Woonasa wene nnaari. Profeta Zakariya aahuupuxeriwa ni Muluku khulepa voohimya sa okathi owo. Olavulaka voohimya sa atthu yaale khalai yiirela mpantta etiini yoowoka owo onihimya so: “Mutthu ti mutthu onohimya wira: ‘Miyo nkihiyó profeta. Miyo ka mulimi. Muteko w’olima t’unvaraka okhuma omiravo aka’. Vano, akhalá onimukoha wira: ‘Weso, mirala xeni iyo siri mwerutthuni mwanyu?’ Owo onimwakhula wira: ‘Kivulalihiwé n’apatthani aka’”. (Zak. 13:4-6) Nto, vannooneya wira aakhala ahooleli a itiini iyo anrowa ohiya itiini saya ni anrowa okhoottaka wira yaaniirela mpantta etiini yoowoka.

⁶ Nto atthu a Muluku anrowa opakaka exeeni okathi owo? Yesu onnitthokiherya: “Muluku ahàvukunle mahiku awo, khavo awerya wopowa. Masi Muluku òvukula mahiku awo mwaha w’atthu òthanliwa”. (Math. 24:22) Ntoko noonale ahu, mwaakha wa 66 EC, maxakha ‘yaahivukuliwa mahiku’ aya. Eyo yaahiweemererya “atthu òthanliwa”, eyo piiyo, maKristau oowoottihiwa, otthyawa muttetthe ole ni mapuro oowaattamela. Vamosaru, mpantta woopacerya wa maxakha maalupale anrowa okhumelela muhoolo anrowa ‘ovukuliwa mahiku’ mwaha wa “atthu òthanliwa”. Anapoliitika, wala “manyaka mulokó” khanirowa weemereriwa waamala-maliha atthu a Muluku. Ohiya-vo, onookhumelela okathi vakhaani woophumurya.

OKATHI WA WEEHERERIWA NI OPHUKELIWA

7, 8. Eparakha xeeni enrowa okhumelela nuumala opwetexiwa mitthenkeso sotheene sa etiini yoowoka, ni moota xeeni atthu a Muluku anrowa aya wooniherya wira awo toovirikana okathi owo?

⁷ Exeeni enrowa okhumelela nuumala opwetexiwa mitthenkeso sa etiini yoowoka? Okathi owo onrowa wooniherya ele eri vamurimani va khula mutthu. Atthu anceene anrowa ophavela opuro wootthyawela mmitthenkesoni sa apinaatamu seiyo sinilikanihiwa ni eriyari ya “miyala sa miyako”. (Wis. 6:15-17) Nilavulaka mwa nlikanyiho, atthu a Muluku anrowa otthyawela nipuro ninrowa awe okumiherya Yehova. Eseekulu yoopacerya, okathi ole wooxankiha khiwaataphulela wira aYuda anceene yaamukela eKristau. Ole waari okathi ale yaari maKristau olipiherya omwiiwelela waya Muluku. Vamosaru, hiyo khanniwehererya wira anookhumelela atthu anceene anrowa okhala anamoona okathi wa maxakha maalupale. Ohiya-vo, owo onrowa okhala okathi wa ale animwaamini mwekeekhai Yehova olipiha waamini waya ni waakhaliherya annawe Kristu.​—Math. 25:34-40.

⁸ Nnaamwi nihisuwelexaka itthu sotheene sinrowa okhumelela okathi owo woweehereriwa, hiyo ninnaamini wira onrowa okhala okathi onivekela oleva mireerelo sahu. Eseekulu yoopacerya, maKristau ale yaahaana ohiya mireerelo saya ni ovilela mixankiho wira awerye woopowa. (Mar. 13:15-18) Nto moophavela okhala oororomeleya, niireke hiyo nnimweemererya opweteiwa mireerelo sahu? Niireke nnoowerya opaka khula etthu enrowa ahu ovekeliwa wira nooniherye omuroromela wahu Yehova? Nkahaya mweemele, muupuwele! Okathi owo, hiyo paahi ninrowa ottharaka ntakiheryo na profeta a khalai, Daniyeli, nivikanihaka omukokhorela Yehova moohicikha etthu sa ele enrowa okhumelela okathi owo.​—Dan. 6:10, 11.

9, 10. (a) Muhupi xeeni atthu a Muluku anrowa aya olaleyaka wuumalani wa olumwenku? (b) Awanani a atthu a Muluku anrowa woonela sai?

⁹ Owo khunrowa okhala okathi wa olaleerya ‘ehapari yorera ya Omwene’. Okathi woolaleerya onrowa wiiraka ovinre ene. Owo onrowa okhala okathi wa ‘omala w’olumwenku’! (Math. 24:14) Moohaaniherya okathi owo atthu a Muluku anrowa olaleyaka muhupi woophukela, woowereya. Woonasa wene eyo enrowa ohela muhina olaleya wira olumwenku ola wootakhala wa Satana woophiya wanikisa waya. Biibiliya onnilikanyiha muhupi owo ni maralala maalupale vaavo vanihimya awe so: “Maluku a maralala malupalexa ni òlemelexa yahamorela atthu. Vano atthu yahimuruwana Muluku mwaha w’ehasara ya maralala, tthiri ehasar’eyo yari yulupale ni yowopihexa”.​—Wis. 16:21.

¹⁰ Itthu iya sotheene sinrowa waaphwanyaka awanani ahu. Uupuxeriwaka ni Muluku, profeta Ezekiyeli aahitthokiherya ele Gogi a Magogi, eyo piiyo, maloko otheene a valaponi, anrowa aya opaka oriki: “Apwiya Muluku animuhimerya Gogi wira: Nihiku nenlo, munotthokelela itthu sinjene, mùpuwelaka owirela sotakhala atthu awo, muhimyaka mmansinyu wira: ‘Kinotuphela elapo ele yohilipihiwa; kinimwatuphela vowatutuxa atthu ale anikhala ni murettele ni witthyala. Mittetthe saya sothene khasirina mikhora nnákhala makokoro walá mwakiheryo mukina’. Kinokuxa mittetthe iye, kinothukumanya mihakhu saya, kinopwetexa mapuro ale atekiwe-tho nanano. Kinimwatuphela atthu ale ethukumanyiwe eriyari y’amálapo’”. (Ezek. 38:10-12) Nilavulaka sa makhalelo a omunepani, atthu a Muluku paahi tanirowa othukumana “eriyari y’amálapo”. Nto eyo enrowa osarya owali maloko. Nto awo, anrowa ophavela waatuphela mowaakuveya alipa-oowoottihiwa a Yehova ni ale anaakhaliherya.

11. (a) Exeeni enireerela ahu wuupuwelela voohimya sa itthu sinrowa wiiraneya okathi wa maxakha maalupale? (b) Atthu anrowa woonela sai mitikiniho sinrowa okhumelela wiirimu?

¹¹ Okathi onrowa ahu othokoreryaka ele enrowa wiiraneya moottharelana, nintthuneya wuupuwelaka wira Nuulumo na Muluku khannihimya itthu iyo moovarihana ni okathi onikhumelela aya mooluluwanya. Vanikhala wira sookhala itthu sinrowa okhumelela okathi omosaru. Yesu aahilavula eprofesia yaahimya imalalelo sa makhalelo ala ootakhala a itthu oriki: “Sinokhumelela ithonyeryo vansuwani, vamwerini ni muthenerini. Vathí-va, maloko othene anokhala òhawa ni òwòva, mwaha w’oruma n’uttikinyeya wa mphareya. Vano atthu anrowa okhwa wova, elipelelaka itthu sinrowa okhumelela mulaponi mothene; mana ikuru sa wirimu sinottikinyeya. Vano-nto atthu anrowa omona Mwana a Mutthu, arwaka mmekuni n’uwerya wulupale n’uvuwa”. (Luka 21:25-27; mmusome Marko 13:24-26.) Niireke waakhwanela wa eprofesia ela onihela muhina wiiraneya mitikiniho ni itthu sikina wiirimu. Nihaana owehererya okathi owo wira noone enrowa okhumelela. Masi khula etthu enrowa okhumelela, enrowa owoopopiha ni waakhulumula awanani a Muluku.

12, 13. (a) Exeeni enrowa okhumelela vaavo Kristu vanirwa awe “n’uwerya wulupale n’uvuwa”? (b) Arumeyi a Muluku anrowa woonela sai okathi owo?

¹² Exeeni enrowa okhumelela okathi Yesu ontthuna awe orwa “n’uwerya wulupale n’uvuwa”? Owo onrowa okhala okathi wa waatthuvela ale ari oororomeleya ni waahukhumu ale oohiroromeleya. (Math. 24:46, 47, 50, 51; 25:19, 28-30) Moovarihana ni eliivuru ya Matheyo, Yesu onimaliherya ohimyaka ekanyeryo ya orwa wawe ni nlikanyiho na ipwittipwitthi ni ipuri, oriki: “Nihiku Mwana a Mutthu ninrwawe n’uvuwa wawe vamosá ni malaikh’awe othene, onokilathi vehijeni vawe vovuwa. Atthu othene anothukumanyiwa oholo wawe. Vano, Owo onimwavalanya atthu òrera murima n’ale òtakhala murima, ntoko makampusi sinvalanyawe ipwittipwitthi n’ipuri. Onokhaliha ipwittipwitthi mono awe wolopwana n’ipuri mono awe wothiyana”. (Math. 25:31-33) Nto masu xeeni oophukela anrowa aya wiiwa ipwittipwitthi ni ipuri? Nlikanyiho nle nimmala nihimyaka so: “Siso, ala [ipuri] animomoleliwa wohawani wohimala [wala wiiviwa]; vano, anaxariya anorowa w’ekumini ehinimala”.​—Math. 25:46.

¹³ Ipuri sinrowa woonela sai nuumala osuwela wira sinrowaniwa “wohawani wohimala”? Iyo sinrowa ‘wìkhupanyerya’. (Math. 24:30) Masi annawe Kristu ni ale anaakhaliherya moororomeleya anrowa woonela sai okathi owo? Amuroromelaka moomalela Yehova Muluku ni Mwanawe, Yesu Kristu, anrowa wiiwelela yooruma ya Yesu yoowi: “Itthu iya sapajeryaka okhumelela, mulipihe murima, nvenxe muru, okhala wira wopoliwa wanyu ori vakhiviru”. (Luka 21:28) Tthiri hiyo ninrowa okhalana muupuwelo wooloka, ni ororomela wira ninrowa woopoliwa.

WAARYA WUULUPALE MOOMWENI

14, 15. Muteko xeeni wa othukumanyiwa onrowa wiiraneya nuumala Gogi a Magogi opacerya otuphela wawe, nto muteko owo onihela muhina exeeni?

¹⁴ Exeeni enrowa okhumelela nuumala Gogi a Magogi opacerya waatuphela atthu a Muluku? Marko ni Matheyo aalepa masu oolikana ariki: “Owo onoruma malaikh’awe wira yathukumanye atthu òthanliwa mulaponi mothene mwa vathí, okhuma wopajeryani w’elapo mpakha wokiseryani w’erimu”. (Mar. 13:27; Math. 24:31) Muteko owo wowaathukumanya atthu khunihimya othukumanyiwa woopacerya wa alipa-oowoottihiwa; nnakhala khonihimya othanliwa wookiserya wa alipa oothanliwa nlelo ari valaponi. (Math. 13:37, 38) Othanliwa nno oniiraneya ahinatthi opacerya maxakha maalupale. (Wis. 7:1-4) Nto muteko xeeni woothukumanya aahimya awe Yesu? Owo okathi yoole a 144.000 nlelo ari valaponi anrowa aya waakhela etthuvo aya ya orowa wiirimu. (1 aTes. 4:15-17; Wis. 14:1) Yowiiraneya eyo enrowa okhumelela nuumala Gogi a Magogi opacerya waatuphela atthu a Muluku. (Ezek. 38:11) Okathi owo anrowa waakhwanela masu ala a Yesu ani: “Vano anaxariya anrowa warya ntoko nsuwa momweneni mw’Atithi aya”.​—Math. 13:43.b

¹⁵ Niireke eyo enitaphulela wira onoophiya okathi alipa-oowoottihiwa anrowa aya “okuxiwa”? Atthu anceene aneettela eKristau yoowoka anaamini wira yowiixuttiha ela enitaphulela wira maKristau awo anookuxiwa ni irutthu saya arowaka wiirimu. Tthiri awo anikupali wira orwa wa Yesu orowa okhala wowooneya ni wira onrowa olamulelaka elapo. Masi, Biibiliya onnooniherya oratteene wira “nthonyeryo na Mwana a Mutthu” ninrowa okhumelela wiirimu ni wira Yesu onimoorwa “mmekuni” a wiirimu. (Math. 24:30) Moolumo ala otheene anihimya wira owo khunrowa wooneyaka. Ohiya-vo, noosuwela wira “Mutthu n’ikuru sawe [ephome ni erutthu] pahi onnojela wakhela omwene wa Muluku”. Nto ale anrowa wiirimu, anitthuneya “otatuxiwa; etthu ila enokhumelela nananoru, ntoko otthukula maitho ni waphila, vanrowaya wompwa nlope nokiserya”.c (Mmusome 1 aKorinto 15:50-53.) Tivonto, vahinireerela ahu orumeela nuulumo noowi “okuxiwa” okhala wira nuulumo nla khannivarihana ni ele eri mBiibiliyani, alipa-oowoottihiwa ari valaponi anrowa othukumanyiwa mwa okathi vakhaani.

16, 17. Exeeni enrowa okhumelela ehinatthi wiiraneya ekasamento ya Mwaapwittipwitthi wiirimu?

¹⁶ Okathi a 144.000 anrowa aya omalela wiirimu, nto enoomaliheriwa olokiheriwa ekasamento ya Mwaapwittipwitthi. (Wis. 19:9) Masi yookhala etthu ekina enrowa okhumelela ohinatthi ophiya okathi owo woohakalaliha. Musuwele wira Gogi onrowa opacerya waatuphela atthu a Muluku a 144.000 akina nlelo aryeene valaponi. (Ezek. 38:16) Nto eyo enrowa okumiherya exeeni? Valaponi atthu a Muluku anrowa okhalaka ntoko kharina nikhaliheryo. Awo anrowa wiiwelelaka malakiheryo yaavahiwe okathi wa Mwene Yosafati wira: “Nyuwo khamunrowa owanano. Mwemele pahi, mwalitteke; munimona wòpowa Apwiya [Yehova] anovahayani nyuwo. Tivó nyuwo, atthu òYuda ni òYerusalemu, muhituthuwasé, muhòv’etthu”. (2 Wah. 20:17) Nto wiirimu enrowa okhumelela etthu ekina. Olavulaka sa okathi alipa-oowoottihiwa otheene anrowa aya okhala wiirimu, Wisupulula 17:14, voohimya sa awanani a atthu a Muluku onnileela so: “Awo anrowa owana ni mwapwittipwitthi, nto ola onrowa wawerya, okhala wira owo ti Pwiya a mapwiya ni Mwené a mamwene. Vano atthu yihaneliwe wopowa, yawo athanliwe, akhanle òroromeleya, anrowa oxintta vamosá ni yowo”. Yesu vamosa ni anamalamulela akhwaawe a 144.000, animoorwa valaponi owaakiherya atthu a Muluku.

¹⁷ Ekhotto ya Harmagedoni enrowa okhumelela enookumiherya otteelihiwa wa nsina na Yehova. (Wis. 16:16) Okathi owo, ale anilikana ni ipuri “animomoleliwa wohawani wohimala [wala wiiviwa]”. Onrowa omala-malihiwa otakhala wotheene valaponi, nto muttitthi muulupale onimoopoliwa maxakha maalupale. Nto malokiheryo otheene yamalela, eponto yuulupale ya eliivuru ya Wisupulula enimwiiraneya, eyo piiyo, ekasamento ya Mwaapwittipwitthi. (Wis. 21:1-4)d Atthu otheene anrowa woopowa okathi owo valaponi anrowa oreelihiwa ni Muluku ni ottottela mureerelo ophenta wawe woomalela. Tthiri eyo enrowa okhala efesta yuulupalexa! Niireke hiyo ninniwehererya okathi owo nuutteeliwa murima vanceene?​—Mmusome 2 Pedru 3:13.

18. Mwaha wa itthu sookuxa murima sihimmwale sinrowa wiiraneya muhoolo, yoolakela ahu ekhaleke evi?

¹⁸ Vano vanisuwela ahu wira sinookhumelela itthu sookuxa murima ohoolo wahu, exeeni enireerela awe opaka khula mmosa a hiyo? Murummwa Pedru aahuupuxeriwa ni Muluku khulepa oriki: “Vavo vo, itthu sothene sintthunaya ohononeya, nyuwo mwettelo anyu okhaleke wowi sai? Mwetteleke murima wa exariya ni womwìwelela Muluku, nwehereryaka nihiku n’Apwiya, mwakuvihaka orwa waya, . . . Tivó, apatthani aka òphentiwa, nalittaka sisa itthu iya, mphaveleke wira Muluku òphwanyeni ni murima worera ni wohittheka ni wa murettele”. (2 Ped. 3:11, 12, 14) Vano nrowe otheene ahu niimananihe okhala ooloka omunepani, ni omukhaliherya Mwene a Murettele.

[Inoota]