Yowiiraneya Ya Mookumini

Yehova Ookivaha Itthu Sinceene Ovikana Iye Kaaphwanela Aka

Elavuliwe ni Félix Alarcón

Miyo kaanisiveliwa ni ophavela itthu ntoko amiravo akina a iyaakha 17. Waanikisivela okhala ni apatthani, okata, ni ommana boola. Masi ohiyu omosa okumi aka waahiturukeya. Yaahikikhumelela ehasara ya moota yeeyo ekirakalinhe okhuma muxikoni mpakha vathi. Soovira iyaakha 30, masi mpakha olelo-va kinikhala vakhaamani paahi.

Kihuuwale epooma ya Alicante, waattamela ephareya ya oMediteraaneo, wEspanha. Emusi aka khiyaiwanana, nto mwaha wa yeeyo, kaaniviriha okathi munceene kiryeene mustaraatani. Waattamela owaani yaahikhala efisina ya ikaaro. Nto mmosa a anamuteko aahikhala mpatthani aka, José María. Owo aari mutthu oophenta ni aanikithokorerya saana waavikana anamuyari aka. Nnaamwi José María aarina iyaakha 20 okivikana miyo, masi okathi wooxankiha aari ntoko munna aka ni mpatthani eekeekhai.

José María iira omusomaka Biibiliya ni Anamoona a Yehova. Owo aanisiveliwa ni itthu aixutta awe ni aamakela okileela itthu iyo. Kaaninwiriyana moomuttittimiha, masi nkaasiveliwa ele yaahimya awe. Murima aka wa omiravo waaxankiheya paahi ni itthu sikina. Masi eyo yaamuturukeya.

EHASARA ETURUNKE OKUMI AKA

Khonkisivela olavula sa ehasara ele. Masi ekhanle aka oohimya tiila: kaahipaka etthu yoohikhala ya miruku ni ya elolo. Nihiku nimosa paahi okumi aka waahiturukeya moomalela. Mootutuxerya kaahihiya okhala mmiravo oowerya, khukhala mutthu aheetta ni aakhala vakhaamani oxipitali. Nkaakupali ele yaakiraneela. Nto kaaniikoha so: ‘Kiireke vannireerela okhala mukumi?’

José María aahirwa okiweha, ni moohipisa aahaavekela Anamoona a Yehova a muttetthe ole wira ekixukurye. Maxukuryo ale yaahivara murima aka. Kikhumakaru esaala yaari aretta ootepexa, kaahipacerya omusoma Biibiliya. Kaahixutta ekeekhai voohimya sa alipa-ookhwa, nthowa naya ninhaawa ahu; ni Muluku onihiya awe itthu sotakhala siireyaka. Kaahixutta-tho sooleiherya sa Muluku sa muhoolo, okathi elapo enrowa aya osareiwa ni atthu oomalela, ni ahinrowa aya ohimyaka wira: “Miyo ki muretta”. (Yesaya 33:24) Mwa ekwaha yoopacerya mookumini mwaka, kaanoona itthu sa muhoolo moohakalala.

Nuumala okhuma oxipitali, kaahirowa vahoolo mwa yoosoma aka ya Biibiliya. Kirumeelaka ekarinyu ya vameekhaaya, kaanirowa omuthukumanoni wa Anamoona a Yehova ni olaleerya. Nto, 5 a Novembro, 1988, kirina ene iyaakha 20, kaahibatiziwa ebanheira ya vameekhaaya. Yehova Muluku ookikhaliherya okhalana moonelo wooloka wa okumi. Masi kaarowa omuxukhurela sai?

KINNIPAKA ETTHU NNAAMWI KIRAKANLE ENE

Nkaaphavela weemya etthu wira ekikhoottiherye omurumeela Yehova. Kaaniphavela orowa vahoolo. (1 Timótheyo 4:15) Wanipacerya, khivaakhanle vookhweya, maana emusi aka khiyaasiveliwa ni etiini aka esya. Masi kaahikhalana axinnaka owaamini yaakikhaliherya. Awo yaaniimananiha wira kiroweleke mithukumano sotheene ni olaleerya.

Nuuvira okathi, kaahoona wira kaanitthuneya okhapeleliwa vanceene. Nto nuumala opaka sootokosa, kaahiphwanya enupa yaakhapeleliwa atthu oorakala epooma yoValência, ikiloomo sowiiraka 160, epantte onikela epheyo ya wAlicante. Owo tokhanle opuro aka mpakha olelo-va.

Nnaamwi kirakanle ene, kimphavela ovikaniha omurumeela Yehova. Kirumeelaka musurukhu kinivahiwa aka mwaha woorakala ni nikhaliheryo nikina, koowerya omuthuma komputadore yoowo onkhala waattamela vakhaamani vaka ni selulari yoowo khuta voosisu oniligariwa ni namuteko a mapuro ala. Wira kiweryeke omurumeela komputadore owo, kinnimutthitta aparelyo ni ekopo ya vameekhaaya yeeyo kinhela aka vayanoni. Ekopo eyo ennikikhaliherya olepa ipaphelo ni okilikari nummuru vaselularini vaka.

Niireke etekonologia eyo ennikikhaliherya? Aayo, maana eyo ennikikhaliherya okela va jw.org ni EBIBLIOTEKA ONLAINE ya Torre de Vigia. Kinnixukhurela vanceene mwaha wookhalana ikaruma iya. Kinniviriha iwoora sinceene khula nihiku kisomaka iliivuru sa mBiibiliyani ni wiixutta itthu sikina sa Muluku ni mikhalelo sawe sootikiniha. Khuta okathi kiniriipiwa aka murima kinniphwanya mwaha wa esaite ahu onikihakalaliha.

Komputadore onnikikhaliherya owiriyana ni wiirela mpantta mithukumano sa eKristau. Kinniwerya okomentari, ovekela, olavula myaha, ni osoma erevista Owehaweha vaavo kinithanliwa aka. Nnaamwi kihiweryaka orowela mithukumano iye, kinnixukhurela vanceene mwaha woowiirela mpantta muloko wa eKristau.

Okhalana selulari ni komputadore onnikikhaliherya olaleerya. Ekeekhai wira nkinwerya olaleerya khuta empa ntoko Anamoona a Yehova akina. Masi eyo khenikiiriha okhumuwa. Kirumeelaka ikaruma iyo, kinniwerya waaleela akina waamini waka. Tthiri, onnikisivela olaleerya ni telefoni; nto axitokweene aakivekela wira kihooleleke ikampaanya sa olaleerya mwa enamuna eyo. Ikampaanya iya anniirela-tho mpantta anna akina ahinwerya okhuma vate vaya.

Masi okumi aka khoneettihiwa paahi ni etekonologia. Khuta nihiku apatthani aka annikixukurya. Awo annaaruuha amusi ni atthu akina aniphavela omusoma Biibiliya. Awo animakela okivekela ohoolela yoosoma eyo. Ikwaha sikina, annoorwa ni imusi saya wira kiireleke mpantta omulompa waya Muluku vatthokoni. Kinnihakalala waaweha anamwane akilaathale ene vakhaamani vaka ni akileelaka nthowa naya animphenta aya Yehova.

Kinnixukhurela oxukuriwa vanceene maana ekwarto aka ennisareya apatthani aka, akina a yaawo anikhuma ottaiwene. Eyo ennaatikiniha anamuteko a opuro ola. Khuta nihiku kinnimuxukhurela Yehova mwaha wokeemererya wiirela mpantta emusi awe yowiiraana.

“NLELO KINIWANA EKHOTTO”

Okathi kinikohiwa aka ehaali, miyo kinaakhula so: “Nlelo kiniwana ekhotto!” Masi koosuwela wira nkikhanle mekhaka ekhotto ela. Voohicikha etthu sa mixankiho sinnikhumelela, maKristau otheene anniwana ‘ekhotto yorera ya wamini’. (1 Timótheyo 6:12) Exeeni enkikhaliherya owana ekhotto eyo mwa iyaakha sinceene? Onvekela ni omuxukhurela Yehova khuta nihiku mwaha wookooniherya yoolakela ya okumi. Nto kinnimananiha omurumeela mooluttuweliwa kilipelelaka itthu sa muhoolo.

Ikwaha sinceene kinnuupuwelela sa elapo esya vaavo kinrowa aka otthikela otthimaka ni otupha. Ikwaha sikina kinnivaanela moothweela ni mpatthani aka José María yoowo oretta wa pólio. Kinnimukoha so: “Ti pani onirowa oxintta okathi ninrowa ahu otthimakaka?” Nto owo onaakhula so: “Etthu yuulupale khahiyo ole onrowa oxintta. Masi ti okhala oParayiisu ni owerya otthimaka”.

Ikwaha sikina khivanikhweya weemya oretta aka. Kinnisuwela wira omiravo aka, kaahipaka etthu ya elolo yeeyo ekiphwanyinhe maxakha. Masi kinnimuxukhurela Yehova mwaha woohikinyanyala. Owo ookivaha itthu sinceene: emusi yuulupale ya anna, ophavela okhala mukumi, ohakalala mwaha wa waakhaliherya akina ni yoolipelela ya muhoolo yoohakalaliha. Vaakhanle wira kiniphavela olavula mmasu vakhaani ele vari vamurimani vaka, kaarowa ohimya so: Yehova ookivaha itthu sinceene ovikana iye kaaphwanela aka.

[Eponto yuulupale epaaxina 11]

Nnaamwi kirakanle ene, kimphavela ovikaniha waaleela akina waamini waka