YOWIIRANEYA YA MOOKUMINI

Kinniphwanya Ikuru Nnaamwi Kiryeene Muretta

Elavuliwe ni Maite Morlans

Vaavo atthu anikiweha aya kikilanthe ene vakarinyuni, khanikupali wira miyo ka mutthu oolipa maana erutthu aka enilemela 29 kg paahi. Masi, vaavo erutthu aka enitepa aya otteettheya, sihaavo ikuru sinikilipiha. Mukihiye kootthokiheryeni moota kiniphwanyaka ikuru nnaamwi kiryeene muretta.

Kuupuwela aka sa onamwane aka, kinnitthokelela mahiku oohakalaliha kikhalaka ni anamuyari aka enupa ya atthu oohaawa oFrança. Apaapa yaahikipakela ebrinquedo, ni vaanikisivela otthimakasa mujardim. Eyaakha ya 1966, Anamoona a Yehova yaahinixukurya ni anavaanela vanci ni apaapa. Nuuvira myeeri 7, apaapa yaahikhala Namoona a Yehova. Moohipisa amaama yaahipaka etthu emosaru. Nto awosa yaahikihuwa etthoko yoohakalala.

Mixankiho saka saapacenrye nuumala otthikela wEspanya, elapo ya anamuyari aka. Kaahipacerya woona owereya vanceene mmatatani ni inawu saka. Nuuvira iyaakha piili naaphavelaka mameediku, naahimphwanya meediku reumatologista yoowo mooriipiha murima aahimmye so: “Moopiserya”. Amaama yaahipacerya wunla. Esaala eyo yaahimaaleleya mooriipiha murima ni kaahiiwa masu ootikiniha ntoko “eretta ehinvoniwa autoimune” ni “poliartrite junevil”a. Nnaamwi kaarina iyaakha 10, kaahisuwela wira ihapari iyo saari sootakhala.

Meediku owo aahihimya wira kaahaana oroihiwa hespitaali ya ekerexa Katoolika yaaloola anamwane. Vaavo kaaphiyale aka enupa eyo, miyo kaahidismayari. Malakiheryo naavahiwa ahu yaari oohaaxa; mafrera yaahimettha ikharari saka, ni khukivaha uniforme oohiloka. Kinlaka kaanuupuwela so: ‘kinrowa ovilela sai opuro ola?’

YEHOVA AAHIKIKHALIHERYA VANCEENE

Mwaha woowi anamuyari aka yaahikiixuttiha omurumeela Yehova, kaahikhootta wiiwelela sowiixuttiha sa ekerexa Katoolika. Mafrera khiyaiwexexa nthowa naya kaakhootta aka. Kaaninvekela Yehova wira ohikihiye, ni kaahoona nikhaliheryo nawe, ntoko tiithi oophenta onimukupaarela mwanawe.

Anamuyari aka yaheemereriwa okixukurya eSaabadu masi okathi vakhaani. Awo yaahikiruuhela iliivuru sa Biibiliya saakilipiha momunepani. Anamwane khiyeemereriwa okhalana iliivuru saya, masi mafrera ale yaahikeemererya ohalana iliivuru iye ni Biibiliya kaamusoma aka khula nihiku. Nave, kanaaleela anamwane akina axithiyana nlipelelo naka nookhala oParayiisu valaponi, weiwo atthu ahinrowa aya owereiwaka. (Wisupulula 21:3, 4) Nnaamwi okathi mukina kaariipiwa murima, kaanihakalala mwaha woowi omuroromela waka Yehova waanilipa.

Nuuvira myeeri 6, mameediku yaahikemererya orowa owaani. Nnaamwi kahaapenunwe, kaahihakalala orowa okhala ni anamuyari aka. Makhuva aka yaanitepa otteettheya, ni kaanoona owereya. Kaahiphwanya omwali aka kiryeene otteettheya vanci. Masi, kirina ene iyaakha 14, kaahibatiziwa ni kaahilakela omurumeela Tiithi aka a wiirimu ni murima wotheene. Masi, ikwaha sikina kaanixankiheya, nto kinavekela so: “Xeeni kinihaawaka? Xontte Muluku, mukipenuxe. Khamunoona ohaawa waka?”

Omwali aka waari wooxankiha. Kaahaana okupali wira nkaarowa openuwa. Nto, khivaareerela wiilikanyiha ni apatthani aka yaarina okumi wooloka. Kaniixoona ohikhalana efaita ni nkaawerya ovaanela ni atthu akina. Nto emusi aka ni apatthani yaanikikhaliherya. Kinnimuupuwela Alicia yoowo aarina iyaakha 20 mookivikana miyo aari mpatthani aka ekeekhai. Owo aahikikhaliherya oliyala eretta aka ni opacerya waacalela akina ohiya mixankiho saka paahi.

KAAHIPHAVELA INAMUNA SOOHAKALALIHA OKUMI AKA

Vaavo kaarina aka iyaakha 18, kaahiwereiwa vanci, nto hata orowa omuthukumanoni wa eKristau waanikixankiha. Masi, kaahittottela mureerelo “okathi aka woomumula” wira kimusome Biibiliya moomaaleleya. Eliivuru ya Yobi ni Esalimo, yaahikikhaliherya woona wira Yehova Muluku onninthokorerya wanipacerya mmukhalelo womunepani ohiya werutthuni. Ovekela waka moohihiyererya, wookivaha “owerya . . . wulupalexa onrwa wa Muluku” ni “murettele wa Muluku onvikana osuwela wa mutthu”.​—2 aKorinto 4:7; aFilipi 4:6, 7.

Vaavo kaarina aka iyaakha 22, kaahaana weemererya weetta ni ekarinyu. Kuupuwela wira atthu khiyaarowa okicalelaka ni yaarowa onwehaka muthiyana oowereiwa vakarinyuni. Masi, ekarinyu yaahikiphwanyiha otaphuwa, nto ele yuupuwelaka okhala otakhaliwa yaahikumiherya mareeliho. Mpatthani aka Isabel, aahikitumererya oviriha iwoora 60 mweeri mmosa nilaleeryaka hoothe.

Wanipacerya, koona wira nkaarowa owerya opaka eyo. Masi kaahinvekela Yehova. Nave, kikhaliheriwaka ni amusi aka ni apatthani kaahiwerya. Nto mwaha wowaatteliwa miteko, mweeri owo waahivira mowaakuveya, ni kaahoona wira kaahixintta woova ni wuuliwa muru. Waahikisivela vanci, nto mwaakha wa 1996 kaahithanla okhala pioneera ookilaatheya, kilaleeryaka iwoora 90 khula mweeri. Opaka eyo waahikiiriha omwaattamela Muluku ni okilipiha werutthuni. Nave, waahikiiriha waalaleerya atthu anci ni waakhaliherya akina okhala apatthani a Muluku.

YEHOVA ONNIVIKANIHA OKIKHALIHERYA

Elimwe ya 2001, kaahimaniwa ni ekaaro, nto sinteya metto saka soomiili. Kiryeene vakhaamani ya hospitaali ni koonaka owereya vanci, kaahinvekela Yehova wiira: “Xontte, muhikihiye!” Muthiyana aattamenle ekhaama aka, aahikikoha so: “Nyuwo mwa Namoona a Yehova?” Nkaarina ikuru somwaakhula, kaattikinnye muru paahi. Owo aahilavula so: “Miyo kinnaasuwela Anamoona! Kinnisoma irevista saya”. Masu awo yaahikilipiha vanci. Hata koona owereya, kaahiwerya olavula sa Yehova. Eyo yaari eparakha yuulupale!

Nuumala openuwa vakhaani, kaahiphavela wuncererya olaleerya. Nnaamwi metto saka saamariwe egeso, amaama yaanikixova vakarinyuni vate va hospitaali wira kilaleeryeke. Khula nihiku, nanaaxukurya aretta vakhaani, nnaakoha ihaali saya, naavahaka irevista. Waaxukurya aretta awo waari wooxankiha, masi Yehova aanikivaha ikuru.

Mahiku ala, kinootepa owereiwa; nave okhwa wa apaapa ohincererya oriipiwa waka murima. Hata vari siiso, kinnimananiha okhalana muupuwelo wooloka. Moota xeeni? Kinnimananiha okhala hoothe ni apatthani ni amusi anikikhaliherya oliyala mixankiho saka. Okathi kinikhala aka mekhaka, kinnimusoma Biibiliya wala waalaleerya akina kimurumeelaka telefoni.

Nave kinnimananiha ophwanya ohakalala hata ni itthu saamukhaani ntoko: epheyo enimana owiitho waka ni wunkhela wa ifilori. Itthu iyo sinnikiiriha oxukhuru. Okhalana muupuwelo wooloka onnikikhaliherya vanci. Mwa ntakiheryo, nihiku nimosa nilaleeryaka, mpatthani aka aaxova ekarinyu, aaheemela wira olepe etthu. Mootutuxerya, ekarinyu yaahipacerya weetta mekhaya mpakha omana ekaaro yeemexiwe. Otheene ahu naahixankiheya, masi vaavo noonale ahu wira khiyaakhumelenle etthu yooxankiha, naahitheya vanceene.

Sihaavo itthu sinci kihinwerya aka opaka. Kinnuupuwela wira itthu iyo kinoovara muhoolo. Ikwaha sinci kinniwala maitho aka ni kinnuupuwelela kiryeene elapo esya Muluku oleihenrye awe. (2 Pedru 3:13) Kinnuupuwela keettaka ni metto sooloka, kirina ene okumi woomalela ni woohakalaliha. Kinnipweha vamurimani, masu a Mwene Davidi yaawo ani: “Mwaroromele Apwiya [Yehova]: mwilipihe. Mulipihe murima”. (Esalimo 27:14) Nnaamwi erutthu aka etepaka otteettheya, Yehova onnikilipiha. Tthiri, kinnivikaniha ophwanya ikuru nnaamwi kiryeene muretta.

[Enoota]

[Eponto yuulupale epaaxina 9]

Ikwaha sinci kinniwala maitho aka ni kinnuupuwelela kiryeene elapo esya Muluku oleihenrye awe