‘Nsina Na Muluku Nivuwihiwe’
1. Muthukumano wa esirkwitu wa mwaakha wa muteko a 2012, orina muru xeeni, ni okhumme yoolepa xeeni?
1 Eparakha yuulupale olaleya nsina na Mwene a Olumwenku Wotheene, Yehova! Muluku oonivaha nsina nawe wira nilaleyeke, nto okhuma mwaakha wa 1931, ninniihaniwa Anamoona a Yehova. (Yes. 43:10) Yesu, mwaana oopaceriwa a Muluku, aanittittimiha vanceene nsina na Muluku, tivonto nivekelo nne noosuwelexiwa, owo aapacerinhe nsina na Muluku. (Math. 6:9) Moovarihana ni nivekelo nno, eprokrama ya muthukumano wa esirkwitu mwaakha wa muteko wa 2012, eni: “Nsina Na Muluku Nivuwihiwe”.
2. Itthu xeeni soohakalaliha sinilipelela ahu wiiwa?
2 Ninrowa Wiiwa Exeeni? ESaabadu, onoolavuliwa mwaha oni: “Arumeyi a Okathi Wotheene Annaasuweliha Akina Nsina na Muluku”, yoowo onirowa othokorerya ohakalala oniphwanyiwa mmuteko wa okathi wotheene. Nave, nnoowiriyana mwaha woohiyeryana oni: “Nisyake Onanariha Nsina na Yehova”, yoowo onirowa onikhaliherya moota woosyaka miraakho mixexe sowoopiha. Mwaha oni: “Nthowa Naya Vanitthuneya Aya Ovuwihiwa Nsina na Muluku”, onimwaakhula makoho ani: Exeeni enrowa onikhaliherya olaleerya mooluttuweliwa vaavo atthu anikhala aya ntoko khansiveliwa vanceene? Nave-tho exeeni enrowa onikhaliherya olaleeryaka mwa nthiti? Ettiminku, nnoowiriyana mwaha woohiyeryana wa ipantte xexe, yoowo onrowa onooniherya moota woovuwiha nsina na Muluku orweela mwa muupuwelo ahu, moolumo ahu, soothanla sahu ni mweettelo ahu. Vanceenexa, ale apacenrye wiixutta ekeekhai niinano anoosiveliwa owiriyana mwaha wa atthu otheene oni: “Yehova Onoovuwiha Nsina Nawe oHarmagedoni”.
3. Eparakha xeeni erina ahu, nto moota xeeni muthukumano wa esirkwitu onirowa aya onikhaliherya?
3 Moohipisa, Yehova onoovuwiha nsina nawe. (Ezek. 36:23) Nilipelelaka okathi owo, nihaana eparakha ya okhaliherya wira nsina noowaarya na Yehova nivuwihiwe. Tthiri, ninniroromela wira muthukumano ola wa esirkwitu onooniiriha ovikaniha olaleya nsina na Muluku mooluttuweliwa.