‘Otthuna wa Muluku Wireye’
1. Eprokrama ya muthukumano wa vameekhaaya ya mwaakha wa muteko wa 2012, erina muru xeeni? Nto xeeni vanitthuneya aya wira nithokorerye mwaha ola?
1 Yehova oonipattuxa mwaha wa otthuna awe. (Wis. 4:11) Nto, nnoomuhakalaliha Mpattuxa ahu niixuttaka ni opaka yootthuna awe. Masi, khivanikhweya opaka eyo, maana nihaana wiimananiha vanceene wira nisyake opaka itthu ‘sinitthuna erutthu ahu ni mupuwelo ahu’, wala opaka sootthuna “s’atthu ahinamini”. (aÉf. 2:3; 1 Ped. 4:3; 2 Ped. 2:10) Naahikhaliheriwe ni Muluku, hiyo pooti ‘ovariwa ni Satana onikhanyererihaka wira sintthunawe’. (2 Tim. 2:26) Tivonto, eprokrama ya muthukumano wa vameekhaaya ya mwaakha wa muteko wa 2012, enoonikhaliherya wiiwelela itthu tthaaru soopacerya siromoliwe munivekeloni noosuwelexiwa na Yesu, nni: “otthuna wanyu wireye”.—Math. 6:10.
2. Makoho xeeni anirowa waakhuliwa okathi wa eprokrama?
2 Makoho Anrowa Waakhuliwa: Okathi onirowa anyu owiriyanaka eprokrama, animwaakhuliwa makoho ala: (1) Exeeni eri yootepa otthuneya ohiya owiriyana paahi Nuulumo na Muluku? (2) Ninrowa osuwela sai yootthuna ya Muluku? (3) Xeeni vanitthuneya ahu ophavelaka waalaleerya atthu otheene? (4) Munrowa ophwanya sai okumi woohakalaliha? (5) Nyuwo amiravo, munrowa opaka exeeni wira mmukupali Yehova? (6) Mareeliho xeeni ninrowa ahu waakhela akhala wira nnoopakaka yootthuna ya Muluku? (7) Xeeni vari aya vootepa otthuneya waalipiha akina?
3. Ninrowa ottottela sai mureerelo muthukumano ola wa vameekhaaya?
3 Muhooceele orowela muthukumano ola, ni mwawiriyane saana ipantta sotheene sa eprokrama. Munna onikhuma oBetheli wala mutokweene ooweetteetta, onrowa olavula mwaha wa mulipa onixukurya. Ehinatthi opacerya ni yamala eprokrama, pooti ovaanela ni munna owo ni amwaarawe, akhala wira oothela. Mwatthikela owaani, mwiimananihe wira ‘muhiliyale’ ele mwiixuntte anyu; nto muuluule ni othokorerya ni etthoko anyu itthu munitthuneya anyu opaka wira mweetteleke otthuna wa Muluku.—Yak. 1:25.
4. Xeeni vanitthuneya ahu opakaka yootthuna ya Muluku ni murima ahu wotheene?
4 Moohipisa, ale anitthara makhalelo ootakhala, ni okhootta opaka yootthuna ya Muluku, anoopwetexiwa. (1 Yoh. 2:17) Tthiri, ninnimuxukhuru Yehova maana oonivaha malakiheryo ootthuneya yaawo annikhaliherya opaka yootthuna ya Muluku ni murima ahu wotheene!