Nwiriyane ni Mwiixutte
1. Xeeni onitthuneya aya wiimananiha vanci wira niwiriyane ni wiixutta okongresuni a edistritu?
1 Moohipisa-va, akongresu a edistritu a 2013 anirowa opacerya. Tthiri, muteko munci woovariwa wira elokiheriwe eprograma enithokorerya sootthuneya sa muteko woolaleerya elapo yotheene. Niireke moopaka mareheryo wira murowe mahiku otheene mararu a kongresu? Kongresu orina atthu anceene pooti okhumelela itthu sinaakanyerya muupuwelo, tivonto onitthuneya aya wiimananiha vanci wira nivahe ephoole eprograma. Okhala wira ipantte saya sinikhala soorakama ovirikana mithukumano sa mmulokoni, nto owiriyana saana ti wootthuneya vaalupale. Ohiya-vo, weetta mukwaha ni itthu sikina pooti oniiriha okhulumuwa. Nto exeeni enirowa onikhaliherya wira nivikanihe okhala oowehaweha wira niwerye owiriyana ni wiixutta?—Otum. 31:12.
2. Ninrowa olokiherya sai murima ahu voohimya sa eprograma ya kongresu?
2 Ohinatthi Opacerya Kongresu: Web site ahu, www.jw.org, ookhalana eprograma ya kongresu, yeeyo enihela muhina miru sa myaha sotheene ni yoolepa emosa wala piili sinittittimiherya iponto suulupale sa khula mwaha. Akhala wira ninnirumeela Internet, woona vahinatthi soohimmwa iya, onoonikhaliherya olokiherya murima ahu voohimya sa ele enirowa okumiheriwa. (Ézi. 7:10) Nto okathi wa omulompa Muluku vatthokoni, nyuwo pooti ovaanela moohakalala ni etthoko anyu voohimya sa kongresu onaattamela.
3. Exeeni enirowa onikhaliherya owiriyana ni ephoole?
3 Okathi wa Eprograma: Vaaweryaneyaka, murowe oxoworo ehinatthi opacerya eprograma. Mmuttipihe celulari anyu wira muhaakanyeriwe ni atthu anirowa wooligarelani, wala weeherereya waakhula mensage okathi wa eprograma. Akhala wira khamunrowa omuttipiha celulari owo, mmuregulari wira ohaanyoonyihe akina akhala wira ookhala onooligarelani. Akhala wira munimurumeela komputadore wala etthu ekina ya eletronika, mukhalane ephoole wira muhaanyoonyihe akina. Okathi wa eprograma, musyakeke olya etthu. (Mus. 3:1) Munwehexexeke ole onilavula mwaha. Vaavo enisommwa aya yoolepa, mutthareke mBiibiliyani mwanyu. Mulepeke itthu vakhaani siniiwa anyu.
4. Anamuyari anirowa waakhaliherya sai anaaya wira awiriyane ni yiixutte?
4 Nave-tho, nimphavela wira aniihu awiriyane ni yiixutte. Miruku 29:15 onihimya so: ‘Mmiravo onihiwa ettaka sintthunawe onowùlihiha muru ame awe’. Tivonto vanireerela aya wira imusi sikilaathiki hoothe wira anamuyari aweryeke osuwela akhala wira anaaya anniwiriyana saana eprograma ohiya othweela, olepa mensage, wala weettakasa. Hata akhala wira nlelo acikhaani vahiniwerya aya wiiwa khula etthu enilavuliwa, anamwane anoowerya wiixuttihiwa wira ahirupeke ni okhala oomaaleleya.
5. Xeeni vari aya vootthuneya wuuluula eprograma, ni ninrowa wuuluula sai?
5 Nuumala Eprograma ya Khula Nihiku: Muhipiseke orupa. Murooke orupa vahinatthi wiila vanceene wira mphumurye saana. Wuuluula ele mwiiwale anyu onimookhaliheryani wuupuwelela okathi munceene. Nto, vanrowa okhala wooloka khula ohiyu oviriha okathi vakhaani wira nvaanele ni emusi anyu voohimya sa eprograma. Akhala wira munrowa orestaurante ni axipatthani anyu, pooti okuxa epaphelo mulempe anyu itthu mwiiwale anyu nto khiyavaanela naawo eponto emosa wala piili soosivenleni. Vaavo munitthikela anyu owaani nuumala kongresu, nyuwo pooti orumeela okathi wa omulompa Muluku vatthokoni wira nvaanele moota woovarihela muteko malakiheryo awo vatthokoni vanyu. Nave-tho, nyuwo pooti wiivaha okathi khula esumana wira muuluule iliivuru sikumiheriwe niinano.
6. Niireke orowa okongresuni paahi vanniphiyerya? Mutthokiherye.
6 Eyoolya khenrowa omukhaliherya mutthu vanci ohikhanle wira orimoolya ni ophumurya. Eyo enilikanasa ni eyoolya ya omunepani enirowa ahu ovahiwa okongresuni. Nto, nrowe nittottele mureerelo oratteene eprograma yotheene ya kongresu, orweela mwa owiriyana saana, ni ovarihela muteko ele enirowa ahu wiixutta.