‘Mwaathukumanye Atthu’
1. Moota xeeni akongresu a vano anilikana aya ni okathi woohiliyaleya aIsarayeli yaathukumanne aya omwaako Sinayi?
1 Okathi vakhaani nuumala aIsarayeli okhuma wEjiitu, Yehova aahimuruma Moise ‘waathukumanya atthu’ omwaako Sinayi wira yiiwe masu Awe, omoova ni owiixuttiha anaaya iphiro Sawe. (Otum. 4:10-13) Tthiri owo waari okathi woohiliyaleya ni woolipiha! Moolikanasa, myeeri vakhaani sinirwa, atthu a Yehova anrowa othukumana wira amwiire kongresu a edistritu ni kongresu anithukumana anna a ilapo sinceene wira yiixuttihiwe ni Yehova. Nipake exeeni wira nimuttottele mureerelo saana kongresu a mwaakha ola?
2. Nipakeke exeeni wira niilokiherye voohimya sa kongresu?
2 Mwiilokiherye: Yehova aahaaruma aIsarayeli wira yiilokiherye wira yathukumane omwaako Sinayi. (Okhum. 19:10, 11) Moolikanasa, ti vootthuneya otheene ahu wiilokiherya saana, ohiya paahi ale arina epantte. Mwa ntakiheryo, anamunceene ahaana oveka efolga omutekoni. Waaniheryasa, mukhalelo anyu onilikana ni Nehemiya. Owo aaphavela ohiya muteko awe wa onvahererya soowurya Mwene Artaserse wira orowe oteka ixiri sa oYerusalemu. Masi aanisuwela wira mwene owo waaniheryasa khaarowa weemya. Nehemiya aahinvekela Yehova nto moolipa murima khurowa olavula ni mwene orumeelaka moolumo ooreera! Mwene aaheemya, ni aahipaka etthu wira okhaliherye muteko wa Nehemiya! (Neh. 2:1-9) Nave, ti vootthuneya opaka mareheryo a mukwaha ni opuro woorupa. Axitokweene anoosiveliwa waakhaliherya ale aniphavela. Mumpake palano wira mphiyeke eprograma ehinatthi opacerya, ni owiriyana saana ele enirowa anyu wiiwaka.—aHéb. 2:1.
3. Exeeni enrowa onikhaliherya olokiherya murima ahu?
3 Nave, ti vootthuneya olokiherya murima ahu wira nawiriyane ni wiixutta. (Ézi. 7:10) Eprograma ya kongresu enoopwehiwa vahinatthi musaite jw.org, nto enimooniheryaka miru vamosa ni yoolepa emosa wala piili suulupale. Owo mwaha wooreerela othokorerya okathi Woomulompa Muluku Vatthokoni, aattamelaka kongresu. Anamalaleerya akina annimpirimiri eprograma eyo nto khiyarumeela wira alepe itthu vakhaani okathi wa kongresu.
4. Anamuyari anrowa omurumeela sai kongresu wira awiixuttihe anaaya?
4 ‘Nwiixuttiheke Aninyu’: Yoolakela emosa ya kongresu omwaako Sinayi yaari yoowi anamuyari a aIsarayeli ‘awixuttihe anaaya’. (Otum. 4:10) Kongresu onnaavaha anamuyari eparakha yoopaka eyo. Anamuyari ahaana okilaathiki ni anaaya okathi wa eprograma wira yaakhaliheryeke ovaha ephoole. Wanikisa wa khula nihiku ni okathi wa omulompa Muluku vatthokoni, imusi pooti othokorerya iponto siixuntte aya.
5. Mureerelo xeeni ninrowa ahu ophwanya okongresuni?
5 Kongresu ohiniliyaleya waapakiwe omwaako Sinayi waahaakhaliherya aIsarayeli ovaha efaita eparakha ya okhala atthu a Muluku. (Otum. 4:7, 8) Nto, kongresu ahu onaattamela olokiheriwe wira onikhaliherye mwa enamuna emosaru. Mwa mahiku 3, ninrowa okhalana eparakha yookhala ottaiwene ni olumwenku ola wa Satana ni olipihiwa ni anna mwa eparayiisu ahu ya omunepani. (Yes. 35:7-9) Nto, vaavo nnaattamela aya nihiku na Yehova, nihipweteiweke eparakha ela ya othukumana wira nilipihaneke mukina ni mukhwaawe!—aHéb. 10:24, 25.