Olaleerya Nirumeelaka Ekarinyu Wala Meesa
Olaleerya erumeeliwaka ekarinyu wala meesa arina iliivuru, onniwiiriha atthu a murima saana weemya ekeekhai. (Yoh. 6:44) Axitokweene a mmulokoni annitumereriwa oweha muttetthe wa muloko ni opaka eprograma ya olaleerya mapuro otheene oniphwanyaneya atthu anceene. Okhala wira ekarinyu wala meesa khapakeliwe okhala opuro omosa, woonasa wene khivanitthuneya oveka weemereriwa ni makhulupale a epooma eyo. Ti pani aniphwanela orumeela enamuna ela? Ti anamalaleerya a miruku, oottittimiheya ni oowara saana yaawo aniwerya opaceriha ovaanela ni atthu. Malakiheryo anittharelana animookhaliheryani okhumela saana mwa enamuna ela yoolaleerya.
Ele Ekhanle Anyu Oopaka:
• Mukhaleke oophenta, ni mwaathokoreryeke ale anivira. Anamalaleerya akina anniwaakhela atthu moophenta, moohakalala ni waalavuliha ntoko apatthani. Akhala wira mutthu owo onniwehexexa meesa wala ekarinyu nto onaattamela, nyuwo pooti omukoha so: “Kiireke yookhala eliivuru yoosivenleni?”
• Mweemeleke opuro woophwanelela. Mittetthe sikina anamalaleerya annikhumela saana vaavo aneemela aya vakhiviru va ekarinyu wala meesa awo. Anna akina annoona wira enamuna ela enniwiiriha atthu ohiphavela weemela, nto anna awo annirakamela vakhaani enamulipelela ole onrowa weemela waattamela vakarinyuni. Vaavo mutthu onaattamela awe ekarinyu eyo, mwiimananihe ovaanela ni yena, waaniheryasa pooti omukoha so: “Niireke mootoko wiikoha siiso?”
• Vaweryaneya mmurumeele Biibiliya.
• Akhala wira mutthu owo ookuxa eliivuru emosa enisommwa ntoko “Biibiliya Oniixuttiha Exeeni?”, muhaana omutthokiherya wira aakhala mareheryo a yoosoma ya Biibiliya. Murumihe eviidiyu eni Xeeni Vanitthuneya Anyu Omusoma Biibiliya eri mutelefonini wala ekaruma akina eletronika.
• Vaweryaneya mmukohe moota mukhanle anyu ookumana-tho. Akhala wira onikhala muttetthe mukina, mmalelihe olepa eformulaario Queira Visitar (S-43-T), ni moohipisa munvahererye mulipa-oolepa a muloko anyu.
Ele Ehikhanle Anyu Oopaka:
• Okhala oowali, ookhanyererya, ni weemela opuro owo voheeteteya ntoko kwarda.
• Wuupuwela wira olaleerya nno ti enamuna enikhweiherya okawa iliivuru. Okhala wira yoolakela ahu ori opaceriha soosoma sa Biibiliya, nto nihaana omananiha ovaanela ni khula mutthu.
• Ottiyelela meesa wala ekarinyu wala ovaanela mootepana ni mpatthani anyu. Akhala wira munrowa ophavela omulikarela mutthu ni selulari, muhaana osusa vakhaani opuro owo.
• Onyakulihana ni ale annivaanyiha. Akhala wira namavaanyiha mmosa onnipacerya oveeha, muhaana othaamela opuro mukina.