Omphenta ni Omuxukhurela Yehova Onoowiirihani Opatisiwa

1-2. Moovarihana ni Miteko 8:27-31, 35-38, exeeni yaamwiirinhe mulopwana oohuliwa a wEthiyopia opatisiwa?

NIIREKE munniphavela opatisiwa wira mukhale mutthareli a Kristu? Atthu akina aapaka eyo. Etthu yaakhalihenrye, waari ophenta ni oxukhurela. Nrowe nthokorerye ntakiheryo na mulopwana oohuliwa aamurumeela pwiyamwene a wEthiyopia.

² Mulopwana ole a wEthiyopia, nuumala wiixutta soolempwa wira ahaana opatisiwa, owo aahipatisiwa moohipisa. (Musome Miteko 8:27-31, 35-38.) Exeeni yaamwiirinhe opaka eyo? Moohaanyiherya, mulopwana ole aanivaha efaita nuulumo na Muluku, maana aahisoma iversu vakhaani sa eliivuru ya Yesaya okathi aari awe mukaaroni okhumaka oYerusalemu orowaka wEthiyopia. Nto okathi Filipi aalavulana awe, mulopwana ole aahixukhurela vanceene ele Yesu aapanke awe. Masi xeeni ohalaka orowa oYerusalemu? Mwaha woowi, okhuma khalai aanimphenta Yehova. Ninsuwela sai? Ninnisuwela eyo, mwaha woowi aakhuma aamukokhorela awe Yehova oYerusalemu. Vanikhala ntoko wira, mulopwana ole aahituruka etiini awe aayaraniwe awe ni aahitakaahana ni nloko naivaherenrye wira nimurumeeleke Muluku eekeekhai. Okhala wira aanimphenta Yehova, owo aahilakela opaka etthu ekina yootthuneya. Owo aahipatisiwa wira okhale mutthareli a Kristu.—Math. 28:19.

3. Exeeni ekhanle oomukhoottiherya mutthu opatisiwa? (Nwehe ekaaxa eni: “Murima Anyu Ori Ntoko Etthaya ya Enamuna Xeeni?”)

³ Omphenta Yehova pooti owiirihani opatisiwa. Nave ophenta pooti wookhoottiheryani opatisiwa. Moota xeeni? Nkahaya muupuwele matakiheryo ala vakhaani: Pooti wira munnaaphenta vanceene amusi ni apatthani anyu ahinimurumeela Yehova, nto munoona wira mwapatisiwa vale, awo animoolupatthakani. (Math. 10:37) Aahiiso sookhala soolema sinoosivelani vanceene ni munisuwela anyu wira khasinimusivela Muluku, nto vanoovilani ohiya. (Esal. 97:10) Nave pooti wira onnoosivelani wiirela mpantta ifesta sa etiini yoowootha. Woonasa wene, nyuwo munnuupuwela itthu soohakalaliha mwaapaka anyu okathi wa ifesta iyo. Nto eyo enniwiirihani woona ovila ohiya wiirela mpantta ifesta iyo sihinimusivela Yehova. (1 aKor. 10:20, 21) Nikoho ninreerela anyu wiikoha tinna: “Exeeni aahiiso tani kintepa aka omphenta?”

TANI MUNIMPHENTA ANYU VANCEENE?

4. Etthu xeeni yuulupale enrowa owiirihani opatisiwa?

⁴ Sookhala itthu sinceene sinoosivelani ni munixukhurela anyu vanceene. Mwa ntakiheryo, Biibiliya. Woonasa wene, nlelo muhinatthi opacerya omusoma ni Anamoona a Yehova, nyuwo mwaanisiveliwa vanceene Biibiliya. Ohiya-vo, nyuwo mwaahiixutta omphenta Yesu. Vano mwaasuwenle anyu Anamoona a Yehova, woonasa wene vannoosivelani okhala vamosa naawo. Ophenta wanyu itthu iyo ti wooloka, masi itthu iyo paahi khasinrowa owiirihani wiivahererya wa Yehova ni opatisiwa. Maana etthu yuulupale enrowa owiirihani opatisiwa, omphenta wanyu Yehova Muluku. Vaavo munimphenta anyu Yehova ni murima wotheene ovikana etthu ekina aahiiso mutthu mukina, khiivo etthu enrowa wookhoottiheryani wiivahererya wa Yehova ni opatisiwa. Hata nuumala opatisiwa, omphenta Yehova onimookhaliheryani ovikaniha omurumeela Yehova moororomeleya ni weettela ekeekhai.

5. Exeeni ninrowa ahu oweha vano?

⁵ Yesu aahimmye wira nihaana omphenta Yehova ni murima ahu wotheene, erooho ahu yotheene, muupuwelo ahu wotheene ni ikuru sahu sotheene. (Mar. 12:30) Exeeni mukhanle anyu oopaka wira omphenta ni omuttittimiha wanyu Yehova otepeke wunnuwa? Muhaana wuupuwelela moota Yehova onoophentaweni vanceene. Opaka eyo, enimookhaliheryani omphenta Yehova. (1 Yoh. 4:19) Vaavo muniixutta anyu omphenta Yehova, munookhalana mikhalelo sikina sooloka. Mikhalelo xeeni? Nrowe niwehe.b

6. Moovarihana ni aRoma 1:20, enamuna xeeni mukhanle anyu oowiixutta voohimya sa Yehova?

⁶ Soopattuxiwa sinoowiixuttihani itthu sinceene voohimya sa Yehova. (Mmusome aRoma 1:20; Wis. 4:11) Muupuweleke moota miri ni inama Yehova opattunxe awe sinooniherya aya ankhili awe. Muupuweleke-tho moota erutthu ahu epakiwe aya mootikiniha ni enivara aya muteko. (Esal. 139:14) Nave muupuweleke ikuru Yehova ovanhe awe nsuwa, nenno nniirela mpantta ibilyau sinceene sa itheneeri.c (Yes. 40:26) Opaka eyo enimookhaliheryani wuncererya omuttittimiha wanyu Yehova. Masi, khoniphiyerya paahi osuwela wira Yehova ookhalana ankhili ni ikuru. Maana iyo itthu soopacerya sinrowa wookhaliheryani okhalana waataana wooloka ni Yehova. Mwaaphavelaka olipiha omphenta wanyu Yehova, muhaana wiixutta itthu sikina voohimya sa yena.

7. Wira omphenta wanyu Yehova otepeke wunnuwa, muhaana okupali exeeni?

⁷ Nyuwo muhaana okupali ni murima wotheene wira Yehova onnoophentani vanceene. Niireke vannoovilani weemererya wira Mpattuxa a erimu ni elapo, onnoosuwelani ni onnoophentani? Akhala wira ti siiso, muupuweleke wira Yehova “khankhala ottaiwene ni hiyo”. (Mit. 17:26-28) Nave Yehova onnitokosa “mirima sothene” ni onnooleiheryani ntoko Davidi aamulenle awe mwanawe Salomoni wira: “Mwàphavelaka Apwiya [Yehova], awo animorwa okumana ni nyuwo”. (1 Wah. 28:9) Tthiri etthu yuulupale eniwiirihani omusoma Biibiliya niinaano-va, mwaha wa ele Yehova ohimmye awe oriki: “Miyo kihophentani okhuma wopajeryani”. (Yer. 31:3) Vaavo munitepa anyu osuwela itthu Yehova oopakenlaaweni, omphenta wanyu onrowa otepaka wunnuwa.

8. Munrowa wooniherya sai wira munnixukhurela ophentiwa ni Yehova?

⁸ Enamuna emosa mukhanle anyu oowooniherya oxukhurela ophentiwa ni Yehova, ori olavula ni yena munvekelaka. Vaavo muninvekela anyu, mmuleeleke Muluku itthu sinooxankihani ni mmuxukhureleke mwaha wa itthu sotheene sooloka onoovahaaweni. Nvaheke ephoole wira moone moota onaakhula awe mavekelo anyu. (Esal. 116:1) Opaka eyo, enimuncererya omphenta wanyu Muluku ni enoolipiha waataana wanyu ni yena. Nave enimookhaliheryani woona wira Muluku onnoosuwelani saana. Masi, wira waataana wanyu ni Yehova olipe, muhaana osuwela itthu sinimusivela ni sihinimusivela. Nave muhaana osuwela ele oniphavela awe wira mpakeke. Nto enamuna emosa mukhanle anyu okhalana ankhili ori osoma Nuulumo na Muluku, Biibiliya.

9. Munrowa wooniherya sai wira munninvaha efaita Biibiliya?

⁹ Mwiixutte ovaha efaita Nuulumo na Muluku, Biibiliya. Musuweleke wira Biibiliya paahi, tonihimya ekeekhai voohimya sa Yehova ni ele oniphavela awe owiirihani. Tivonto mmusomeke Biibiliya khula nihiku. Nave mulokiheryeke saana eliivuru anyu ohinatthi orwa ole onoosomihani Biibiliya ni nvariheleke muteko ele muniixutta anyu. Mwiira siiso, munimooniherya wira munninvaha efaita Biibiliya. (Esal. 119:97, 99; Yoh. 17:17) Niireke mookhalana eprograma ya omusoma Biibiliya? Niireke munnitthara oratteene eprograma eyo?

10. Etthu xeeni ya vameekhaaya Biibiliya orina awe?

¹⁰ Etthu ya vameekhaaya Biibiliya orina awe, sowiiraneya sa atthu yanwenhe Yesu. Nave Biibiliya eliivuru emosa paahi enitthokiherya oratteene ele Yesu opanke awe wira oophwanyiheni mireerelo. Vaavo muniixutta anyu ele Yesu aapanke awe ni aahimmye awe, enimookhaliheryani omphenta ni okhalana waataana wooloka ni Yesu.

11. Exeeni enrowa wookhaliheryani wuncererya omphenta wanyu Yehova?

¹¹ Mwiixutte omphenta Yesu, mwiira siiso omphenta wanyu Yehova onimunnuwa. Mwaha wa xeeni? Mwaha woowi Yesu aahitakiha moomalela mikhalelo sa Tiithi awe. (Yoh. 14:9) Tivonto, vaavo muniixutta anyu voohimya sa Yesu, munoorowa omusuwelaka vanceene Yehova ni munimwaaphentaka vanceene. Muupuweleke moota Yesu aawoonela awe othunku atthu yahooneliwa vatthu ntoko atthu oohaawa, aretta, ni oorakala. Nave muupuweleke miruku sooloka Yesu ovanhe awe ni moota ekumi anyu enrowa aya oloka akhala wira munootthara miruku iyo.—Math. 5:1-11; 7:24-27.

12. Vaavo muniixutta anyu voohimya sa Yesu, eyo enrowa owiirihani opaka exeeni?

¹² Muupuweleleke yowoopola Yesu ovanhe awe mohikhanyereriwa. Tthiri owo oovaha ekumi awe wira nileveleliwe itampi sahu. (Math. 20:28) Moohaanyiherya wiiwexexa ele Yesu opanke awe enimookhaliheryani wuncererya omphenta wanyu Yesu. Nave-tho enoowiirihani ottharuwa itampi sanyu ni onvekela Yehova wira ooleveleleni. (Mit. 3:19, 20; 1 Yoh. 1:9) Vaavo munrowa anyu otepaka omphenta Yehova ni Yesu, nyuwo munrowa otepaka ophavela okhala vamosa ni waaphenta atthu awe.

13. Exeeni Yehova oovanhaaweni?

¹³ Mwaaphenteke atthu animphenta Yehova. Pooti wira amusi anyu ni apatthani anyu ahikhanle Anamoona a Yehova khansuwela etthu eniwiirihani wiivahererya wa Yehova. Nto anapacerya woonyokhani. Masi Yehova khonoohiyani meekhiinyu. Owo onimoovahani anna ni arokora a mmulokoni yaawo ari ntoko amusi anyu. Akhala wira munooviriha okathi muri ene ni anna ni arokora, awo animookhaliheryakani ni woophentani. (Mar. 10:29, 30; aHéb. 10:24, 25) Nuuvira okathi, pooti wira amusi ni apatthani anyu anoomurumeelaka Yehova ni wiiwelela malamulo awe.—1 Ped. 2:12.

14. Ntoko onihimya awe 1 Yohani 5:3, exeeni moonale anyu voohimya sa malamulo a Yehova?

¹⁴ Mwiixutte ovaha efaita ni wiiwelela malamulo a Yehova. Muhinatthi omusuwela Yehova, woonasa wene nyuwo mwaanipaka ele moona anyu wira ti yooloka ni yoohiloka. Masi vano mmusuwenle anyu Yehova, muhoona wira malamulo a Yehova toolokexa. (Esal. 1:1-3; mmusome 1 Yohani 5:3.) Nkahaya muupuwele miruku Biibiliya onaavaha awe alopwana oothela, athiyana ootheliwa ni anamwane. (aÉf. 5:22–6:4) Niireke emusi anyu ennihakalala mwaha woowi munnivarihela muteko malakiheryo awo? Niireke omutthu anyu wooloka mwaha wootthara malakiheryo a Yehova anihimya wira nihaana waathanla mwa miruku apatthani ahu? Niireke mwa mutthu oohakalala? (Mir. 13:20; 1 aKor. 15:33) Woonasa wene, munaakhula wira “aayo” makoho awo otheene.

15. Exeeni enrowa wookhaliheryani osuwela ovarihela muteko oratteene malakiheryo a mBiibiliyani?

¹⁵ Pooti wira okathi mukina khimwaasuwela moota woovarihela muteko oratteene malakiheryo a mBiibiliyani mwiixutta anyu. Tivonto Yehova onirumeela awe mutthenkeso awe wira onivaheke iliivuru sinimutthokiherya Biibiliya, seiyo sinnikhaliherya osuwela ele eri yooloka ni yoohiloka. (aHéb. 5:13, 14) Vaavo munisoma anyu iliivuru iyo, munimoona moota siri aya soovareleya muteko. Ohiya-vo, iyo sinimookhaliheryani wiirela mpantta mutthenkeso wa Yehova.

16. Yehova aatthokinhe sai atthu awe?

¹⁶ Mwiixutte ophenta ni okhaliherya mutthenkeso wa Yehova. Yehova ohaatthokiha atthu awe orumeelaka miloko. Nave oomuthanla Mwanawe, Yesu wira okhale muhooleli a miloko iyo. (aÉf. 1:22; 5:23) Olelo-va, wookhala muteko onivariwa ni miloko iyo sotheene. Wira ohooleleke muteko owo, Yesu oomuthanla “murumeyi òroromeleya ni ànkhili”. Egrupu eyo yaamukhaani ya maKristau oothanliwa, anniimananiha onikhaliherya ni waakiherya waataana wahu ni Muluku. (Math. 24:45-47) Axitokweene annoolakiheryani ni wookhapelelani, eyo enamuna emosa murumeyi oororomeleya onooniherya awe wira onnookhapelelani. (Yes. 32:1, 2; aHéb. 13:17; 1 Ped. 5:2, 3) Axitokweene awo anoopaka sotheene aniwerya aya wira yookhaliheryeni, woomaalihani ni olipiha waataana wanyu ni Yehova. Enamuna yuulupalexa axitokweene awo anrowa aya wookhaliheryani ori owiixuttihani osuwela moota wowiixuttiha atthu voohimya sa Yehova.—aÉf. 4:11-13.

17. Moovarihana ni aRoma 10:10, 13, 14, xeeni muniphavela anyu owiixuttiha atthu voohimya sa Yehova?

¹⁷ Mwaakhaliheryeke atthu akina wiixutta omphenta Yehova. Yesu ohaaruma atthareli awe owiixuttiha atthu voohimya sa Yehova. (Math. 28:19, 20) Ekeekhai wira vanweryaneya wiiwelela yooruma eyo mwaha wookhanyereriwa. Masi vaavo omphenta wanyu Yehova wannuwa aya, woonasa wene mwaarina moonelo mmosaru wa murummwa Pedru ni Yohani, yaawo yaahimmye so: “Hiyo khaninwerya ohiya olaleya itthu sònalyahu ni sìwalyahu!” (Mit. 4:20) Itthu saamukhaani pooti oniphwanyiha ohakalala wekeekhai ntoko omukhaliherya mutthu omphenta Yehova. Nkahaya muupuwele moota namalaleya Filipi aahakalanle awe nuumala omukhaliherya mulopwana ole a wEthiyopia wiiwexexa ekeekhai ya Soolempwa ni opatisiwa! Vaavo munitthara anyu ntakiheryo na Filipi ni wiiwelela yooruma ya Yesu ya olaleerya, munnooniherya wira munniphavela okhala Namoona a Yehova. (Mmusome aRoma 10:10, 13, 14.) Nuumala ophiya nivalo nno, woonasa wene munniikoha nikoho nimosaru iikonhe awe mulopwana a wEthiyopia oriki: “Enkikhottiha obatiziwa exeni?”—Mit. 8:36.

18. Mwaha onittharelana, ninrowa waakhula makoho xeeni?

¹⁸ Yoothanla yootepa otthuneya mookumini mwanyu ori opatisiwa. Okhala wira yoothanla eyo ti yootepa otthuneya, muhaana wuupuwela itthu sotheene sinihela muhina. Exeeni munreerela anyu osuwela voohimya sa opatisiwa? Exeeni munreerela anyu opaka muhinatthi ni nuumala opatisiwa? Mwaha onittharelana, ninrowa waakhula makoho awo.