Efootu enooniherya epalku ni eroolu
1922 Iyaakha 100 Sivinre
“MULUKU . . . onninikhaliherya oxintta . . . mwa . . . Yesu Kristu!” (1 aKor. 15:57) Ela yaari yoolepa ya mwaakha wa 1922. Moolumo a yoolepa ela yaaniwuupuxerya Anamasoma a Biibiliya mareeli- ho Yehova aarowa awe waavaha mwaha woororomeleya. Mwaakha ole wa 1922, Yehova aakhwaniherya yooleiherya awe okhala wira aahaareeliha anamalaleerya ale ooluttuweliwa owerya wimpirimiri iliivuru saya ni omurumeela raadio wira alaleeryeke ikeekhai sa Omwene. Muhoolo mwaya mwaakha yoole Yehova aahaatthuvela aavahaka itthu sikina. Anamasoma a Biibiliya ale yaahithukumana oCedar Point Ohio, wEstados Unidos wira anwehe kongresu oovara murima. Itthu siranenyale kongresu ole sinniirela mpantta mutthenkeso wa Yehova mpakha olelo-va.
“MIRUKU SOOLOKA”
Vaavo naakhalela ahu nthiti olaleerya, naanoona wira naniprisari okhalana iliivuru sinceene. Anna a oBetheli ya oBrooklyn yaaninprimiri irevista sinceene, masi wira awerye wimpirimiri iliivuru saarina ekaapa yoolipa awo yaahaana waalukari maakina makina. Nuuvira miyeeri sinceene, maakina owimpirimiri naalukari ahu yaahipacerya wimpirimiri iliivuru vakhaani, munna Rutherford aahimukoha munna Robert Martin, yoowo aahoolela muteko woowimpirimiri vakhala wira vanweryaneya hiyo okhalana maakina ahu owimpirimiri.
Epereetiyu yampirimiriwa iliivuru oConcord oBrooklyn, oNova York
Munna Martin aahimmye so: “Miruku sooloka, okhala wira eyo yaamunikhaliherya okhalana opuro ahu wira nimpirimiriki ni winkaternari iliivuru”. Nto anna yaahalukari opuro oConcord oBrooklyn ni yaahithuma ikaruma saareerela.
Nuumala anna osuwela wira yaarowa okhalana opuro aya woowimpirimiri, yaahihakalala vanceene masi yaahikhala atthu akina yahaatteeliwe murima. Muhooleli a emperesa naalukari ahu wira nimpirimiri iliivuru sahu aahirwa oweha maakina ahu owimpirimiri. Owo aahimmye so: “Mookhalanasa maakina ootepa oreera ni oolokexa masi khuuvo a nyuwo onisuwela moota woorumeela. Nto munimoona savira miyeeri 6 maakina ala ootheene anoohononeya”.
Munna Martin aahimmye so: “Etthu aahimmye awe muhooleli ole ekeekhai, masi owo khonisuwela wira hiyo ninkhaliheriwa ni Yehova ni khula okathi Yehova oninikhaliherya”. Munna Martin aahimya ekeekhai okhala wira nuuvira okathi vakhaani, maakina owinkaternari yaaniwerya winkaternari iliivuru soowiiraka 2.000 khula nihiku.
Anna yeemenle ene ohoolo wa maakina animpirimiri iliivuru
OLALEERYA NIMURUMEELAKA RAADIO
Ohiya wimpirimiri iliivuru sahu paahi, arumeyi a Yehova yaahipacerya orumeela enamuna esya yoolaleerya, eyo piiyo, olaleerya amurumeelaka raadio. Domingo othana, 26 a Fevereiro a 1922, munna Rutherford aahilavula mwaha awe woopacerya muraadioni. Mwaha awe woopacerya yoowo waahimya so: “Milhões que agora vivem jamais morrerão” aalavunle oraadio ya oKOG oLos Angeles, oCalifornia wEstados Unidos.
Atthu oowiiraka 25.000 yaahiwiriyana mwaha owo. Atthu akina yaawiriyanne mwaha owo yaahilepa ikarta amuxukhurela aka munna Rutherford. Mmosa a atthu awo yaalempe ikarta amuxukhurelaka munna Rutherford aari Willard Ashford a oSanta Ana oCalifornia. Owo aahimuxukhurela munna Rutherford, ohimyaka wira: “Mwaha ole waari woohakalaliha ni woovara murima”. Nuumala-vo owo aahincererya ohimyaka so: “Vaakhanle wira mwaha ole khiwaalavuliwe oraadio miyo nkaarowa owerya owiriyana, okhala wira kinaakhapelela atthu araru aniwereiwa owannyaka”.
Myaha sikina saalavuliwe isumana saattharelana. Erevista A Torre de Vigia (yeeyo olelo-va enisuweliwa okhala Owehaweha) yaahimmye wira mpakha wanikisa wa mwaakha ole atthu oowiiraka 300.000 yaahiiwa muhupi muraadioni.
Mwaha wa anamunceene osiveliwa ni muteko ole ni ottottopela, Anamasoma a Biibiliya yaahupuwela okhalana raadio aya oStaten Island waattamela eBetheli ya oBrooklyn. Raadio owo akumiheriwe, aasuweliwa okhala WBBR, aamurowa orumeeliwaka iyaakha saattharelana wira Anamasoma a Biibiliya alaleyeke ihapari sooreera sa Omwene.
“ADV”
Erevista 15 ya Junho a 1922, yaahihimya wira kongresu a atthu ootheene aarowa opakiwa oCedar Point, Ohio okhuma mahiku 5 mpakha 13 a Setembro a 1922. Anamasoma a Biibiliya ale yaahihakalala vanceene okathi yaaphiyale aya opuro owo.
Mwaha awe woopacerya, munna Rutherford aahaleela alipa yanwiriyana wira: “Kinnikupali wira Yehova . . . onoomureeliha kongresu ola ni wira kongresu ola onoovaha onamoona wuulupale ovikana khalai”. Khula munna aalavula mwaha kongresu ole, anaatumererya anna okhalela nthiti muteko woolaleerya.
Muttitthi wa atthu onweha aka kongresu oCedar Point, Ohio 1922
Nuumala-vo Namathanu 8 a Setembro, atthu imilyau 8 yaahisareya opuro owo, aphavelaka owiriyana mwaha wa munna Rutherford. Atthu ale yaalipelela wira munna Rutherford aamuhimya etthu yaataphulela aya ileetera “ADV”, seiyo saari vanlattuloni. Okathi anamunceene yaakilanthi aya, awo yaaniwerya oweha eroolu yuulupale yaakhuniwe epwehiwa vasulu va epalku. Arthur Claus yoowo aakhumme oTulsa, Oklahoma, wEstados Unidos wAmerica orowaka onweha kongresu, aahiphwanya opuro wookilaathi arowa awe owerya aka owiriyana oratteene myaha sa kongresu nnaamwi okathi ole sahaakhanle ikaruma saarumiha masu.
“Naanivaha ephoole khula nuulumo naalavuliwa”
Wira ohikhale mutthu onrowa owaakanyerya alipa-oowiriyana, muhooleli a muthukumano aahihimya wira nuumala opacerya mwaha wa munna Rutherford khuuvo aarowa weemereriwa ovolowa opuro ole. Voosiisu 9:30, munna Rutherford aahipacerya olavula mwaha awe oromolaka moolumo a Yesu aniphwanyaneya Matheyo 4:17, yaawo anihimya so: “Omwene wa wiirimu ori vakhiviru”. Olavulaka sa moota apinaatamu yaarowa aya osuwela voohimya sa Omwene owo, aahimmye so: “Yesu aahihimya wira okathi wa orwa wawe, owo anvara muteko wa ohepha, ni okathi owo woohepha aarowa waathukumanya arumeyi awe ekeekhai ni oororomeleya”.
Munna Claus yoowo aakilaathale ohoolo aahimmye so: “Naanivaha ephoole oratteene khula nuulumo naalavuliwa”. Nto nnaamwi aasuwela wira khaarowa weemereriwa otthikela opuro awe, munna Arthur aahikhuma moohilakela.
Nuuvira okathi vakhaani, muxankiho ole waahinvira. Nuumala otthikela opuro ole waathukumaniwe owo aaniwiiwa atthu amanaka makuphi. Eyo yaahimuhakalaliha vanceene. Nto owo aahilakela hata owela vasulu va epereetiyu wira vaaweryaneyaka owerye owiriyana mwaha ole mpakha wanikisa. Munna Claus aarina iyaakha 23 okathi ole, ahoona enamuna ya owela mukerekhere mwa epereetiyu. Okhala wira ixanela khasaawaliwe, munna ole aahoona wira opuro ole “anwerya owiriyanaka myaha saana”.
Masi Arthur khaakhanle meekhaawe. Axipatthani awe akina yaari vasulu vaavo. Mmosa a yaawo, Frank Johnson aahirwa vari awe munna ole omukoha so: “Kiireke mookhalana mwaalo woowiitha saana?”
Arthur aakhunle so: “Aayo kookhalana”.
Frank aahihimya wira: “Yehova ohaakhula mavekelo ahu. Nave aahimukoha-tho wira munnoona eroolu ele yuulupale? Nvaheke ephoole okathi mphukia onrowa awe olavula. Ahimya-ru wira: ‘Mulaleye!, Mulaleye!’ nuumala-vo nyuwo pooti othikila mikhoi iyo mixexe”.
Arthur, aanilipelela wiiwa moolumo awo okunxe ene mwaalo mmatatani. Nto waahiphiya mpantta muulupalexa wa mwaha awe munna Rutherford, otteeliwa ene murima ni ohakalanle ene aahikhuwela ohimyaka so: “Mukhaleke oororomeleya nyuwo Anamoona a Apwiya. Muhihiye owana ekhotto mpakha Babilonia opwetexiwa moomalela. Nave mulaleyeke ihapari elapo yootheene. Atthu ootheene ahaana osuwela wira, Yehova Muluku, ni Yesu Kristu Mwene a mamwene ni Pwiya a mapwiya. Ola okathi wa efaita yinceene. Moone, Mwene onnilamulela! Nto mookhalana muritti woowaaleela atthu voohimya sa Mwene owo. Nto mmulaleye, mmulaleye, mmulaleye Mwene ni Omwene awe!”
Arthur onihimya wira yena ni anna akina yaahithikilasa mikhoi iye mixexe nto eroolu ele yaahitaphuwa. Nto ileetera iye “ADV” (winkelexini, saataphulela: Mulaleye) nto eroolu ele yaahimya so: “Mmulaleye Mwene ni Omwene awe”.
MUTEKO WA EFAITA YINCEENE
Kongresu aapakiwe oCedar Point, aahaakhaliherya anna anceene okhalela nthiti muteko muulupalexa, eyo piiyo, olaleya Omwene. Nto ale yaivahererya yaanikhaliherya vanceene. Kolportore mmosa (yoowo onisuweliwa okhala pioneero olelo-va) a Oklahoma, wEstados Unidos wAmerica, aalempe so: “Muttetthe naalaleerya ahu anamunceene yaari oohaawa”. Nave owo onihimya so: Ikwaha sinceene okathi atthu awo aniwiriyana aya muhupi ori erevista Idade de Ouro b “awo yaaninla”. Nave owo onincereye oriki: “Ninnitteeliwa murima vanceene mwaha wa osuwela wira ninnaamaaliha atthu awo”.
Anamasoma a Biibiliya ale yahoona efaita erina aya moolumo a Yesu ari Luka 10:2 yaawo anihimya so: “Soolya khasireere mmatta, masi anamuteko ari vakhaani”. Nto wanikisa wa mwaakha wa 1922, awo yaahilakela olaleya Omwene elapo yootheene.
a Ikwaha sikina munna Rutherford aaniithaniwa okhala “mphuki” okhaka wira ootoko orumeela ntoko mphuki oMissouri, wEstados Unidos wAmerica.
b The Golden Age.