Makoho Anikohiwa Ni Ale Anisoma Irevista Sahu
Niireke okathi nasalimo aalempe awe masu ari Esalimo 61:9, aamutepiha aahiiso aamootha, vaavo aahimmye awe wiira kinoovuwiha nsina na Muluku “mahiku otheene?”
Nnaari. Etthu Davidi aalempe awe owo aahimya ekeekhai.
Nwehe etthu Davidi aalempe awe eversiikulu ela ni moota sinlikana aya ni iversiikulu sikina: “Vano miyo kinowipelani, kotthapelakani mahiku othene: nihiku ti nihiku kinimwamaliha anatiri yamanalyeka”. “Apwiya Muluku aka! Kintthuna wotthapelani ni murim’aka wothene n’ulaleya ovuwa wanyu vohimala-tho”. “Kinottottopela nsina nanyu mahiku othene”. — Esal. 61:9; 86:12; 145:1, 2.
Okathi Davidi aalempe awe moolumo ala, owo khahiyo aamutepiha aahiiso aamootha, maana aanisuwela wiira muhoolo aamookhwa. Davidi aanisuwela wiira atthu ootheene, annookhwa, mwaha wa etampi aravihiwe aya ni Adamu ni Eva nave-tho owo aanisuwela wiira aari natampi. (Maph. 3:3, 17-19; Esal. 51:6, 7) Owo aanisuwela wiira alopwana oowaamini, ntoko Abrahamu, Isakhi ni Yakobe yaahikhwa. Ti nthowa naya Davidi aasuwela awe wiira aamookhwa. (Esal. 37:25; 39:5) Masi, masu Davidi aalempe awe Esalimo 61:9, annooniherya yoophavela awe ya onvuwiha Muluku mahiku ootheene, eyo piiyo, okumi awe wootheene. — 2 Sam. 7:12.
Itthu sikina Davidi aalempe awe owo aanilavula sa soowiiraneya sa mookumini mwawe, hiyo pooti oweha masu ari vasulu wa ikapiitulu 18, 51, ni 52 eliivuru ya Esalimo. Eliivuru ya Esalimo ekapiitulu 23, Davidi onnimuhimya Yehova ntoko makampusi oniweha-weha, olyiha ni okhapelela ipwittipwitthi sawe. Nave Davidi aari makampusi. Masi owo, aaphavela onvuwiha Muluku okumi awe wootheene. — Esal. 23:6.
Nto nihiliyale wiira, itthu sootheene Davidi aalempe awe uupuxeriwe ni Yehova. Itthu Davidi aalempe awe saahikhala iprofesia saarowa wiiraneya muhoolo. Mwa ntakiheryo, Esalimo 110, Davidi aahihimya wiira onoophiya okathi, Muluku onrowa awe omwiitthana pwiya awe Davidi wiira ‘okilaathi moono awe woolopwana ni ovahiwe owerya’. Owerya xeeni iwo onrowa awe ovahiwa? Owerya wiira aapwetexe awanani a Muluku ni ‘waalamula atthu a maloko ootheene’. Davidi aari muhavinre awe Yesu yoowo aarowa okhala Mesiya ni arowa olamulelaka ori ene wiirimu ni okhala “mulipa a mukuttho wa mahiku othene”. (Esal. 110:1-6) Nave Yesu aahihimya wiira eprofesia eri Esalimo 110 yaamuhimya yena ni yaamurowa wiiraneya muhoolo. — Math. 22:41-45.
Yehova aahimuupuxerya Davidi olepa itthu saarowa wiiraneya okathi awe ni saarowa wiiraneya muhoolo. Okathi yoowo Davidi onrowa awe ohihimuxiwa wiira onvuwiheke Yehova wa mahiku ootheene. Nto Esalimo 37:10, 11, 29, yaahiiraneya okathi wa aisarayeli nave enrowa wiiraneya muhoolo, okathi Yehova onrowa awe omaleliha sooleiherya sawe. — Nwehe ettima 8 ya mwaha oni: “Munrowa Okhala ni Miyo Mparayiisu”, ori erevista yeela.
Masu ari Esalimo 61:9 ni iversiikulu sikina annooniherya wira Davidi aaphavela onvuwiha Yehova okumi awe wootheene. Tthiri moolumo ala annooniherya etthu Davidi onrowa awe opaka okathi Yehova onrowa awe omuhihimuxa muhoolo.