Mulokiheryeke Muupuwelo Anyu Okathi Munimusoma Anyu Biibiliya

Okathi nniilokiherya ahu wiira nimusome Biibiliya, pooti wiikoha so: Kinrowa wiixutta Exeeni mwaha ola? Okathi onisoma ahu, nihuupuweleke wiira noosuwela itthu sinceene, okhala wiira sookhala itthu sikina isya nikhanle ahu oowiixutta. Ninrowa onwiriyana sai Yehova okathi onniixuttiha awe?

Nvekeleke wiira mukhalane ankhili. Munvekeleke Yehova wiira ookhaliheryeni osuwela ele oniphavela awe wiira mwiixutte nenna-va. (Yak. 1:5) Muhiroromeleke osuwela wanyu paahi. — Mir. 3:5, 6.

Nuulumo na Muluku nookhalana owerya. “Nuulumo na Muluku nikumi”. (aHeeb. 4:12) Niireke wiira nyuwo munneemererya olavula ni Yehova khula nihiku? Khula okathi nimmusoma ahu Biibiliya, nnimwiixuttaka itthu isya seiyo sinrowa onikhaliherya mwa inamuna soovirikana mookumini mwahu. Eyo enoweryaneya vakhala wiira nnoohiya Nuulumo na Muluku wiira nneettiheke.

Muxukhureleke itthu sootheene Yehova onipaka awe wiira owiixuttiheni. Itthu Yehova onnivaha awe wiira nilipihe waamini wahu, sinoolikana ni “efesta ya yolya yowunkhela sana”. (Yes. 25:6) Mwiimananiheke osoma myaha seiye munoona anyu wiira kasinoosivelani osoma, aahiiso seiye munoona anyu wiira sinnoonyoonyani. Opaka eyo, onlikana ni omweemererya Muluku wiira onikhaliherye okhala mutthu ooloka. Nave-tho nyuwo moohaanyiherya munoorowa osiveliwaka ni ele munisoma anyu!