Mutakiheke Mikhalelo sa Malaikha Oororomeleya

1-2. a) Mwa inamuna xeeni niri ahu oovirikana ni malaikha? b) Mwa inamuna xeeni ninlikana ahu ni malaikha?

NTOKO arumeyi a Yehova, ootheene ahu nniirela mpantta emusi enimphenta ni eninvuwiha yena. Emusi eyo, eniirela mpantta anna ni arokora ni imilyau sinceene sa malaikha. (Dan. 7:​9, 10) Okathi nnuupuwelela ahu voohimya sa malaikha, ninnoona wiira awo toovirikana ni hiyo. Mwa ntakiheryo, malaikha apattuxiwe khalai onivikana hiyo. (Yoob. 38:​4, 7) Malaikha awo, toowerya onivikana hiyo. Nave toowaarya ni ta xariya, masi hiyo na atthu oottheka. — Luka 9:26.

² Nnaamwi itthu iya siniirihaka okhala oovirikana ni malaikha, sookhala itthu sikina sinlikana ahu naawo. Mwa ntakiheryo, nnoowerya otakiha mikhalelo sa Yehova. Nave nookhalana eparakha yoopaka soothanla ntoko malaikha awo. Ntoko hiyo, khula nlaikha nookhalana nsina naya ni toovirikana mukina ni mukhwaawe nave aakhalana miritti soovirikana. Tthiri ootheene ahu vamosa ni malaikha, nimphavela omukokhorelaka Mpattuxa ahu. — 1 Ped. 1:12.

3. Exeeni ninrowa ahu wiixutta mwaha ola?

³ Okhala wiira sookhala itthu sinceene ninlikana ahu ni malaikha, nto ntakiheryo naya nooloka pooti oniixuttiha etthu. Mwaha ola, nnimwiixutta moota nikhanle ahu ootakiha wiiyeviha wa malaikha, ororomeleya waya, waaphenta waya atthu, ovilela waya, ni wiimananiha waya wiira muloko okhaleke woowaarya.

MALAIKHA TOOWIIYEVIHA

4. a) Moota xeeni malaikha anooniherya aya wiiyeviha? b) Xeeni malaikha ari aya oowiiyeviha vanceene? (Esaalimu 89:7)

⁴ Malaikha oororomeleya toowiiyeviha. Nnaamwi avirinhe ene okathi munceene amurumeelaka Yehova, ari ene oowerya ni a ankhili, awo aniiwelela malakiheryo a Yehova. (Esal. 103:20) Okathi onivaraya muteko anithanleliwa aya, awo khaniikompela mwaha wa owerya orina aya. Annihakalala ovara muteko athanleliwe aya ni Yehova hata atthu akina ahisuwelaka masina aya.a (Maph. 32:​24, 29; 2 Mam. 19:35) Nave annikhootta waakhela ovuwa oniphwanela awe Yehova. Xeeni malaikha ari aya oowiiyeviha vanceene? Okhala wiira awo annimphenta Yehova ni annimuttittimiha vanceene. — Musome Esaalimu 89:7.

5. Nlaikha noonihenrye sai wiiyeviha okathi naamuttarunxe aya murummwa Yohani? (Nwehe eteseenyu.)

⁵ Nrowe nithokorerye yoowiiraneya enooniherya wiira malaikha toowiiyeviha. Mwaakha wa 96 Nuumala Kristu Orwa, nlaikha nihinsuwela ahu nsina naya, naahimuleela murummwa Yohani itthu sootikiniha saarowa wiiraneya muhoolo. (Wiis. 1:1) Exeeni Yohani aapanke awe nuumala oweha itthu iyo sootikiniha siiraneyaka? Owo aaheererya okokhorela nlaikha nle. Nlaikha nle, moowakuveya, naahikhootta okokhoreliwa ni Yohani, nave naahimuleela so: “Nnaari, muhiire siiso! Miyo ka murumeyi mukhwiinyu paahi, ni ka murumeyi a axinninyu . . . Tivo, mmukokhoreleke Muluku”. (Wiis. 19:10) Tthiri nlaikha nle, naahooniherya wiiyeviha! Nto khinaaphavela okokhoreliwa aahiiso ovuwihiwa. Moowakuveya, naahimuleela Yohani wiira aahaana omukokhorelaka Muluku paahi. Nave nlaikha nle khinaithokorerya okhala na faita onvikana Yohani. Nnaamwi nlaikha nle naapacenrye khalai omurumeela Yehova, nave naari noowerya onvikana Yohani, naahiyeviha ni naahimuromola Yohani okhala murumeyi mukhwaawe. Nave hata nlaikha nle naamuttarunxe Yohani, masi khinaampwapwenle mwa enamuna yoohiloka aahiiso yoowereya. Ohiya-vo, nlaikha nle, naamulavulihale mwa enamuna yooreera murima. Nave naahisuwela wiira Yohani aaphavela okokhorela, mwaha woowi aahitikinihiwa ni itthu aawehale awe.

6. Ninrowa otakiha sai wiiyeviha wa malaikha?

⁶ Ninrowa otakiha sai wiiyeviha wa malaikha? Nnoowerya vakhala wiira nnoovaraka itthu ninvekeliwa ahu ovara mmutthenkesoni mwa Yehova nihiikompelaka aahiiso ophavela ovuwihiwa. (1 aKor. 4:7) Ohiya-vo, nihiixooneke okhala a faita waavikana atthu akina, mwaha woowi nipacenrye khalai omurumeela Yehova aahiiso mwaha wookhalana miritti. Nto vaavo mutthu onivahiwa awe miritti sinceene, owo ohaana otepaka wiiyeviha waavikana atthu akina. (Luka 9:48) Ntoko malaikha, nihaana waarumeelaka atthu akina. Nave nihipakeke etthu ekhanle oowiirihaka atthu akina wuupuwela wiira nookhalana efaita waavikana awo.

7. Ninrowa wooniherya sai wiiyeviha vaavo nninvaha ahu malakiheryo aahiiso miruku mutthu mukina?

⁷ Nave hiyo nnimooniherya wiiyeviha, vaavo nnaavaha ahu malakiheryo aahiiso miruku atthu akina ekhale anna ni arokora aahiiso anamwane. Nto ikwaha sikina ninnipirisari ovaha malakiheryo mooluluwanya. Ntoko nlaikha naamuttarunxe aya Yohani mooreera murima, nave hiyo nihaana ovaha malakiheryo mooluluwanya nihimwiirihaka mutthu owo oriipiwa murima. Vakhala wiira khanniixoona okhala a faita waavikana atthu akina, nnoowerya ovaha malakiheryo mwa nttittimiho ni moopixa murima, nimurumeelaka Biibiliya. — aKol. 4:6.

MALAIKHA ANNAAPHENTA APINAATAMU

8. a) Moovarihana ni Luka 15:​10, malaikha anooniherya sai waaphenta waya apinaatamu? b) Malaikha annikhaliherya sai okathi ninlaleerya ahu? (Nwehe eteseenyu ya vakaapani.)

⁸ Malaikha, annaathokorerya apinaatamu ni annaaphenta. Awo annihakalala vanceene vaavo anaaweha aya atthu ale apanke itampi attharuwaka. Nave annihakalala okathi ale yaahiyale omurumeela Yehova, anitthikela aya omurumeela moororomeleya. Malaikha annihakalala vaavo mutthu oniixutta awe voohimya sa Yehova ni onipaka awe marukunuxo mookumini mwawe, wiira omurumeeleke yena. (Mmusome Luka 15:10.) Nave awo annikhalela nthiti ovara muteko woolaleya ihapari sa Omwene. (Wiis. 14:6) Nnaamwi ahilavulaka ni atthu mooluluwanya, malaikha annimukhaliherya namalaleerya wiira omphwanye mutthu omphavela wiixutta voohimya sa Yehova. Ekeekhai wiira khaninsuwela moota malaikha annikhaliherya aya wiira nimphwanye mutthu oniphavela wiixutta. Yehova pooti orumeela inamuna sikina, ntoko munepa awe woowaarya, wiira aakhaliherye arumeyi awe waaphwanya atthu aniphavela wiixutta voohimya sa yena. (Mit. 16:​6, 7) Hata vari siiso, owo onnirumeela malaikha wiira anikhaliheryeke okathi ninlaleerya ahu. Tivonto, okathi ninlaleya ahu ihapari sooreera, nikupaliki wiira malaikha ari ni hiyo wiira anikhaliheryeke. — Nwehe ekaaxa eni: “Mavekelo Aya Yaahaakhuliwa”.

9. Ninrowa otakiha sai malaikha ni wooniherya wiira ninnaaphenta atthu?

⁹ Ninrowa otakiha sai malaikha ni wooniherya wiira ninnaaphenta atthu? Okathi nniiwa ahu wiira munna aahiiso murokora oottikiheriwa mmulokoni, nihaana otteeliwaka murima ntoko malaikha anihakalala aya. Nave nihaana wiimananiha wiira nimooniherye munna aahiiso murokora owo omphenta wahu ni ohakalala, mwaha wa otthikela omurumeela Yehova. (Luka 15:​4-7; 2 aKor. 2:​6-8) Nave hiyo nnoowerya otakiha malaikha, nikhalelaka nthiti muteko woolaleerya. (Mus. 11:6) Ntoko siisaale malaikha anikhaliherya aya muteko woolaleerya, nave hiyo nihaana ophavelasa inamuna sa waakhaliherya anna ni arokora vaavo anilaleerya aya. Mwa ntakiheryo, hiyo pooti ompaka palano wiira nikhume muteko woolaleerya ni anamalaleerya asya. Nave hiyo pooti waakhaliherya anna ni arokora oowuuluvala aahiiso ahiniiwerya-werya wiira nikhume naawo muteko woolaleerya.

10. Yoowiiraneya ya murokora Sara, enniixuttiha exeeni?

¹⁰ Ankhi vakhala wiira makhalelo ahu khanneemererya ovara itthu sootheene naaphavela ahu mmutthenkesoni wa Yehova? Hata vari siiso, hiyo nnoowerya ovara vamosa ni malaikha muteko woolaleerya. Nrowe nithokorerye yoowiiraneya ya murokora Sara,b yoowo onikhala wIndia. Nuumala oviriha iyaakha 20 orumeelaka ntoko pioneera, waahimphwanya oretta waamwiiriha ohiwerya weetta ni ovenya vakhaamani. Owo aahixanka vanceene. Masi mwaha wookhaliheriwa ni anna ni arokora a mmulokoni ni yoosoma awe ya Biibiliya, Sara aahitthikela okhalana moonelo wooloka. Ekeekhai wiira owo aahaana wiilimaleliha muteko woolaleerya ni makhalelo awe masya. Okhala wiira khaawerya okilaathi wiira olepe ikarta, aalaleerya paahi omurumeelaka telefoni. Nto owo aanaalikarela atthu aasomiha awe Biibiliya, nave awo yaaninvaha mammeru a atthu akina yaaphavela omusoma Biibiliya. Exeeni yiiraneyale muhoolo mwaya? Miyeeri vakhaani paahi, Sara ahikhalana soosoma sa Biibiliya 70. Nto sikina khaawerya osomiha! Nto aahaavekela anamalaleerya akina mmulokoni wiira yaasomiheke atthu akina. Nave atthu anceene aasomiha awe, annirowela mithukumano. Nto malaikha annihakalala vanceene ovara vamosa ni anna ni arokora, yaawo aniimananiha olaleerya ntoko Sara!

MALAIKHA ANNOONIHERYA OVILELA

11. Malaikha oororomeleya anooniherya sai ovilela?

¹¹ Malaikha oororomeleya, annivaha ntakiheryo nooloka na ovilela. Awo annivilela ohixariya ni otakhala mwa iyaakha sinceene. Malaikha awo oororomeleya, yaahinweha Satana ni malaikha makina oohiroromeleya yaawo yaamurumeelana aya hoothe Yehova, emurukunuwelaka yena. (Maph. 3:1; 6:​1, 2; Yuda 6) Biibiliya onnilavula nlaikha nimosa noororomeleya, nenlo naavirihale mahiku manceene niwanaka ni nlaikha nootakhala. (Dan. 10:13) Ohiya-vo, okhuma khalai, malaikha annaaweha apinaatamu yaawo anithanla ohimurumeela Yehova. Hata vari siiso, malaikha awo oororomeleya, khanihiya omurumeela Yehova moohakalala ni nthiti. Awo annisuwela wiira okathi wooreerela, Yehova onoomaliha ohixariya wootheene.

12. Exeeni enrowa onikhaliherya ovilela?

¹² Ninrowa otakiha sai ovilela wa malaikha? Moolikanasa ni malaikha, hiyo ninniweha itthu sinceene sinipakiwa moohixariya, nave ninnilupatthiwa. Masi hiyo ninnikupali wiira okathi wooreerela, Yehova onoomaliha otakhala wootheene. Nto nittharaka ntakiheryo na malaikha, “nihikhulumuwe ovara miteko sooreera”. (aGal. 6:9) Nave Muluku oonileiherya wiira onoonikhaliherya wiira nivilele. (1 aKor. 10:13) Nto wiira nihihiye opixa murima ni ohakalala, nihaana onvekela Yehova wiira onivahe munepa awe woowaarya. (aGal. 5:22; aKol. 1:11) Ankhi vakhala wiira munnilupatthiwa? Mmuroromeleke Yehova ni murima anyu wootheene. Khula okathi Yehova onrowa wookhaliheryakani ni woolipihani. — aHeeb. 13:6.

MALAIKHA KHANIHIYA OKHALIHERYA MULOKO OKHALA WOOWAARYA

13. Yoothanleliwa xeeni ya vameekhaaya avahiwa aya malaikha mahiku ala ookiserya? (Matheyo 13:​47-49)

¹³ Mahiku ala ookiserya, Yehova onnivaha malaikha soothanleliwa sa vameekhaaya. (Mmusome Matheyo 13:​47-49.) Muteko woolaleerya, onniwiiriha atthu a olumwenku wootheene wiixutta ekeekhai. Anamunceene a yaawo, anoopaka marukunuxo wiira ekhale makristau, masi akina khanrowa weemererya. Malaikha, aavahiwa muteko wa “waavalanya atakhali ni anaxariya”. Eyo entaphulela wiira aakhalana muritti wa okhaliherya muloko okhala woowaarya. Masi eyo khentaphulela wiira atthu ahiyale omurumeela Yehova, khanikhala-khala etthikelaka omurumeela. Nave khentaphulela wiira mmulokoni, khasinrowa okhumelaka mixankiho. Hata vari siiso, nikupaliki wiira malaikha anniimananiha ovara muteko wiira akhaliherye miloko okhala soowaarya.

14-15. Ninrowa otakiha sai malaikha nikhaliheryaka muloko okhala woowaarya? (Nwehe efootu.)

¹⁴ Ninrowa otakiha sai malaikha ophavela waya wiira miloko sikhaleke soowaarya? Nnoowerya niimananihaka okhalana mweettelo wooloka, ni waataana wooloka ni Yehova mmulokoni. Nave nihaana wiimananiha okhapelela murima ahu. Nnoopaka eyo naathanlaka apatthani oloka ni naasyakaka atthu akhanle ooniiriha opaka itthu soohiloka. (Esal. 101:3) Nave nihaana waakhaliherya anna ni arokora ohihiya omuroromela Yehova. Mwa ntakiheryo, exeeni mukhanle anyu oopaka vakhala wiira moosuwela wiira munna aahiiso murokora oopaka etampi yuulupale? Omphenta wahu mutthu owo, onooniiriha omutumererya wiira aaleele axitokweene. Akhala wiira khaalenle axitokweene, hiyo nihaana waalela. Hiyo nimphavela wiira khula mutthu oniphavela okhaliheriwa, okhaliheriwe moowakuveya! — Yak. 5:​14, 15.

¹⁵ Mooriipiha murima, atthu akina annipaka itampi suulupale, mwaha waivaavo annikumihiwa mmulokoni. Nto eyo yiiraneya, hiyo ‘ninnihiya weetta ni mutthu owo’.c (1 aKor. 5:​9-13) Nto eyo ennikhaliherya muloko okhala woowaarya. Vaavo ninhiya ahu waataana ni mutthu okumihiwe mmulokoni, hiyo ninnooniherya wiira ninnimureerela murima mutthu owo. Eyo ennimukhaliherya mutthu owo wuupuwela otthikela omurumeela Yehova. Nto akhala wiira onootthika, hiyo, Yehova ni malaikha nnoohakalala vanceene. — Luka 15:7.

16. Moota xeeni nyuwo mukhanle anyu ootakiha malaikha?

¹⁶ Eparakha yuulupale osuwela malaikha ni ovara muteko vamosa naawo! Hiyo nimphavela otakiha mikhalelo sooreera malaikha arina aya ntoko: wiiyeviha, waaphenta atthu, ovilela ni wiimananiha waya ophavela okhaliha muloko woowaarya. Nto vakhala wiira nnimwiimananiha otakiha malaikha oororomeleya, hiyo ninrowa wiirelaka mpantta emusi ya Yehova mahiku ootheene.