“Nyuwo mookhalana efaita yinceene”!

1-2. Exeeni ekhanle oonikupaliha wiira nookhalana efaita para Yehova?

YEHOVA, onnaavaha efaita yinceene arumeyi awe ootheene. Masi arumeyi awe akina anuupuwela wiira kharina efaita. Woonasa wene, awo annuupuwela siiso, mwaha woowi khanithokoreriwa saana ni atthu akina. Niireke nyuwo munuupuwela siiso? Akhala wiira munuupuwela siiso, etthu xeeni enrowa wookupalihani wiira mookhalana efaita para Yehova?

² Etthu enrowa wookhaliheryani, ori osoma myaha sa mbiibiliyani sinooniherya moota Yehova oniphavela awe wiira atthu athokoreriweke. Yesu, yoowo ori Mwaana a Yehova, aanaathokorerya atthu mooreerela murima ni mwa nttittimiho. Mwaha woowaathokorerya saana atthu akina, Yesu ni Yehova, ahooniherya wiira annaavaha efaita atthu oowiiyeviha, yaawo anuupuwela wiira kharina efaita. (Yoh. 5:19; Ahep. 2) Mwaha ola, ninrowa oweha 1) Moota Yesu aakhalihenrye awe atthu woona wiira aakhalana efaita, ni 2) Moota nikhanle ahu ookupali wiira hiyo nookhalana efaita para Muluku. — Hag. 2:7.

YESU AAKHALIHENRYE SAI ATTHU OSUWELA WIIRA AAKHALANA EFAITA?

3. Yesu aathokorenrye sai atthu a oGalileya, yaawo yaaphavela okhaliheriwa?

³ Okathi Yesu aalaleerya awe oGalileya, atthu anceene yaanirowa wa yoowo ananwiriyana ni anapenuxiwa iretta saya. Yesu aahimyale wiira atthu, yaari “ntoko ipwittipwitthi soovulalihiwa ni soonyanyaliwa, sihirina makampusi aya.” (Math. 9:36) Ahooleli aya a itiini, yaathokorerya ntoko atthu ahirina efaita. Nave, yaaniwiihana okhala atthu ootakhaliwa. (Yoh. 7:​47-49) Masi Yesu, aanaathokorerya mwa nttittimiho ni mooreerela murima, owiixuttihaka ni aapenuxaka iretta saya. (Math. 9:35) Nave, wiira aakhaliherye atthu anceene, aahiwiixuttiha arummwa awe olaleerya ni aahaavaha owerya wa openuxa iretta. — Math. 10:​5-8.

4. Onniixuttiha exeeni moota Yesu aathokorerya awe atthu oowiiyeviha?

⁴ Okhala wiira aanaathokorerya mooreerela murima ni mwa nttittimiho, Yesu aahooniherya wiira yena ni Tiithi awe, yaanaavaha efaita atthu yahooneliwa vatthu mmuttettheni. Vakhala wiira munimurumeela Yehova, masi munaanyiherya mwaarina ene efaita, muupuweleleke moota Yesu aathokorerya awe atthu oowiiyeviha, yaawo yaaphavela wiixuttihiwa ni yena. Mwapaka eyo, munimoona wiira mookhalana efaita yinceene para Yehova.

5. Exeeni ninsuwela ahu sa muthiyana Yesu amphwannye awe oGalileya?

⁵ Nnaamwi Yesu aawiixuttiha atthu ntoko ekurupu, owo animwiixuttiha ni omukhaliherya khula mutthu. Mwa ntakiheryo, okathi Yesu aalaleerya awe oGalileya, aahimphwanya muthiyana aavirihale iyaakha 12 ephome awe eyiiheyaka. (Mar. 5:25) Moovarihana ni Nlamulo, muthiyana ole aari oohiloka. Nave, khula mutthu aarowa omukwannya aakhala oohiloka. Nto eyo, yaanimwiiriha muthiyana ole, ikwaha sinceene okhala mekhawe. Ohiya-vo, muthiyana ole khaawerya omukokhorela Yehova ni atthu akina musinagoga aahiiso okhala ni atthu akina okathi wa ifesta. (Onam. 15:​19, 25) Tivonto, muthiyana ole aaniwereiwa ni woonasa wene, aanoona wiira khaarina efaita. — Mark 5:26.

6. Muthiyana yaayiiheya ephome awe, aapenuxiwe sai?

⁶ Muthiyana ole aanihaawa vanceene, tivonto aaphavela awe openuxiwa ni Yesu. Masi khaawerya olavula ni Yesu wiira ompenuxe. Mwaha wa xeeni? Mwaha woowi, mukhalelo awe waanimwiiriha woova ni wuuliwa muru. Nave, pooti wiira aanoova woomoliwa ni Yesu, mwaha woowi aahitthara muttitthi ole variki ahaalonke mwaha wa oretta awe. Tivonto, okupaliki wiira aamukhala saana, aahivara nlaya na ota na Yesu. (Mar. 5:​27, 28) Nto mwaha wa waamini wawe wuulupale, eretta ele yaahimmalela. Yesu aahikoha ophavelaka omusuwela mutthu aavanre nlaya nawe. Nto Yesu aamuthokorenrye sai muthiyana ole?

7. Yesu aamuthokorenrye sai muthiyana ole aahaawale vanceene? (Marko 5:34)

⁷ Yesu aahimuthokorerya muthiyana ole mwa nttittimiho ni mooreerela murima. Yesu aahoona wiira muthiyana ole “aahipacerya ottettemela ni woova.” (Mar. 5:33) Tivonto, aahimureerela murima ni aahimulipiha. Nave aahimwiihana wiira “mwanaka”. Mwaha woorumeela nuulumo nla, khahiyo paahi Yesu oonihenrye wiira aanimuttittimiha, masi-tho, aahooniherya wiira aanimureerela murima ni omphenta. (Mmusome Marko 5:34.) Ela eversiikulu emosa paahi ya mbiibiliyani, Yesu onimwiihana awe muthiyana wiira “mwanaka”. Pooti wiira aahirumeela nuulumo nla nooreerela murima, mwaha woowi aahoona wiira muthiyana ole aanoova vanceene. Ohimya ekeekhai, muthiyana ole aahihakalala vanceene! Okhala wiira Yesu aahilavula moolumo ale oolipiha, eyo yaahimukhaliherya okhala oomaaleleya ni ohiivaha nthowa. Ohiya-vo, Yesu aahimukhaliherya woona wiira ookhalana efaita yinceene ni mwaana mwaamuthiyana oophentiwa ni Tiithi awe a wiirimu.

8. Muxankiho xeeni Maria, yoowo onikhala oBrasil aarina awe?

⁸ Nave olelo-va, arumeyi akina a Yehova anniriipiwa murima ni woona wiira kharina efaita, mwaha wa owereyasiwa. Pioneera rekulaare oniihaniwa Maria,a yoowo onikhala oBrasil, owo oyariwe ohirina metto ni ntata noothiyana. Maria, onihimya so: “Ikwaha sinceene, kaaniveehiwa ni otheiwa oskola mwaha woorakala. Ale kaasomana aka, yaanikivaha masina oonanara ni ooveeha. Nave amusi aka akina, yaanikiveeha.”

9. Maria aakhaliheriwe sai woona wiira ookhalana efaita para Yehova?

⁹ Etthu xeeni yaamukhalihenrye Maria? Nuumala okhala Namoona a Yehova, anna ni arokora yaahimulipiha ni omukhaliherya wiithokorerya ntoko Yehova onimuthokorerya awe. Maria onihimya so: “Anna ni arokora, yaahikikhaliherya vanceene! Kinnimuxukhurela vanceene Yehova, mwaha wookivaha anna ni arokora awo oophenta, yaawo ari amusi aka kirina aka waamini omosa-ru.” Anna ni arokora yaahimukhaliherya Maria osuwela wiira ookhalana efaita para Yehova.

10. Mixankiho xeeni aarina awe Maria Madalena? (Nwehe iteseenyu.)

¹⁰ Nwehe moota Yesu aamukhalihenrye awe Maria Madalena. Maria Madalena, aahivariwa ni malaikha 7 ootakhala! (Luka 8:2) Woonasa wene, malaikha ootakhala yaanimwiiriha Maria Madalena opaka itthu soohiloka, nto atthu akina khiyaamwaattamela. Okathi wootheene aavariwe awe ni malaikha ootakhala, Maria Madalena aanihaawa vanceene. Nave woonasa wene, aanoova ni uupuwela wiira khuuvo mutthu aarowa omphenta ni omukhaliherya. Vanikhala ntoko wiira, nuumala Yesu woomola malaikha ale ootakhala, Maria Madalena aahipacerya omutthara Yesu.

11. Yesu aamukhalihenrye sai Maria Madalena woona wiira aahikhalana efaita para Yehova? (Nwehe iteseenyu.)

¹¹ Mwa inamuna xeeni sikina Yesu aamukhalihenrye awe Maria Madalena, woona wiira aahikhalana efaita para Muluku? Yesu aahinvaha eparakha Maria Madalena, wiira omuhooleke ni awiixutti awe okathi yaalaleerya aya muttetthe ti muttetthe.b Nto eyo, yaahimukhaliherya ohihiya ottottela mureerelo itthu Yesu aawiixuttiha awe atthu akina. Nave nihiku aahihimuxiwe awe, Yesu aahimukhumelela Maria Madalena. Nihiku nle, Maria Madalena taapacenrye olavula ni Yesu ahinatthi arummwa akina. Nave-tho, Yesu aahinvekela Maria Madalena orowa waaleela arummwa awe wiira yena aahihihimuxiwa. Mwaha wonvaha miteko iyo, Yesu aahimukhaliherya Maria Madalena, woona wiira aahikhalana efaita yinceene para Yehova! — Yoh. 20:​11-18.

12. Muhimye etthu yaamwiiriha Lidia wuupuwelaka wiira khaaphwanela ophentiwa.

¹² Ntoko Maria Madalena, atthu anceene olelo-va, anoona wiira khaniphentiwa. Murokora mmosa, yoowo onikhala wEspanha oniihaniwa Lidia, onihimya wiira okathi maama awe aamurupanle awe, owo aaphavela okumiha erukulu ele. Nave, Lidia onnuupuwela wiira okathi aari awe mwaana, maama awe khamphavela ni aanimuhasula. Lidia onihimya so: “Okhala wiira maama aka khaakiphenta, etthu kaaphavela aka vanceene waari ophentiwa ni atthu akina ni okhala apatthani aya. Kuupuwela wiira nkaaphwanela ophentiwa ni atthu akina, mwaha woowi maama aka aamakela okileela wiira ka mutthu ohinserviri.”

13. Exeeni yaamukhalihenrye Lidia woona wiira ookhalana efaita para Yehova?

¹³ Okathi Lidia aapacenrye awe omusoma Biibiliya, itthu saahiturukeya. Onvekela Yehova, omusoma Biibiliya ni miteko ni moolumo a anna ni arokora, yaahimukhaliherya Lidia woona wiira aahikhalana efaita para Yehova. Lidia, onihimya-tho so: “Iyaka onimakela okileela wiira onnikiphenta. Nave ikwaha sinceene, onimakela okileela wiira kookhalana mikhalelo sooloka. Nave-tho, apatthani aka akina annikileela etthu emosa-ru.” Niireke ookhala mutthu munoona anyu wiira onnipirisari okhaliheriwa, woona wiira ookhalana efaita para Yehova?

NIITHOKORERYEKE NTOKO YEHOVA ONNITHOKORERYA AWE

14. 1 Samuweli 16:​7, onnikhaliherya sai oweha wiira Yehova onnaathokorerya atthu? (Nwehe ekaaxa eni: “Xeeni Yehova onaavaha awe efaita atthu awe?”)

¹⁴ Muhiliyale wiira Yehova khonoothokoreryani ntoko atthu a moolumwenkuni anoothokoreryaayani. (Mmusome 1 Samuweli 16:7.) Atthu anceene a olumwenku ola, annimuthokorerya mutthu okhala a efaita, mwaha wa oreera wawe, musurukhu orina awe ni moota osomme awe. Masi Yehova khonaathokorerya siiso atthu. (Yes. 55:​8, 9) Tivonto, mwiimananiheke wiithokorerya ntoko Yehova onoothokoreryaaweni, ohiya moota atthu a moolumwenkuni anoothokoreryaayani. Biibiliya onnaalavula atthu, yaawo yoona wiira kharina efaita, ntoko Eliya, Nowemi ni Ana. Okathi munisoma anyu soowiiraneya sa atthu awo, nweheke moota Yehova aaphenta awe. Nave, nyuwo pooti olepa itthu siwiiranenleni, seiyo sinooniherya wiira Yehova onnoophentani ni onnoovahani efaita. Pooti otokosa myaha sinooniherya wiira Muluku onnaavaha efaita atthu, seiyo siri iliivuru sahu sinimutthokiherya Biibiliya.c

15. Exeeni yaamwiiriha Yehova onvaha “efaita yinceene” Daniyeli? (Daniyeli 9:23)

¹⁵ Muhiliyale wiira mwaha wa ororomeleya wanyu, mookhalana efaita para Yehova. Ekwaha emosa, woonasa wene okathi aarina awe iyaakha 90, profeta Daniyeli aahikhulumuwa vanceene. (Dan. 9:​20, 21) Yehova aamulipihale sai? Muluku aahiruma nlaikha Gabriyeli, orowa omuleela wiira “mookhalana efaita yinceene”, ni mavekelo anyu aawiriyaniwa ni Muluku. (Mmusome Daniyeli 9:23.) Xeeni Muluku anvaha awe efaita Daniyeli? Mwaha woowi, Daniyeli aari mutthu a xariya ni oororomeleya. (Ezek. 14:14) Nto Yehova ooruma olempwa mbiibiliyani yoowiiraneya ela wiira enimaaliheke. (Arom. 15:4) Okhala wiira munnipaka itthu sooloka ni munniroromeleya, Yehova onnoovahani efaita yinceene. Ntoko siisaale aakhunle awe mavekelo a Daniyeli, mukupaliki wiira Yehova onimwaakhula mavekelo anyu. — Mik. 6:8; Ahep. 6:10.

16. Exeeni enrowa wookhaliheryani oweha wiira Yehova Tiithi oophenta?

¹⁶ Mmuthokoreryeke Yehova ntoko Tiithi onoophentani. Khahiyo wiira Yehova onaavya ifaalya sanyu, masi oniphavela wookhaliheryani. (Esal. 130:3; Math. 7:11; Luka 12:​6, 7) Muupuweleleke moota aakhalihenrye awe atthu akina woona wiira aakhalana efaita. Mwa ntakiheryo, nwehe yoowiiraneya ya murokora oniihaniwa Michelle, yoowo onikhala wEspanha. Owo uupuwela wiira khoniphentiwa mwaha woowi, mwa iyaakha sinceene iyawe aamakela onveeha ni ompakela itthu soohiloka. Michelle, onihimya so: “Okathi kinoona aka wiira nkirina efaita, kinnimananiha omuupuwela Yehova okikunxe ene mmatatani mwawe okikhapelelaka ni okiphenta.” (Esal. 28:9) Murokora oniihaniwa Lauren, yoowo onikhala wÁfrica do Sul, onihimya so: “Okhala wiira Yehova ookiphenta ni mikhoi sa niphento, onnikikhaliherya omwaattamela iyaakha iya sootheene ni owiixuttiha atthu akina. Nto eyo, enooniherya wiira onnikivaha efaita ni onnikiruma ovara miteko sawe.” — Hos. 11:4.

17. Exeeni enrowa wookupalihani wiira munnimusiveliha Yehova? (Esaalimu 5:12) (Nwehe efootu.)

¹⁷ Mukupaliki wiira munnimusiveliha Yehova. (Musome Esaalimu 5:12.) Mwene Davidi aahilikanyiha omusiveliha Yehova ni “nikula . . . na wiixaakihana”, nenlo nnaakhapelela anaxariya. Osuwela wiira munnimusiveliha Yehova, onimookhaliheryani okhootta muupuwelo woowi khamurina efaita. Munrowa osuwela sai wiira munnimusiveliha Yehova? Ntoko niwehale ahu, Yehova oonivaha Biibiliya, yoowo onnikhaliherya osuwela moota onnithokorerya awe. Nave, onnaaruma axitokweene, apatthani ahu ni atthu akina, wiira anuupuxeryeke wiira nookhalana efaita para Yehova. Mpakeke exeeni okathi atthu akina anoolipihaayani?

18. Xeeni munireerela anyu okupali okathi munittottopeliwa anyu?

¹⁸ Okathi atthu anoosuwelani ni anoophentani anihimya aya wiira munnipaka itthu sooloka ni anoottottopelaayani, muhuupuweleke wiira awo animootha. Pooti wiira Yehova ohaaruma atthu awo wiira yookhaliheryeni woona wiira mookhalana efaita ni munnimusiveliha. Michelle nimulavunle ahu, onihimya so: “Vakhaani-vakhaani, kaahipacerya okupali okathi atthu akina yaakittottopela aya. Vaanikixankiha okupali wiira kinnipaka itthu sooloka. Masi kinnisuwela wiira eyo ti etthu Yehova oniphavela awe wiira kipakeke.” Nave axitokweene yaahimukhaliherya Michelle woona wiira onniphentiwa ni Yehova. Vano, Michelle pioneera ni onnikhaliherya oBeteli ori ene owannyawe.

19. Xeeni munireerela anyu okupali wiira mookhalana efaita para Muluku?

¹⁹ Mooreerela murima, Yesu onninuupuxerya wiira Tiithi ihu a wiirimu onninivaha efaita yinceene. (Luka 12:24) Tivonto, nikupaliki ni murima wootheene wiira Yehova onninivaha efaita. Nihikhala-khale niliyalaka etthu ela! Nto ootheene ahu, naakhaliheryeke atthu akina woona wiira aakhalana efaita para Muluku!