Watchtower EBIBLIOTEKA ONLAINE
Watchtower
EBIBLIOTEKA ONLAINE
Emakhuwa
  • BIIBILIYA
  • ILIIVURU
  • MITHUKUMANO
  • ijwbq mwaha 77
  • Ohihimuxiwa Exeeni?

Mpantta ola khekhanle eviidiyu.

Muniswaamihe, khivaniweryaneya orumiha eviidiyu ela.

  • Ohihimuxiwa Exeeni?
  • Makoho Biibiliya Onaakhula Awe
  • Miru Saamukhaani
  • Mwaha Onlikana Nuula
  • Waakhuliwa wa mBiibiliyani
  • Tthiri Ohihimuxiwa Onimwiiraneya!
    Biibiliya Onniixuttiha Exeeni?
  • Nlipelelo Neekeekhai wa Ale Anaaphenta Anyu Akhwiiye
    Biibiliya Oniixuttiha Exeeni Tthiri?
  • “Miyo Kinniroromela Oholo wa Muluku”
    Owehaweha Elaleyaka Omwene Wa Yehova (Yoosoma)—2017
  • Onitaphulela Exeeni Ohihimuxiwa wa Yesu?
    Owehaweha Elaleyaka Omwene wa Yehova—2014
Nwehe Sikina
Makoho Biibiliya Onaakhula Awe
ijwbq mwaha 77
Muhoolo okathi atthu anrowa aya ohihimuxiwaka, atthu awaakhelaka apatthani ni amusi aya yaakhwiiye atthikelaka okhala akumi oparayiisu valaponi

Ohihimuxiwa Exeeni?

Waakhuliwa wa mBiibiliyani

MBiibiliyani, nuulumo ntaphuleliwe ntoko “ohihimuxiwa”, ninkhuma elavulelo ya ekereku anástasis, nintaphulela “ovenya” aahiiso “ootthikela weemela”. Okathi mutthu onihihimuxiwa awe, “onnivenxiwa” mookhwaani ni onatthikela okhala ntoko aari awe khalai.—1 aKorinto 15:12, 13.

Nuulumo noowi “ohihimuxiwa” khanimphwanyaneya soolempwa sa eHeeberi, seiyo sinsuweliwa-tho okhala Waataana wa khalai. Masi yoowiixuttiha aya enniphwanyaneya. Mwa ntakiheryo, omurumeelaka profeta Hoseya, Muluku aahaaleiherya so aisarayeli: “Miyo kinoowoopola mmahiye, kinoowaakiherya elapo ya alipa-ookhwa”.— Hoseya 13:14, Piipiliya Emakhuwa; Yoobi 14:13-15; Yesaya 26:19; Daniyeli 12:2, 13.

Atthu anrowa ohihimuxiwa woowi? Atthu akina anrowa ohihimuxiwa wiira yakhaleke wiirimu ni yalamuleleke ni Kristu. (2 aKorinto 5:1; Wiisuupulula 5:9, 10) Biibiliya onnihimya ohihimuwa iwo okhala “ohihimuwa woopacerya”, [Biblia Solempwa Sowarya] ni “ohihimuxiwa”. Moolumo ala oomanli anooniherya wiira yookhala enamuna wala etiipu ekina ya ohihimuwa onrowa wiiraneya moottharelana. (Wiisuupulula 20:6; aFilipi 3: 11) Ohihimuxiwa iwo wa nenli onrowa waaphwanyiha mureerelo atthu anceene, anrowa okhalaka valaponi wa mahiku ootheene.— Esalimo 37:29.

Atthu anrowa ohihimuxiwaka sai? Muluku onvaha Yesu owerya wowaahihimuxa atthu akhwiiye. (Yohani 11:25) Yesu onimwaattikiherya okumi “atthu otheene ari mmahiye”. Khula mutthu onrowa ohihimuxiwaka sintoko saarya awe khalai. (Yohani 5: 28, 29) Atthu anrowa ohihimuxiwa para orowa wiirimu annivahiwa erutthu ntoko malaikha. Masi ale anrowa ohihimuxiwa wiira akhaleke valaponi vaava anrowa ohihimuxiwa ni erutthu ya opinaatamu, ya niinaano ni ehirina iretta.—Yesaya 33:24; 35:5, 6; 1 aKorinto 15:42-44, 50.

Tani anrowa ohihimuxiwa? Biibiliya onihimya wiira onookhala ohihimuxiwa wa “anaxariya ni ale ahikhanle anaxariya”. (Miteko 24:15) Anaxariya atthu yaale oowaamini, ntoko Nowe, Sara ni Abrahamu. (Maphattuwelo 6:9; aHeeberi 11:11, Yakobo 2: 21) Atthu ahikhanle anaxariya anihela muhina atthu yaale yahaiwenle sooruma sa Muluku mwaha woohikhalana eparakha yoosuwela sooruma iyo ni weettela.

Masi, atthu yaale anipaka itthu soohiloka wala soonanara ni ahimphavela ottharuwa khanrowa ohihimuxiwa. Okathi onikhwa awe mutthu siiso, khorina tho nlipelelo nootthikela okhala mukumi.— Matheyo 23:33; aHeeberi 10:26, 27.

Ohihimuxiwa onrowa wiiraneya silini? Biibiliya aahihimya wiira ohihimuxiwa wa ale anrowa wiirimu waarowa opacerya okathi wa olamulelo ohinooneya wa Yesu, yoowo opacenrye mwaakha wa 1914. (1 aKorinto 15:21-23) Ohihimuxiwa wa atthu anrowa okhalaka valaponi onrowa wiiraneya okathi wa Olamulelo wa Iyaakha 1000 wa Yesu Kristu, vaavo elapo enrowa aya okhalihiwa eparayiisu.— Luka 23:43; Wiisuupulula 20:6, 12, 13.

Xeeni vari aya vooloka okupali ohihimuxiwa? MBiibiliyani sookhala soowiiraneya 9 sinaalavula atthu yaahihimuxiwe, seiyo atthu ankupali aya. (1 Mamwene 17:17-24; 2 Mamwene 4:32-37; 13:20, 21; Luka 7: 11-17; 8:40-56; Yohani 11:38-44; Miteko 9:36-42; 20:7-12; 1 aKorinto 15:3-6) Ohihimuxiwa wa Laazaro yaari etthu yeekeekhai maana yaahivira mahiku 4 okhwiiye ene. Nave Yesu aapanke mwiiriirya ole ohoolo wa atthu anceene. (Yohani 11:39, 42) Hata awanani awe yaanikupali itthu sootheene saakhumelenle; ti nthowa naya yaaphavela aya omwiiva Yesu ni Laazaro.—Yohani 11:47, 53; 12:9-11.

Atthu araru yaahihimuxiwe anromoliwa mBiibiliyani: mwaana a naamukhweli, muthiyana mmosa mukristau, ni Laazaro mpatthani awe Yesu

Biibiliya onnooniherya wiira Muluku ookhalana owerya ni onniphavela vanceene waahihimuxa atthu akhwiiye. Orumeelaka muupuwelo awe ohinimala, onniwerya omuupuwelela khula mutthu okhwiiye ni omuhihimuxa orumeelaka owerya wawe wuulupale. (Yoobi 37:23; Matheyo 10:30; Luka 20:37, 38) Muluku onoowerya waattikiherya okumi atthu akhwiiye, nave onniphavela opaka eyo! Okathi onilavula awe sa nlipelelo na muhoolo, Biibiliya onihimya wiira Muluku aamunkheliwa ni ‘muteko wa matata awe’.— Yoobi 14:15.

Itthu soowoothiwa voohimya sa ohihimuwa

Yowoothiwa: Ohihimuxiwa onitaphulela otakaahiwa erooho ni erutthu.

Ekeekhai: Biibiliya onihimya wiira eroho enithoonyerya mutthu oomalela, ohiya epantte ya erutthu enihala eri ene ekumi nuumala mutthu okhwa. (Maphattuwelo 2:7; enoota; Ezekiyeli 18:4) Tivonto, ohihimuxiwa khahiyo otakaahiwa wa erooho ni erutthu, masi onihimmwa opakiwa vasya mutthu owo.

Yowoothiwa: Atthu akina anohihimuxiwa nuumala-vo anoopwetexiwa moohipisa.

Ekeekhai: Biibiliya onihimya wiira “ale avanre miteko sootakhala anrowa ophukeliwa ni olamuliwa”. (Yohani 5:29) Nto, ophukeliwa iwo onrowa wiiraneyaka moovarihana ni itthu onrowa awe opaka mutthu owo nuumala ohihimuxiwa ohiya ohinatthi okhwa. Yesu aahimmye wiira onoophiya okathi “alipa-ookhwa anrowa aya wiiwa nsu na Mwaana a Muluku, nto ale avanhe ephoole, anookhala akumi”. (Yohani 5:25) Ale ‘anivaha ephoole’ nihimye so: ale anrowa wiiwelela, itthu anrowa aya wiixuttihiwa nuumala ohihimuxiwa, masina aya aanoolempwa “eroolu ya okumi” — Wiisuupulula 20:12, 13.

Yowoothiwa: Atthu anrowa ohihimuxiwa anrowa ovenyaka ni erutthu aya ya khalai yaarina aya ehinatthi okhwa.

Ekeekhai: Nuumala mutthu okhwa, erutthu awe ‘enitthikela muntthupini’. —Musuweli 3:19, 20.

    Watchtower EBIBILIOTEKA ONLAINE (1982-2025)
    Okhuma
    Okela
    • Emakhuwa
    • Ovaha
    • Siniphavela Anyu
    • Copyright © 2025 Watch Tower Bible and Tract Society of Pennsylvania
    • Malamulo Oorumeela
    • Mwaha Woosuka Isiiri
    • Privacy Settings
    • JW.ORG
    • Okela
    Ovaha