Onitaphulela Exeeni Ohihimuxiwa wa Yesu?

‘Owo ohihimuxiwa’.​—MATH. 28:6.

MUNNIWERYA OTTHOKIHERYA?

Moota xeeni ohihimuxiwa wa Yesu onivirikana aya ni ohihimuwa wa atthu waakhumelenle khalairu?

Exeeni ennisuweliha wira Yesu aahihihimuxiwa ni wira olelo-va mukumi?

Onitaphulela exeeni ohihimuwa wa Yesu?

1, 2. (a) Exeeni yaaphavela aya osuwela makhulupale a etiini, nto Pedru aakhunle sai? (Nwehe elatarato yoopacerya.) (b) Exeeni yaamwiirinhe Pedru okhala oolipa murima okathi ole?

MAHIKU vakhaani nuumala Yesu wiiviwa, murummwa Pedru aahivariwa ni atthu oowoopiha ni ootakhala murima. Awo yaari makhulupale a etiini ya aYuda, yaale ene yampanke palano wira Yesu iiviwe. Awo yaaphavela osuwela etthu emosa. Pedru ampenunxe mutthu oorakala oyariwa wene, nto awo yaaphavela osuwela ikuru wala nsina naarumenle awe wira opake mwiiriirya ole. Murummwa ole aahaakhula moolipa murima oriki: ‘Ni nsina na Yesu Kristu muNazarethi, yoole mmukhomenlyanyu vamwirini, yoole Muluku omuhihimunxe awe mookhwani, ni owerya wawe Yesu yoowo mulopwana ola tokhanlyawe mukumi, oholo wanyu’.​—Mit. 4:5-10, Tradução do Novo Mundo.

² Ohinatthi ophiya okathi ole, Pedru aahimukhootta Yesu ikwaha tthaaru mwaha wa woova. (Mar. 14:66-72) Nto exeeni yamphwanyinhe olipa murima woowerya olavula ohoolo wa makhulupale ale a etiini? Munepa wotteela ti waavanre muteko khumukhaliherya Pedru osuwela wira Yesu tthiri aahihihimuxiwa. Exeeni yaamwiiriha murummwa ole okupaliki wira Yesu tthiri aahitthikela okhala mukumi? Nto xeeni hiyo vanitthuneya ahu okhalana moonelo mmosaru?

3, 4. (a) Atthu xeeni yaatonko ohihimuxiwa ahinatthi oyariwa arummwa a Yesu? (b) Atthu xeeni yaatonko ohihimuxiwa ni Yesu mwanene?

³ Arummwa a Yesu yaanisuwela wira vanniweryaneya mutthu ookhwa okhala-tho mukumi, okhala wira yaahitoko ohihimuxiwa atthu khalai awo ahinatthi oyariwa. Awo yaanisuwela wira Muluku aahaavaha ikuru maprofeta Eliya ni Eliseyo wira apake miiriirya sa waahihimuxa atthu. (1 Mam. 17:17-24; 2 Mam. 4:32-37) Ookhala mutthu ookhwa aatonko ohihimuwa mwaha wa ovithiwa nipuro nimosaru naari makhuva a profeta Eliseyo, okwannyakaru makhuva awo khuhihimuwa. (2 Mam. 13:20, 21) MaKristau oopacerya yaanaamini soohimmwa iyo sa mBiibiliyani, ntoko hiyo sinaamini ahu wira Nuulumo na Muluku ekeekhai.

⁴ Vamosaru hiyo otheene sinninivara murima osoma soohimmwa siri mBiibiliyani sa atthu yaahihimuxiwe ni Yesu. Okathi aamuhihimunxe awe mwaana mmosa ene a naamukhweli, tthiri naamukhweli ole aahitteeliwa murima vanceene. (Luka 7:11-15) Okathi mmosa Yesu aahimuhihimuxa mwaarusi mmosa aarina iyaakha 12. Nkahaya mmananihe woona moota saatteeliwe aya murima anamuyari awe okathi yaamonale aya mwanaya ole ori mukumi! (Luka 8:49-56) Ni moota saatteeliwe aya murima atthu otheene yaamoonale Lazaru okhumaka mmahiye onari mukumi!​—Yoh. 11:38-44.

EXEENI ENIIRIHA OHIHIMUXIWA WA YESU OHILIKANAKA NI OHIHIMUWA WA ATTHU AKINA?

5. Moota xeeni ohihimuxiwa wa Yesu waavirikanne aya ni ohihimuxiwa wa atthu akina?

⁵ Arummwa ale yaanisuwela wira ohihimuxiwa wa Yesu waari woovirikana ni khula mutthu aatonko ohihimuxiwa khalai. Atthu ale yaatonko ohihimuxiwa khalai, yaahittikiheriwa irutthu saya sa khalai ni nuuvira okathi yaahitthikela okhwa. Masi Yesu aahihimuxiwe ni erutthu yomunepani ehinikhwa-tho. (Musome Miteko 13:34.) Pedru omuhimyaka Yesu aalempe so “Owo ohòkhwa ntoko mutthu, masi òkhalihiwa-tho mukumi” ntoko yoopattuxiwa ya omunepani. Nenna-va ori “mono wolopwana wa Muluku. Wirimu weiwo, Yesu oniruma malaikha ni makhulupale n’uwerya wothene”. (1 Ped. 3:18-22) Ekeekhai wira atthu yaahihimuxiwe khalai saari miiriirya suulupale, masi khuuvo aatonko ohihimuxiwa aalikana ni ohihimuwa wa Yesu weiwo waari wuulupalexa.

6. Etthu xeeni ohihimuwa wa Yesu yaaphwanyinhe aya arummwa awe?

⁶ Ohihimuxiwa wa Yesu waahaaphwanyiha olipa murima arummwa awe. Okathi ole Yesu khaavikaninhe okhala mutthu ookhwa ntoko awanani awe saaphavela aya. Masi owo aari mutthu mukumi oomunepani ahaaweryaneya wiirihiwa etthu yootakhala ni apinaatamu. Ohihimuxiwa wawe waahooniherya wira ole aari Mwaana a Muluku, ni eyo yaahaahakalaliha arummwa ale yaari ooriipiwa murima, vano khupacerya otthapa ni ohakalala. Ohiya-vo woova waya waahiranttelihiwa ni olipa murima. Ohihimuwa wa Yesu tonilipiherya wiiraneya ya yoolakela ya Yehova ni ihapari sooreera saalaleya aya moolipa murima elapo yotheene.

7. Muteko xeeni onivara awe Yesu olelo-va, ni makoho xeeni anikhumelela?

⁷ Hiyo nikhanle arummwa a Yehova ninnisuwelexa wira Yesu khahiyo aari mutthu pure paahi. Olelo-va owo mukumi ni onihoolela muteko onaaphwanyiha mureerelo atthu otheene valaponi. Ntoko Mwene a Omwene wa Muluku, Yesu Kristu onrowa omaliha itthu sootakhala valaponi ni okhaliha elapo ela eParayiisu enirowa okhaliwaka ni atthu voohimala. (Luka 23:43, NM) Itthu iya sotheene khisaarowa wiiraneya vaakhanle wira Yesu khohihimuxiwe. Vano mathowa xeeni arina ahu annikupaliha wira Yesu oohihimuxiwa tthiri mookhwani? Nto ohihimuxiwa wawe onitaphulela exeeni wa hiyo?

YEHOVA OHOONIHERYA IKURU SAWE SINIWERYA OMUXINTTA NAAKHWA

8, 9. (a) Exeeni yaawiirinhe makhulupale a etiini ya aYuda ovekela wira aheliwe makwarta ekhapuri ya Yesu? (b) Exeeni yaakhumelenle okathi athiyana yaaphiiye aya omahiye?

⁸ Nuumala Yesu wiiviwa, mukhulupale a anamukuttho ni aFarisi yaahirowa olavula ni Pilato khwiira: “Pwiya! Nihùpuwela wira mulavilavi ule, ari mukumi, ahihimya wira: ‘Yavirá mahiku mararú, kinohihimuwa mokhwani’. Tivó, murumé wira mahiye ale yalipeleliweke mpakha nihiku naneraru, awixutti awe ehirowé okuxa murutthu awe, numalá, yahimeryeke atthu wira: ‘òhihimuwa mw’alipa-òkhwa’. Wotha nno wokiserya wamurowa otepa onanara ovikana iwe wopajerya”. Pilato aahahimeerya wira: “Mokhalana alipeleli anyu. Murowé mwalipeleleke ntoko sinsuwelanyu”. Tthiri awo yaahiira siiso.​—Math. 27:62-66.

⁹ Murutthu wa Yesu waaheliwe ekhapuri yaathimpwale vamwala yaattiyeliwe ni nluku nuulupale. Ole ti opuro makhulupale ale a etiini yaaphavela wira Yesu okhaleke mmahiye voohimala-tho. Masi Yehova aarina muupuwelo woovirikana ni owo. Okathi Maria Madalena ni Maria mukina yaaronwe aya omahiye nihiku na neeraru, awo yaaphwannye nluku nle nipirikixeriwe ene ottaiwene nikilaatheliwe ene ni nlaikha. Nlaikha nle nahaalattula athiyana ale wira athurumele mmahiye mme, khuhiphwanya etthu. Nlaikha nle naahimmye so: ‘Khakhanle vava, òhihimuwa ntoko sahimyalyawe!’ (Math. 28:1-6, NM) Tthiri Yesu aari mukumi!

10. Etthu xeeni Paulo aahimmye awe enooniherya wira tthiri Yesu aahihihimuxiwa?

¹⁰ Itthu saakhumelenle mahiku 40 yaattharelana, saahikhaliherya wiiwanyeiha oratteene wira tthiri Yesu aahihihimuwa. Okathi aalepela awe aKorinto, murummwa Paulo aahimmye so: “Opajerya wene, miyo kihovahereryani Ehapar’ile yakhenlyaka: wira Kristu okhwenlé itampi sahu, ntoko silempwaya. Krist’uwo ahivithiwa, khuhihimuwa mokhwani mmurottoni mwaya, ntoko silempwaya. Ahìsoniherya wa Pedru, numalá, ahìsoniherya w’arummwa mulokó nanli. Vasulu vaya, ahìsoniherya-tho okathi omosá w’atthu òwamini yavikanne miloko miloko mithanú: atthu anjene a yawo nlelo àkhala, akina ahokhwa. Vaholo, ahìsoniherya wa Yakobo, numalá, ahìsoniherya w’arummwa othene. Vokiserya, ahìsoniherya wa miyo, kiri ntoko mwana òyariwa okhwene”.​—1 aKor. 15:3-8.

ETTHU XEENI ENNIKHALIHERYA OSUWELA WIRA YESU AAHIHIHIMUXIWA TTHIRI?

11. Xeeni ohimmwaka wira ohihimuwa wa Yesu ohiiraneya “ntoko silempwaya”?

¹¹ Etthu yoopacerya ennisuweliha wira Yesu aahihihimuxiwa okhala wira eyo yaahiiraneya “ntoko Silempwaya”. Nuulumo na Muluku naahihimya vahinatthi ohihimuwa nno. Mwa ntakiheryo, Davidi aahilepa wira “murumeyi” awe muulupale khaarowa ohiiwa wunttaka mmahiye. (Musome Esalimo 16:10.) Nihiku na Pentekoositi a 33 EC, murummwa Paulo aahirumeela masu a eversu ela omuhimyaka Yesu, vaavo aalavunle awe so: ‘Davidi, ònaka ohihimuwa wa Kristu ohinatthi okhumelela, ahilaleya ni molumo ala: Khanyanyaliwe nipuro n’alipa-òkhwa, nnákhala erutthu awe khiyònne wuntta’.​—Mit. 2:23-27, 31.

12. Ti pani aamonne Yesu nuumala ohihimuxiwa?

¹² Etthu ya nenli ennisuweliha wira Yesu tthiri aahitthikela okhala mukumi okhala wira hiyo nookhalana onamoona wa atthu yaawenhe itthu iyo siiraneyaka. Muhina mwa mahiku 40, Yesu aahikhumelela ohoolo wa arummwa awe mmatta memme aavithiwe awe, mphironi ya wEmaúsi ni mapuro makina. (Luka 24:13-15) Okathi owo aahilavula ni atthu oovirikana omuhela muhina Pedru ni ikrupu sinceene sa atthu. Yesu aahikhumelela-tho ohoolo wa atthu yaavikana 500 okathi omosa! Tthiri onamoona wa atthu oowaatta yoonale etthu ni maitho aya khoniweryaneya ovaanyihiwa.

13. Moota xeeni nthiti na arummwa naari aya yoowooniherya yoowi Yesu aahihihimuxiwa mookhwani?

¹³ Etthu ya neeraru ennisuweliha wira Yesu aahihihimuxiwa ti nthiti na arummwa awe okathi yaalaleerya aya. Olaleya waya mwa nthiti wira Yesu aahihihimuxiwa waahiwiriha olupatthiwa, ohaaxiwa ni wiiviwa. Vaakhanle wira Yesu khaahihimuxiwe, wala vaarimoothereriwa, nto xeeni Pedru aakhulenle awe ohasuliwa ni makhulupale a etiini yaawo yaamunyokha ni yaamwiivinhe Yesu yoowo Pedru aamulaleya awe? Mwaha woowi Pedru ni arummwa akina yaanisuwelexa wira Yesu aahihihimuxiwa ni ti yoowo aahoolela muteko wa Muluku waavariwa. Ohiya-vo, ohihimuxiwa wa Yesu wanaalipiherya arummwa awe wira naawo nave yaarowa ohihimuxiwa yakhwa vale. Mwa ntakiheryo Sitéfano aakhwiiye okupaliki wira atthu ookhwa yaamuhihimuxiwa muhoolo.​—Mit. 7:55-60.

14. Exeeni enniiriha okupaliki wira Yesu mukumi nenna-va?

¹⁴ Etthu ya neexexe ennisuweliha wira Yesu aahihihimuxiwa okhala wira sookhala itthu sinooniherya wira owo vano Mwene ni wira tokhanle Muru wa muloko wa eKristau. Mwaha waivaavo muloko wa eKristau onninnuwa. Niireke itthu iyo saamukhumelela vaakhanle wira Yesu khaahihimuxiwe mookhwaani? Woonasa wene hiyo khinaarowa wiiwa ihapari sooreera vaakhanle wira Yesu khahihimuxiwe. Masi hiyo nookhalana mathowa manceene annikupaliha wira Yesu vano mukumi ni wira tonihoolela ni weettiha muteko wa olaleerya ihapari sooreera olumwenku wotheene.

ONITAPHULELA EXEENI OHIHIMUXIWA WA YESU?

15. Xeeni ohihimuxiwa wa Yesu onnivaha aya olipa murima wira nalaleerye?

¹⁵ Ohihimuxiwa wa Yesu onninivaha olipa murima wira nilaleerye. Mwa iyaakha 2.000, awanani a Muluku aarumeela khula ekapwitthi ntoko anammwareya, anamavaanyiha, anamatuphela, okhoottiheriwa olaleerya, ohasuliwa ni wiiviwa, wira amala-malihe muteko woolaleerya ihapari sooreera. Hata vari siiso khiivo ‘eyuma epakeliwe onilupattha’ ewenrye omala-maliha muteko woolaleerya ni waapaka awiixutti onivariwa. (Yes. 54:17) Hiyo khanniwoova anamuteko a Satana. Yesu ori ni hiyo, onikhaliheryaka ntoko saaleihenrye awe. (Math. 28:20) Hiyo nookhalana mathowa manceene anniiriha ohikhala oowoova, hata neehereriwaka khula enamuna, awanani ahu khanirowa oniwerya!

16, 17. (a) Moota xeeni ohihimuxiwa onilipiha aya ele Yesu aixuttinhe awe? (b) Moovarihana ni Yohani 11:25, owerya xeeni Muluku onvanhe awe Yesu?

¹⁶ Ohihimuxiwa wa Yesu onnilipiha itthu sotheene siixuttinhe awe. Paulo aalempe wira vaakhanle wira Yesu khahihimuxiwe mookhwaani, nroromelo na maKristau ni olaleerya waya waarowa okhala wa ethiru. Musomi onitokosa itthu soolempwa mBiibiliyani aalempe so: “Vaakhanle wira Yesu khahihimuxiwe, . . .maKristau yaarowa okhala alolo, aniwokeriwa etthu ya ethiru”. Wahaakhanle ohihimuxiwa wa Yesu, Ivangelyo sotheene saarowa okhala yoohimmwa ya ethiru, yoomoriha ikharari ya mulopwana mmosa ooloka ni a ankhili yoowo aiviwe ni anyokhani awe. Masi Kristu aahihihimuxiwa, khulipiherya itthu saixuttinhe awe ohela muhina ele yaixuttinhe awe sa muhoolo.​—Mmusome 1 aKorinto 15:14, 15, 20.

¹⁷ Yesu aahimmye so: “Miyo ki ohihimuwa n’ukumi. Ole onikamini miyo, hatá anakhwaru, onokhalatho mukumi”. (Yoh. 11:25) Masu ale oovara murima yaalavuliwe ni Yesu animwiiraneya moohooceela. Yehova onvaha ikuru Yesu wira aattikiheryeke ekumi ohiya paahi ale anrowa okhalaka wiirimu, masi onoowerya waahihimuxa atthu ibilyau sinceene yaawo arina nlipelelo na ekumi yoohimala valaponi. Mukuttho wa Yesu ni ohihimuxiwa wawe onitaphulela omalamalihiwa naakhwa. Niireke osuwela eyo khonilipiha nroromelo nanyu wira nvileleke mixankiho hata weemererya okhwa moolipa murima?

18. Ohihimuxiwa wa Yesu onniroromeliha exeeni?

¹⁸ Ohihimuxiwa wa Yesu onninilipiherya wira atthu anikhala valaponi anirowa ophukeliwa moovarihana ni malamulo oophenta a Yehova. Olavulaka ni ekrupu emosa ya alopwana ni athiyana wAtena, Paulo aalavunle so: ‘Tthiri Muluku òthanla nihiku ninrowawe waphukela atthu othene n’ixariya, elamuliwaka ni Mutthu mmosá omukupalihalyawe oholo w’atthu othene, amuhihimuxaka mokhwani’. (Mit. 17:31) Tthiri Yesu ti mulipa oophuka othanliwe ni Muluku, ni hiyo nihaana waamini wira ophuka wawe onrowa okhala wa exariya ni ophenta.​—Mmusome Yesaya 11:2-4.

19. Mireerelo xeeni siniphwanya ahu mwaha wa okupali wira Yesu oohihimuxiwa?

¹⁹ Okupali wira Yesu oohihimuxiwa onniniiriha ophavela opaka yotthuna ya Muluku. Wahaakhanle okhwa ni ohihimuxiwa wa Yesu, hiyo naarowa ovikaniha okhala atthu anilamuliwa ni etampi ni okhwa. (aRom. 5:12; 6:23) Tthiri vaakhanle wira Yesu khahihimuxiwe, naarowa ohimyaka so: “Nilyeke, niwuryeke, okhala wira melo nnimokhwa!”. (1 aKor. 15:32) Vano hiyo khannitepa ovaha efaita soophavela sa erutthu. Ohiya-vo hiyo ninnivaha efaita nlipelelo na ohihimuxiwa ni nookhalana mathowa manceene a wiiwelela malakiheryo a Yehova mweekumini mwahu.

20. Moota xeeni ohihimuxiwa wa Yesu onooniherya aya okhulupale wa Muluku?

²⁰ Ohihimuxiwa wa Yesu onnivaha onamoona wa okhulupale wa Yehova yoowo ‘onatthuvela ale animphavela’.(aHeb. 11:6) Tthiri Yehova ohooniherya okhulupale, ikuru ni ankhili mwaha wa omuhihimuxa Yesu khunvaha ekumi ya omunepani ehinikhwiwa! Ohiya-vo, Muluku ohooniherya owerya wawe waakhwaniherya sooleiherya sawe. Eyo enihela muhina eprofesia ya Muluku yeeyo yaalavula sa “osulu” yoowo waarowa olokiherya myaha sa okhulupale wa Muluku. Waakhwanela wa yooleiherya eyo waavekela okhwa ni ohihimuxiwa wa Yesu.​—Maph. 3:15.

21. Nnookhaliheryani sai nlipelelo na ohihimuwa wa atthu ookhwa?

²¹ Niireke nyuwo khamunimuxukhuru Yehova yoowo onivanhe nlipelelo na ohihimuxiwa? Biibiliya onnilipiherya so: “Emp’ela, empa ya Muluku variyari v’atthu. Muluku onokhala ni yawo, awo anrowa okhala atthu awe. Muluku onrowa okhalaka Muluku vamosá ni yawo. Owo onopuputtha maithori aya othene, khunrowa okhala-tho okhwa, nnákhala oripiwa murima, walá ikuttho nnákhala ohawa. Tthiri olumwenku wa khalayi wovira”. Sooleiherya iya soovara murima aahimeriwe murummwa oororomeleya Yohani yoowo aaleeliwe so: “Mulepe etthu ila, okhala wira molumo aka t’òroromeleya ni t’èkekhai”. Nto ti pani aamuupululenle Yohani itthu iya sotheene? Tthiri ti namahihimuxiwa Yesu Kristu aamuhimeeryale itthu iyo.​—Wis. 1:1; 21:3-5.