Xeeni Anamoona a Yehova Anuupuwelela aya Yoolya ya Ohiyu ya Apwiya Moovirikana ni Itiini Sikina?

Okathi nnuupuwelela ahu Yoolya ya Ohiyu wApwiya, wala okhwa wa Yesu, ele ensuweliha-tho okhala “Santa Ceia”, ninnitthara saana malakiheryo a mBiibiliyani. (1 aKorinto 11:20) Masi itthu sinipaka aya itiini sikina okathi owo wa wuupuwelela, sinnivirikana vanceene ni itthu Biibiliya oniixuttiha awe.

Yoolakela aya

Yoolya ya Ohiyu ya Apwiya, enninuupuxerya Yesu nave ninnooniherya oxukhurela mwaha wa Yesu ovaha okumi awe mwa mureerelo ahu. (Matheyo 20:28; 1 aKorinto 11:24) Niira nlo khahiyo yoolema ya etiini enaavaha atthu mareeliho a Muluku ni oleveleliwa itampi saya.a Biibiliya oniixuttiha wiira itampi sahu paahi siniweryaneya oleveleliwa akhala wiira nnoomwaamini Yesu, ohiya otthara yoolema ya etiini. — aRoma 3:25; 1 Yohani 2:1, 2.

Enipakiwa okathi xeeni?

Yesu aahimmye wiira awiixutti awe yaahaana wuupuwelelaka Yoolya ya Apwiya, masi khaahimmye ikwaha sene akhanle aya oopaka eyo. (Luka 22:19) Atthu akina anikupali wiira eyo ehaana opakiwa mukwaha mmosa khula mweeri; akina anuupuwela wiira ehaana opakiwa mukwaha mmosa khula esumana, khula nihiku aahiiso ikwaha sinceene vanihikuni. Nave akina anihimya wiira khula mutthu pooti othanla ikwaha sene oniphavela awe wupuwelelaka Yoolya ya ohiyu ya Apwiyab. Masi sookhala itthu sinireerela wuupuweleliwa saana.

Yesu aahipaceriha yoolya ya Ohiya nihiku aapakiwa awe Paasikha a aYuda, ni aakhwiiye evinre ene mahiku vakhaani. (Matheyo 26:1, 2) Ele khiyaakhumelenle mekhayaru. Biibiliya onnilikanyiha mukuttho wa Yesu ni Mukuttho wa mwaapwittipwitthi waavahiwa nihiku na Paasikha. (1 aKorinto 5:7, 8) Paasikha aapakiwa mukwaha mmosa vamwaakhani. (Okhuma 12:1-6; Onamukuttho 23:5) Mwa enamuna emosaru, makristauc oopacerya nave yuupuwelela okhwa wa Yesu mukwaha mmosa vamwaakhani. Nave Anamoona a Yehova annitthara ntakiheryo nimosaru niri mbiibiliyani.

Nihiku ni Okathi

Etthu aapanke awe Yesu enninikhaliherya osuwela, ohiya paahi ikwaha sene, masi-tho nihiku ni iwoora onireerela aya wuupuweleliwa ohiyu wa Apwiya. Yesu aapanke niira ya Wuupuwelela nuumala nsuwa okela wala onaya, nihiku na 14 a Nisani, eyaakha ya 33 Nuumala Kristu Orwa. Etata ela emmutthara kalendaario a mbiibiliyani. (Matheyo 26:18-20, 26) Hiyo nlelo ninnuupuwelela okhwa wawe khula eyaakha nihiku nimosaru nenle nittharaka ntakiheryo na makristau oopacerya.d

Nihiku 14 a Nisani mwaakha wa 33 Nuumala Kristu Orwa, waari Namathanu, masi namutthara kalendaario ahu, nihiku ninvarihana ni etaata ela khula eyaakha pooti okalyariki mahiku oovirikana. Wiira nisuwele nihiku onrowa awe okhala 14 a Nisani, ninrumeela enamuna emosaru ya okathi wa Yesu, ohiya kalendaario a vano.

Ephau ni Eviinyu

Niira na Wuupuwelela Yesu aapacerinhe awe, arumenle ephau yoohiheliwa eferemento ni eviinyu tinto, yaahanle nuumala Paasikha. (Matheyo 26:26-28) Ninttharaka ntakiheryo nawe, ninrumeela ephau yoohiheliwa eferemento ni yoohiheliwa etthu ekina. Nave ninrumeela eviinyu tinto yoohiheliwa etthu, ohiya sumo a ewuuva wala eviinyu yooheliwa esuukari, eviinyu ya mihali wala ikaju aahiiso itthu sikina.

Itiini sikina sinrumeela ephau yooheliwa eferemento. Hata vari siiso mBiibiliyani, eferemento ikwaha sinceene enthoonyerya etampi ni wuutta. (Luka 12:1; 1 aKorinto 5:6-8; aGalasia 5:7-9) Tivonto, paahi ephau yoohiheliwa eferemento ni yoohiheliwa itthu sikina, tenireerela orumeeliwa sintoko ethoonyeryo ya erutthu ya Kristu yahaarina etampi. (1 Pedru 2:22) Yoolema ekina Biibiliya ohintumererya awe, orumeeliwa sumo a ewuuva yoohiheliwa eferemento ohiya eviinyu. Ikerexa sikina sinnipaka eyo mwaha woowi sinnaakhoottiherya atthu owurya eviinyu. Masi Biibiliya khoniixuttiha siiso. — 1 Timootheyo 5:23.

Ephau ni eviinyu ithoonyeryo paahi

Ephau ni eviinyu tinto, enrumeeliwa nihiku na Wuupuwelela, ithoonyeryo, sa erutthu ni ephome ya Kristu. Khasinthatuwa mwa miiriirya nave khasintakaahereya ni ephome ni erutthu yeekeekhai ya Yesu, sintoko anuupuwela aya atthu akina.

• Yesu khaarumme awiixutti awe owurya ephome awe. Aanisuwela wiira Nuulumo na Muluku naanikhoottiha olya ephome, okhala wiira ephome ti yoowaarya. (Maphattuwelo 9:4; Miteko 15:28, 29) Veekeekhai Yesu khuuvo mutthu aarowa awe omutumererya otthekela malamulo a Muluku. — Yohani 8:28, 29.

• Arummwa a Yesu khiyaarowa owerya owurya ephome ya Yesu, nlelo ori ene mukumi. Ephome awe nlelo yiira ehinatthi omwaraxiwa. — Matheyo 26:28.

• Mukuttho wa Yesu oovahiwe “ekwaha emosa paahi”. (aHeeberi 9:25, 26) Akhala wiira ephau ni eviinyu enrumeeliwa Ohiyu wApwiya, ennithatuwa erutthu ni ephome ya Yesu, ale ankhuura ephau eyo ni owurya eviinyu nihiku na wuupuwelela yaarowa otthikelaka mukuttho awe, vanakhala ntoko wiira antthikela omwaraxa ephome awe.

• Yesu aahimmye so: “Muthipeleleke opaka ela mukuupuwelaka miyo”.— 1 aKorinto 11:24.

Atthu akina anikupali wiira ephau ni eviinyu ennitathuwa erutthu ni ephome ya Yesu. Etthu enwiiriha wuupuwela eyo, soolepa sikina sa mBiibiliya sihitaphuleliwe saana aBiibiliya akina. Mwa ntakiheryo, aBiibiliya anceene moolumo a Yesu ari Matheyo 26:28 ataphuleliwe so: “Ela ephome aka”. Masi efrase ela pooti otaphuleliwa so: “Ela enithoonyerya ephome aka”, wala “Ela entaphulela ephome aka”.e Yesu aarumenle masu a nlikanyiho, enamuna emosa yoolikanyiherya etthu sintoko iira awe okathi aixuttiha awe. — Matheyo 13:34, 35.

Ti pani onikhuura ephau ni owurya eviinyu?

Okathi Anamoona a Yehova anuupuwelela aya Ohiyu wApwiya, atthu vakhaani paahi tanikhuura ephau ni owurya eviinyu ya wuupuwelela. Mwaha wa xeeni?

Ephome ya Yesu emwaraxiwe yookumiherya “nivarihano na niinaano”, nenlo niranttenle nivarihano napaakiwe ni Yehova vamosa ni aisarayeli a khalai. (aHeeberi 8:10-13) Atthu aniheliwa muhina mwa nivarihano nlo na niinaano tanikhuura ephau ni owurya eviinyu nihiku na Wuupuwelela. Ekurupu eyo khenihela muhina makristau ootheene, masi paahi ti ya ale “yiihaniwe” mwa enamuna ya vameekhaaya ni Muluku. (aHeeberi 9:15; Luka 22:20) Nave Biibiliya onnaahimya atthu arina eparakha yoorowa olamulelaka ni Kristu wiirimu, okhala a 144.000. — Luka 22:28-30; Wiisuupulula 5:9, 10; 14:1, 3.

Ekurupu enrowa olamulelaka ni Kristu eniitthaniwa “nikoto naamukhaani”. Moovirikana ni vo, anamunceene a hiyo anrowa wiirelaka mpantta “muttitthi” muulupale wa atthu anrowa waakhela okumi woohimala valaponi. (Luka 12:32; Wiisuupulula 7:9, 10) Atthu arina nlipelelo nookhala valaponi, khanikhuura ephau ni khaniwurya eviinyu ya Wuupuwelela. Masi hata vari siiso annirowela muthukumano owo wiira yooniherye oxukhurela waya mukuttho Yesu ovanhe awe wiira owoopole atthu ootheene. — 1 Yohani 2:2.