Yesaya
16 Mmuroihele epwittipwitthi mwene a mulaponi,
Mukhumaka oSela, nviraka moothakoni,
Mpakha ophiya mwaako wa epooma ya oSiyoni.
2 Ntoko mwaapalame onoomoliwa mpuruni mwawe,+
Atthu a oMowabi, anrowa okhala siiso opuro onilapuwa atthu, wa Arinoni.+
3 “Nvahe miruku, muthanle etthu yoowiira.
Muuttutthi onookhapelelani othana eriyari, oriipe ntoko ohiyu.
Nwiipithihe ale amwareyale ni muhaavarihe ale anitthyawa.
4 Nyuwo Mowabi, atthu aka amwareyale akhale eriyari anyu.
Mukhale nipuro aniipitha aya, mwaha wa ole oniphavela waapwetexa.+
Mulipa-oopwetexa onoomala,
Ohononiwa onoomala,
Nave ale anaanyakela atthu akina anoomala mulaponi.
5 Nuumala-vo, mwene a emusi ya Davidi, onrowa okilaathi veehiceni.
Owo onrowa okhala oororomeleya ni omwene awe onrowa okhala woolipa mwaha wa ophenta wawe woororomeleya;+
Onimwaaphukelaka atthu ottharaka exariya, ni onoopakaka itthu mwa xariya”.+
6 Nihiiwa olavuliwaka sa wiixinnuwiha wa Mowabi, owo onniixinnuwiha vanceene.+
Nihiiwa olavuliwaka sa wiittottopa wawe, wiixinnuwiha wawe ni onanariwa wawe;+
Masi wiittottopa wawe ti weethiru.
7 Tivonto, Mowabi onrowa wiikhupanyerya mwaha wa maxakha awe;
Atthu ootheene a weiwo animwiikhupanyerya.+
Ale anrowa omaniwa, anrowa wiikhupanyeryaka yinlelaka ipoolu sa ewuuva yoowuuma ya oKiri-Harexi.+
Anamalamulela a mulaponi aanyakatta iritta seiyo saimale ewuuva yooxeerya;*
Iritta iyo saahiphiya oYazeri.+
Iyo saahiphiya mpakha woothakoni.
Iritta saya isya saahiphiya mpakha ophareya.
9 Tivonto, miyo kinimunlela ematta ya ewuuva ya oSiibima ni ematta ya oYazeri.
Nyuwo Hexeboni ni Eleyale,+ maithori aka anoosareya mulaponi mwanyu,
Okhala wiira otthapa wa ale anihepha ipyo ni anithukumanya mihokorokho sa elimwe, woomala.*
10 Omatta, woomala otteeliwa murima ni otthapa,
Nave wiipa ni otthapa woomala mmatta mwa ewuuva.+
Mulipa oninyakatta ewuuva, khonnyakatta-tho ewuuva,
Okhala wiira miyo koomaliha otthapa.+
11 Mwaha wa Mowabi, murima aka onnittettemela,+
Ntoko mikhoyi sa viola,
Nave kooriipiwa murima vanceene, mwaha wa Kiri-Harexi.+
12 Hata Mowabi iikukhumulaka owela nipuro noottukhuwa wiira aakokhorele amuluku awe, aahiiso ovekelaka vanceene mutemplo mwawe, onrowa opaka eyo mahala ene.+
13 Ala moolumo Yehova aalavunle awe khalai ene omuhimyaka Mowabi. 14 Vano Yehova onihimya wiira: “Ntoko eniiraneya aya ni namuteko oniliviwa, ovuwa wa Mowabi onoomala, muhina mwa iyaakha tthaaru. Atthu khanrowa wiiwananaka, nave ale anrowa ohala anrowa okhala vakhaani ni oohilipa”.+