Ezekiyeli
28 Kaahisuwelihiwa-tho moolumo a Yehova yaahimya wiira: 2 “Nyuwo mwaana a mutthu, mmuleele muhooleli a oTiiro wiira: ‘Etthu onihimya awe Pwiya Muulupalexa Yehova, tiila:
“Mwaha wa wiixinnuwiha vamurimani vanyu,+ nyuwo munnihimya wiira: ‘Miyo ka muluku.
Kikilanthi veehiceni va muluku, eriyari ya ephareya’.+
Masi nyuwo mwa mutthu paahi, khahiyo mwa muluku,
Nnaamwi muupuwelaka vamurimani vanyu wiira mwa muluku.
3 Kiireke nyuwo mwa mutthu oosuwelexa onvikana Daniyeli?+
Kiireke khiivo esiiri ekhanle anyu oovitheriwa?
4 Nyuwo moothaaciri mwaha wa osuwela wanyu vamosa ni ankhili anyu,
Nave munnithipelela othukumanya eweero ni eparatha, mapuro munisuka anyu mihakhu sanyu.+
5 Osuwela wanyu omwiira nakoso, woowiirihani othaaciri,+
Nave murima anyu ohiixinnuwiha mwaha wa mihakhu sanyu”’.
6 “‘Tivonto, etthu onihimya awe Pwiya Muulupalexa Yehova, tiila:
“Okhala wiira vamurimani vanyu munuupuwela wiira mwa muluku,
7 Kinimookumiheryani amalapo ootepa otakhala, yaawo anikhuma maloko makina.+
Nto awo anootholola ispaata saya,* anoopwetexa itthu sanyu sootepexa oreera, seiyo mphwanye anyu ni osuwela wanyu.
Nave-tho anoonanariha oreera wanyu.+
9 Niireke munoowerya omuhimeerya ole oniwiivani, wiira nyuwo mwa muluku?
Mmatatani mwa ale anooveehani, nyuwo munrowa okhala mutthu paahi, ohiya muluku”’.
10 “Pwiya Muulupalexa Yehova, onihimya wiira: ‘Nyuwo munimwiiviwa ni amalapo, ntoko atthu oohinnuwihiwa,
Okhala wiira ti miyo kilavunle’”.
11 Kaahisuwelihiwa-tho moolumo a Yehova yaahimya wiira: 12 “Nyuwo mwaana a mutthu, mwiipe nsipo na wiikhupanyerya, mmuhimyaka mwene a oTiiro. Mmuhimeerye wiira: ‘Etthu onihimya awe Pwiya Muulupalexa Yehova, tiila:
“Nyuwo mwaari ntakiheryo na mutthu ohirina etampi,
13 Nyuwo mwaari wEedeni, exarti ya Muluku.
Mwaahireerihiwa ni mithinto sootheene sa maluku oowaarya,
Eyo piiyo, rupi, topaasio, xaspe, krisoolito, oonikisi, xaade, safira, turkesa,+ ni esmeralda.
Maluku awo yaahireerihiwa ni eweero.
Awo yaahilokiheriwa nihiku mwaapattuxiwe anyu.
14 Miyo kaahoothanlani wiira mukhale kerubi onikhapelela, yoowo othanliwe.
Nyuwo mwaari vamwaako woowaarya wa Muluku,+ nave mwaaneetta eriyari ya maluku a mooro.
15 Mwaari oororomeleya ni mweettelo anyu, okhuma nihiku mwaapattuxiwe anyu,
Mpakha okathi mwaapacenrye anyu ohiroromeleya.+
Tivo, kinoowoomolani vamwaako wa Muluku, ntoko mutthu oohiloka ni kinimoopwetexani.+
Nyuwo kerubi onikhapelela, kinoowoomolani opuro anyu, eriyari ya maluku a mooro.
17 Murima anyu waahipacerya wiixinnuwiha mwaha wa oreera wanyu.+
Muhaahonona ankhili anyu mwaha wa owerya wanyu wuulupale.+
Kinimoorihelani vathi.+
Kinimoopwehani ohoolo wa mamwene, wiira aweheke etthu ewiiranenleni.
18 Mwaha wa mulattu anyu muulupale ni anakoso anyu oohiroromeleya, moonanariha mapuro anyu oowaarya.
Kinoopattiha mooro eriyari anyu, yoowo onrowa woopahani.+
Kinimookhalihani ettuurwa enikhala vathi, ohoolo wa atthu ootheene anoowehani.
19 Atthu ootheene a maloko makina yaawo yoosuwelani, animoowehakani etikinihiwe ene.+
Emalelo anyu enrowa okhala yootutuxerya ni yoowoopiha,
Nave khamuntthikela-tho okhala”’”.+
20 Kaahisuwelihiwa-tho moolumo a Yehova yaahimya wiira: 21 “Nyuwo mwaana a mutthu, nweheke oSiidoni,+ nave mulaleye eprofesia muhimyaka weiwo. 22 Muhimye wiira: ‘Etthu onihimya awe Pwiya Muulupalexa Yehova, tiila:
“Nyuwo muttetthe wa oSiidoni, miyo kinoowana ni nyuwo, nave kinoovuwihiwa eriyari anyu.
Atthu anoosuwela wiira miyo ka Yehova, okathi kinrowa aka woophukelani, ni okathi kinrowa aka oreerihiwa eriyari anyu.
23 Kinimookumiheryani ekwerere, nave mustaraatani mwanyu enoomwareela ephome.
Atthu ookhwa anoomorela eriyari anyu, okathi muttetthe anyu onrowa aya otupheliwa ni espaata* ipantta sootheene.
Nto atthu anoosuwela wiira miyo ka Yehova.+
24 “‘“Atthu a nloko na Isarayeli khanttikela-tho orukureriwa ni itthu soohaaxa, nnakhala ni miiwa soowereya,+ eyo piiyo, ale anaathanya. Nto atthu anoosuwela wiira miyo ka Pwiya Muulupalexa Yehova”’.
25 “‘Etthu onihimya awe Pwiya Muulupalexa Yehova, tiila: “Okathi kinrowa aka otthikela waathukumanya atthu a nloko na Isarayeli, kaakumihaka maloko yaamwara-mwariwe aya,+ awo anookireeriha ohoolo wa maloko.+ Nto awo anookhalaka mulaponi mwaya,+ kanvahale aka murumeyi aka Yakobe.+ 26 Anrowa okhalaka ni murettele,+ anrowa otekaka ipa saya ni anrowa waalaka miri saya sa ewuuva.+ Aayo, awo anrowa okhalaka ni murettele okathi kinrowa aka waaphukela atthu ootheene yaarukurenrye, yaawo anaathanya.+ Nto awo anoosuwela wiira miyo ka Yehova, Muluku aya”’”.