Yoosoma 6
Eparayiisu Erii Vakhiviru!
Itthu sootakhala siniiraneya ninano-va sinooniherya wira Eparayiisu yookhuveela. Biibiliya aahimmye wira waamukhala okathi wowoopihexa ehinatthi orwa Eparayiisu. Ninkhala ninano-va mmahiku yaawo. Ikina saahimmye Biibiliya wira inimwiiraneya tiiya:
Ikhotto sulupale. “Maloko makina anotuphela maloko makhw’aya, elapo enotuphela elapo ekina.” (Matheyo 24:7) Eprofecia ela ehiiraneya. Okhuma eyaakha ya 1914, sookhumelela ikhotto piili sa olumwenku ni ikina sinceene saamukhaani. Iya soowiiva atthu ikonto miloko sene.
Iretta mapuro otheene. ‘Mapuro manjene anorwela iretta’. (Luka 21:11) Vano, sinnikhumelela seiya? Aayo. Cancro, iretta sa murima, elapaha, malariya, SIDA ni iretta ikina sinniwiiva atthu anceene.
Othowa wa soolya. Mulaponi motheene, aakhala atthu ahirina yoolya emphiyerya. Khuta yaakha, ikonto miloko sene sa atthu ankhwa etala. Ela ethoonyeryo ekina yawi Eparayiisu enimorwa ninano. Biibiliya onihimya wira: ‘Mapuro manjene enokhumelela . . . etala.’—Marko 13:8.
Itetere. ‘Inokhumelela . . . itetere ilapo sinjene.’ (Mateyo 24:7) Ela-tho ennikhumelela okathi ahu ola. Ovikana ikonto ekonto emosaa ya atthu annookhwa itetere okhumela mu 1914.
Atthu ootakhala. Atthu yaarowa “osiveliwaka musurukhu” ni ‘wiitthuna’. (NM) Yaarowa okhala “òphavela sopuha, òmuhiya Muluku”. Anamwane yaarowa okhala “òhiwìwelela anamuyari aya”. (2 Timótheyo 3:1-5) Khimuneemererya wi olelo-va aakhala atthu siisa? Atthu ahimmuttittimiha Muluku ni ala anniruuha mixankiho waale amphavela wiixutta sa Owo.
Opahula. Wamukhala-tho “wuncerereya wa ohiweleliwa nlamulo”. (Matheyo 24:12, NM) Pooti waakhuleliha wi opahula wootepa ninano-va ovikana iyaakha sivinre. Atthu a mapuro otheene annoova waakhiwa itthu saya, omorela moowokiwani ni okhala oopweteiwa.
Sotheene iyo sinooniherya wira Omwene wa Muluku orii vakhiviru. Biibiliya onihimya wira: “Monaka-ru iya sìraneyaka, musuweleke wira omwene wa Muluku ori vakhiviru.” (Luka 21:31) Omwene wa Muluku exeeni? Erii ekuvernu ya wirimu ya Muluku enrowa omutikitherya Parayiisu veelaponi ya vathii. Omwene wa Muluku onrowa orantteliha ikuvernu s’apinaatamu.—Daniyeli 2:44.