Makoho Oowaakhuliwa

◼ Ninrowa waakhaliherya sai mapioneero?

Olumwenku wotheene, anna ni arokora oowiiraka 800.000 aarumeela ntoko mapioneero ookilaatheya ni a vameekhaaya, mwaakha wa muteko wa 2009. Mapioneero ala aavaha okathi aya, ikuru saya, ni muhakhu aya mwa enamuna yootepa oreera wira akhaliherye olaleya ihapari sooreera sa Omwene. (Mir. 3:9) Tthiri, Yehova onnisiveliwa ni wiimananiha onipaka aya! Nto, ninrowa omutakiha sai Yehova ni waakhaliherya mapioneero ophwanya ohakalala ni ovilela mmuteko aya?

Tthiri, masu ahu oottottopela pooti waalipiha wira avikaniheke orumeela ntoko pioneero. (Mir. 25:11) Niireke wira hiyo pooti ompaka palano khuta esumana wira nilaleeryeke hoothe? Okathi onilaleya ahu hoothe, hiyo pooti waakuxa mukaaroni mwahu ohiya onikuxa mukaaroni mwaya. Nto, akhala wira nniwela ekaaro aya, hiyo pooti waavaha musurukhu ahu wira naakhaliherye. (1 aKor. 13:5; aFil. 2:4) Nave, hiyo pooti wooniherya waaphenta wahu, naalattulaka owannyihu wira nilye hoothe.​—1 Ped. 4:8, 9.

Biibiliya onilipiherya wira Yehova onimwaakhaliherya atthu anipweha Omwene awe opuro oopacerya. (Esal. 37:25; Math. 6:33) Owo pooti orumeela emusi ahu yowiiraana ya eKristau wira onikhaliherye. (1 Yoh. 3:16-18) Ekeekhai wira mapioneero khanilipelela ovahiwa musurukhu. Nto, vaavo vanithoiwa aya etthu khivanireerela omakelaka oveka-veka. Masi, hiyo pooti waakhaliherya mapioneero ala oororomeleya ni omaleliha ‘othoiwa waya’, akhala wira ninnoona sootthuneya saya.​—2 aKor. 8:14, 15.

Vaavo Febe, namalaleerya a nthiti a eseekulu yoopacerya a Muloko wa oKenkhere, aaronwe awe oRoma, Paulo aahaatumererya anna a oRoma wira: “Mmwakhele ni nsina n’Apwiya, ntoko simphwanelaya wira aKristu: mmukhaliherye mwa sothene sinimuthowa”. (aRom. 16:1, 2) Nto, hiyo nookhalana eparakha ya wooniherya ophentana wahu mmulokoni, naakhaliheryaka anna yaale anilaleya ihapari sooreera moohihiyererya ni anirumeela ntoko mapioneero ookilaatheya ni a vameekhaaya.​—Mit. 5:42.