Murumeele Inamuna Sotheene Wira Mulaleye Ihapari sa Omwene!
1. Exeeni eniixutta ahu sa ntakiheryo na Davidi?
1 Mwene Davidi aaniphavela vanceene oteka empa ya Yehova. Masi, okathi aasuwenle awe wira khaarowa ovara muteko owo, Davidi khaakhumunwe. Nto aahilokiherya itthu wira Salomoni oteke etemplo. (1 Mam. 8:17-19; 1 Wah. 29:3-9) Ohiya omakela wuupuwela itthu sahaawerya awe, Davidi uupuwela itthu saawerya awe. Ninrowa omutakiha sai Davidi okathi nimphavela ahu inamuna soolaleya Omwene?
2. Ninrowa otokosa sai makhalelo ahu?
2 Mpake Ele Eniwerya Anyu: Anna anceene aakhweiherya ikumi saya wira akele opioneero wookhaliherya wala wookilaatheya. (Math. 6:22) Munoowerya okela muteko owo? Akhala wira munootokosa makhalelo anyu vamosa ni ovekela, woonasa wene munimoona wira woohuleya mukhora muulupale ohoolo wanyu. Nto muttottele muraarelo eparakha eyo!—1 aKor. 16:8, 9.
3. Inamuna xeeni soolaleerya nikhanle ahu oottottela muraarelo hata nihiweryaka okela opioneero?
3 Sai akhala wira khamuniwerya okela opioneero mwaha wa makhalelo anyu? Murumeele inamuna sikina murina anyu. Mwa ntakiheryo, akhala wira munivara muteko ni atthu oohaamini, mwaavyeke enamuna yowaalaleerya. Wala akhala wira munoowereiwa, nyuwo pooti waalaleerya ale anookhapelelani. Muhiliyale wira anna ahiniwerya olaleerya vanci mwaha wa wuuluvala wala owereiwa, anneemereriwa ovaha minutu 15 khula mweeri. Nave, okathi munilepa anyu erelatoorio anyu, muhiliyaleke olepa okathi onivira mulaleeryaka mohiilokiherya, iliivuru munivaha anyu, ni ifolyeeto sa Wuupuwelela okhwa wa Yesu ni kongresu. Nto vaavo munrowa anyu otakaaha iwoora iyo, munimoona wira moolaleerya vanci.
4. Tiivi eri yoolakela anyu?
4 Hata muhiweryaka okela opioneero, muurumeeleke inamuna sotheene wira mulaleye ihapari sooreera. Mwiira siiso, munoohakalala vanci mwaha woosuwela wira munnipaka sotheene muniwerya anyu mwaha wa Omwene.—Mar. 14:8; Luka 21:2-4.