Yoosoma 13

Munrowa Ophwanya Sai Etiini Yekeekhai?

Niireke wira itiini sotheene sinnimusivela Muluku, wala enimusivela etiini emosa paahi? (1)

Xeeni varya aya itiini sinceene sinihimya okhala sa eKristau? (2)

Munrowa waasuwela sai maKristau eekeekhai? (3-7)

1. Yesu aapacerinhe etiini emosa paahi ya eKristau yekeekhai. Tivonto olelo va nohaana okhala nikhuuru wala ekrupu emosa paahi ya anamakokhorela eekeekhai a Yehova. (Yohani 4:23, 24; aÉfeso 4:4, 5) Biibiliya oniixuttiha wira atthu vakhaani paahi tanitthara ephiro yoophunyeya enirowa wookumini.​—Matheyo 7:13, 14.

2. Biibiliya aahihimya vahinatthi wira nuumala okhwa arummwa oopacerya a Yesu, vakhaani-vakhaani mmuloko wa eKristau saamukela sowiixuttiha ni sowiira soohiloka. Ale yaamini yaarowa ohapuxiwa wira yaatthareke atthu mmapuro mwa omutthara Kristu. (Matheyo 7:15, 21-23; Miteko s’Arummwa 20:29, 30) Ti nthowa naya vanoona ahu itiini sinceene sinihimya okhala sa eKristau. Nto ninrowa waasuwela sai maKristau eekeekhai?

3. Ethoonyeryo yuulupale ya maKristau eekeekhai ti yoowi awo tthiri anniphentana mukina ni mukhw’awe. (Yohani 13:34, 35) MaKristau eekeekhai khaniixuttihiwa wuupuwelaka wira awo tari ooloka waavikana atthu a nloko nikina wala nikhuli nikina. Nnakhala vakhaani khaniixuttihiwa waanyokha atthu a ilapo sikina. (Miteko s’Arummwa 10:34, 35) Tivonto awo khaniirela mpantta ikhotto sa mulaponi. Makristau eekeekhai annithokoreryana mukina ni mukhw’aya ntoko munna ni murokora.​—1 Yohani 4:20, 21.

4. Ethoonyeryo ekina ya etiini yekeekhai ti yoowi ale ari mutiinini mmo annimuttittimiha vanceene Biibiliya. Annimwaakhulela Biibiliya okhala Nuulumo na Muluku ni annikupali ele enihimya awe. (Yohani 17:17; 2 Timótheyo 3: 16, 17) Awo annimuthokorerya Biibiliya okhala etthu yootepa otthuneya ovikana muupuwelelo wala soolema sa apinaatamu. (Matheyo 15:1-3, 7-9) Awo anniimananiha omuttharihela Biibiliya mookumini mwaya khuta nihiku. Nto, awo khanivara etthu enivirikana ni ele eniixuttiha aya.​—Tito 1:15, 16.

5. Etiini yekeekhai yohaana-tho ovuwiha nsina na Muluku. (Matheyo 6:9) Yesu aahaasuweliha atthu akina nsina na Muluku, Yehova. MaKristau eekeekhai ahaana opakaka etthu emosaru eyo. (Yohani 17:6, 26; aRoma 10:13, 14) Mapuro anikhala anyu, tani aniwiixuttiha atthu akina nsina na Muluku?

6. MaKristau eekeekhai ahaana olaleeryaka Omwene wa Muluku. Eyo ti etthu Yesu yaapanke awe. Okathi wotheene Yesu aanilavula sa Omwene. (Luka 8:1) Yesu aahaatumererya awiixutti awe olaleerya mitthaka imosa-mosaru elapo yotheene. (Matheyo 24:14; 28:19, 20) MaKristau eekeekhai annikupali wira paahi Omwene wa Muluku tonrowa oruuha murettele ni okhala saana wekeekhai valaponi.​—Esalimo 146:3-5.

7. Awiixutti a Yesu ahiireleke mpantta elapo ela yootakhala. (Yohani 17:16) MaKristau eekeekhai khaniirela mpantta wa myaha sa ipoliitika sa mulaponi ni owana-wana wa atthu a mulaponi. Awo annisyaka mweettelo ni sowiira sootakhala, vamosa ni muupuwelelo woohiloka ori woolema mulaponi. (Yakobo 1:27; 4:4) Niireke wira munniwerya woona mmuttettheni mwanyu etiini erina ithoonyeryo iyo sa eKristau yekeekhai?

[Efootu ya epaaxina 27]

MaKristau eekeekhai Anniphentana mukina ni mukhw’awe annimuttittimiha Biibiliya ni annilaleerya Omwene wa Muluku