Yoosoma 7

Moota Womwaattamela Muluku Nnivekelo

Xeeni varya aya vootthuneya ovekelaka moohihiyererya? (1)

Tani onitthuneya ahu onvekelaka ni nivekeleke moota xeeni? (2, 3)

Itthu xeeni sinireerela ovekelaka? (4)

Okathi xeeni onitthuneya anyu ovekelaka? (5, 6)

Niireke wira Muluku onniwiriyana mavekelo a atthu otheene? (7)

1. Ovekela ori olavula ni Muluku mowiiyeviha. Nyuwo muhaana onvekelaka Muluku moohihiyererya. Eyo enoowiirihani omwaattamela Muluku ntoko mpatthani oophenta. Yehova ti muulupalexa ni aikuru, masi owo onniwiriyana mavekelo ahu! Niireke wira nyuwo munninvekela Muluku imaara sinceene?​—Esalimo 65:3; 1 aTesalonika 5:17.

2. Nivekelo nniirela mpantta okokhorela wahu. Tivonto, nohaana onvekelaka paahi Muluku, Yehova. Vaavo Yesu aarya awe valaponi, okathi wotheene owo anvekela Tiithi awe paahi, khuuvo mukina anvekel’awe. Hiyo nohaana opakaka etthu emosaru eyo. (Matheyo 4:10; 6:9) Masi, mavekelo ahu otheene ahaana wiiriwaka mwa nsina na Yesu. Eyo enooniherya wira ninnittittimiha okhulupale wa Yesu ni wira ninniroromela mukuttho awe a yowoopola.​—Yohani 14:6; 1 Yohani 2:1, 2.

3. Okathi oninvekela ahu Muluku, nohaana ohimyaka itthu siri vamurimani vahu. Mavekelo ahu ahikhaleke oosukiwa mmuru aahiiso wira oomusoma muliivuruni. (Matheyo 6:7, 8) Okathi woovekela pooti orumeela khuta mukhalelo onooniherya nttittimiho, khuta okathi, ni khuta opuro. Muluku onniiwa hata mavekelo yaale anipakiwa ni murima moohiiwanyeya nsu. (1 Samuweli 1:12, 13) Ti vooloka ophwanya opuro woomaaleleya ohikhanle atthu akina wira nipake mavekelo ahu.​—Marko 1:35.

4. Myaha xeeni sinitthuneya anyu ohimyaka mmavekeloni? Khuta etthu enivarihana ni ompatthani anyu ni Muluku. (aFilipi 4:6, 7) Nivekelo na ntakiheryo, nnooniherya wira nohaana ovekelaka voohimya sa nsina ni soolakela sa Yehova. Nohaana-tho ovekelaka wira nivahiwe itthu sootthuneya sa werutthuni, wira nileveleliwe soottheka sahu, ni wira nikhaliheriwe okhoottela soweehererya. (Matheyo 6:9-13) Mavekelo ahu ahikhaleke a nrima. Nohaana ovekelaka itthu seiye sinivarihana ni yootthuna ya Muluku paahi.​—1 Yohani 5:14.

5. Nyuwo pooti ovekelaka khula okathi vaavo murima anyu onootumereryaaweni omuxukhuru wala omuttottopela Muluku. (1 Wahala a Mamwene 29:10-13) Muhaana ovekelaka akhala wira muri mmixankihoni ni okathi yoole oneehereriw’aya nroromelo nanyu. (Esalimo 55:23; 120:1) Ti vooreerela ovekela muhinatthi opacerya olya. (Matheyo 14:19) Yehova onninlattula wira ‘nilompeke okathi wothene’.​—aÉfeso 6:18.

6. Nohaana ovekelaka mwa vameekh’aya akhala wira noopaka yoottheka yuulupale. Okathi owo, hiyo nohaana onvekelaka Yehova wira onimorele ikharari ni olevelela etampi ahu. Akhala wira ninnihimya wa Yehova itampi sahu ni wiimananiha ohitthikela itampi iyo, Muluku onrowa ‘onilevelela’.​—Esalimo 86:5; Miruku 28:13.

7. Yehova oniwiriyana mavekelo aanaxariya paahi. Wira Muluku owiriyane mavekelo anyu, nyuwo muhaana wiimananiha wiiwelela malamulo awe. (Miruku 15:29; 28:9) Okathi onivekela anyu, nyuwo muhaana wiiyevihaka. (Luka 18:9-14) Muhaana wiilipiherya opaka itthu moovarihana ni ele eniveka anyu. Opaka eyo onimooniherya wira mookhalana waamini ni wira munivekela ni murima wotheene. Paahi mu enamuna eyo Yehova tonrowa awe waakhula mavekelo anyu.​—aHéberi 11:6.