Yoosoma 16

Yoolakel’anyu ya Omurumeela Muluku

Exeeni enitthuneya anyu opaka wira mukhale mpatthani a Muluku? (1, 2)

Munrowa wiivahererya sai wa Muluku? (1)

Munitthuneya opaka exeeni wira mbatiziwe? (2)

Munrowa ophwanya sai ikuru wira muvikanihe okhala oororomeleya wa Muluku? (3)

1. Wira mukhale mpatthani a Muluku, nyuwo muhaana osuwela oratteene ekeekhai eri mBiibiliyani. (1 Timótheyo 2:3, 4), waamini itthu sixuttalya anyu (aHéberi 11:6), ottharuwa soottheka sanyu (Miteko s’Arummwa 17:30, 31), ni orukunuxa mweettelo anyu. (Miteko s’Arummwa 3:19) Nto omphenta wanyu Muluku wohaana owiirihani wiivahererya. Wiivahererya onitaphulela opaka nivekelo mutthu oryeene ekhawe, omuhimeeryaka Muluku wira onniivahererya wira opakeke yootthuna awe.​—Matheyo 16:24; 22:37.

2. Nuumala wiivahererya wa Muluku, nyuwo muhaana obatiziwa. (Matheyo 28:19, 20) Obatizo onniwiiriha atthu otheene osuwela wira nyuwo muhiivahererya wa Yehova. Mwaha wa eyo, anibatiziwa t’ale yiinnunwe voophiyerya opaka yoothanla ya omurumeela Muluku. Okathi mutthu onibatiziw’awe, erutthu awe yotheene yohaana opwinihiwa mmaasini okathi vakhaani.a​—Marko 1:9, 10; Miteko s’Arummwa 8:36.

3. Nuumala wiivahererya, Yehova oniwehererya wira munrowa okhalaka moovarihana ni ele eleihenrya anyu opaka. (Esalimo 50:14; Musuweli 5:4, 5) Diabo onrowa omananiha wookhoottiheryani omurumeela Yehova. (1 Pedru 5:8) Masi nyuwo muhaana omwaattamela Yehova orweela mwa nivekelo. (aFilipi 4:6, 7) Musomeke Nuulumo na Muluku khuta nihiku. (Esalimo 1:1-3) Mukhaleke oowiiraana ni muloko. (aHéberi 13:17) Akhala wira munoopaka itthu iyo sotheene, nyuwo munoophwanya ikuru wira muvikanihe okhala oororomeleya wa Muluku. Mmukhalelo owo nyuwo munoowerya opaka itthu seiye Muluku siniphavela awe!

[Enoota]