Osuwanyeihiwa wa “‘Babilonia’ Muttetthe Mulupale”

ELIIVURU ya Wisupulula yookhalana masuu ahintthuneya wiiwexexiwaka ntoko siry’aya. (Wisupulula 1:1) Mwa ntakiheryo, eliivuru ela ennimuhimya muthiyana orina nsina nlempwale vayuuci vawe noowi “‘Babilonia’ muttetthe mulupale”. Muthiyana ola onihimmwa wira okilaathale eriyari ya “maloko n’ilapo”. (Wisupulula 17:1, 5, 15) Okhala wira khuuvo muthiyana tthiri aarowa opaka ela, Babilonia Muttetthe Muulupale ohaana okhala etthu ya nthoonyeryo. Nto, muthiyana ola namararuwa a nthoonyeryo onitaphulela exeeni?

Wisupulula 17:18, muthiyana owo a nthoonyeryo onihimmwa okhala “muttetthe mulupale oniwettiha mamwene a mulaponi”. Nuulumo noowi “muttetthe” ninthoonyerya mulokiheryo wa atthu. Okhala wira “muttetthe mulupale” oniweettiha “mamwene a mulaponi”, muthiyana owo oniihaniwa Babilonia Muttetthe Muulupale ohaana okhala mulokiheryo wa mulaponi motheene yoowo onaahela muhina atthu anceene. Tivonto, moophwanelela pooti ohimmwa okhala olamulelo wa olumwenku wotheene. Olamulelo wa muthinto xeeni? Orii olamulelo wa etiini. Nkahaya nwehee moota iversiikulu sikina sa eliivuru ya Wisupulula siniiriha aya ohimya siiso.

Olamulelo pooti okhala wa epoliitika, wa nakoso, aahiiso wa etiini. Muthiyana owo oniihaniwa Babilonia Muttetthe Muulupale, khahiyo olamulelo wa epoliitika, mwaha woowi Nuulumo na Muluku nnihimya wira “mamwene a mulaponi”, aahiiso atthu a epoliitika a elapo ela, “àraruwa” ni yoowo. Owo onnihimmwa wira onniraruwa mwaha wa wataana orina awe ni ale aneettiha elapo, ti mulattu aya vaniihaniwa awe okhala “namararuwa ònanarexa”.—Wisupulula 17:1, 2; Yakobo 4:4.

Babilonia Muttetthe Muulupale khahiyo olamulelo wa nakoso, okhala wira “anamarotta a mulaponi”, anithoonyerya atthu a nakoso, yaawo anrowa wunla mwaha wa opwetexiwa wawe. Tthiri, mamwene ni atthu a nakoso annihimmwa wira aninweha Babilonia Muttetthe Muulupale aryeene “ottaiwene”. (Wisupulula 18:3, 9, 10, 15-17) Tivonto, ti vookhalela ohimya wira Babilonia Muttetthe Muulupale, khahiyo olamulelo wa epoliitika aahiiso wa nakoso, masi olamulelo wa etiini.

Etthu ekina enisuwanyeiha wira Babilonia Muttetthe Muulupale olamulelo wa etiini, mwaha woohimmwaka wira onnithweeleliha maloko otheene ni “mirette [sawe] s’okhwiri”. (Wisupulula 18:23) Okhala wira mikhalelo sotheene sa onammunepani sinikhuma mwa axetwani, khahiyo vootikhinaka vaavo Biibiliya vanihimya awe wira Babilonia Muttetthe Muulupale “empa y’arumeyi a Satana”. (Wisupulula 18:2; Otumererya 18:10-12) Olamulelo ola onihimmwa-tho wira onninyokha vanceene etiini yekeekhai, ni onnaalupattha “maprofeta” ni ‘atthu òwarya’. (Wisupulula 18:24) Mwekeekhai, Babilonia Muttetthe Muulupale onninyokha vaalupale etiini yekeekhai, nto onnaalupattha vootakhala-vo hataa owiiva ale ‘animutthara Yesu’. (Wisupulula 17:6) Ti mulattu aya, muthiyana ola orina nsina na Babilonia Muttetthe Muulupale vanihimmwa awe okhala olamulelo wa olumwenku wotheene wa etiini yoowoka, yoowo onihela muhina olamulelo wa itiini sotheene moolumwenkuni seiyo sininvirikanya Yehova Muluku.