Niireke Munoophuka Ohiiwanana Wira Mukumiherye Murettele?

YEHOVA MULUKU, oniphavela wira ale animukokhorela akhalaneke murettele. Tivonto, oniphavela awe wira aphaveleke murettele mukina ni mukhwaawe. Vaavo ampaka aya eyo, onnikhala murettele mmulokoni mwa eKristau. Nto murettele owo onniwiiriha atthu anceene wiixutta ekeekhai.

Mwa ntakiheryo, mukulukhana mmosa a oMadagascar aahoona murettele arina aya atthu a Yehova nto khuupuwela so: ‘Akhala wira kiniphavela weettela etiini, ela tenrowa okhala etiini aka’. Nto nuuvira okathi, aahihiya okokhorela minepa sootakhala, aahilepiha ekasamento awe ni aahipacerya omukokhorela Yehova Muluku a murettele.

Ntoko mulopwana ole, khula mwaakha atthu ikonto sinceene anniirela mpantta muloko wa eKristau ni anniphwanya murettele yoowo aniphavela aya. Ninnisoma mBiibiliyani wira “nrima notakhala n’uhìwanana” mmulokoni ninnihonona wataana ni okumiherya ohiiwanana. (Yakobo 3:14-16) Masi Biibiliya onninivaha miruku sooloka wira nisyake ohiiwanana ni olipiha murettele orina ahu ni anna ni arokora. Nrowe noone moota miruku iyo saakhalihenrya aya anna akina.

OHIIWANANA NI MOOTA WOOPHUKA

CHRIS onihimya wira: “Miyo ni munna kaavarana aka muteko, naahipacerya onyakulihana. Okathi naanyakulihana ahu, atthu anli yaahirwa wiirela onamoona”.

JANET onihimya so: “Murokora kaalaleeryana aka ikwaha sinceene aahihiya olavula nlaleeryaka. Nuumala-vo aahihiya okilavuliha. Nkaasuwela etthu yaamwiiriha”.

MICHAEL onihimya wira: “Kaalavula ni atthu araru mutelefonini ekwaha emosa-ru. Mutthu mmosa aahilaxerya. Nto kaahimulavula moohiloka ole aalaxenrye, kuupuwelaka wira aahimuttipiha telefoni, masi nlelo iira ohimuttipinhe”.

GARY onihimya so: “Mapioneero manli a muloko ahu, yaahipacerya ohiiwanana. Mmosa aahimpwapwela mukhwaawe ohoolo wa atthu otheene. Nto eyo yahaakhumuliha akina”.

Myaha iya pooti wooneyaka ntoko saamukhaani. Masi pooti wira sahaawereiha murima atthu awo ni ohonona murettele mmulokoni. Moohakalaliha, anna ni arokora awo, yaahitthara malakiheryo a mBiibiliyani khutthikela okhalana murettele. Nto malakiheryo xeeni a mBiibiliyani yaakhalihenrye anna awo?

“Muhinyakulihaneké mphironi”. (Maphattuwelo 45:24) Yosefe aahaavaha annawe miruku iya vaavo yaatthikela aya elapo aya. Mutthu ohinikasoopa muupuwelo awe ni oowaakuva onanariwa pooti otepiha mwaha hata ori ene mwaamukhaani. Akina pooti otepa onanariwa. Chris aahoona wira ikwaha sikina vaaninvila wiiyeviha ni otthara malakiheryo. Owo aaphavela opaka marukunuxo, nto aahinvekela musammaha munna ole aanyakulihanne awe. Nuumala-vo, Chris aahiimananiha okasoopa muupuwelo awe. Vaavo munna ole oonale awe wiimananiha wa Chris wira opake marukunuxo, nave owo aahipaka etthu emosaru. Nto olelo-va awo aakhalana murettele ni annimurumeela Yehova hoothe.

“Mwahikoheru miruku, munimojela miteko sanyu”. (Miruku 15:22) Okathi mpatthani awe Janet aahiyale awe olavulana, Janet aahiimananiha ovarihela muteko miruku iya sa mBiibiliyani. Owo aahirowa ovaanela aahiiso olavula ni murokora ole. Janet aahimukoha akhala wira oohimya etthu yaamunyoonyale. Wanipacerya, khivaakhweyale. Masi vaavo yaavikaniha aya olavula moovola murima, khula mutthu aahipacerya olavula mootaphuwa. Nto murokora ole aahoona wira khaiwale saana etthu yaakhumelenle khalai, nto Janet khaapanke etthu wira onveehe aahiiso omunyoonyiha murokora ole. Owo aahinvekela musammaha Janet, nto vano aatthikela-tho okhala apatthani ni annimurumeela Yehova hoothe.

“Mwarowaka ovelela yovah’anyu waltari, weiwo mùpuwelá wira munn’inyu khakhanle sana ni nyuwo, muhiye yovah’anyu oholo w’altari, murowé toko, mwatàne ni munn’iny’uwo. Vano-nto muhalé murwaka ovelela yovah’anyu”. (Matheyo 5:23, 24) Mwaha Yesu Aalavunle awe Vamwaako, aahivaha miruku iya. Nuumala Michael omulavula moohiloka munna mukina, owo aahixanka vanceene. Nto aahipaka khula etthu aawerya awe wira omalihe mwaha ole. Michael aahimphavelasa munna ole wira onvekele musammaha. Nto exeeni yaakhumelenle? Michael onihimya so: “Mooreerela murima, munna ole aahikilevelela”. Nto vano apatthani aalupale.

“Nvilelaneke, mulevelelaneke imara sothene muntthekelananyu. Ntoko Muluku òlevelenlyaweni nyuwo, siso-tho nyuwo mwaleveleleke akhw’inyu”. (aKolosi 3:12-14) Niireke munniwuupuwela mapioneero ale yaanyakulihanne alaleeryaka? Mooreerela murima, mutokweene mmosa aahaakhaliherya woona wira mukhalelo ole wamwaaxankiha akina. Mutokweene ole aahiwuupuxerya wira yaahaana opixeryana murima wira akhaliherye muloko ovikaniha okhalana murettele. Awo yaaheemererya ni yaahivarihela muteko miruku iye. Nto vano, aakhalana murettele ni annilaleya ihapari sooreera hoothe.

Nave malakiheryo ala ari aKolosi 3:12-14 pooti wookhaliheryani okhala oowiiyeviha ni omulevelela ole ootthekenleni ni ohiya wuupuwelela mwaha owo. Ankhi akhala wira niheererya olevelela nihinawerya? Malakiheryo a mBiibiliyani ari Matheyo 18:15, pooti onikhaliherya. Nnaamwi Yesu aalavula itampi suulupale, owo aahooniherya etthu enireerela ahu opaka akhala wira khanniiwanana ni munna aahiiso murokora. Mowiiyeviha ni mooreerela murima, nihaana olavulana wira niphuke mwaha owo.

MBiibiliyani aakhala malakiheryo manceene oovareleya muteko. Malakiheryo manceene anihela muhina ororomela munepa wootteela wa Muluku, wira nooniherye yoowiima ya munepa wootteela. Mikhalelo iyo sinihela muhina “ophenta, otteliwa murima, murettele, ovilela, othunku, orera murima, ororomeleya, wiyeviha, wisumaliha”. (aGalasia 5:22, 23) Nkahaya muupuwele ela: Wira maakina yeetteke saana ahaana okhalana ooleyo. Moolikanasa, vannikhweya ophuka ohiiwanana ni okhalana wataana wooloka vaavo nnooniherya ahu mikhalelo iyo sinkhuma wa Yehova.

ATTHU A MIKHALELO SOOVIRIKANA ANNIHAKALALIHA MULOKO

Khula mmosa a hiyo ookhalana omutthu awe. Nave khula mmosa a hiyo ookhalana itthu iya: moonelo, mikhalelo ni malavulelo oovirikana. Nto mikhalelo iyo sinniiriha wataana wahu okhala woohakalaliha. Hata vari siiso, atthu a mikhalelo soovirikana pooti okumiherya ohiiwanana. Mutokweene mmosa orina sookumanana sinceene, oovaha ntakiheryo nnooniherya moota eyo eniwerya aya okhumelela, oriki: “Mutthu oowaakuva onyamanyereya pooti ikwaha sikina onyoonyiheya akhala wira itthu sinniturukeya. Mukhalelo awe owo pooti okhalaka ntoko khahiyo etthu, masi pooti okumiherya ohiiwanana wuulupale”. Niireke munoona wira atthu arina mikhalelo soovirikana khanikhala-khala yiiwananaka? Vano, nrowe niwehe ntakiheryo na arummwa anli. Vaavo ninmmupuwelela ahu Pedru, nimmoona ntoko mutthu aahimya khula etthu uupuwela awe. Nave, vaavo nimmuupuwela ahu Yohani, nimmoona okhala munna oophenta, yoowo uupuwela ohinatthi olavula aahiiso opaka etthu. Tthiri Pedru ni Yohani yaari atthu oovirikana vanceene. Masi awo yaahimurumeela Yehova hoothe. (Miteko 8:14; aGalasia 2:9) Eyo pooti wiiraneya olelo-va. Nnaamwi maKristau akhalanaka mikhalelo soovirikana, awo anoowerya ovara muteko hoothe.

Masi, ankhi akhala wira mutthu a mmulokoni mwanyu onnipaka aahiiso onnihimya etthu enoonyoonyani? Muhaana wuupuwela wira Kristu oomukhwela munna owo ntoko ookhwenlaweni nyuwo, nave muhaana omphenta munninyu owo. (Yohani 13:34, 35; aRoma 5:6-8) Khahiyo vooloka omusyaka aahiiso wuupuwela wira khamunikhala-khala mwaataanaka ni munna owo. Masi muhaana wiikoha so: ‘Kiireke munna owo onipaka etthu ehinivarihana ni nlamulo na Yehova? Kiireke oroolakela okinyoonyiha? Aahiiso nrina mikhalelo soovirikana? Kiireke ookhalana mikhalelo kiniphavela aka otakiha?’

Mwa ntakiheryo, akhala wira munna omusivela olavula, masi nyuwo khamunilavula vanceene, xeeni muhirowaka olaleerya ni yena wira moone etthu ekhanle anyu oowiixutta? Mukhalelo xeeni wooloka orina awe oniphavela anyu otakiha? Niireke munnoona ohakalala onikhumelela vaavo munaakhaliherya anyu atthu oowuuluvala, ale aniwereiwa ni oothoiwa? Niireke munoowerya otakiha oreera wawe murima? Etthu yuulupale tiila: nnaamwi nyuwo ni munna owo muri ene oovirikana mikhalelo, muhaana wuupuwelela mikhalelo sooloka sa munna owo. Nave, hata muhirowaka okhala apatthani aalupale, munoowerya okhalana wataana wooloka. Nto eyo enimookhaliheryani okhalana murettele nyuwo ni munna owo vamosa ni muloko.

Eseekulu yoopacerya, yaahikhala arokora anli yaahiiwanana, Evodia ni Sintikhe. Awo yaahikhalana mikhalelo soovirikana, masi murummwa Paulo ahaatumererya oriki: “Mwiwananeke mw’Apwiya”. (aFilipi 4:2) Hiyo nave ninnimukokhorela Yehova vamosa ni anna ni arokora, nto nihaana okumiherya murettele mmulokoni.

MPHUKE OHIIWANANA

Xeeni vanitthuneya ahu omaliha ohiiwanana nrina ahu ni annihu? Ohiiwanana pooti olikanyihiwa ni miiwa siri ejardim erina ifilori sooreera. Akhala wira khaninvenxa miiwa iyo, pooti ohonona ejardim eyo. Moolikanasa, akhala wira khanrina moonelo wooloka voohimya sa annihu, moonelo owo pooti ohonona muloko wotheene. Masi, akhala wira ninnimphenta Yehova ni annihu, nnoopakaka khula etthu wira nikhapelele murettele mmulokoni.

Vaavo nniimananiha ahu okhalana murettele ni atthu akina, hiyo pooti otikinihiwa okathi itthu sinikhumela aya saana. Nwehe yowiiraneya ya Namoona mmosa. Owo onihimya wira: “Aahikhala murokora mmosa koona aka wira aakithokorerya ntoko mwaana. Tthiri eyo yaanikinyoonya. Vaavo kaatepa aka onyoonyiheya, kaahipacerya ohimphavela. Nto kaahuupuwela so: ‘Okhala wira khonikittittimiha, ni miyo nkinimuttittimihaka’”.

Vano murokora ole aahuupuwelela saana mukhalelo awe. Owo onihimya so: “Mukhalelo aka waahitteettheya nto eyo yaahikinyoonya. Kaahoona wira kaahaana olokiherya muupuwelo aka. Nuumala onvekela Yehova voohimya sa mwaha ole, kaahuupuwela onvaha etthu ni olepa ewarakha kinvekelaka musammaha. Nto naahikhupaarelana ni olakela omaliha mwaha ole. Vano nookhalana murettele”.

Otheene ahu ninniphavela murettele. Masi ohivareleleya aahiiso wiixinnuwiha pooti owiiriha atthu opaka itthu sinihonona murettele. Olumwenku ola, eyo etthu ehireere wuulaana, masi Yehova oniphavela wira ale animukokhorela aphaveleke murettele. Anamoona a Yehova ahaana okhala oowiiraana ni a murettele. Yehova aahimuupuxerya murummwa Paulo olepa wira maKristau ahaana ‘wettela makhalelo òrera, yawo yihaneliwaya’. Nave ahaatumererya opaka eyo aaleelaka so: “Mukhaleke òwìyeviha ni òmàla ni òvilela. Nvilelaneke mukina ni mukhw’awe, mwakhelaneke n’uphenta. Muthokoreryeke okhapelela wiwanana omosaru onvahiwanyu n’iroho [munepa] yowarya ni murettele onothukumanyani”. (aÉfeso 4:1-3) ‘Murettele onathukumanya’ atthu a Yehova ti wootepa otthuneya. Tivonto, nrowe nipake khula etthu eniwerya ahu wira nlipihe murettele owo niphukaka mixankiho nrina ahu ni anna ni arokora a mmulokoni.