YOOSOMA 56
Muhihiye Okhaliha Murettele Mmulokoni
Okathi ninkhala ahu ni anna ni arokora, moonelo ahu onoolikana ni moonelo wa mwene Davidi, yoowo aahimmye so: “Mòne: ti yorera ni ti yosivela tthiri wira amusi ekhaleke vamosá”. (Esalimo 133:1) Wiiraana iwo khonikhumelela mekhaya paahi. Nto khula mmosa a hiyo ohaana opaka mpantta awe wira okhaliherye wiiraana mmulokoni.
1. Etthu xeeni enaasuwanyeiha arumeyi a Muluku?
Akhala wira munoorowa oweha mithukumano sahu elapo ekina, munimoona wira munniphentiwa ni munrowa okhala ootaphuwa hata muhisuwelaka nttaava ninlavuliwa. Mwaha wa xeeni? Mwaha woowi, hiyo nimmusoma Biibiliya ni iliivuru ninrumeela ahu sinimutthokiherya Biibiliya simosaru olumwenku wootheene. Nave ninniphentana mukina ni mukhwaawe. Moohicikha elapo ninkhala ahu ni nikhuli nahu, otheene ahu ninnilaleya nsina na Yehova ni nimmukokhorela Yehova ni “murima mmosaru”.—Sofoniya 3:9.
2. Mpakeke exeeni wira mukhalihe murettele?
“Mphentaneke vanceene ni murima wotheene”. (1 Pedru 1:22) Munrowa owerya sai opaka eyo? Muhiwehexexeke soovonya sa atthu akina, masi nwehexexeke mikhalelo saya sooloka. Nave apatthani anyu, ahikhaleke atthu yaale paahi anipaka itthu sinoosivelani ni murina anyu munnuwelo mmosaru. Nave-tho muhaana okumiha vamurimani vanyu nthalu.—Mmusome 1 Pedru 2:17.a
3. Mpakeke exeeni akhala wira khamuniiwanana ni munna aahiiso murokora?
Hiyo naatthu oowiiraana, masi hata vari siiso, otheene ahu niyariwe ni etampi. Nto mwaha waivaavo, okathi mukina pooti waariipiha murima anna ni arokora. Tivonto Biibiliya onihimya awe wira “mulevelelaneke ni murima wotheene”. Nave onihimya wira “ntoko Yehova oolevelenlyaaweni, ni nyuwo-tho mwiireke siiso”. (Mmusome aKolosi 3:13.) Hiyo khaninwerya okontari ikwaha sootheene nimuriipihale ahu murima Yehova. Masi hata vari siiso, Yehova onninilevelela. Nto Yehova oniphavela wira naaleveleleke anna ni arokora. Akhala wira munoona wira moomuriipiha murima munna wala murokora, muhaana ophuka muxankiho owo wira mukhalihe murettele.—Mmusome Matheyo 5:23, 24.b
MWIIXUTTE ITTHU SIKINA
Nwehe etthu mukhanle anyu oopaka wira mukhaliherye wiiraana ni murettele mmulokoni.
Muhaana opaka exeeni wira mukhalihe murettele?
4. Muhikhalaneke nthalu
Hiyo ninnaaphenta ni murima wootheene anna ni arokora. Masi okathi mukina pooti onivila omphenta mutthu nnoona ahu wira sookhala itthu nivirikanne ahu. Etthu xeeni enrowa onikhaliherya? Musome Miteko 10:34, 35, nuumala-vo mwaakhule makoho anittharelana:
Yehova khorina nthalu, owo onnimweemererya khula mutthu oniphavela omukokhorela. Mmutakihaka Yehova, mwaathokoreryeke sai atthu arina mikhalelo soovirikana ni sawinyu?
Enamuna xeeni ya nthalu ehireere wuulaana muttetthe anyu? Xeeni vanireerela aya nyuwo okhootta?
Mmusome 2 aKorinto 6:11-13, nuumala-vo mwaakhule nikoho ninttharelana:
Munrowa owerya sai waaphenta anna ni arokora arina mikhalelo soovirikana ni sawinyu?
5. Mulevelelaneke ni murima wootheene ni mukhaliheke murettele
Hiyo khaninkhala-khala nimulevelelaka etthu Yehova, maana owo khonattheke. Masi hata vari siiso, owo onninlevelela. Musome Esalimo 86:5, nuumala-vo mwaakhule makoho anittharelana:
Ikwaha ikavi Yehova onnilevelela awe?
Exeeni eniwiirihani oxukhurela olevelela wa Yehova?
Hiyo nimphavela okhala apatthani a atthu akina. Itthu xeeni sikhanle oohonona ompatthani ahu ni atthu akina?
Ninrowa omutakiha sai Yehova ni ohihiya wiiraana ni anna ni arokora? Musome Miruku 19:11, nuumala-vo mwaakhule nikoho ninttharelana:
Akhala wira ookhala mutthu oonyoonyihaleni aahiiso ooveehaleni, muhaana opaka exeeni wira mukhalihe murettele?
Okathi mukina ninnipaka etthu enaawereya atthu akina. Eyo yiiraneya, nihaana opaka exeeni? Nwehe EVIIDIYU, nuumala-vo mwaakhule nikoho.
Eviidiyu niwenhe ahu, murokora ole aapanke exeeni wira okhalihe murettele?
6. Nweheke mikhalelo sooloka sa anna ni arokora
Vaavo ninviriha ahu okathi munceene niri ene ni anna ni arokora ninnaasuwela oratteene, ninniweha mikhalelo saya sooloka ni mikhalelo saya soohiloka. Ninrowa owerya sai owehexexa mikhalelo sooloka sa anna ni arokora? Nwehe EVIIDIYU, nuumala-vo mwaakhule nikoho.
Etthu xeeni enrowa wookhaliheryani owehexexa mikhalelo sooloka sa anna ni arokora?
Yehova onniwehexexa mikhalelo sahu sooloka. Mmusome 2 Wahala 16:9a, nuumala-vo mwaakhule nikoho ninttharelana:
Yehova onniweha mikhalelo sanyu sooloka. Niireke eyo khenoohakalalihani?
Munela opakiwe ni ikaruma sooreera pooti okhalana iraaxa wala wuusuwa, masi hata vari siiso, owo onnikhalana efaita. Mwa enamuna emosaru, anna ni arokora ootheene ayariwe ni etampi, hata vari siiso, Yehova onnaavaha efaita
ATTHU AKINA ANIHIMYA WIRA: “Miyo kinoowerya omulevelela mutthu ni murima wootheene, masi owo ohaana toko orwa okivekela muswammaha”.
Xeeni vari aya voohiloka wuupuwela siiso?
IPONTO SUULUPALE
Munoowerya okhaliherya murettele mmulokoni mwaalevelelaka atthu akina ni waaphenta anna ni arokora ni murima anyu wootheene.
Wuuluula
Munrowa owerya sai oxintta nthalu?
Etthu xeeni mukhanle anyu oopaka akhala wira khamuniiwanana ni munna aahiiso murokora?
Xeeni muniphavela anyu otthara ntakiheryo na Yehova mwaalevelelaka atthu akina?
NWEHE ITTHU SIKINA
Nwehe moota nlikanyiho Yesu aapanke awe ninrowa aya wookhaliheryani ohiya waaphukela atthu akina.
Niireke nihaana ovekela muswaammaha hata nisuwelaka wira khanipanke etthu yoohiloka?
“Oveka Muswammaha Onnikhaliherya Okhaliha Murettele” (Owehaweha, 1 a Novembro, 2002)
Nwehe etthu yaakhalihenrye wiiraana alopwana anli yaakhala elapo yahaareere nthalu.
Nwehe moota mukhanle anyu oophuka mixankiho sanyu ni munna aahiiso murokora, mixankiho iyo sihinatthi ohonona murettele wa mmulokoni.