4 Nihaana Ovekela Exeeni?

OLUMWENKU wotheene atthu anceene annitthikela opaka mavekelo mamosaru a maKristau. Ekhale ekeekhai wala nnaari, nivekelo na ntakiheryo naapakiwe ni Yesu, nenno ninsuweliwa okhala Tiithi Ihu wiirimu, atthu anceene khanisuwela ele nintaphulela aya. Atthu imilyau sinceene annitthikela opaka nivekelo nno ikwaha sinceene vanihikuni. Masi Yesu khaaphavela wira atthu apakeke nivekelo nno ntoko anipaka aya olelo-va. Ninsuwela sai eyo?

Ohinatthi ohimya nivekelo nno, Yesu aahimmye so: “Mwaavekelaka, muhimakeleke oromola moolumo mamosa-ru”. (Matheyo 6:7) Niireke Yesu aamwiivirikanya vaavo aahimmye awe wira moolumo makina yaahaana oheliwa mmuru okathi wa nivekelo? Nnaari! Yesu aaniixuttiha itthu nikhanle ahu oovekela ni nikhanle ahu oohela nipuro noopacerya naavekelaka. Muhoolo nnoothokorerya oratteene itthu Yesu aahimmye awe. Nivekelo nno nilempwale Matheyo 6:9-13.

“Tiithi ihu muri wiirimu, nsina nanyu nitteelihiwe”.

Ni moolumo ala, Yesu aaphavela onooniherya wira nihaana onvekela paahi Tiithi ahu Yehova. Niireke nyuwo munnisuwela nthowa naya nsina na Yehova nri aya na faita yinceene ni ninreerela aya otteelihiwa?

Okhuma woopaceryani wa sowiiraneya sa apinaatamu, nsina nootteela na Muluku ninnihononiwa mwaha wa itthu soohiloka onootheriwa awe. Mwa ntakiheryo, nwanani a Muluku, Satana onihimya wira Yehova Namalamulela owootha, ohiniphavela mureerelo wa atthu onaalamulela awe ni khorina ehakhi ya olamulela itthu sotheene opattunxe awe. (Maphattuwelo 3:1-6) Atthu anceene ari mpantta wa Satana, mwaha woowi anniixuttiha wira Muluku khonoona othunku, tootakhala, toohukhumu ni aniixuttiha wira khokhanle Mpattuxa. Atthu akina anniveeha nsina na Yehova, aBiibiliya anaataphulela aya aakumiha nsina na Muluku ni annaakhoottiha atthu akina orumeela nsina na Muluku.

Biibiliya onnooniherya wira Muluku onoomaliha itthu iyo soohiloka. (Ezekiyeli 39:7) Nave owo onoonivaha itthu sotheene sinnithowa ni onoomaliha mixankiho sahu sotheene. Moota xeeni? Moolumo anittharelana a nivekelo na Yesu animwaakhula nikoho nno.

“Omwene anyu orwe”.

Olelo-va, wookhala ovirikana ni evutuka-vutuka eriyari ya awiixuttihi a itiini voohimya sa Omwene wa Muluku. Masi atthu ale yanwiriyana Yesu, yaanisuwela wira maprofeta a Muluku yaahihimya wira Mesiya aarowa okhala Moopoli othanliwe ni Muluku ni aarowa olamulelaka Momweneni mwa Muluku ni opaka marukunuxo valaponi. (Yesaya 9:5,6; Daniyeli 2:44) Omwene owo onootteeliha nsina na Muluku mwaha woowi onimooniherya sowootha sa Satana. Nuumala-vo, onompwetexa Satana ni miteko sawe sootakhala. Nto Omwene wa Muluku onoomaliha ikhotto, iretta, etala ni okhwa. (Esalimo 46:10; 72:12-​16; Yesaya 25:8; 33:24) Vaavo munivekela anyu wira Omwene wa Muluku orwe, nyuwo munivekela wira sooleiherya iyo siiraneye.

“Ele eniphavela anyu yiireye vathi-va, ntoko wiirimu”.

Moolumo ala a Yesu annooniherya wira ele Muluku oniphavela awe ehaana wiiraneya valaponi ntoko eniiraneya aya wiirimu, opuro yoowo Muluku onikhala awe. Okhala wene, ele Muluku oniphavela awe yaaniiraneya wiirimu, maana waari opuro yoowo Mwaana a Muluku aawanne awe ekhotto ni Satana ni ale animukhaliherya Satana, nuumala-vo aahimurihela valaponi. (Wiisuupulula 12:​9-​12) Yoovekela ela ya neeraru ntoko soovekela sikina sa nivekelo na ntakiheryo, enninikhaliherya ohiwehexexa ele hiyo nimphavela ahu, masi owehexexa ele Muluku oniphavela awe. Maana ele Muluku oniphavela awe enniphwanyiha mireerelo itthu sotheene Muluku opattunxe awe. Hata Yesu yoowo aahaarina etampi, aahimuleela Tiithi awe wira: “Ehiireye ntoko kiniphavela aka, masi yiireye ntoko muniphavela anyu”.​—Luka 22:42.

“Munivahe olelo, yoolya”.

Moottharelana, Yesu ahooniherya wira khahiyo vootakhala ovekela itthu sinnithowa khula nihiku. Tthiri opaka eyo enninikhaliherya woona wira Yehova “tonaavaha atthu iphumu, okumi ni itthu sotheene”. (Miteko 17:25) Nave Biibiliya onnooniherya wira Yehova Tiithi oophenta, yoowo onaavaha anaawe itthu aniphavela aya. Ntoko siisaale paapa ooloka, Yehova khonaakhula itthu nninvekela ahu seiyo saarowa onikumiherya mixankiho.

“Munlevelele soottheka sahu”.

Niireke yookhala etthu mmutthekenle anyu Muluku? Niireke muniphavela wira ooleveleleni? Atthu anceene olelo-va, khanisuwela etampi exeeni ni wira etampi etthu yuulupale vamaithoni va Muluku. Musuweleke wira Biibiliya onihimya wira etampi tenikumiherya mixankiho sinceene maana tenniiriha okhwa. Okhala wira otheene ahu niyariwe ni etampi, ninnittheka ikwaha sinceene, nto wira niphwanye okumi woohimala, nihaana oleveleliwa ni Muluku. (aRoma 3:​23; 5:​12; 6:​23) Ti voohakalaliha osuwela wira Biibiliya onihimya wira: “Apwiya! Nyuwo mòrera murima ni òlevela”.​—Esalimo 86:5.

“Munaakiherye Mutakhali”.

Niireke nyuwo munnoona wira muhaana okhapeleliwa ni Muluku? Atthu anceene khanikupali wira “Mutakhali”, eyo piiyo, Satana ookhala. Masi Yesu aahooniherya wira Satana ookhala ni aahimuhimya okhala “namalamulela a olumwenku ola”. (Yohani 12:31; 16:11) Satana Diabo, yoowo ori namalamulela a olumwenku ola oniphavela onihapuxa ni onihiiha okhalana waataana wooloka ni Tiithi ahu Yehova. (1 Pedru 5:8) Masi Yehova ookhalana ikuru onvikana Satana ni ooleiherya waakhapelela atthu otheene animphenta.

Noothokorerya moowaakuveya iponto suulupale sa nivekelo na ntakiheryo na Yesu, nenno ninlavula itthu sa faita yinceene ninreerela ahu ovekela. Muhiliyale wira 1 Yohani 5:14 onnileela wira: “Muluku onooniwiriyana wa khula etthu eninvekela ahu”. Nto muhuupuweleke wira mixankiho sanyu saamukhaani vahinreerela aya omuleela Muluku.—1 Pedru 5:7.

Ankhi opuro ni okathi? Niireke wookhalana efaita opuro ni okathi ninvekela ahu?