Mukhaleke Moovarihana ni Nivekelo na Ntakiheryo​—Mpantta II

“Atithi’nyu annisuwela simphavela anyu.”​—MATH. 6:8.

MUNNUUPUWELA?

Exeeni eniheliwa muhina vaavo vaniveka ahu yoolya ya khula nihiku?

Exeeni enitthuneya ahu opaka wira nileveleliwe soottheka sahu?

Yehova onaakhula sai yooveka ahu wira ohineemererye nimoroxiwaka okathi oneehereriwa ahu?

1-3. Exeeni emukhalihenrye murokora mmosa waamini wira Yehova onnisuwela tthiri itthu siniphavela ahu?

LANA khonirowa oliyala ele yaakhumelenle wAlemanha elimwe ya 2012. Owo aahoona wira mavekelo awe manli ooluluwanya yahaakhuliwa. Nivekelo noopacerya aapanke eettaka mukwaha ni komboi orowaka waerporto. Aahinvekela Yehova wira omphwanyihe eparakha ya olaleerya. Na nenli aapanke nuumala ophiya waerporto nto khisuwela wira nihiku nle khaarowa owela eviyau mpakha mmeeloni mwaya. Lana aahipaka nivekelo ohimyaka wira aahirumeela musurukhu awe wotheene wa wEuropa ni khaarina nipuro noomaka.

² Ohinatthi omaliha nivekelo nle na nenli, Lana aahimwiiwa mutthu oriki, “Ehaali, Lana, muniirani-va?” Mmiravo ole aamulavuliha aari mwaapara awe aasomana awe oxikola khalai. Owo aari ni ameyawe ni apiipi awe, yaawo yaamuhoolale wira awe eviyau oroweke wÁfrica do Sul. Nuumala osuwela muxankiho aarina awe Lana, maama ole, ni Elke, yaahimulattula mooreera murima wira orowe amake vatthokoni vaya. Elke ni amamawe yaahimwaakhela saana Lana ni yaahimukoha makoho voohimya sa ele yaamini awe okhala wira owo aanivara muteko wa orummwa wa okathi wotheene.

³ Mmeeloni mwaya, nuumala olya yoolya sa vaasiisu, Lana aahaakhula makoho makina a mBiibiliyani, nto aahimaleliha olepa epaphelo enivekela wira mutthu oxekuriwe-tho. Lana aahitthikela owaani ni murettele ni aahivikaniha orumeela ntoko pioneera ookilaatheya. Owo onnaamini wira ‘ole oniwa mavekelo’ taakhalihenrye moota itthu seettale aya.​—Esal. 65:3.

4. Itthu xeeni siniphavela ahu seiyo sinirowa ahu othokorerya muru ola?

⁴ Okathi onnikhumelela aya mixankiho onikhweyerya ovekela nikhaliheryo wa Yehova ni owo onnimusivela owiiwa ale animuroromela anvekelaka nikhaliheryo. (Esal. 34:16; Mir. 15:8) Okathi onuupuwelela ahu nivekelo na ntakiheryo, woonasa wene, munimoona wira sookhala itthu siniphavela ahu suulupale siromoliwe, masi okathi mukina sihinicalela ahu. Mwa ntakiheryo, muthokorerye moota sootthuneya sahu sa omunepani sinittittimiheriwa aya ni soovekela tthaaru sookiserya sa nivekelo na ntakiheryo. Nto yookhala etthu ekina enitthuneya ahu opaka wira nikhaleke moovarihana ni nivekelo na ntakiheryo, ohiya paahi ovekela yoolya ya khula nihiku?​—Mmusome Matheyo 6:11-13.

“MUNIVAHE OLELO YOLY’AHU YA KHULA NIHIKU”

5, 6. Xeeni yoovekela ahu yoowi munivahe yoolya ya nihiku nla na olelo eryaaya yootthuneya hata nirineene mireerelo sowaatta?

⁵ Moone wira yoovekela ela nnaamwi epakiwaka ni mutthu mmosa owo khonilavula wira yoolya “aka” ya olelo, masi owo oni yoolya “ahu” ya olelo. Victor, yoowo ori mutokweene ooweetteetta wÁfrica, onitthokiherya so: “Ikwaha sinceene kinnimuxukhuru Yehova ni murima aka wotheene okhala wira miyo ni mwaaraka khannixankiheya mwaha woohisuwela vanrowa aya okhuma yoolya enrowa ahu olya meelo, ni khannixankiheya ni moota onrowa ahu oliva empa enikhala ahu. Annihu anninikhapelela khula nihiku. Masi miyo kinnivekela wira ale annikhaliherya awerye owanana muxankiho wa othowa musurukhu onaaphwanya”.

⁶ Vakhala wira hiyo ninniwerya okhalana yoolya ya mahiku manceene, nto nihaana owuupuwelaka anna ale ari amasikhini wala aphwanyiwe ni ihasara sa ephattu. Ohiya waavekelela paahi, nihaana opaka etthu wira nikhaleke moovarihana ni mavekelo anipaka ahu. Mwa ntakiheryo, hiyo pooti waakawela ele erina ahu annihu oothoiwa. Nave hiyo pooti ovahaka musurukhu wira nikhaliherye muteko onivariwa olumwenku wotheene, nisuwelaka wira musurukhu owo onnirumeeliwa mookhalela.​—1 Yoh. 3:17.

7. Nlikanyiho xeeni aapanke awe Yesu wira onikhaliherye ohuukhuwela “nihiku n’omelo”?

⁷ Okathi waalavunle awe wira yoolya ahu ya khula nihiku, Yesu aaphavela ohimya itthu seiye sinimuthowa mutthu owo tthiri. Masi owo aahilavula-tho wooniheryaka moota Muluku oniwariha awe miri sa mutakhwani, nto khuhimya wira: Muluku ‘onimowarihani nyuwo, atthu òwamini vakhani. Tivó, muhithanané mwiraka, . . . ‘Niware exeeni?’ Owo aamalinhe ovahaka miruku iya sootthuneya: “Muhukhuwé nnihiku n’omelo.” (Math. 6:30-34) Eyo enninooniherya wira ohiya okhala oosiveliwa mihakhu, nihaana otteeliwaka murima ni itthu sirina ahu khula nihiku. Itthu iyo pooti ohela muhina nipuro nookhala nooreerela, muteko onniphwanyiha yoolya, ni ankhili wira niwerye oxintta mixankiho sahu wala oretta. Vakhala wira hiyo ninnivekela itthu iyo sa werutthuni paahi, nto naamooniherya ohiloka. Nookhalana itthu sinnithowa somunepani, nto seiyo siri sootthuneyexa vanceene.

8. Masu a Yesu voohimya sa yoolya ya khula nihiku annuupuxerya yootthuna xeeni yuulupale erina ahu? (Nwehe elatarato yoopacerya.)

⁸ Masu a Yesu voohimya sa yoolya ya khula nihiku ahaana onuupuxerya wira ninnitthuneya yoolya ya omunepani. Pwiya ahu aalavunle so “Kahiyó n’iphawu-ru pahi mutthu t’onkhala awe mukumi, nto ni khula nulumo ninkhuma mwano mwa Muluku.” (Math. 4:4) Hiyo nihaana ovekelaka wira Yehova ovikaniheke onivaha yoolya ya omunepani okathi wooreerela.

“MUNLEVELELE SOTTHEKA SAHU”

9. Moota xeeni soottheka sahu sinilikana aya ni ‘sokopha’?

⁹ Yesu aahilavula wira ‘munlevelele sokopha sahu’. (Math. 6:12 NM) Okathi mukina, aahilavula wira “munlevelele sotheka sahu”. (Luka 11:3) Iyaakha 60 sivinre, erevista ela yaahitthokiherya oratteene wira: “Omutthekela Muluku wala malamulo awe onoolikana ni omukophela. . . . Mwaha wa soottheka sahu Muluku pooti onaakha ekumi ahu. . . . Owo onoowerya onaakha murettele awe, ni wataana wahu wooloka ni yena. . . . Hiyo nihaana omphenta, nooniheryaka eyo ni omwiiwelela wahu; nto okathi onimutthekela ahu ninnimukophela niphento, okhala wira omutthekela onooniherya ohimphenta Muluku”.​—1 Yoh. 5:3.

10. Marehereryo xeeni animwiiriha Yehova onilevelela soottheka sahu, nto hiyo nooneleke sai?

¹⁰ Otthuneya wahu oleveleliwa khula nihiku onnittittimiherya otthuneya waya orumeela mathipelo akumiheriwe ni Muluku wira nileveleliwe soottheka sahu, eyo piiyo, mukuttho wowoopola wa Yesu. Nnaamwi mukuttho owo wowoopola oliviwe ene iyaakha 2.000 sivinre, hiyo nihaana ovahaka efaita ntoko nivahiwe olelo vaava. “Esisapo yopolaniwe” ahu ti yoowalamela vanceene ehiniweryaneya oliviwa ni pinaatamu oohimalela ntoko hiyo. (Musome Esalimo 49:8-10; 1 Pedru 1:18, 19.) Tivonto vahinihiyererya ahu omuxukhurela Yehova mwaha wa yoovaha eyo yuulupalexa. Nto masu oowi “soottheka sahu”, ohiya “soottheka saka”, ahaana onuupuxerya wira otheene yaale aniirela mpantta emusi ahu ya anamakokhorela annitthuneya marehereryo awo anooniherya omoriwa ikharari wa Muluku. Tthiri vannooneya wira Yehova khoniphavela okhala wahu saana paahi omunepani masi wa atthu akina waahela muhina ale annitthekela. Nto soottheka saamukhaani sa atthu awo sinninnivaha eparakha ya wooniherya wira ninnaaphenta anna awo ni wira ninnaalevelela ntoko Muluku sinnimorela awe ikharari.​—aKol. 3:13.

11. Xeeni varyaaya vootthuneya okhalana munepa woolevelela?

¹¹ Mooriipiha murima, apinaatamu oohimalela okathi mukina anniinlelana ikuhu mukina ni mukhwaawe. (Onam. 19:18) Vakhala wira hiyo ninnilavula myaha soohiloka ni atthu akina awo anoonitakihaka, nto eyo enookumiherya ohiiwanana mmulokoni. Neemererya wira eyo ekhumelele nto naarowa wooniherya wira khannivaha efaita oreera murima wa Muluku yoowo onivanhe yowoopola. Tiithi ahu onoohiya onilevelela soottheka sahu orumeelaka mukuttho wa Mwanawe vakhala wira ninnooniherya munepa wa ohilevelela. (Math. 18:35) Yesu aahilavula mwaha owo omalihakaru wiixuttiha nivekelo na ntakiheryo. (Mmusome Matheyo 6:14, 15.) Tthiri naaphavelaka ottottela mureerelo olevelela wa Muluku, nihaana osyaka opaka soottheka suulupale moolakelela. Wiimananiha wahu osyaka opaka yoottheka onninooniherya yoovekela yoottharelana ya nivekelo nle.​—1 Yoh. 3:4, 6.

“MUHINIHIYÉ OMORA NEHERERIWAKA”

12, 13. (a) Exeeni yaamukhumelenle Yesu voohipisa nuumala obatiziwa? (b) Muritti xeeni onikhalana ahu okathi oneehereriwa ahu? (c) Exeeni Yesu ewenrye awe opaka mwaha wa ovikaniha wawe okhala oororomeleya mpakha okhwa?

¹² Othokorerya ele yaamukhumelenle Yesu voohipisa nuumala obatiziwa, enoonikhaliherya wiiwexexa nthowa nniiriha otthuneyaka yoovekela ela eni: “Muhinihiyé omora nehereriwaka”. Yesu aahirowaniwa woothakoni ni munepa wa Muluku. Nthowa xeeni? “Wira èhereriwe ni Satana”. (Math. 4:1; 6:13) Niireke eyo enninitutuxa? Nnaari vakhala wira hiyo ninniiwexexa etthu yaamwiirinhe Muluku omuruma Mwanawe orwa valaponi. Owo aarwenle waakhula mulattu waakhumelenle okathi yoole Adamu ni Eva yaakhoottale aya olamuleliwa ni Muluku. Aakhala makoho yaatthuneya waakhuliwa. Mwa ntakiheryo, niireke Muluku khampattunxe saana pinaatamu? Niireke vanweryaneya mutthu oomalela okhaliherya olamulelo wa Muluku hata eehereriwaka ni “mutakhali”? Niireke ekumi ya apinaatamu yaamuloka vakhanle wira khiyaarowa olamuleliwaka ni Muluku ntoko Satana saahimmye awe? (Maph. 3:4, 5) Wira yaakhuliwe makoho awo waatthuneya okathi munceene, masi eyo yaamukhaliherya soopattuxiwa sotheene sa Yehova woona wira enamuna awe ya olamulela ti yaarowa waaphwanyiha mureerelo.

¹³ Yehova, toowaarya, tivonto vahinimweehererya awe mutthu wira opake etampi. Nto, Diabo tori ‘mulipa-òwehererya’. (Math. 4:3) Diabo onniwerya okumiherya makhalelo animweehererya mutthu. Ekeekhai wira khula mutthu ohaana othanla vakhala wira onrowa weemererya weehereriwa wala nnaari. (Mmusome Yakobo 1:13-15.) Yesu, aahikhootta mowaakuveya weehereriwa wawe ni Satana orumeelaka soolepa sa Nuulumo na Muluku. Mwekeekhai Yesu aahikhaliherya ehakhi ya olamulelo wa Muluku. Masi, Satana aahivikaniha omweehererya Yesu. Owo “ahimuhiya, khurowa mpakha okathi wophwanelela”. (Luka 4:13) Yesu aahivikaniha okhootta itthu sotheene saapaka awe Satana wira ohonone waamini wawe. Kristu aahivarexexa exariya ni ehakhi yaarina awe Yehova ya olamulela ni aahooniherya wira pinaatamu oomalela onoowerya ovikaniha okhala oororomeleya hata eehereriwaka voovikaniha mphimo. Masi, Satana onnimananiha waavara atthareli a Yesu, woohelani muhina nyuwo.

14. Exeeni enitthuneya ahu opaka wira nihimore neehereriwaka?

¹⁴ Mwaha wa mulattu ole ohinatthi ophukiwa voohimya sa olamulelo wa Muluku, Yehova onnimweemererya Satana orumeela olumwenku ola wira oneehererye. Khahiyo Muluku onnikumiherya sooweha. Ohiya-vo, owo onniniroromela ni oniphavela onikhaliherya. Mwaha wa ottittimiha wawe ehakhi enivanhe awe ya opaka soothanla sahu, nto Yehova khonikhoottiherya hiyo weehereriwa. Nihaana opaka itthu piili, ohirupa omunepani ni ovikaniha opaka mavekelo. Vano Yehova onaakhula sai mavekelo ahu?

15, 16. (a) Soweeha xeeni sinitthuneya ahu osyaka? (b) Ti pani orina nthowa vaavo mutthu onimora awe eehereriwaka?

¹⁵ Yehova onninivaha ikuru sa munepa awe wootteela, yoowo onrowa onikhaliherya oxintta soweeha. Muluku onninilopola vahinatthi orumeelaka Nuulumo nawe ni muloko voohimya sa itthu sinireerela ahu osyaka, itthu ntoko ohonona okathi, musurukhu ni ikuru sinceene mwaha wa itthu sihirina efaita. Espen ni Janne, anikhala elapo yoothaaciri ya wEuropa. Mwa iyaakha sinceene awo yaari mapioneero ookilaatheya muttetthe mmosa waari woothowa anamalaleerya. Nuumala omuyara mwanaya oopacerya, awo yaahihiya muteko wa opioneero, vano awo aakhalana mwaana a nenli. Espen onihimya wira “Hiyo ninninvekela Yehova ikwaha sinceene, wira nihimore neehereriwaka, vanceenexa okathi ola ohiniwerya ahu ovara miteko sinceene sa Muluku ntoko siira ahu khalai. Hiyo ninninvekela Yehova wira onikhaliherye ovikaniha okhalela nthiti miteko sawe ni olaleerya”.

¹⁶ Yoweeha ekina ehireere wuulaana mahiku ala ti oweha epornografia. Vakhala wira hiyo ninnimoroxiwa ni yooweeha eyo, nihimukhupanyeke Satana. Nthowa xeeni? Mwaha woowi Satana ni olumwenku awe khonnikhanyererya opaka etthu nihitthunne mmensihu. Akina aamorela yoweeha eyo mwaha wa weemererya miyuupuwelo soohiloka mmuruni mwaya. Masi hiyo onoowerya okhootta, ntoko ikonto sinceene sa annihu yiirale aya.​—1 aKor. 10:12, 13.

“MUNAKIHERYE MUTAKHALI”

17. (a) Ninrowa okhala sai moovarihana ni yoovekela ahu yoowi naakiheriwe mutakhali? (b) Woopoliwa xeeni ori vakhiviru?

¹⁷ Wira nikhale moovarihana ni yoovekela yoowi “munakiherye mutakhali”, hiyo nintthuneya osyaka wiirela mpantta olumwenku wa Satana. Nihaana otharuwa ‘Ophenta itthu sa vathí-va’, eyo piiyo, itthu sa molumwenkuni. (Yoh. 15:19; 1 Yoh. 2:15-17) Opaka eyo onitthuneya wiimananiha vanceene. Nkahaya muupuwelele moota sinrowa aya okhala okathi Yehova onrowa awe waakhula yoovekela eyo omoomolaka Satana ni omala-maliha olumwenku awe ola wootakhala! Hiyo nihaana wuupuwelaka wira okhuma vaavale Satana oomoliwe awe wiirimu, owo onnisuwela wira orina okathi vakhaani paahi. Orumeelaka owali, owo onnipaka sotheene oniwerya awe wira ohonone waamini wahu. Tivonto vanitthuneya ahu ovekelaka khula okathi wira naakiheriwe mutakhali owo.​—Wis. 12:12, 17.

18. Wira noopowe wuumalani wa olumwenku ola wa Satana, exeeni enitthuneya ahu ovikaniha opaka?

¹⁸ Nyuwo munniphavela waakhelela ohakalala onrowa okhumelela? Waaso nvikanihe ovekela wira Omwene ootteelihe nsina na Muluku ni wiirihe yootthuna awe wiraneya valaponi. Khula okathi munvekeleke Yehova wira woophwanyiheni itthu sinoothowani omunepani ni werutthuni. Tthiri nvikanihe okhala moovarihana ni nivekelo na ntakiheryo.