Yohani Mbatiza Aahilokiherya Ephiro

Saahivira iyaakha 17, okhuma vaavale Yesu aakonhe awe awiixuttihi mutemplo orina ene iyaakha 12. Vano yaari elimwe ya 29 EC. Atthu anceene yaanilavula sa Yohani, mmusi awe Yesu, yoowo aalaleerya elapo ele, mpantta onikela nsuwa wa Muro Yordani.

Atthu anceene yaahitikinihiwa ni iwarelo ni moota Yohani aalavula awe. Ikuwo sawe saari sa manri a ikamelo, nave aaniwara esintu ya esapala muyuununi mwawe. Yohani aalya oravo ni isoope. Muhupi xeeni aalaleya awe? Owo aahimya wira: “Murukunuxe mirima sanyu, mana Omwene wa wirimu ori vakhiviru”.​—Matheyo 3:2.

Atthu yaanirwa owiriyana muhupi wookuxa murima Yohani aalaleya awe. Atthu anceene yaanoona wira yaahaana ottharuwa, eyo piiyo, ohiya muupuwelo, mweettelo ni makhalelo aya oohiloka. Awo yaakhuma “òYerusalemu ni èlapo yothene y’oYudeya ni mittetthe sowattamela muró Yordani”. (Matheyo 3:5) Anamunceene a yaawo, yaahittharuwa itampi saya. Nto Yohani aanaabatiza aaxuweyaka mmaasini wa muro Yordani. Nthowa xeeni?

Mwaha wootthekela nivarihano na Nlamulo na Muluku, Yohani aanaabatiza atthu ale, ntoko ethoonyeryo yoowi yaahittharuwa itampi saya. (Miteko 19:4) Masi khahiyo wira atthu otheene yaanibatiziwa. Vaavo yaarwiiye aya ahooleli akina a etiini ya aFarisi ni aSaduki, Yohani aahaahimya okhala “nloko na ivili!” Nave, aahaakoha oriki: “Mulèliwe n’ani wira munniwerya otthyawa ehukhumu ya Muluku ehanle orwa? Nvareke miteko sorera, sinòniherya orukunuxa wanyu murima. Muhìsotothé, muhimyaka wira : ‘Tith’ihu t’Abrahamu!’ Tthirí miyo kinohimeryani wira Muluku hatá maluku ala onniwerya otatuxa, ekhalé àn’awe Abrahamu. Epasó yolikana wira yìkitthe miri vathí-váthi: tivó, miri sothene sihinìma mihokorokho sorera sinimùhiwa, siriheliwe vaikho”.​—Matheyo 3:7-10.

Okhala wira Yohani aanilaleya muhupi woovara murima ni atthu anceene yanrowa wa yoowo wira abatiziwe, nto aYuda yaahaaruma alipa a mukuttho ni aLevi, orowa omukoha Yohani wira: “Nyuwo mwá pani?”

Yohani aahaakhula wira: “Miyo nkihiyó Kristu!”

Awo yaahimukoha wira: “Vano mwá pani? Mwá Eliya?”

Yohani aakhunle wira: “Nnari: nkihiyó Eliya”.

Awo yaahimukoha wira: “Nyuwo mwá profeta onihimmwa?” Eyo piiyo, Profeta muulupale Moise aamuhimmye awe wira aamoorwa.​—Otumererya 18:15, 18.

Yohani aahaakhula wira: “Hoye!”

Yaahimukoha-tho wira: “Nanso, nyuwo mwá pani? Nawakhule exeni ale anirumme? Nyuwo mwanene munìsirela tani?” Yohani aahiwaakhula wira: “Miyo ka nsu nawe ole onikhuwela mothakoni, wira: ‘Òkololani ephiro y’Apwiya’. Ti siso sihimmyawe profeta Yesaya”.​—Yohani 1:19-23.

Aphavelaka osuwela, yaahimukoha-tho wira: “Nanso, munabatizerya-ni atthu, muhikhanle Kristu, walá Eliya, nnákhala Profet’owo?” Vano Yohani aahiwaakhula wira: “Miyo kimbatiza ni màsi: vano eriyari anyu òkhala-vo yowo ohinimusuwelanyu. Owo onrwa ottuli waka”.​—Yohani 1:25-27.

Yohani aahisuwela wira aalokiherya ephiro ni mirima sa atthu wira amwaakhele Mesiya aaleiheriwe, yoowo aarowa okhala Mwene. Olavulaka sa Mwene owo, Yohani aahimmye so: “Ole onrwa ottuli waka òkivikana miyo owerya: miyo nkiniphwanela omukuxerya ixapattho sawe”. (Matheyo 3:11) Tthiri Yohani aahimmye wira: “Ottuli waka onimorwa mukina mulupale okivikanne miyo, okhala wira kihinatthi oyariwa, owo ìra akhanlene”.​—Yohani 1:15.

Mwekeekhai, ti wookhalela muhupi wa Yohani oni: “Murukunuxe mirima sanyu, mana Omwene wa wirimu ori vakhiviru”. (Matheyo 3:2) Muhupi ola wa Yohani onnooniherya wira Yesu Kristu, Mwene yoowo othanliwe ni Yehova, aahanle opacerya muteko awe.