Ninrowa Wooniherya Sai Wira Ninnimphenta Yehova?
“Hiyo ninnimphenta Muluku, okhala wira Muluku t’opajenrye oniphenta.”—1 YOH. 4:19.
MOOTA XEENI OMPHENTA WANYU YEHOVA ONROWA AYA WUNCEREREYA VAAVO VANIMOONA ANYU . . .
oovahakani itthu sinoothowani sa werutthuni?
oovahakani yoolya ya omunepani?
oovahakani miruku ni woolakiheryani?
1, 2. Moovarihana ni murummwa Yohani, Muluku onoonihenrye sai enamuna ya oniphenta?
ANAMUNCEENE anneemererya wira enamuna ya tiithi omwiixuttiha mwanawe omooniherya ntakiheryo nooloka. Murummwa Yohani aalempe so: “Hiyo ninnimphenta Muluku, okhala wira Muluku t’opajenrye oniphenta”. (1 Yoh. 4:19) Ti maana aya Yehova onivanhe awe ntakiheryo na tiithi oophenta onnikhaliherya wira nimphenteke.
2 Mwa enamuna xeeni Yehova ‘epacenrye awe oniphenta’? Murummwa Paulo aahimmye so: “Muluku ònithonyerya khuluwi oniphenta wawe; tthiri Kristu ònikhwela hiyo, varyahu nlelo anatampi”. (aRom. 5:8) Mwaha wa opaka mukuttho wa Mwanawe wira owoopole apinaatamu animwaamini, Yehova ohooniherya makhalelo awe a ophenta. Owo aahipaka eyo onivahaka mwanawe ni murima wotheene. Oreera wawe murima woomwiiriha oneemererya hiyo ottottela mureerelo oniphenta wawe ni wira hiyo nave nimphenteke.—1 Yoh. 4:10.
3, 4. Onooniheriwa sai omphenta Muluku?
3 Niphento ti mukhalelo muulupalexa wa Yehova, nto nnoowerya woona ele yaamwiirinhe Yesu omwaakhula mutthu aamukonhe oriki nlamulo noopacerya na Muluku ti nla “Mwaphenteke Apwiya Muluku anyu ni murim’anyu wothene n’iroho anyu yothene n’usuwela wanyu wothene n’ikuru sanyu sothene”. (Mar. 12:30) Masu ala yaalavuliwe ni Yesu anniniixuttiha wira omphenta Muluku ohaana okhala etthu yoopacerya ya vamurimani vahu. Nto omurumeela Yehova ni murima wookawanyeya etthu yoomunanara vanceene. Ohiya-vo, hiyo ninnoona wira omphenta Muluku onihela muhina ekumi ahu yotheene, muupuwelelo ahu, ni ikuru sahu sotheene. Eyo enitaphulela wira omphenta Muluku onnivikana khula etthu enihela ahu vamurimani vahu paahi. Ohiya omurumeela Yehova ni murima ahu wotheene paahi, niphento nlo ninhela muhina munepa ahu ni makhalelo otheene a erutthu ahu. Moovarihana ni profeta Mikeya, eyo ti etthu Yehova eniphavela awe.—Mmusome Mikeya 6:8.
4 Ninrowa wooniherya sai wira ninniphenta tthiri Tiithi ahu a wiirimu? Nihaana omphenta ni murima ahu wotheene. Ntoko Yesu soonihenrye awe, eyo enihela muhina makhalelo ahu a werutthuni, muupuwelelo, ni munepa ahu. Muru ovinre, noothokorerya inamuna xexe sa moota Yehova woonihenrye awe waaphenta wawe wuulupale anaawe. Vano nrowe nithokorerye moota hiyo nikhanle ahu oowunnuuherya omphenta wahu Yehova mwa enamuna enrowa oniiriha hiyo weemereriwa ni ophentiwa ni yena.
NIHAANA OXUKHURELA ITTHU SINIVAHIWA AHU NI YEHOVA
5. Naarowa wooniherya sai wira ninnixukhurela itthu sotheene sooloka sinnivaha awe Yehova?
5 Exeeni enipaka anyu vaavo vanivahiwa anyu etthu? Khula mutthu ookhalana inamuna sawe sa oxukhurela hata sivirikanaka. Vamosaru, nyuwo munniimananiha orumeela saana etthu ele evahiwe anyu, mooniheryaka wira othowa ovahiwa etthu. Mwiixutti Yakobo aalempe so: “Eparakha yothene yophaveleya ni sovahiwa sothene sorera sinkhuma osulú, sinnikhuruwa w’Atithi, yawo apattunxe itheneri. Vano Muluku khanthatuwa, nnákhala khanihiya warya, mana Owo khammala”. (Yak. 1:17) Yehova khonihiyererya onivaha itthu sinitthuneya wira nikhale akumi ni oohakalala. Niireke eyo khenniiriha hiyo ophavela omphenta nave Yehova?
6. Exeeni yaatthuneya aya aIsarayeli ovikaniha opaka wira yaakheleke mareeliho a Yehova?
6 Nloko na Isarayeli naahiviriha iyaakha imiya sinceene nikhapeleliwaka moophenta ni Yehova, aavahaka itthu saathowa sa werutthuni ni omunepani. (Otum. 4:7, 8) Wira avikanihe waakhela mareeliho ale, awo yaatthuneya ovikaniha wiiwelela Malamulo a Muluku, yaawo yaahela muhina onvaha Yehova “mihokorokho sopajerya sa mmatta” mwaya. (Okhum. 23:19) Opaka eyo yaamooniherya wira aIsarayeli yaanixukhurela mareeliho ale yaavahiwa aya ni Yehova.—Mmusome Otumererya 8:7-11.
7. Ninrowa orumeela sai itthu sahu “sorera” wira nooniherye omphenta wahu Yehova?
7 Ankhi olelo-va? Nnaamwi olelo-va nihivekeliwaka ovaha mikuttho ntoko okathi ole, ti vooreerela wooniherya oxukhurela wahu oniphenta wawe Muluku ninvuwihaka ni itthu “sorera” sirina ahu. (Mir. 3:9) Nto ninrowa opaka eyo mwa inamuna xeeni? Eyo enivekela wira hiyo nirumeeleke mihakhu sahu wira nikhaliherye miteko sa Muluku sinivariwa mmuttettheni mwahu wala olumwenku wotheene. Eyo ti enamuna yoolokexa ya wooniherya wira ninnixukhurela oniphenta wawe Yehova, hata nirineene mireerelo sowaatta wala vakhaani. (2 aKor. 8:12) Masi, sookhala inamuna sikina nikhanle ahu oowooniherya oxukhurela wahu niphento na Yehova.
8, 9. Moota xeeni ororomela yooleiherya ya Yehova onivarihana aya ni waamini wahu? Nvahe ntakiheryo.
8 Muupuwele masu Yesu aahimeeryale awe atthareli awe wira ahixankiheye mwaha wa yoolya ni yoowara, masi avikanihe ophavela Omwene. Owo aahimmye wira aTiithi annisuwela khula etthu ennithowa. (Math. 6:31-33) Enamuna enikupali ahu yooleiherya eyo ennooniherya munnuwelo wa omphenta wahu Yehova okhala wira niphento ninnivarihana ni nroromelo. Khivaniweryaneya omphenta mutthu ohinimuroromela ahu. (Esal. 143:8) Nto nihaana wiikohaka so: ‘Kiireke soolukama saka ni itthu sinkisivela sinnooniherya wira miyo kinnimphenta Yehova? Kiireke sowiira saka khula nihiku sinnooniherya wira kinniroromela owerya wa Yehova wira onookikhapelela?’
9 Kristau mmosa oniireliwa Mike ahooniherya niphento ni ororomeleya moota owo. Okhuma onamwane awe, Mike aaniphavela omurumeela Yehova elapo ekina. Owo aahithela ni aahaayara anamwane anli, masi yoophavela awe khiyaavukunwe. Olipihiwaka ni myaha aasomme awe sa iliivuru sahu soovirikana vamosa ni soohimmwa sa atthu yaarumeela mapuro oothowa anamalaleerya, Mike ni emusi awe yaahithanla okhweiherya ekumi aya. Awo yaahitumiha empa aya ni yaahithaamela empa ekina yaamukhaani. Nuumala-vo Mike aahivukula munnuwelo wa nakoso awe ni ahiixutta moota woomweettiha nakoso owo orumeelaka Interneti. Nuumala emusi ele othaama ni oviriha iyaakha piili arumeelaka elapo ya okhopela, Mike onihimya so: “Hiyo nahoona wira masu yaalavuliwe ni Yesu ari eliivuru ya Matheyo 6:33 anihimya ekeekhai.”
MUHELE VAMURIMANI VANYU EKEEKHAI ENIKHUMA WA MULUKU
10. Ntoko sooniheriwe aya ni Mwene Davidi, exeeni enrowa aya oniixuttiha wuupuwelela ekeekhai voohimya sa Yehova?
10 Iyaakha 3.000 sivinre, Mwene Davidi ahoona etthu yanvanre murima okathi waaweha awe wiirimu. Owo aalempe so: “Erimu ennilaleya ovuwa wa Muluku, itheneri sinnivuwiha miteko sa matat’awe”. Nuumala-vo, aahoona wira Malamulo a Muluku annooniherya ankhili, khulavula so: “Soruma s’Apwiya ti sorera; sinnivaha ekumi ya nanano. Molumo a Apwiya t’òroromeleya: annavaha miruku atthu òwiyeviha”. Nto waakumihenrye exeeni woona ni ovaha efaita ele yaaweha awe? Davidi aahivikaniha ohimyaka so: “Apwiya! Mwakhele molumo a mwano mwaka mwakhele mupuwelo wa mmurimani mwaka. Apwiya! Nyuwo mwá mòpoli aka n’ulipa waka”. Eyo ennooniherya wira waahikhumelela opatthani woolipa eriyari ya Davidi ni Muluku.—Esal. 19:2, 8, 15.
11. Moota xeeni omphenta Muluku onrowa aya onikhaliherya orumeela oratteene osuwela wa mBiibiliyani orina ahu olelo-va? (Nwehe elatarato yoopacerya.)
11 Olelo-va, nooreelihiwa mwaha wa osuwela miteko sa Yehova, soopattuxa sawe ni moota yoolakela awe enrowa aya waakhwanela. Olumwenku ola onnivaha efaita osoma wuniversidade ni ixikola suulupale. Masi, atthu anceene ahoona wira okhalela nthiti itthu iyo ikwaha sinceene onnikumiherya oyeleela waamini ni omphenta waya Yehova. Biibiliya onninitumererya wira nihiphenteke osuwela paahi, owo oni naaphaveleke ankhili ni miruku. Eyo enitaphulela wiixutta moota woorumeela ele enisuwela ahu voohimya sa Muluku wira niphwanye mureerelo ahu ni wa atthu akina. (Mir. 4:5-7) Muluku “onitthuna wira atthu othene yòpowe, esuwele ekeekhai”. (1 Tim. 2:4) Hiyo ninnooniherya omphenta wahu Yehova vaavo vanaalaleerya ahu atthu otheene voohimya sa ihapari sooreera sa Omwene, ni waakhaliherya atthu wiiwexexa yoolakela ya Muluku wa apinaatamu.—Musome Esalimo 66:16, 17.
12. Moota xeeni mwaana mmosa oonihenrye awe osiveliwa itthu somunepani sinivahiwa ahu ni Yehova?
12 Hata amiravo anoowerya wooniherya omphenta waya Yehova vaavo anooniherya aya oxukhurela soovaha somunepani. Shannon onihimya wira okathi waarina awe iyaakha 11, owo ni muhima awe aarina iyaakha 10 yaahirowa omuthukumanoni wa muttetthe “Devoção Piedosa” ni anamuyari aya. Okathi wa eprograma, axinamwane yaahivekeliwa wira yakilaathi opuro wa vameekhaaya. Owo onihimya wira ahoova vakhaani. Nuumala-vo owo aahitteeliwa murima vaavo khula mwaana aavahiwe awe eliivuru emosa yooreera yaarina muru oni Os Jovens Perguntam—Respostas Práticas. Eliivuru ele yaamoonihenrye exeeni Shannon voohimya sa Yehova Muluku? Owo onihimya so: “Okhuma okathi yoole miyo kaahoona wira Yehova ookhala tthiri ni wira owo onnikiphenta miyo vanceene”. Shannon onihimya-tho so: “Tthiri hiyo nootteeliwa murima okhala wira Muluku ahu muulupale Yehova, oonivaha mooreera murima eliivuru ela yooreera!”
MWEEMERERYEKE MIRUKU NI MALAKIHERYO ANIKHUMA WA MULUKU
13, 14. Moonelo ahu voohimya sa miruku sa Yehova onooniherya sai omphenta wahu?
13 Biibiliya onninuupuxerya so: “Tthiri Apwiya annapwapwela anaphentaya, ntoko tithi onimuttaruxawe mwan’awe onimphentexawe”. (Mir. 3:12) Nto hiyo nooneleke sai malakiheryo awo? Murummwa Paulo aahihimya ekeekhai vaavo aalempe awe so: “Okathi onttaruxiwahu, khavo ontteliwa murima; nto ninniripiwa murima”. Okathi waalavunle awe siiso Paulo khaaphavela oyeveiha otthuneya waya malakiheryo ale, owo aavikaninhe olavula ohimyaka so: “Masi oholo waya, ale anvilela ottaruxiwa weiwo annakhela sorera saya; murettele n’ixariya”. (aHéb. 12:11) Vakhala wira hiyo ninnimphenta Yehova, nihaana osyaka ohiiwelela malakiheryo anivahiwa ahu. Eyo ennaavila anamunceene. Masi omphenta wahu Yehova onoonikhaliherya opaka eyo.
14 Mahiku a profeta Malakhiya, aYuda anceene khiwaasivela waakhelela malakiheryo a Muluku. Awo yaanisuwela Malamulo awe voohimya sa mikuttho masi vowuuliha muru yaanihiyererya ovaha mikuttho iyo nto anatthuneya ovahiwa miruku. (Mmusome Malakhiya 1:12, 13.) Okathi ole makhalelo ale yaari sai? Nkahaya nwiriyane masu a Yehova: “Miyo kinotakhaliha itthu sinrerihanyu, okhala wira khavo mwa nyuwo onthokorerya ikano saka [malamulo aka].” (Mal. 2:1, 2) Tthiri, olakelela ohiiwelela miruku sinooniherya ophenta wa Yehova onnikumiherya maxakha maalupale.
15. Mweettelo xeeni olelo-va ohireere wuulaana onitthuneya ahu osyaka?
15 Mahiku ala, atthu aryaaya oowiitthuna ti voovila wiiwelela miruku ni malakiheryo. Hata ale anooniwa wira anniiwelela miruku ni malakiheryo ikwaha sikina khaniiwelela miruku iyo ni murima wotheene. Tivonto maKristau otheene anitumereriwa aya wira: “Muhitthareké mwettelo w’atthu a vathí”. Siiso hiyo nnoosuwela ni wiiwelela etthu “enimusivela Muluku”. (aRom. 12:2) Yehova orumeelaka otthokeya wawe onninivaha malakiheryo khula okathi annikhaliherya mweekumini mwahu, eyo piiyo, moota woowaathokorerya atthu a enoka yoovirikana, atthu anipatthana ahu ni inamuna sa otthekula wahu. Vakhala wira ninneemererya ni ovarihela muteko malakiheryo awo, hiyo ninnooniherya wira ninnixukhurela ni ninniphenta tthiri Yehova ni murima ahu wotheene.—Yoh. 14:31; aRom. 6:17.
MUNVEKELEKE YEHOVA WIRA WOOKHAPELELENI NI OWOOPOLANI
16, 17. (a) Xeeni varyaaya vootthuneya otthara malakiheryo a Yehova nihinatthi opaka soothanla sahu? (b) Moota xeeni aIsarayeli yoonihenrye aya ohimphenta ni ohimuroromela Yehova?
16 Okathi anamwane anoona aya etthu eniwoopiha mowaakuveya awo annitthyawela vari anamuyari aya. Nto vaavo aninnuwa aya, awo anniixutta ohaaroromelaxa anamuyari aya masi khiyaroromela muupuwelo aya ni opaka soothanla saya. Eyo enniiraneya mwaha woowi anninnuwa. Masi, ale aniphavela okhalana opatthani wuulupale ni anamuyari aya annoona okhala vooreerela waavekela miruku ni malakiheryo anamuyari aya ahinatthi opaka khula etthu enuupuwela aya. Eyo enoolikana mwa enamuna ya omunepani. Yehova onninivaha munepa awe wootteela, wira onikhaliheryeke “otthuna n’umaliherya” oratteene miteko sawe. Tthiri ohipaka eyo waamooniherya ohimphenta wahu Yehova ni okhala oowiiroromela nto khiyapaka soothanla nihittharihelaka malakiheryo awe.—aFil. 2:13.
17 Okathi aakhala awe profeta Samuweli, aIsarayeli anceene yaahiiviwa okhottoni ni aFilisti. Atthu ale a Muluku yaanitthuneya okhaliheriwa ni woopoliwa. Nto yaarowa opaka exeeni? Awo yuupuwenle so: “Nirowele nivuku no watàna w’Apwiya oSilo, nikhaleke eriyari ahu, nnakiherye mmatatani mw’aFilisti.” Nto exeeni yaakhumelenle? “Anakhotto anjene yahipwetexiwa okhottoni, yahivakasiwa atthu ikonto miloko miraru. Nivuku no watàna nahikuxiwa.” (1 Sam. 4:2-4, 10, 11) Okathi aIsarayeli yaakunxe Nivuku na wataana, yaakhala ntoko yaaphavela nikhaliheryo na Yehova. Tthiri, awo khiyaavenke malakiheryo a Yehova, masi yaatthanre muupuwelo aya, nto eyo yahaaruhela maxakha maalupale.—Musome Miruku 14:12.
18. Nooneleke sai onvekela nikhaliheryo Yehova?
18 Nasaalimo mmosa aahooniherya okhalana murima wooloka vaavo aalempe awe so: “Mmuroromele Muluku, mmutthapele-tho! Owo ti Muluku aka, ontteliha ekhove aka. Murim’ aka, onnithukumela ni wunkheliwa, kimutthokelelaka Muluku.” (Esal. 42:6, 7) Tthiri owo aanimphenta vanceene Yehova! Niireke nyuwo munnooniherya omphenta ni omuroromela wanyu Tiithi anyu a wiirimu? Vakhala wira munaakhula wira aayo, nyuwo munoowerya wunnuuherya omuroromela wanyu Yehova muttharihelaka masu ala a mBiibiliyani ani: “Mwaroromeleke Apwiya ni murim’anyu wothene; muhiroromelé osuwela wanyu pahi! Nwupuwele Apwiya mothene munettanyu; awo anolokiha iphiro sanyu.”—Mir. 3:5, 6.
19. Mwa inamuna xeeni munrowa anyu wooniherya wira munnimphenta Yehova?
19 Okhala wira Yehova topacenrye oniphenta, owo onninooniherya inamuna sikhanle ahu omphenta nave. Vano nihaana wuupuwelelaka khula okathi ntakiheryo nawe nlo nuulupalexa. Vano nooniherye omphenta wahu wuulupale Yehova ‘ni murim’ahu wothene n’iroho ahu yothene n’usuwela wahu wothene n’ikuru sahu sothene!’—Mar. 12:30.