“Musuweleke Othanla Itthu Sintepa Ophwanela”
“Musuweleke othanla itthu sintepa ophwanela”.—AFIL. 1:10.
MYAHA SINIREERELA WUUPUWELELA
Sowooniheriwa sa Yesaya, Ezekiyeli ni Daniyeli sinnilipiha sai?
Exeeni nixuntte ahu mwaha wa othokorerya saana mulokiheryo wa Yehova mpantta wa vathi?
Yoosoma ela enootumereryani opaka exeeni?
1, 2. Eprofesia xeeni yaatikininhe awiixutti a Yesu voohimya sa mahiku ookiserya, ni nthowa xeeni?
PEDRU, Yakobo, Yohani, ni Andre yaarisa ni mwiixuttihi aya paahi. Ele Yesu yaahimyale awe sa opwetexiwa wa empa ya Muluku, yaahaaxankiha vanci. (Mar. 13:1-4) Tivonto yaakohale aya so: ‘Munihimerye: itthu iya sinrowa okhumelela lini? Nave ethonyeryo y’orwa wanyu ni y’omala olumwenku [ola] t’ivi?’ (Math. 24:1-3) Nto Yesu khupacerya ohimya itthu wala mikhalelo saarowa okhumelela, masi itthu iyo khahiyo saarowa paahi orukunuxa makhalelo a okumi, masi saarowa wooniherya mahiku ookiserya a olumwenku ola wootakhala wa Satana. Yaahikhala etthu emosa yaatikininhe vanceene awiixutti a Yesu. Nuumala olavula itthu soothananiha ntoko ikhotto, othowa soolya, ni otepa otakhala, Yesu aahilavula etthu yooloka yaarowa wooneya mmahiku ookiserya. Owo onihimya so: ‘Nave ehapari ela yorera ya Omwene wa wirimu enolaleiwa mulaponi mothene wira maloko othene esuwele. Vano-nto olumwenk’ula omaleke’.—Math. 24:7-14.
2 Awiixutti a Yesu vanaasivela olaleya hoothe ni Kristu ihapari sooreera sa Omwene. (Luka 8:1; 9:1, 2) Awo waaniheryasa yaanuupuwela masu aalavunle awe wira: ‘Solya khasirere mmatta, vano alipa-óhepha ari vakhani. Munvekele mwanene ematta, wira árumihele anamuteko mmatta mwawe’. (Luka 10:2) Masi yaarowa olaleya sai ‘mulaponi mothene wira maloko othene esuwele?’ Yaarowa okhuma woowi anamuteko? Vaakhanle wira yaahuupuwela itthu saarowa wiiraneya muhoolo okathi yoole yaakilanthe aya ni Yesu, awo khiyaarowa otikiniheya oweha wiiraneya wa masu ala vakhaani ninsoma ahu vano mMatheyo 24:14.
3. Moota xeeni Luka 21:34 onivareleya awe muteko olelo-va, nto ninrowa otokosa sai mukhalelo ahu?
3 Ninkhala mahiku aniiraneya aya eprofesia ya Yesu. Imilyau sinceene sa atthu annuuraana wira yaakhwaniherye muteko ola wa olaleiwa ihapari sooreera sa Omwene. (Yes. 60:22) Yesu aahilavula wira akina yaarowa woonaka oxankiha ovara muteko owo mmahiku ala ookiserya. Awo yaarowa ohapuxiwaka ni itthu sikina ni ‘olemeliwa ni sonanara’. (Mmusome Luka 21:34.) Ninniweha tthiri wiiraneya wa masu ala. Arumeyi akina a Muluku annihapuwa. Eyo enniweheya ni soothanla anipaka aya ntoko: mavarelo aya miteko sa mulaponi, osoma universidade, ni ophenta mihakhu, ni okathi munceene anirumeela aya etthekulaka wala ni axooku. Akina annitthikela ottuli mwaha wa oxankiheya vanceenexa ni soophavela sa okumi wa khula nihiku. Nto mwiikoheke so: ‘Miyo kiri sai? Soothanla saka sinooniherya exeeni voohimya sa okumi aka?’
4. (a) Paulo aavekenle exeeni wa maKristau a oFilipi, nto waari mwaha wa xeeni? (b) Ninrowa othokorerya exeeni yoosoma ela ni enittharelana, nto yoolakela aya tiivi?
4 MaKristau yaakhala eseekulu yoopacerya yahaana wiilipiha wira omurumeela waya Muluku okhaleke nipuro noopacerya. Murummwa Paulo aahiweha otthuneya waya ovekela wira ale yaari oFilipi yahaana ‘osuwelaka othanla itthu sintepa [otthuneya]’. (Mmusome aFilipi 1:9-11.) Ntoko Paulo, anamunceene okathi ole yaanitepa ‘olaleya masu a Muluku ni ikuru, ehòvaka etthu’. (aFil. 1:12-14) Nave, anamunceene a hiyo olelo, ninniimananiha olaleya Nuulumo na Muluku moolipa murima. Nlelo, niireke othokorerya etthu enaakhwaniheriwa olelo-va mmulokiheryo wa Yehova, enoonikhaliherya ovarexexa saana muteko ori wootepexa otthuneya wa olaleerya? Tthiri pooti onikhaliherya! Yoosoma ela, ninrowa oweha malokiheryo Yehova onipaka awe anikhweeherya waakhwanihereya wa Matheyo 24:14. Exeeni mulokiheryo owo oniphavela aya, nto moota xeeni osuwela eyo ennikhaliherya aya vamosa ni imusi sahu? Nto yoosoma enittharelana, enrowa onikhaliherya moota woovilela ni ottharaka mavalo a mulokiheryo wa Yehova.
MULOKIHERYO WA YEHOVA EPANTTA YA WIIRIMU ONNEETTA
5, 6. (a) Xeeni Yehova onooniherya awe mukhalelo wa mulokiheryo awe epantta ya wiirimu? (b) Ezekiyeli ooniheriwe exeeni?
5 Sookhala itthu sincipale Yehova ohiphavenle awe olempwa mBiibiliyani. Mwa ntakiheryo, owo khahimmye oratteene moota oramattha wala ottoopare onivara awe muteko, wala moota mapakeliwo a olumwenku anivara aya muteko, nnaamwi itthu iyo saarowa okhala sooreera vanceene osuwela! Ohiya-vo, Yehova oonivaha malakiheryo anitthuneya wira nisuwele soolakela sawe, wira nikhaleke moovarihana ni seiyo. (2 Tim. 3:16, 17) Masi ti vootepa otteeliha murima oweha moota Biibiliya onooniherya awe vakhaani, makhalelo a nikhuuru nootthokiheya na Yehova epantta ehinooneya, wiirimu! Ninnitikiniheya ni ohakalala naasomaka myaha sa Yehova wiirimu silempwe ni Yesaya, Ezekiyeli, Daniyeli ni myaha sooniheriwe awe Yohani. (Yes. 6:1-4; Ezek. 1:4-14, 22-24; Dan. 7:9-14; Wis. 4:1-11) Eyo enkhala wira Yehova ohunle ekortina wira noone itthu siri wiirimu. Xeeni owo onnileela awe myaha iyo sa wiirimu?
6 Yehova oniphavela wira nihiliyale wira nniirela mpantta mulokiheryo awe wa olumwenku wotheene. Eyo enihela muhina itthu sinci, ohiya okhaliherya paahi soolakela sa Yehova siniwerya ahu woona. Mwa ntakiheryo Ezekiyeli aahiweha mpantta wa mulokiheryo wa Yehova ohinooneya onlikanyihiwa ni ekaaro yuulupale ya wiirimu. Ekaaro eyo yaaneetta mowaakuveya ni erukunuwelaka mpantta mukina moohipisa. (Ezek. 1:15-21) Mwaha wa maroota aya a vameekhaaya, ekaaro eyo yaaniwerya weetta ekwaha yoorakama okathi vakhaani. Okathi oonihiwa awe Ezekiyeli, aahiwerya onweha vakhaani mulipa Eettiha ekaaro eyo. Owo onihimya so: ‘Yahikhala etthu yalikana ni . . . overunya . . . walikana ni moro, warya waya wotutha walikana ni ovuwa wa [Yehova]’. (Ezek. 1:25-28) Tthiri Ezekiyeli oweha etthu ela waari mutikiniho muulupale! Owo aahinweha Yehova eettihaka saana nikhuuru nawe nootthokiheya, orweela mwa munepa awe wootteela. Tthiri ela yowooniherya yootikiniha ya epantta ya wiirimu ya mulokiheryo wa Yehova oneetta!
7. Moota xeeni yowoonihiwa ya Daniyeli eninroromeliha aya?
7 Daniyeli nave ahoonihiwa itthu sinniiriha ororomela. Owo aaheemiheriwa woona ethoonyeryo ya Yehova ntoko ‘Humu Mulupale’ aakilanthe veehiceni yaapatta mooro. Ehice eyo yaahikhalana maroota aya. (Dan. 7:9) Yehova aaphavela wira Daniyeli awehe wira mulokiheryo wa Yehova onneetta waakhwaniheryaka yoolakela ya Muluku. Daniyeli nave aahoona ‘etthu yalikana ni Mwana a Mutthu’, Yesu, avahiwaka okhulupale wa epantta ya mulokiheryo wa Yehova valaponi. Olamulelo wooloka wa Kristu khahiyo opacenrye niinano. Masi ‘owerya wawe khunimala, khanakhiwa, omwene awe khunipwetexiwa-tho’. (Dan. 7:13, 14) Ela enninlipiherya omuroromela Yehova ni woona etthu enipaka awe vano. Owo ‘onvaha owerya ni ottittimiheya ni omwene’, Mwanawe eehereriwe mwa sotheene, Yesu. Tthiri Yehova onnimuroromela Mwanawe. Tivonto hiyo nihaana ororomelaka olamulelo wa Yesu.
8. Ezekiyeli ni Yesaya yoonenle sai itthu yoonihiwe aya ni Yehova, nto hiyo nooneleke sai?
8 Moota xeeni yowoonihiwa ela ya mulokiheryo wa Yehova wa wiirimu ekhanle aya onikhaliherya? Ntoko Ezekiyeli, hiyo nihaana tthiri otikiniheya ni wiiyeviha mwaha wa itthu Yehova onaakhwaniherya awe. (Ezek. 1:28) Wuupuwelela mulokiheryo wa Yehova, onooniiriha opaka etthu ntoko siirale awe Yesaya. Okathi waakhumelenle aya eparakha ya waahimeerya akina sa ele Yehova enipaka awe, owo aahipaka eyo moohihoverya”. (Mmusome Yesaya 6:5, 8.) Yesaya aaniroromela wira Yehova aarowa omukhaliherya wira axintte khula muxankiho. Moolikanasa, osuwela vakhaani orina ahu sa mulokiheryo wa Yehova epantta ya wiirimu, oniiriheke otikiniheya, ororomela ni ophavela opaka etthu. Tthiri murima ahu onnihakalala oweha mulokiheryo owo weettaka saana, ni otepaka ophavelexa waakhwaniherya soolakela sa Yehova!
MULOKIHERYO WA YEHOVA EPANTTA YA VATHI
9, 10. Xeeni vaatthuneya aya okhala mulokiheryo wa Yehova valaponi?
9 Amurumeelaka Mwanawe, Yehova oopaka malokiheryo vathi-va yaawo anivarihana ni mulokiheryo awe epantta ya wiirimu. Nthowa xeeni malokiheryo a epantta ya vathi anitthuneya aya wira aakhwaniheriwe muteko ori mMatheyo 24:14? Muthokorerye mathowa mararu.
10 Noopacerya: Yesu aahilavula wira muteko woolaleerya waarowa owiiriha awiixutti awe ophiya ‘mpakha omalenle elapo’. (Mit. 1:8) Na nenli: Yahaana opakiwa malokiheryo wira eyoolya yomunepani evahiweke ale anivara muteko ola. (Yoh. 21:15-17) Na neeraru: Sookhaliherya iyo saahaana opakiwa wira ale anilaleerya ihapari sooreera, ethukumaneke ni omukokhorela Yehova ni wiixuttihiwa moota woovara muteko owo. (aHéb. 10:24, 25) Wira vaweryaneye opaka itthu iya, khisaarowa okhumelela ekhayaru. Wira atthareli a Kristu ekhumele saana, muteko owo wahaana okhala wootthokiheya saana.
11. Ninrowa wooniherya sai okhaliherya miteko sinipakiwa ni mulokiheryo wa Yehova?
11 Nnooniherya sai wira ninnikhaliherya malokiheryo a nikhuuru nootthokiheya na Yehova? Enamuna emosa yuulupale ori waaroromelaka okathi wotheene ale Yehova ni Yesu aathanlale awe wira enihooleleke mmuteko woolaleerya. Sookhala miteko sinceene sa olumwenku ola saarowa ovukula waattittimiha wahu ale annihoolela. Nto, etthu xeeni ekhanle yootepexa otthuneya enivariwa ni mulokiheryo wa Yehova epantte ela ya vathi?
MULIPIHERYEKE ITTHU SINITEPA OTTHUNEYA
12, 13. Moota xeeni axitokweene maKristau anivara aya muteko aya, nto xeeni eyo enoolipihaayani?
12 Axitokweene maKristau oolipa omunepani olumwenku wotheene, aathanliwa wira ekhapeleleke muteko wolaleya Omwene, mapuro anirumeela aya. Nto, vaavo anna awo anipaka aya soothanla, ni murima aya wotheene awo annitokosa Nuulumo na Muluku, ni opaka okhala ʼmuthuko wa inawu saya onimwalela ephiro ayaʼ.—Esal. 119:105; Math. 7:7, 8.
13 Ntoko anna yaale yaahoolela eseekulu yoopacerya, axitokweene ari maKristau anihoolela muteko woolaleerya olelo-va, annivara muteko wa ‘olaleya masu’. (Mit. 6:4) Awosa annihakalala vanceene ni orowa ohoolo oniiraneya ni muteko woolaleerya ihapari sooreera sa omwene mapuro anikhala aya ni olumwenku wotheene. (Mit. 21:19, 20) Awo khanipaka malamulo wala opaka malakiheryo aya. Masi, animutthara Biibiliya ni malakiheryo a munepa wootteela wa Muluku vaavo anipaka aya malokiheryo anitthuneya okhaliherya muteko wa olaleerya wira oroweke ohoolo. (Musome Miteko 15:28.) Mwaha wa opaka eyo, anna awo annivaha ntakiheryo nooloka mmulokoni.—aÉf. 4:11, 12.
14, 15. (a) Malokiheryo xeeni a okhaliherya olaleerya aniphwanyaneya olumwenku wotheene? (b) Munoonela sai okhaliherya muteko wa olaleya Omwene olumwenku wotheene?
14 Sookhala miteko nihiniweha ahu sinivariwa, ntoko otthokihiwa wa yoolya yomunepani eniphwanyaneya muliivuruni mwahu, mithukumano, ni akongresu. Ikonto sinceene sa atthu owiivahererya annivara muteko moohikhulumuwa wira etaphulele yoolya ela yomunepani mattaava 600 wira atthu anceene ewerye wiixutta ni nttaava naya ‘miteko sulupale sa Muluku’. (Mit 2:7-11) Anna ari amiravo ni arokora annivara muteko apakaka iliivuru ni maakina owuupa wira yimpirimiri ni oheliwa ikaapa. Iliivuru iya nto sinnikaweliwa miloko hata seiye siri ottaiwene wa elapo.
15 Aakhala-tho malokiheryo manceene mapuro anikhala ahu wira niireleke mpantta saana muteko woolaleerya mmulokoni. Mwa ntakiheryo, ikonto sinceene sa alipa oowiivahererya annikhaliherya otekiwa iSalau sa Omwene, iSalau sa Asembeleya, waakhaliherya yaale aphwanyiwe ehasara ya ephattu wala anitthuneya ovahiwa murette mowaakuveya, otthokiha mithukumano sa asembeleya ni akongresu, wiixuttihaka ixikola sa Muluku sinipakiwa, ni itthu sikina sinivariwa sihinooneya. Yoolakela aya tiivi miteko iyo sotheene? Yoolakela aya ti okhweiherya olaleiwa ihapari sooreera, olipiha omunepani wa ale anivara muteko ola, ni wunnuuherya okokhorela wekeekhai. Niireke mulokiheryo wa Yehova valaponi onnivikaniha ovarexexa itthu sinitepa otthuneya? Aayo!
MUTTHAREKE NTAKIHERYO NA MULOKIHERYO WA YEHOVA
16. Enamuna xeeni ya omusoma Biibiliya yaarowa wookhaliheryani nyuwo wala emusi anyu?
16 Niireke ninnisuka okathi wira nuupuwelele miteko sa mulokiheryo wa Yehova? Akina aathanla ohela muhina okathi animulompa aya Muluku vatthokoni otokosa ni wuupuwelela saana myaha iyo. Sowooniheriwa sa Yesaya, Daniyeli, ni Yohani, ti soohakalaliha osoma. Eliivuru eni: Testemunhas de Jeová—Proclamadores do Reino de Deus ni iliivuru sikina wala aDVD aniphwanyaneya a nttaava nanyu sinnikhaliherya osuwela saana mulokiheryo ahu.
17, 18. (a) Yoosoma ela yookhalihenryeni sai? (b) Makoho xeeni anireerela ahu othokorerya?
17 Wuupuwelela ele Yehova enipaka awe vano, orumeelaka mulokiheryo awe, ti etthu yooloka wa hiyo. Nittharaka mulokiheryo ola woohakalaliha, nivikanihe olipiherya itthu sinitepa otthuneya. Opaka eyo enrowa onlipiha ni omutakiha Paulo yoowo aalempe so: ‘Muluku n’urera wawe murima, t’onivanhe muteko ola’. (2 aKor. 4:1) Nave owo ahaalipiha maKristau akhwaawe ariki: ‘Nihikhulumuwelekè ovara miteko sorera: okhala wira nahojeyeru, nnohepha okathi aya’.—aGal. 6:9.
18 Niireke aakhala marukunuxo anireerela ahu opakaka mmansihu wala ni emusi ahu wira nivaraxaxe itthu sinitepa otthuneya mookumini mwahu? Niireke vannitthuneya okhweiherya okumi ahu wala ovukula miteko sinivara ahu wira nilipiherye muteko woolaleerya yoowo ori wa efaita? Yoosoma enittharelana ninrowa othokorerya itthu thanu sinrowa onikhaliherya ovikaniha otthara mulokiheryo wa Yehova.
[Elatarato epaaxina 22]
[Elatarato epaaxina 24]