5 Niireke Opuro ni Okathi Wookhalana Efaita?

MOOHAANYIHERYA nyuwo muhoona wira itiini sinceene sinnivaha efaita yinceene ikerexa ni mapuro makina a okokhorela wira avekele ni onnikhala okathi wa opaka mavekelo. Niireke Biibiliya onnihimya okathi ni opuro ninreerela ahu ovekela vanihikuni?

Ekeekhai wira Biibiliya onnihimya wira wookhala okathi ninreerela ahu ovekela. Mwa ntakiheryo, ohinatthi olya ni awiixutti awe, Yesu aahipaka nivekelo omuxukhurelaka Muluku. (Luka 22:17) Nave okathi awiixutti awe yaathukumana aya wira amukokhorele Muluku, awo yaanivekela. Nto awo yaahivikaniha otthara yoolema yaapakiwa musinagoga ni mutemplo oYerusalemu. Ohiya-vo, Muluku aaphavela wira etemplo ekhale “empa ya mavekelo ya maloko otheene”.—Marko 11:17.

Okathi arumeyi a Muluku anithukumana aya annivekela ari ene hoothe, mavekelo aya aakhala owerya wuulupale. Muluku vannimusivela vaavo atthu anithukumana aya ni ovekela waya onivarihana aya ni malakiheryo a mBiibiliyani. Nave ovekela pooti owiirihani opaka etthu mwahaarowa anyu owerya opaka. (aHeeberi 13:18, 19) Okathi wotheene Anamoona a Yehova anithukumana aya, awo annivekela. Nyuwo munnilattuliwa orowa oxukurya Empa ya Omwene mwaattamenle anyu wira mwawiriyane mavekelo awo.

Masi Biibiliya khonihimya okathi wa vameekhaaya ninreerela ahu ovekela. Maana mBiibiliyani sookhala sowiiraneya sa arumeyi a Muluku yaavekenle okathi woovirikana ni opuro woovirikana. Yesu aahimmye so: “Okathi onivekela anyu, muroweke mpaani mwanyu, nwaleke mukhora, munvekeleke Tiithi inyu, ohinooneya. Vano, Tiithi inyu, yoowo oniweha itthu sotheene, onimootthuvelani”.​—Matheyo 6:6.

Niireke eyo khahiyo etthu yoohakalaliha? Tthiri nyuwo pooti onvekela Mukhulupale a olumwenku wotheene okathi muniphavela anyu, muri ene mekhinyu ni mukupaliki wira owo onimoowiriyanani. Tivonto, okathi mukina Yesu aanikhala mekhawe wira ovekele! Okathi omosa, owo aahivekela ohiyu wotheene, woonasa wene aavekelaka ankhili wira opake yoothanla yuulupale.—Luka 6:12, 13.

Alopwana ni athiyana akina aniromoliwa mBiibiliyani yaahivekela okathi yaaphavela aya opaka soothanla suulupale ni okathi wa mixankiho. Okathi mukina yaanivekela moowiiwanyeya, okathi mukina moohirunya. Nave yaanivekela athukumanne ene wala ari ene mekhaya. Etthu ya faita okhala wira awo yaanivekela. Nave Muluku oniphavela wira arumeyi awe ‘avekeleke voohihiyererya’. (1 aTesaloonika 5:17) Yehova onimwaawiriyana ale anivekela ntoko oniphavela awe. Niireke khamunikupali wira eyo enooniherya ophenta wa Yehova?

Olumwenku ola atthu anceene ahinaamini aya, atthu anceene khanikupali wira ovekela onnikhaliherya. Woonasa wene munniikoha so: ‘Kiireke ovekela onookikhaliherya?’