Nttittimiho ni Nlemeliho Muluku Onaavaha awe Athiyana

OKATHI Yesu aaryaawe valaponi, ahooniherya moomalela mikhalelo sa Apapawe a wiirimu ni moota onipaka aya itthu. Owo aalavunle so: ‘miyo nkinìra etthu mekhaka: miyo kinnilaleya itthu sikixuttihale aya Atithi, mana mahiku othene miyo . . . kinnìra itthu sinimusivela’. (Yohani 8:28, 29; aKolosi 1:15) Nto, moota Yesu aathokorerya awe athiyana ni mweettelo awe, onniniixuttiha etthu voohimya sa moota Muluku onaakhapelela awe athiyana.

Alipa oosoma annihimya wira soolempwa sa Evangelyo, sinnooniherya wira Yesu aanaathokorerya athiyana mmukhalelo waawiiriha akina waacalaka-tho. Moota xeeni? Nto niireke wira sowiixuttiha sa Yesu nlelo sinnaakhapelela athiyana a mahiku ala?

Yesu Aakhapelela Sai Athiyana?

◼ Yesu khoona wira athiyana muteko aya orupihiwa paahi. Moonelo wa ahooleli a itiini aYuda, yaahimya wira vaahikhale etthu yootepexa otthuneya, alopwana ehitakaaxeryaneke ni athiyana. Okhala wira yooniwa okhala yooweeha, awo khiyaavaanela vanlakani vene ni alopwana, wala weetta hoothe ehikhuneenle owiitho. Masi, Yesu aahilopola wira mutthu ti mutthu okhapeleleke murima awe wira athiyana ekhaleke oottittimiheya ohiya okhala oothanyeya.​—Matheyo 5:28.

Yesu aahilavula-tho: ‘Mulopwana onimwalana ni mwar’ awe, anamuthela mukina, onimuraruwela mwar’ awe’. (Marko 10:11, 12) Atthu awo yaatthara mwiixuttiho wa aYuda, yaanimwalana ni asaaraya ‘mwaha w’etthu p’itthu’. (Matheyo 19:3, 9) AYuda anci khiyaacalela muupuwelo oowi mulopwana onnimurarwela mwaarawe. Awosa yiixuttiha wira mulopwana khanimuraruwela muthiyana, masi muthiyana tonimuraruwela iyawe! Nto otthokiheryaka masu ala a Yesu, mutthu mmosa aahimyale so: “Vaavo Yesu aattittimihenrye awe wira alopwana yiixuumaaliheke ntoko athiyana siniira aya, Yesu ooniherya wira onaattittimiha athiyana”.

Sowiixuttiha sa Yesu Sihaana Ikuru olelo-va: Mmulokoni mwa maKristau, Anamona a Yehova, athiyana anithukumana vamosa mootaphuwa ni alopwana. Masi, awo ekhalaneke ephoole wiiwariwa waya ni makhalelo aya; okhala wira maKristau alopwana ahana ‘olavulanaka athiyana owuluvala ntoko aximamaya, athiyana òhùluvala ntoko axirokoraya n’owumàla wulupale’.

◼ Yesu aaniviriha okathi munceene awiixuttihaka athiyana. Moovirikana ni mwiixuttiho wa aYuda wa ohaacala athiyana, Yesu aahiwiixuttiha ni waatumererya ohimya moonelo aya. Mwaha wa ohikhoota omwiixuttiha Mariya, Yesu ahooniherya wira muthiyana muteko awe khahiyo waapeya paahi. (Luka 10:38-42) Nave Muhima awe Mariya, Martha, aahittottela mureerelo sowiixuttiha sa Yesu, ntoko sinooneya aya moota aamwaakhunle awe Yesu nuumala Laazaru okhwa.​—Yohani 11:21-27.

Yesu aanithokorerya muupuwelelo wa athiyana. Ikwaha sikina athiyana anceene yaari aYuda yuupuwela wira mutthu oohakalala ohaana omuyara mwaana mulopwana wala profeta. Okathi muthiyana mmosa aakhuwenle awe ariki: “Yoreriwa erukulu yoyanreni!” Yesu aahittottela murarelo okathi ole wira awehe muupuwelo wooloka muthiyana ole aarina awe. (Luka 11:27, 28) Mwaha wa wooniherya wira myaha sa Muluku ti sootepa okhalana efaita, Yesu aahilavula etthu yuulupale ovikana yoolema yiixuttihiwe aya athiyana.​—Yohani 8:32.

◼ Ikuru Sirina Aya Olelo-va Yowiixuttiha Ela ya Yesu: Alipa oowiixuttiha mmulokoni wa eKristau, annivaha efaita okathi athiyana anilavula aya. Awo annaattittimiha athiyana arina ankhili mwaha wa ‘ovahaka miruku sorera’ orweela mwa masu ni ntakiheryo. (Tito 2:3) Nave awo annaaroromela athiyana mwaha wa olaleyaka ihapari sooreera sa Omwene wa Muluku.​—Esalimo 68:12; nwehe ekaaxa eni: “Niireke Murummwa Paulo Ahaakhoottiherya Athiyana Olavula?” epaaxina 9.

◼ Yesu anaakhapelela saana athiyana. Okathi wa khalai, waayara anamwane axithiyana, khiyaavahiwa efaita ntoko axilopwana. Talmud aahimya so: “Ooreeriwa taale anaayara alopwana, nave ootakhaliwa taale anaayara athiyana”. Anamuyari akina, okhalana aximwali yoona okhala muritti; nto mwali aanaavyeriwa mulopwana khuliveriwa wira amuthele; eyo yaaniwiiriha anamuyari otaphuwa okhala wira mwali ole aakhapeleliwa ni mulopwana aarowa omuthela.

Masi Yesu ahooniherya wira okumi wa mwaana muthiyana, ti wa faita ntoko wa mulopwana. Owo aahimuhihimuxa mwaamwali a Jairo ni mwammiravo a naamukhweli oNayini. (Marko 5:35, 41, 42; Luka 7:11-15) Nuumala onvoniha muthiyana mmosa aarina ‘nlaikha nootakhala okhuma iyakha mulokó ni thanu na ttharu’, Yesu aahimwiihana muthiyana ole okhala ‘mwana Àbrahamu’ nuulumo nenno naasuweliwa saana mwa soolempwa sa aYuda. (Luka 13:10-16) Mwaha wa orumeela nuulumo nla noottittimiheya, khahiyo paahi ooniherya wira muthiyana owo ta nloko nle, masi aahimukupaleela muthiyana ole mwaha wa waamini waarina awe.​—Luka 19:9; aGalasia 3:7.

Ikuru sirina aya olelo va yowiixuttiha ela ya Yesu: Muhapo mmosa wa wAsia, oni: “Omuhuwa mwaana muthiyana, onlikana ni orekari exardi ya namwaattamanani”. Anamuyari maKristau, khantthara masu awo oohiloka, maana annakhapelela moophenta anamwene othene, athiyana ni alopwana. Anamuyari maKristau annaasomiha ni okhapelela okumi wa anaaya otheene.

◼ Yesu anaaroromela athiyana. Alipa oophuka milattu aYuda, khiyaakupali onamoona wa athiyana, maana waathokoreriwa ntoko onamoona wa epottha. Josefo, mulipa-oolepa sowiiranya a eseekulu yoopacerya, aahilopola oriki: “Muthiyana khaniroromeleya mwaha wa okhala muthiyana”.

Ovirikanyihaka masu awo, Yesu aahaathanla athiyana wira yiirele onamoona ni olaleya ohihimuwa wawe. (Matheyo 28:1, 8-10) Athiyana ala oororomeleya, yahiirela onamoona wiiviwa ni ovithiwa wa Pwiya, ohoolo wa awiixutti, nnaamwi akina yahaakupali masu aya. (Matheyo 27:55, 56, 61; Luka 24:10, 11) Mwaha wa opacerya wiisooniherya wa athiyana nuumala Kristu ohihimuwa, eyo ethoonyeryo yoowi athiyana yanwerya olaleya ntoko awiixutti akina.​—Miteko 1:8, 14.

Ikuru sirina aya olelo va yowiixuttiha ela ya Yesu: Mmulokoni mwa Anamoona a Yehova, alopwana anihoolela muloko, ahaana othokoreryaka moonelo wa athiyana. Alopwana maKristau oothela annaavaha nlemeliho asaaraya vaavo anaawiriyana aya yaalavulaka.​—1 Pedru 3:7; Maphattuwelo 21:12.

Malakiheryo a Biibiliya Annaavaha Athiyana Ohakalala

Alopwana ahaana omutakiha Kristu, vaavo anaattittimiha aya ni waavaha otaphuwa athiyana ntoko Muluku aaphavenle awe. (Maphattuwelo 1:27, 28) Alopwana maKristau esyakeke muupuwelo wowaathanya athiyana; nto yeetteleke malakiheryo a Biibiliya yaawo anihakalaliha etthoko.​—aÉfeso 5:28, 29.

Okathi Yelena aapacenrye awe omusoma Biibiliya, owo khaalavula mwaha wa onyoholiwa ni aiyawe. Iyawe Yelena, aayariwe mapuro yaale atthu yaalimalenle aya ohaaxana ni omuthela muthiyana moomukhanyererya. Yelena onihimya so: “Masu asommye aka mBiibiliyani, aakilipiha. Kihiixutta wira ookhala onikithokorerya ni okivaha efaita vanci. Nave kaahoona wira aiyaka yamusoma Biibiliya awo yaamurukunuxa moota anikikhapelela aya”. Nto yoophavela awe ele, yahiiraneya, maana iyawe aahimusoma Biibiliya, abatiziwa nto khukhala Namoona a Yehova. Yelena onihimya so: “Nto iyaka owo aahiixutta okhala ntakiheryo na wiikasoopa”, Yelena oni: “Nihiixutta olevelelana”. Owo onnimaliherya ariki: “Malakiheryo a Biibiliya, aakikhaliherya miyo okhala oosukeya mukasamentoni mwaka”.​—aKolosi 3:13, 18, 19.

Ela, khahiyo emwiiranenle Yelena mekhawe paahi. Imilyau sincene sa axirokora annihakalala okhala wira awo ni axiiyaya anniilipiha otthara malakiheryo a Biibiliya mukasamentoni mwaya. Awo anniphwanya nttittimiho, olipiheya ni otaphuwa vaavo anaataana aya ni anna maKristau.​—Yohani 13:34, 35.

Alopwana ni athiyana maKristau, annisuwela wira otheene aya atthu oottheka; nave otheene aya soopattuxiwa sa Muluku seiyo ‘sitakhaliwe’ wala sithenke. Nto, mwaha wa wataana ni Muluku Yehova ori Tiithi oophenta, awo anrowa ‘wòpoliwa mwakhalihiwaya ipottha’ wira ekhale ‘ana a Muluku’. Tthiri eyo eparakha yuulupale wira alopwana ni athiyana yakhapeleliweke ni Muluku!​—aRoma 8:20, 21.

[Ekaaxa epaaxina 9]

Niireke Murummwa Paulo Ahaakhoottiherya Athiyana Olavula?

Murummwa Paulo aahilepa wira: ‘Athiyana ahana omàlaka’ mmulokoni. (1 aKorinto 14:34) Masu ala a Paulo anitaphulelani? Niireke owo aamuyeviha miruku saya? Nnaari. Owo ikwaha sinceene aanilavula wira athiyana yaniixuttiha miruku sooreera. (2 Timótheyo 1:5; Tito 2:3-5) Epaphelo Paulo aalepenle awe aKorinto, owo ahaalopola ohiya athiyana paahi, masi atthu otheene yaarina ehakhi ya olavula mattaava ni ohimya iprofesiya wira ‘ehilavuleke’ okathi munna mukina onilavula awe. (1 aKorinto 14:26-30, 33) Waaniheryasa, epantta ele ya elapo, athiyana akina maKristau, yaakhala ootteliwa murima vanceenexa mwaha wa itthu yiixutta aya nto khiyaalavula-tho okathi alipa a mwaha yaalavula aya. Wira aphuke waakanyerereya wiiraneya vale, Paulo ahaalipiherya athiyana wira ‘yakoheke aiyaya owani’.​—1 aKorinto 14:35.

[Elatarato epaaxina 10]

Yesu aahinvaha Maria Madalena nttitimiho vaavo aamulenle awe wira aaleele awiixutti wira owo oohihimuwa