MWAHA WOOPACERYA

Exeeni Muluku Opanke Awe Mmureerelo Anyu?

“Vekekhai, Muluku ohaphentexa atthu mpakha wavaha Mwan’awe mmosene, wira othene ale animwamini yowo, ehirimelé, masi ekhalane ekumi ehinimala”.​—Yohani 3:16.

Ela yoolepa ya Biibiliya yoosuwelexiwa ni eniromoliwa vanceene. Vannihimmwa wira eveersu ela “ennooniherya saana wataana Muluku orina awe ni apinaatamu ni ele opanke awe wira owoopole”. Ti maana aya, ilapo sikina eveersu ya “Yohani 3:16”, ennilempwa mukerekhere mwa ekaaro, mapuro aniphwanyaneya atthu, ikartaz sinimulaleya nakoso mpooma, ni mapuro makina.

Ikwaha sinci, ale anipaka eyo annikupali wira ophenta wa Muluku onimwaaphwanyiha ekumi yoohimala. Ankhi nyuwo? Ophenta wa Muluku ontaphulelani wa nyuwo? Niireke ehaavo etthu Muluku opanke awe enooniherya wira onnoophentani?

“MULUKU OHAPHENTEXA ATTHU”

Anamunceene anninvuwiha Muluku mwaha woowi owo oopattuxa erimu, elapo, apinaatamu ni itthu sotheene. Soopattuxiwa sikumi ti sootikiniha ni sipakiwe mwa enamuna enooniherya wira ole opattunxe ta miruku. Atthu anci annimuxukhuru Muluku khula nihiku mwaha woowi ohaavaha okumi. Nave-tho, annikupali wira Muluku paahi, tonaavaha itthu sotheene sinikhaliherya okumi aya ntoko: iphumu, maasi, yoolya ni itthu sikina wira avikaniheke okhalana okumi wooloka.

Ti vooloka omuxukhuru Muluku mwaha wa itthu iya, maana owo Mpattuxa ahu ni Tonikhaliherya okumi ahu. (Esalimo 104:10-28; 145:15, 16; Miteko 4:24) Nnoowerya oxukhurela ophenta wa Muluku vaavo nnuupuwelela ahu itthu onipaka awe wira nikhalane okumi. Murummwa Paulo aalempe so: ‘Muluku onnavaha atthu othene ekumi n’umumula n’itthu sothene. Hiyo nokhalana ekumi mwa yowo, ninnetta mwa yowo, ni nokhala mwa yowo’.​—Miteko 17:25, 28.

Masi, ophenta wa Muluku onnooneya mwa inamuna sinci ohiya paahi mmukhalelo wa werutthuni. Owo oonipattuxa moovirikana ni inama; nto oonivaha eparakha yoomusuwela ni onninikhaliherya moota woopaka eyo. (Matheyo 5:3) Nto, atthu owiiwelela ahaana yoolipelela ya wiirela mpantta emusi ya Muluku, ntoko ‘anaawe’.​—aRoma 8:19-21.

Yohani 3:16, onnihimya-tho wira Muluku ohaaphenta atthu vaavo aamurumme awe Mwanawe, Yesu, orwa valaponi wira oniixuttihe voohimya sa Muluku, ni okhwa mwaha wa hiyo. Masi, anamunceene khanisuwela saana xeeni vaatthuneya aya Yesu okhwa ni moota xeeni okhwa wawe oryaaya ophenta wa Muluku. Noone moota Biibiliya onitthokiherya awe nthowa naya Yesu aakhwiiye awe ni efaita aya.

‘OWO OHAVAHA MWANAWE MMOSENE’

Apinaatamu khanikhala okathi wotheene. Awo anniwereiwa, wuuluvala ni okhwa. Masi eyo khahiyo yaari yoolakela yoopacerya ya Yehova Muluku. Owo ahaavaha Adamu ni Eva yoolipelela ya okhala oparayiisu mahiku otheene. Masi awo yaahaana omwiiwelela. Akhala wira khiyaarowa omwiiwelela, awo yaamookhwa. (Maphattuwelo 2:17) Adamu khomwiiwelenle Muluku, tivonto ohiiruuhela okhwa owo ni osuulu awe. Murummwa Paulo onitthokiherya so: “Mutthu mmosá pahi t’oruhale etampi mulaponi: etamp’iyo yoruha okhwa. Siso okhwa ohaphwanya atthu othene, okhala wira atthu othene àttheka”.​—aRoma 5:12.

Masi, Muluku onniphenta exariya. (Esalimo 37:28) Nnaamwi ohimulevelenle Adamu mwaha wa ohiiwelela wawe woolakela, Muluku khiweemerenrye wira hiyo nihaaweke ni okhwa mahiku otheene niliveryaka ohiiwelela wa Adamu. Masi, orumeelaka nlamulo noowi: “ekumi eliviwe n’ikumi”, owo aahirumeela exariya awe wira aavahe-tho ekumi yoohimala apinaatamu oowiiwelela. (Okhuma 21:23) Masi vaarowa oweryaneya sai apinaatamu okhalana-tho okumi woohimala Adamu aayelenle awe? Vaanitthuneya wira mutthu mmosa ovahe ekumi awe ntoko mukuttho: ekumi yoomalela ntoko ya Adamu.

Ekeekhai wira khuuvo osuulu wa Adamu aarina okumi woomalela wira ovahe mukuttho; masi Yesu aahikhalana. (Esalimo 49:7-10) Yesu khaaranve yoottheka. Tivonto owo aari oomalela ntoko Adamu. Mwaha woovaha okumi awe, Yesu owoopola apinaatamu okhala epottha ya etampi. Vanonto, oovaha osuulu wa anamathelana oopacerya eparakha yookhalana okumi woomalela yoowo Adamu ni Eva yaarina aya. (aRoma 3:23, 24; 6:23) Niireke ehaavo etthu yooreerela opaka wira nittottele mureerelo ophenta nno wuulupale wa Muluku?

“OTHENE ALE ANIMWAMINI YOWO”

Nitthikelaka yoolepa ya Yohani 3:16, ninnoona masu ani: “Othene ale animwamini [Yesu], ehirimelé, masi ekhalane ekumi ehinimala”. Ela enitaphulela wira naaphavelaka ophwanya “ekumi yohimala” nihaana opaka etthu, eyo piiyo: omwaamini Yesu ni omwiiwelela.

Waaniheryasa, nyuwo pooti wiikoha so: ‘Xeeni vanitthuneya ahu omwiiwelela Yesu? Kiira aahimyale wira ‘otheene ale animwamini anookhalana ekumi yoohimala?’ Ekeekhai wira waamini ti vootthuneya. Masi, nuupuweleke wira mBiibiliyani, waamini onihela mpuwa itthu sinci ohiya paahi okupali. Moovarihana ni Vine’s Expository Dictionary of Old and New Testament Words, masu arumeeliwe ni Yohani mwa nttaava noopacerya nintaphulela “omuroromela Muluku, ohiya paahi omuupuwelela”. Wira neemereriwe ni Muluku, nihaana opaka itthu sikina ohiya paahi okupali wira Yesu ti Moopoli. Ole orina waamini ohaana weettelaka ele Yesu aixuttiha awe. Akhala wira khonipaka eyo, waamini wawe khorina efaita. Biibiliya onihimya wira: “Wamini ohirina miteko sorera ti wokhwa”. (Yakobo 2:26) Niire so: omwaamini Yesu onitaphulela weettela sooruma sawe.

Paulo aahitthokiherya eponto eyo oriki: ‘Ophenta wa Kristu t’onnikhanyereriha: nosuwela wira mutthu mmosá, Yesu, òhakhwela atthu othene . . . Owo ohakhwela atthu othene, wira ale ari akumi ehìkhalele mmansaya, nto emukhaleleke ole àkhwenle ni àhihimuwenle yawo’. (2 aKorinto 5:14, 15) Oxukhurela wahu ni murima wotheene mukuttho wa Yesu, ohaana oniiriha opaka marukunuxo mookumini nihiphavelaka wiisiveliha, masi omwiiwelela Yesu, yoowo onikhwenle. Tivonto, hiyo nihaana weettelaka sowiixuttiha sa Yesu. Opaka eyo onooniiriha okhalana mweettelo ni soothanla sooloka, ni itthu sotheene sinipaka ahu. Mareeliho xeeni anirowa aya ophwanya ale animukupali ni omwaamini Yesu?

“EHIRIMELÉ, MASI EKHALANE EKUMI EHINIMALA”

Epantte yookiserya ya yoolepa ya Yohani 3:16, enooniherya mareeliho anirowa aya waakhela ale anaamini mukuttho wa Yesu ni aneettela malakiheryo a Muluku. Owo oniphavela wira atthu awo “ehirimelé, masi ekhalane ekumi ehinimala”. Sihaavo igrupu piili sa atthu anttottela mureerelo ophenta wa Muluku.

Egrupu yoopacerya: Yesu ooleiherya ekumi yoohimala wiirimu. Owo aahaaleela awiixutti awe owaamini wira aarowa olokiherya opuro aya wira awo alamulele ni yena. (Yohani 14:2, 3; aFilipi 3:20, 21) Ale anirowa ohihimuxiwa wira akhalane ekumi wiirimu, “anrowa okhala anamukuttho a Muluku ni a Kristu, anokhalihiwa mamwene mpakha iyakha iye ekonto emosá”.​—Wisupulula 20:6.

Atthareli a Kristu vakhaani tanrowa waakhela eparakha eyo. Yesu aahimmye so: “Muhòvé, nyuwo nikoto namukhani, mana Atith’inyu ohasivela wovahani omwene aya”. (Luka 12: 32) Ari akavi atthu awo a “nikoto namukhani”? Wisupulula 14:1, 4 oniira so: “Numalá, miyo kahiweha-tho, khumona mwapwittipwitthi [oohihimuxiwa Yesu Kristu] emenlene vamwako Siyoni. Yahikhala vavo ni yowo atthu ikonto miloko mulokó ni miloko mixexe n’atthu ikonto xexé [144.000], yale yalempwe vayuji nsina na mwapwittipwitthi ni nsina n’Atithi awe. . . . Awo yòpoliwe ehavuliwaka mw’atthu akina othene, ntoko milipu sivahiwe Muluku ni mwapwittipwitthi”. Nalikanyiherya ni ibilyau soohikontareya sa atthu atonko okhala mulaponi, nummuru nla na 144.000 tthiri “nikoto namukhani”. Awo annihimmwa okhala mamwene. Nto anrowa waalamulelaka aani?

Yesu aahilavula sa egrupu ya nenli anirowa waakhela mareeliho a Omwene wa wiirimu. Va Yohani 10:16, Yesu aalavunle so: “Kokhalana-tho ipwittipwitthi sikina sihikhanle nikoto nenla: seiyo-tho kihana othukumanya. Iyo sinimwiwa nsu naka: siso ninrowa okhalaka nikoto nimosa ni makampusi aya mmosá”. “Ipwittipwitthi” iyo, sinimwaakhela okumi woohimala valaponi, okumi yoowo Adamu ni Eva yaarina aya wanipacerya. Ninsuwela sai wira atthu awo anirowa okhalaka valaponi?

Imaara sinci, Biibiliya onnilavula makhalelo anrowa okhala oparayiisu valaponi. Wira nwehe mmansinyu, pooti omuhula Biibiliya anyu ni osoma soolepa iya: Esalimo 37:9-11; 46:9, 10; 72:7, 8, 16; Yesaya 35:5, 6; 65:21-23; Matheyo 5:5; Yohani 5:28, 29; Wisupulula 21:4. Iveersu iyo, sinnihimya omala wa ekhotto, etala, iretta, ni okhwa. Sinnihimya-tho okathi atthu ooloka anrowa aya ohakalala mwaha wooteka inupa saya, olima imatta, ni waahuwa anaaya mwa elapo ya murettele.a Niireke mareeliho awo annoosivelani? Hiyo nihaana mathowa ooloka annikupaliha wira sooleiherya iyo sinimwiiraneya moohipisa.

MULUKU OOPAKA ITTHU SINCEENE

Akhala wira munimuupuwelela ele Muluku opanke awe mmureerelo anyu ni wa atthu otheene, munooweha wira owo oopaka tthiri itthu sinci. Hiyo nookhalana okumi, ankhili, miruku, ni itthu sikina sinikhaliherya okumi ahu. Ohiya-vo, ntoko niixuntte ahu va Yohani 3:16, nnoowerya ophwanya mareeliho manceene mwaha woowi Muluku oovaha mukuttho wowoopola orweela wa Yesu yoowo onikhwenle.

Tthiri, okumi woohimala ni wa murettele, ohikhala wa iretta, ekhotto, etala, wala okhwa, onookumiherya ohakalala wekeekhai ni mareeliho oohimala. Nto waakhela mareeliho awo wala ohaakhela, yoothanla anyu. Nikoho nootthuneya tinla: ‘Exeeni munipaka anyu wira mmusivelihe Muluku?’

[Enoota]