MURUU WA NEETHANU NEEXEXE
Owerya Orina Aya Yoolipelela ya Ohihimuwa
1. Niireke wira alipa-ookhwa yaamukhalana yoolipelela, vahaakhanle ohihimuwa?
NIIREKE wira mootoko okhweliwa ole amphenta anyu? Vahaakhanle yoolipelela ya ohihimuwa, khivaaweryaneya onweha vasyaa. Owo aarowa ovikanihaka okhala mmukhalelo yoowo Biibiliya onihimya awe oriki: “Masi alipa-òkhwa khansuwela-tho etthu. . . . Okhala wira elapo y’alipa-òkhwa [Seol] khuvovo muteko nnákhala osuwela walá otthokelela nnákhala ankhili. Ni ti weiwo ontthunanyu orowa”.—Musuweli 9:5, 10.
2. Yoolipelela xeeni yooreera eniweryaneya orweela mwa ohihimuwa?
2 Orweela mwa ohihimuwa, moomoriwa ikharari Yehova ohaavaha eparakha yuulupale atthu anceene yaawo akhwiiye wira ahihimuwe ni akhalane okumi woohimala. Ela enitaphulela wira nyuwo munoowerya okhalana yoolipelela yoomaaliha, wira nihiku nikina mu elapo esyaa ya Muluku, munrowa okhala-tho n’awo.—Marko 5:35, 41, 42; Miteko s’Arummwa 9:36-41.
3. (a) Mu iphiro xeeni ohihimuwa woonihenrya aya okhala wootthuneya mu waakhwaniherya yoolakela ya Yehova? (b) Okathi xeeni mwa vameekh’aya yoolipelela ya ohihimuwa vanikhala aya etthu yoolipiha wa hiyo?
3 Mwaha wa ohihimuwa, hiyo khanintthuneya woova okhwa mootepana. Yehova pooti weemererya wira arumeyi awe yeehereriwe mootakhala ni Satana mmikhalelo sotheene, wi Satana eererye wooniherya wootha wawe wootakhala woowi “atthu annivaha sothene sirinaya wira esuke ekumi aya”. (Yobi 2:4) Yesu aari oororomeleya wa Muluku mpakha okhwa, tivonto Muluku aahimuhihimuxa wira orowee wirimu. Tthiri, Yesu aari oolikana wira oroihe veehiceni ya Tiithi awe wirimu, ele ewenrya awe othuma ni mukuttho awe wa omutthu woohittheka, yoowo oniwerya onoopola. Orweela mwa ohihimuwa, ale a “nikoto namukhani”, ntoko anamalamulela vamosaa ni Kristu, aakhalana yoolipelela ya okhala n’uwo Momweneni wa wirimu. (Luka 12:32) Atthu akina annilipelela ohihimuwa wira akhalane okumi woohimala mparayiisu valaponi. (Esalimo 37:11, 29) Yoolipelela ya ohihimuwa ennaavaha maKristau otheene ‘owerya wulupalexa’ vaavo vanikumana aya soweeha siniwiiriha omoona naakhwa vakhiviru.—2 aKorinto 4:7.
Ohihimuwa ti Wootthuneya wa Nroromelo na eKristau
4. (a) Mmukhalelo xeeni ohihimuwa ory’aya “mwixuttiho wopajerya”? (b) Atthu anceene a elapo anoonela sai yowiixuttiha ya ohihimuwa?
4 Moovarihana ni aHéberi 6:1, 2, ohihimuwa ti “mwixuttiho wopajerya”. Ohihimuwa ti mathipelo a nroromelo. Nto vahaakhanle yoolipelela ya ohihimuwa khinaawerya-tho okhala maKristau oolipa. (1 aKorinto 15:16-19) Masi, yowiixuttiha ela ya ohihimuwa eri mBiibiliya etthu ehinkupaliwa ni atthu anceene arina muupuwelelo wa elapo. Mwaha woohisiveliwaka ni itthu sa Muluku, annitepa waatta atthu anoona wira okumi okhanle ti yoola paahi. Tivonto, yoophavela ya atthu awo opuha paahi. Nto aakhala ale aneettela itiini sa ephattu, eyo piiyo, ale ari muhina aahiiso ari otaa wa etiini ya eKristau Yoowootha, yaawo anuupuwela wira yookhala etthu ekina ehinikhwa eri muhina mwa mutthu. Masi yookupali eyo khenivarihana ni yowiixuttiha ya Biibiliya ya ohihimuwa, mwaha woowi ohihimuwa khiwaarowa okhala wootthuneya vaakhanleke wira apinaatamu aakhalana etthu ekina enivikaniha okhala nuumala okhwa erutthu. Ophavela ovaraanyiha sowiixuttiha iya piili, onnikumiherya waakanyereya mmapuro mwa ovaha nlipelelo. Ninrowa waakhaliherya sai ale arina murima wooloka yaawo aniphavela osuwela ekeekhai?
5. (a) Mutthu ohinatthi wiiwexexa sa ohihimuwa wa alipa-ookhwa, ohaana osuwela exeeni? (b) Soolepa xeeni munrowa anyu orumeela wira mutthokiherye mukhalelo wa alipa-ookhwa? (c) Nipake exeeni akhala wira mutthu onimurumeela Biibiliya mukina yoowo ohintthokiherya oratteene ekeekhai?
5 Ahinatthi osuwela moota marehereryo a ohihimuwa ary’aya ootthuneya vanceene, atthu awo ahaana osuwela oratteene mukhalelo wa alipa-ookhwa. Ikwaha sinceene, vanniphiyerya ovarihela muteko soolepa vakhaani wira nimutthokiherye mutthu yoole oniphavela osuwela ekeekhai eri mBiibiliyani. (Maphattuwelo 2:7; Esalimo 146:3, 4; Ezekiyeli 18:20) Masi, aBiibiliya akina a olelo va, ni iliivuru sikina sinilavula sa Biibiliya, khasinitthokiherya oratteene ekeekhai voohimya sa mukhalelo wa alipa-ookhwa. Tivonto, pooti okhala wootthuneya othokorerya moolumo yaarumeeliwe olempwaka Biibiliya.
6. Munrowa omukhaliherya sai mutthu wira iiwexexe yootaphulela ya erooho?
6 Mwa vameekh’aya, Biibiliya Tradução do Novo Mundo tootthuneya mmwaha ola, okhala wira onnitaphulela moohivirikaniha nuulumo na eHeeberi noowi né·fesh nenno nri psy·khé mu nuulumo na eKriki nitaphuleliwe okhala “erooho”. Mu apendice a Tradução do Novo Mundo, sookhala soolepa sinceene sinooniherya opuro orumeeliwa aya moolumo awo. ABiibiliya akina anceene khantaphulela oratteene moolumo oowi né·fesh ni psy·khé moovarihana ni ilavulelo saarumeeliwa olempwaka Biibiliya. Olikanyiha ele enihimya aBiibiliya awo ni Tradução do Novo Mundo onrowa omukhaliherya ole onimusoma Biibiliya ni murima wooloka, wiiwexexa wira moolumo a elavulelo yoopacerya oowi “erooho” anitaphulela atthu vamosaa ni inamaa. Masi moolumo ala khatonko otaphulela muupuwelelo oowi erooho etthu ehinooneya, etthu ehinivareya yeeyo eniwerya okhuma mwerutthuni nuumala okhwa ni khiyavikaniha okhala mapuro makina.
7. Mmurumeelaka Biibiliya, mwaarowa otthokiherya sai mukhalelo wa ale ari oSeol? Ari oHades? Ni ale ari oGehena?
7 Nave-tho Tradução do Novo Mundo onnirumeela moohivirikaniha nuulumo noowi “Seol” nipuro nenno elavulelo ya eHeeberi enihimya aya okhala sheʼóhl ni onnirumeela nuulumo noowi “Hades” nipuro nenno elavulelo ya eKriki enihimya aya okhala haí·des ni onnirumeela nuulumo noowi “Gehena” nipuro nenno elavulelo ya eKriki enihimya aya okhala gé·en·na. Tivonto “Seol” nsuu nimosaru noowi “Hades”. (Esalimo 16:10; Miteko s’Arummwa 2:27) Biibiliya onniiwanyeiha saana wira moolumo ala manli, Seol ni Hades, anihimya etthu emosaa, mapuro aalipa-ookhwa ni anivaraanyihiwa ni naakhwa ohiya okumi. (Esalimo 89:49; Wisupulula 20:13) Nave-tho, Biibiliya onnooniherya wira yoolipelela ya atthu ari mmahiye, aahiiso, mapuro aalipa-ookhwa, ti ohihimuwa. (Yobi 14:13; Miteko s’Arummwa 2:31) Moovirikana ni eyo, ale anrowa oGehenaa kharina yoolipelela ya okumi, nto erooho khenahimmwe wira ennikhalana okumi oGehena.—Matheyo 10:28.
8. Moota xeeni wiiwexexa saana mwaha wa ohihimuwa oniwerya aya ohapuwela muupuwelo ni sowiira sa mutthu?
8 Vaavo miyaha iya vanitthokihiwa aya saana, mutthu onoowerya okhaliheriwa wira iiwexexe ele ohihimuwa enrowa aya otaphulela wa owo. Owo onoowerya okhala ooxukhurela ophenta wa Yehova mwaha woopaka malokiheryo awo ooreerexa. Osuwela wira annilipelela okumana ni ale akhwiiye mu elapo esyaa ya Muluku, onoowerya ovukula owereya onoona aya mwaha wa okhweliwa ole onimphenta aya. Wiiwexexa miyaha iya ti wootthuneya wira nisuwele yootaphulela ya okhwa wa Kristu. MaKristau a eseekulu yoopacerya, yaahisuwelexa wira ohihimuwa wa Yesu Kristu ti wootthuneya wa nroromelo na eKristau, ni wira woohula ephiro wi atthu akina ahihimuwe. Mwa nthiti, awo yaahilaleerya ohihimuwa wa Yesu ni yoolipelela enivaha aya ohihimuwa nno. Nave-tho, olelo va otheene yaale aniiwexexa ni oxukhurela malokiheryo a ohihimuwa, anniphavela ni murima wotheene waaleela atthu akina ekeekhai ela yootthuneyexa.—Miteko s’Arummwa 5:30-32; 10:42, 43.
Ovarihela Muteko Muhulelo wa Hades
9. Wanipacerya Yesu onivarihela sai muteko muhulelo wa okhwa ni wa Hades?
9 Otheene yaale anrowa okhalaka ni Kristu Momweneni mwawe wirimu ahaana okhwa. Masi awo annisuwela saana olipiheriwa waya ni masuu awe oowi: “Kahikhwa, nto vano kinikhala vohimala-tho. Kihana owerya [“kihaana muhulelo”, NM] w’oruma okhwa n’umwene aya”. (Wisupulula 1:18) Yesu aaphavela ohimya exeeni? Owo aattittimiherya ele yaamwiiranenle. Nave-tho Yesu aahikhwa. Masi Muluku khaamuliyanle mu Hades. Mu nihiku na neeraru Yehova mwaneene aahinvenxa ntoko mutthu oomunepani onvahaka okumi ohinikhwa. (Miteko s’Arummwa 2:32, 33; 10:40) Nave-tho, Muluku aahinvaha Yesu muhulelo wa okhwa ni wa Hades wira aataphule atthu akina ari mapuro aalipa-ookhwa ni sookhumelela sa yoottheka ya Adamu. Mwaha wa okhalana muhulelo, Yesu onniwerya waahihimuxa atthareli awe oororomeleya mwa alipa-ookhwa. Wanipacerya, owo onaahihimuxa ale a muloko awe yoottihiwe ni munepa wootteela, aavahaka eparakha yuulupale ya okumi ohinikhwa wirimu, ntoko siisaale owo saavahiwe awe ni Tiithi awe.—aRoma 6:5; aFilipi 3:20, 21.
10. Ohihimuwa wa maKristau oororomeleya oowoottihiwa oniiraneya okathi xeeni?
10 Ohihimuwa wa maKristau oororomeleya oowoottihiwa yaawo anirowa wirimu oniiraneya okathi xeeni? Biibiliya onooniherya wira ohihimuwa iwo woopacerya. Murummwa Paulo aatthokihenrye wira awo yaarowa ohihimuxiwa ‘nihiku ninrwawe Kristu’, nihiku nenno nipacenrye mwaakha wa 1914. (1 aKorinto 15:23) Vaavo ale oororomeleya oowoottihiwa vanikhwa aya olelo va, nihiku na Kristu, awo khanivikaniha okhala ookhwa mpakha orwa wa Pwiya aya. Amalakaru okhwa, awo annihihimuxiwa momunepani, athatuwaka mowaakuveya “ntoko otthukula maitho ni waphila”. Moota onihakalala aya okhala wira miteko sooloka sivanrya aya “sinimwahola”!—1 aKorinto 15:51, 52; Wisupulula 14:13.
11. Ohihimuwa xeeni onrowa okhala wa atthu otheene, ni onrowa opacerya silini?
11 Masi khahiyo wira ohihimuwa okhanle ti wa atthu yaale paahi anrowa waakhela Omwene ni okumi wa wirimu. Mwaha wa Wisupulula 20:6 ohimyaka okhala ‘ohihimuwa wopajerya’, eyo enooniherya wira wookhala ohihimuwa onrowa ottharelana. Ale anrowa ophwanya ohihimuwa nno wookiserya anrowa ohakalala okhalana okumi woohimala mparayiisu mulaponi. Ohihimuwa nno wookiserya onrowa wiiraneya silini? Eliivuru ya Wisupulula enooniherya wira onrowa wiiraneya nuumala opwetexiwa wa “elapo n’erimu”, eyo piiyo, mukhalelo ola wootakhala wa itthu ni makhulupale aya anilamulela. Wanikisa wa mukhalelo ola wa khalai ohaattamela vanceene. Nuumala vo, mu okathi othoonyiwe ni Muluku, onrowa opacerya ohihimuwa wa atthu anrowa okhalaka valaponi.—Wisupulula 20:11, 12.
12. Tanii eriyari ya atthu oororomeleya anrowa ohihimuxiwa wira akhaleke valaponi, ni nthowa xeeni ery’aya etthu yoohakalaliha?
12 Tanii anrowa ohihimuwa wira akhaleke valaponi? Akina a yaawo anrowa okhala arumeyi oororomeleya a Yehova a okathi wa khalai, alopwana ni athiyana yaawo mwaha wa okhalana nroromelo nuulupale na ohihimuwa ‘yahikhotta wopoliwa vathí-va’. Eyo piiyo, awo khiyaaphavenle ohonona ororomeleya waya wa Muluku aphavelaka osyaka ohaaxiwa ni wiiviwa wootakhala. Moota vanrowa aya okhala voohakalaliha waasuwela ni owiiwa mmensihu atthokiheryaka kamosa-kamosa soohimmwa siri mBiibiliya silavuliwe mookwasa! Akina-tho anrowa ohihimuxiwa wira akhaleke valaponi ti Abeli namoona oopacerya ni oororomeleya a Yehova; Enookhi ni Nowee, anamalaleerya oohoova a mihupi sa Muluku yaawo yaaloponle ohinatthi Mutaaseke; Abrahamu ni Sara, yaawo yaakhenle malaikha ntoko aletto; Moise, yoowo aavahiwe Nlamulo va Mwaako Sinayi; Maprofeta oolipa murima ntoko Yeremiya, yoowo aawenhe opwetexiwa wa Yerusalemu mwaakha wa 607 A.E.C.; ni Yohani Mbatiza, yoowo aamwiiwale Muluku mwaneene omuhimyaka Yesu okhala Mwanawe. Nave-tho, vanrowa okhala ohihimuwa wa alopwana ni athiyana anceene oororomeleya, yaawo akhwiiye mahiku ala ookiserya a mukhalelo ola wootakhala wa itthu.—aHéberi 11:4-38; Matheyo 11:11.
13, 14. (a) Etthu xeeni enrowa wiiraneya ni Hades vamosaa ni alipa-ookhwa ari memmo? (b) Tanii anrowa ohihimuwa-tho, ni nthowa xeeni?
13 Moovira wa okathi, akina eriyari ya arumeyi oororomeleya a Muluku anrowa ohihimuxiwa, nto mapuro aalipa-ookhwa khanrowa okhala etthu. Moota mapuro awo sihinrowa aya okhala etthu, vanniwerya wooneya mu enamuna yeeyo Yesu sinrowa awe orumeela muhulelo wa Hades wira aaphwanyihe mureerelo apinaatamu. Mwaha ola onnitthokihiwa mu sowoonihiwa sa Yohani. Owo aahimoona Hades ‘oriheliwaka mphareya mwa moro’. (Wisupulula 20:14) Ela enitaphulela exeeni? Enitaphulela opwetexiwa moomalela wa Hades, mapuro aalipa-ookhwa. Hades khonrowa okhala-tho, mwaha woowi anrowa ovenxiwa ale akhwiiye ari memmo. Moowuncererya ohihimuxiwa wa anamakokhorela otheene oororomeleya a Yehova, moomoriwa ikharari Yesu onrowa-tho waahihimuxa ale oohikhala a xariya. Nuulumo na Muluku nninlipiherya wira: “Atthu othene, ale òrera murima n’ale òtakhala murima, anohihimuwa mokhwani”.—Miteko s’Arummwa 24:15.
14 Khuuvo mmosaa aatthu awo oohikhala a xariya onrowa ohihimuxiwa moophavela ophukeliwa-tho okhwa paahi. Mwaha woowi mukhalelo wa xariya onrowa okhala mulaponi motheene Momweneni mwa Muluku, awo anrowa okhaliheriwa wira alokiherye ikumi saya moovarihana ni iphiro sa Yehova. Yowoonihiwa eyo enooniherya wira “elívuru y’ekumi” enrowa ohuliwa. Mmukhalelo owo, awo anrowa okhalana eparakha ya olempwa masina aya muliivuruni mmo. Otheene aya anrowa ‘olamuliwa sitthariheliwaka miteko sinrowa aya ovara’ nuumala ohihimuwa. (Wisupulula 20:12, 13) Tivonto, moovarihana ni ele enrowa aya opaka, ohihimuwa waya onrowa okhala ‘ohihimuwa, wira ephwanyé ekumi’ ohiya ‘ohihimuwa wira ephwanyé ehukhumu’.—Yohani 5:28, 29.
15. (a) Tanii ahinrowa ohihimuxiwa? (b) Onnivara sai osuwela ekeekhai voohimya sa ohihimuwa?
15 Masi, khahiyo wira atthu otheene akhwiiye anrowa ohihimuxiwa. Atthu akina ahiira soottheka sihiniweryaneya oleveleliwa. Atthu awo khakhanle mu Hades, masi ari oGehena, weiwo onipwetexiwa aya moomalela. Anniheliwa-tho muhina ale anrowa opwetexiwa ‘mmaxakha malupale’, yaawo vano yaattamenle. (Matheyo 12:31, 32; 23:33; 24:21, 22; 25:41, 46; 2 aTesalonika 1:6-9) Tthiri, vaavo Yehova vanooniherya awe omoriwa ikharari vaalupale aahihimuxaka alipa-ookhwa mu Hades, yoolipelela ya ohihimuwa khennivaha nthowa noowi nihicaleleke moota oneettiha ahu okumi ahu. Atthu yaale moolakelela anivirikanya olamulelo muulupale wa Yehova, khanrowa ohihimuwa. Osuwela nno ohaana oniirihaka oxukhurela vaalupale oreera murima wa Muluku mwaha wa itthu sinipaka awe moovarihana ni yootthuna awe.
Oolipihiwa Mwaha wa Yoolipelela ya Ohihimuwa
16. Moota xeeni yoolipelela ya ohihimuwa vaniwerya aya okhala yoolipiha vaalupale?
16 Atthu yaale anikupali yoolipelela ya ohihimuwa anoowerya olipihiwa ni yoolipelela eyo. Nto, vaavo vanaattamela ahu wanikisa wa okumi ahu, hiyo ninnisuwela wira khinniwerya osyaka okhwa moomalela, pooti nlooliwaka saana wira nivikanihe okhala akumi. (Musuweli 8:8) Akhala wira nnoomurumeela Yehova vamosaa ni mulokiheryo awe moororomeleya, hiyo nnoowerya olipelela itthu sa muhoolo moomaaleleya. Hiyo ninnisuwela wira orweela mwa ohihimuwa, nnoowerya-tho okhala akumi vasyaa, okathi oniphavela Muluku. Nto moota okumi onrowa aya okhala woohakalaliha! Ntoko siisaale murummwa Paulo saahimmye awe okhala “ekumi yekekhai”.—1 Timótheyo 6:19; aHéberi 6:10-12.
17. Exeeni eniwerya onikhaliherya ovikaniha okhala oororomeleya wa Yehova?
17 Osuwela wira vanookhala ohihimuwa wa alipa-ookhwa ni omusuwela Ole opanke marehereryo awo onniiriha nroromelo nahu okhala noolipa. Ela enninlipiha wira nikhalee oororomeleya wa Muluku hataa atthu ootakhala annilupattha yeereryaka oniiva. Okhuma khalai Satana onnirumeela woova wiiviwa wira owiirihe atthu okhala ipottha sawe. Masi Yesu khaarina woova moota owo. Owo aahikhala oororomeleya wa Yehova mpakha okhwa. Orweela mwa mukuttho awe wowoopola, Yesu oohula ephiro wira aataphule atthu akina mu woova nno.—aHéberi 2:14, 15.
18. Exeeni enaakhaliherya arumeyi a Yehova osuweliwa ntoko atthu oororomeleya?
18 Ntoko yookhumelela ya waamini waya mukuttho wa Kristu vamosaa ni ohihimuwa, arumeyi a Yehova aasuweliwa vanceene okhala oororomeleya. Okathi oneehereriwa aya, ‘awo annileva ekumi aya’ mwaha wa omphenta Yehova. (Wisupulula 12:11) Mwa miruku, awo khanihiya malamulo eeKristau aphavelaka woopola okumi aya wa olelo va. (Luka 9:24, 25) Annisuwela wira pooti arowaka okhwa vano mwaha wa okhaliherya olamulelo muulupale wa Yehova moororomeleya, Muluku onrowa waatthuvela orweela mwa ohihimuwa. Niireke wira nyuwo mookhalana waamini moota owo? Nyuwo munrowa okhalana waamini iwo, akhala wira munnimphenta Yehova ni murima wotheene ni munnixukhurela ele enitaphulela aya tthiri ohihimuwa.
[Enoota]
a Biibiliya a Emakhuwa orumenle nuulumo noowi “omoroni”.
Makoho Oowuuluula
• Ohinatthi oxukhurela yoolipelela ya ohihimuwa, etthu xeeni mutthu enitthuneya awe wiiwexexa oratteene voohimya sa mukhalelo wa alipa-ookhwa?
• Tanii anrowa ohihimuwa mwa alipa-ookhwa, nto ela yahaana onivaraka sai?
• Yoolipelela ya ohihimuwa ennilipiha sai?
[Elatarato eri epaaxina 84, 85]
Yehova onilakela wira vanrowa okhala ohihimuwa wa anaxariya ni ale oohikhala a xariya