Niireke Muhiilokiherya Wira Mpatisiwe?

Okathi mwaamusoma anyu Biibiliya, nyuwo muhiixutta itthu sinceene voohimya sa Yehova. Woonasa wene, moopaka marukunuxo manceene mookumini mwanyu wira mweetteleke itthu mwiixuntte anyu. Masi pooti wira sookhala itthu sikina sinookhoottiheryani wiivahererya wa Yehova ni opatisiwa. Yoosoma ela, ninrowa oweha itthu sikhanle oowookhoottiheryani opatisiwa ni etthu mukhanle anyu oopaka wira muxintte itthu iyo.

1. Niireke muhaana osuwela itthu sootheene sa mBiibiliyani wira mpatisiwe?

Wira mpatisiwe nyuwo muhaana okhalana “osuwela weekeekhai”. (1 Timootheyo 2:4) Eyo khentaphulela wira muhaana osuwela waakhuliwa wa makoho otheene atthu anipaka aya voohimya sa Biibiliya. Hata atthu yaale apatisiwe khalai, khanihiya wiixutta itthu sikina voohimya sa Yehova. (aKolosi 1:9, 10) Hata vari siiso, nyuwo muhaana osuwela soowiixuttiha soopacerya sa Nuulumo na Muluku. Axitokweene animookhaliheryani woona akhala wira vannireerela nyuwo opatisiwa.

2. Itthu xeeni munireerela anyu opaka muhinatthi opatisiwa?

Muhinatthi opatisiwa, muhaana ‘orukunuxa murima anyu ni oturuka mweettelo anyu’. (Musome Miteko 3:19.) Eyo enitaphulela wira muhaana ottharuwa ni murima wootheene itthu soohiloka mwaapaka anyu khalai ni onvekela Yehova wira ooleveleleni. Nave muhaana weettela ele Yehova oniphavela awe ni ohipaka itthu soohiloka Yehova oninyokha awe. Nave-tho nyuwo muhaana orowela mithukumano sootheene ni olaleerya ni anna ni arokora a mmulokoni.

3. Xeeni vahinreerela aya woova opatisiwa?

Atthu akina khanipatisiwa mwaha woowi anoova ohipaka ele amuleihenrye aya Yehova. Ekeekhai wira okathi mukina nyuwo pooti ovonya wala opaka itthu soohiloka. Tthiri alopwana ni athiyana oororomeleya anilavuliwa mBiibiliyani okathi mukina yaanivonya. Masi muhiliyale wira Yehova, khonlipelela wira okathi wootheene ale aniivahererya wa yena anrowa opakaka itthu sooloka. (Musome Esalimo 103:13, 14.) Owo onnihakalala vanceene vaavo nniimananiha ahu omurumeela! Nto, mukupaliki ni murima wootheene wira onimookhaliheryani. Tthiri Yehova ooleiherya wira khiivo etthu ‘enwerya onivalaanya ni ophenta wa Muluku’.—Mmusome aRoma 8:38, 39.

MWIIXUTTE ITTHU SIKINA

4. Mmusuwele oratteene Yehova

Mpakha vaavi munireerela anyu omusuwela Yehova muhinatthi opatisiwa? Nyuwo muhaana omusuwela Yehova mpakha owiirihani omphenta ni ophavela omusiveliha. Nwehe EVIIDIYU wira moone itthu anaxikola a Biibiliya a olumwenku wootheene apanke aya wira amusuwele oratteene Yehova. Nuumala-vo mwaakhule nikoho.

EVIIDIYU: Marukunuxo Atthu Akina Apanke Aya Wira Apatisiwe (3:56)

• Eviidiyu niwenhe ahu, etthu xeeni yaakhalihenrye atthu akina wiilokiherya wira apatisiwe?

Mmusome aRoma 12:2, nuumala-vo mwaakhule makoho anittharelana:

• Niireke nyuwo munnaanyiherya itthu Biibiliya oniixuttiha awe? Niireke munnaanyiherya akhala wira Anamoona a Yehova anniixuttiha ekeekhai?

• Akhala wira yookhala etthu munaanyiherya anyu muhaana opaka exeeni?

5. Muxintte mixankiho wira mpatisiwe

Okathi naalakenle ahu wiivahererya wa Yehova ni opatisiwa, otheene ahu naahikhalana mixankiho. Moone ntakiheryo nimosa, nwehe EVIIDIYU, nuumala-vo mwaakhule makoho.

EVIIDIYU: Omphenta Yehova Wookikhaliherya Oxintta Mixankiho (5:22)

• Eviidiyu niwenhe ahu, mixankiho xeeni Narangerel aaxinttale awe wira omurumeeleke Yehova?

• Omphenta Yehova waamukhalihenrye sai Narangerel oxintta mixankiho iyo?

Musome Miruku 29:25 ni 2 Timootheyo 1:7, nuumala-vo mwaakhule nikoho ninttharelana:

• Etthu xeeni ennikhaliherya oxintta mixankiho?

6. Mukupaliki wira Yehova onimookhaliheryani

Yehova onimookhaliheryani opaka ele oniphavela awe. Nwehe EVIIDIYU, nuumala-vo mwaakhule makoho.

EVIIDIYU: Yehova Onimookhaliheryani (2:50)

• Eviidiyu niwenhe ahu, etthu xeeni yaamukhoottiherya naxikola a Biibiliya opatisiwa?

• Etthu xeeni yaamukhalihenrye olipiha omuroromela wawe Yehova?

Mmusome Yesaya 41:10, 13, nuumala-vo mwaakhule nikoho ninttharelana:

• Akhala wira munimwiivahererya wa Yehova, etthu xeeni enookupalihani wira munoowerya opaka ele mmuleihenrye anyu Yehova?

7. Muncererye oxukhurela wanyu ophentiwa ni Yehova

Wuupuwelela moota Yehova onoophentaweni onimuncererya omuxukhurela wanyu ni ophavela wanyu omurumeela mahiku otheene. Musome Esalimo 40:6, nuumala-vo mwaakhule nikoho ninttharelana:

• Mareeliho xeeni a Yehova antepa woosivelani?

Profeta Yeremiya animphenta vanceene Yehova, Biibiliya ni anivaha efaita eparakha aarina awe ya omurumeela Yehova. Owo aahimmye so: “Masu anyu àkitteliha murima. Apwiya, Muluku òwerya sothene! Miyo k’àwinyu: tivó masu anyu àsariha murim’aka otteliwa n’upuha”. (Yeremiya 15:16) Vano mwaakhule makoho anittharelana:

• Xeeni okhala Namoona a Yehova eri aya eparakha yuulupale?

• Niireke nyuwo munniphavela opatisiwa ni okhala Namoona a Yehova?

• Niireke yookhala etthu enookhoottiheryani opatisiwa?

• Mwa moonelo anyu, etthu xeeni munireerela anyu opaka wira mpatisiwe?

IPONTO SUULUPALE

Mukhaliheriwaka ni Yehova nyuwo munoowerya oxintta mixankiho wira mpatisiwe.

Wuuluula

• Niireke muhaana osuwela itthu sootheene sa mBiibiliyani wira mpatisiwe?

• Woonasa wene, marukunuxo xeeni munireerela anyu opaka muhinatthi opatisiwa?

• Xeeni vahinreerela aya weemererya woova wookhoottiheryakani opatisiwa?

NWEHE ITTHU SIKINA

Nwehe etthu enrowa wookhaliheryani wiivahererya ni opatisiwa.

“Niireke Muhiilokiherya Wira Mpatisiwe?” (Owehaweha, Março 2020)

Nwehe itthu sikhanle oowookhoottiheryani opatisiwa.

“Exeeni Enkikhoottiherya Opatisiwa?” (Owehaweha, Março 2019)

Nwehe mixankiho suulupale mulopwana mmosa aaxinttale awe wira opatisiwe.

‘Exeeni Enookhoootiheryani Opatisiwa?’ (1:10)

Wanipacerya mulopwana mmosa oniihaniwa Ataa aanaanyiherya akhala wira pooti opatisiwa aahiiso nnaari. Nwehe etthu yaamukupalinhe woona wira ahaana opatisiwa.

Kiireke Miyo Kinnireerela Opatisiwa? (7:21)