YOOSOMA 22
Munrowa Owerya Sai Waalaleerya Atthu Akina Ihapari Sooreera?
Mpakha-va, nyuwo muhiixutta ikeekhai sinceene sa mBiibiliyani. Woonasa wene, nyuwo munnuupuwela so: ‘Atthu akina yaahaana osuwela itthu iya kiixuntte aka!’ Ekeekhai wira atthu otheene ahaana osuwela ikeekhai mwiixuntte anyu. Masi hata vari siiso, woonasa wene nyuwo munniixanka muupuwelaka enamuna mukhanle anyu oowaaleela itthu iyo mwiixuntte anyu. Yoosoma ela, ninrowa oweha moota mukhanle anyu ooxintta woovelela wala oxanka iwo ni ohakalala vaavo munaaleela anyu atthu akina ihapari sooreera siri mBiibiliyani.
1. Munrowa waaleela sai amusi ni apatthani anyu itthu mwiixuntte anyu?
Awiixutti a Yesu yaahimmye so: “Hiyo, khaninwerya ohiya olavula itthu noonale ahu ni niiwale ahu”. (Miteko 4:20) Awo yaanivaha efaita yinceene ikeekhai sa mBiibiliyani yiixuttihiwe aya ni Yesu. Nto yaaphavela waaleela atthu otheene itthu yiixuntte aya. Niireke nyuwo murina moonelo mmosaru ntoko wa awiixutti a Yesu? Akhala wira ti siiso, mwaavyeke okathi wooreerela munrowa anyu waaleela amusi ni apatthani anyu itthu mwiixuntte anyu. Nto okathi munaaleela anyu itthu mwiixuntte anyu mwaattittimiheke vanceene.—Mmusome aKolosi 4:6.
Moota mukhanle anyu oopaceriha ovaanela
Vaavo munimuleela anyu mmusi anyu myaha sa mBiibiliyani, nyuwo pooti ohimya so: “Esumana ela kihiixutta etthu ya efaita yinceene”.
Mmooniheryeke mutthu oniwereiwa wala oxankale yoolepa ya mBiibiliyani yoolipiha.
Akhala wira ale munivarana anyu muteko annookohani moota nvirinhe anyu wanikisa wa esumana, nyuwo pooti waaleela itthu mwiixuntte anyu okathi wa yoosoma anyu ya Biibiliya wala mwiixuntte anyu okathi wa mithukumano.
Nwooniheryeke apatthani anyu esaiti jw.org.
Mwaalattuleke atthu akina okathi munimusoma anyu Biibiliya ni nwooniheryeke moota woovekela yoosoma ya Biibiliya esaiti jw.org.
2. Xeeni vari aya vooloka olaleerya ni muloko?
Awiixutti a Yesu yaahipaka etthu ekina ohiya paahi waaleela ihapari sooreera atthu yaasuwela aya. Yesu “aaruma anli-anli orowa ipooma ni mapuro otheene aarowa awe ophiya” wira yaalaleerye atthu a ipooma iyo. (Luka 10:1) Yoolepa ela, ennooniherya wira awiixutti ale yaalaleerya mwa enamuna yootthokiheya. Nto eyo yaahaavaha eparakha atthu anceene wiiwa ihapari sooreera. Ohiya-vo, olaleerya hoothe waanaahakalaliha vanceene awiixutti ale a Yesu. (Luka 10:17) Niireke nyuwo mwanwerya olaleerya ni muloko?
MWIIXUTTE ITTHU SIKINA
Nwehe moota mukhanle anyu ooxintta woovelela wanyu olaleerya ni moota olaleya ihapari sooreera onrowa aya woophwanyihani ohakalala.
3. Yehova onimookhaliheryani
Atthu akina anniphavela olaleerya, masi awo annixanka vaavo anuupuwela aya moota atthu akina anrowa aya woonela wala owaakhela.
Niireke nyuwo munnoova waaleela atthu itthu mwiixuntte anyu? Mwaha wa xeeni?
Nwehe EVIIDIYU, nuumala-vo mwaakhule nikoho.
Amiravo ala Anamoona a Yehova yaaxinttale sai woova?
Mmusome Yesaya 41:10, nuumala-vo mwaakhule nikoho ninttharelana:
Akhala wira munnoovelela olaleerya, ovekela onrowa wookhaliheryani sai?
Nyuwo mwaanisuwela?
Atthu anceene olelo-va ari Anamoona a Yehova yuupuwela wira khiyaarowa owerya olaleya ihapari sooreera. Mwa ntakiheryo, munna Sergey a oRússia uupuwela wira khaarina efaita ni waaninvila ovaanela ani atthu akina. Masi nuumala-vo aahipacerya omusoma Biibiliya. Sergey onihimya so: “Nnaamwi koova, kaahipacerya waaleela atthu akina ele kiixutta aka. Moohakalaliha vaavo kaatepa aka waaleela atthu akina itthu kiixutta aka mBiibiliyani, kaanitepa olipa murima. Nave waahikikhaliherya olipiha sookupali saka ni waamini waka”.
4. Mwaattittimiheke
Vaavo munaaleela anyu atthu akina ihapari sooreera muhuupuweleke paahi etthu munrowa anyu ohimya, masi-tho muupuweleke moota munrowa anyu ohimya. Mmusome 2 Timootheyo 2:24 ni 1 Pedru 3:15, nuumala-vo mwaakhule makoho anittharelana:
Vaavo munivaanela anyu ni atthu akina voohimya sa Biibiliya, munrowa ovarihela sai muteko ele iversiikulu iya sinihimya aya?
Amusi anyu ni apatthani anyu akina pooti ohitthuna ele munihimya anyu. Etthu xeeni munireerela anyu opaka? Etthu xeeni muhinreerela anyu opaka?
Tiivi eri yooloka: Opaka makoho ooreerela murima wala waakhanyererya atthu weemererya muupuwelo anyu? Mwaha wa xeeni?
5. Olaleya ihapari sooreera onniniphwanyiha ohakalala
Yehova aahinvaha Yesu muteko woolaleya ihapari sooreera. Yesu oonela sai ovara muteko owo? Mmusome Yohani 4:34, nuumala-vo mwaakhule makoho anittharelana:
Ohiya paahi oniphwanyiha okumi wooloka, olya onninihakalaliha. Xeeni Yesu aalikanyinhe awe opaka ele Muluku oniphavela ntoko olaleya ihapari sooreera ni yoolya?
Etthu xeeni enookupalihani wira olaleya ihapari sooreera onniphwanyiha ohakalala?
Itthu mukhanle anyu oopaka
Okathi wa mithukumano sa eriyari ya esumana nvaheke ephoole malakiheryo ninvahiwa ahu a moota woolaleerya.
Mwiilepihe wira mwiireleke mpantta, mipantta sa anaxikola okathi wa mithukumano sa eriyari ya esumana. Mipantta sa anaxikola pooti wookhaliheryani oxintta woova wanyu wira mwaaleeleke atthu akina ele muniixutta anyu.
Muusariki mpantta oni: “Atthu Akina Anihimya Wira” wala “Atthu Akina Pooti Wookohani Wira”, wa eliivuru ela ya kursu a Biibiliya wira mwiixutte waakhula makoho a atthu wala vaavo atthu akina anoovaanyihaayani.
ATTHU AKINA POOTI WOOKOHANI WIRA: “Ihapari xeeni murina anyu?”
Mwarowa orumeela sai okathi owo wira mmuleele mutthu owo etthu mwiixuntte anyu okathi wa yoosoma anyu ya Biibiliya?
IPONTO SUULUPALE
Waaleela atthu akina ihapari sooreera onniniphwanyiha ohakalala, nave owo muteko wookhweya.
Wuuluula
Xeeni vari aya vooloka waaleela atthu akina ihapari sooreera?
Nyuwo munrowa waalaleerya sai atthu akina mwa nttittimiho?
Munrowa oxintta sai woovelela olaleerya?
NWEHE ITTHU SIKINA
Nwehe inamuna 4 sookhweya mukhanle anyu olaleya ihapari sooreera murumeelaka ikartau sa oxukurya sa jw.org.
Nwehe itthu 4 sinrowa wookhaliheryani olaleya ihapari sooreera.
“Niireke Muhiilokiherya Wira Mukhale Mutothi Aatthu?” (Owehaweha, Setembro 2020)
Nwehe moota matakiheryo a mBiibiliyani akhanle aya oowookhaliheryani olipa murima wira mulaleye ihapari sooreera, hata muri ene mmiravo.
Nwehe moota mukhanle anyu oowaaleela myaha sa mBiibiliyani amusi anyu ahikhanle Anamoona a Yehova.
“Enamuna Yoowiiriha Weemya Ekeekhai Amusi Ahikhanle Anamoona” (Owehaweha, 15 a Março, 2014)