Niireke Nyuwo Moorukunuxa Mukhalelo Anyu?

‘Murukunuxe mukhalelo anyu, mùlule osuwela wanyu’.​—AROM. 12:2.

MUNNIWERYA OTTHOKIHERYA?

Xeeni maKristau otheene anitthuneya aya orukunuxa makhalelo aya?

Marukunuxo xeeni khula muKristau onitthuneya awe opaka?

Ninrowa okhumela sai saana napaka marukuknuxo anitthuneya?

1, 2. Xeeni sowiira sahu sinitthara aya makhalelo a opuro ohuwale ahu wala oyariwa ahu?

OTHEENE ahu ninnipaka itthu nittharihelaka moota ohuuwale ahu wala opuro oyariwa ahu. Eyo enihela muhina mawarelo ahu; muthinto wa yoolya ennisivela; ni itthu sinikupali ahu. Mwaha wa xeeni? Eyo enniiraneya mwaha wa atthu anikhalana ahu ni makhalelo ahu.

² Masi, sookhala itthu suulupale sinivikana othanla yoolya wala moota woowara ikuwo. Mwa ntakiheryo, nihiixutta osuwela itthu sooloka sinireerela opaka, ni okhootta itthu soohiloka. Nto itthu iyo khula mutthu tonithanla, mwa enamuna yoovirikana ni akina. Soothanla sahu pooti wooniherya-tho moota onivara aya muteko yowuupuxerya ya murima ahu. Biibiliya onihimya wira ‘[nnaamwi atthu a mulaponi], ahisuwelaka ikano sa Moise, [awo annipaka itthu attharihelaka] ikano’. (aRom. 2:14) Niireke ela entaphulela wira khanikhanle nlamulo na Muluku nnooniherya mweettelo wooloka, ni wira khula mutthu ohaana otthara makhalelo a opuro onikhala awe wala ayareliwe awe paahi?

3. Mathowa xeeni manli aniwiiriha maKristau ohittharaka soolema sinitthariwa ni atthu anceene?

³ Aakhala mathowa manli anooniherya wira maKristau khanireerela otthara yoolema eyo. Nthowa noopacerya: Biibiliya onihimya wira ‘Sihavo iphiro sinònahu orera, masi nimmalela wokhwani’. (Mir. 16:25) Okhala wira hiyo atthu oohimalela, khanirina owerya wa osuwela saana moota wowiikhapelela wira nikhumele saana moomalela. (Mir. 28:26; Yer. 10:23) Nthowa na nenli: Biibiliya onnooniherya wira soophavela ni soolema sa mulaponi sinnikumiheriwa ni weettihiwa ni Satana, yoowo ori ‘muluku a vathí-va’. (2 aKor. 4:4; 1 Yoh. 5:19) Nto, akhala wira nimphavela ophentiwa ni oreelihiwa ni Yehova, nihaana wiiwelelaka miruku siri mwa aRoma 12:2.​—Mmusome.

4. Iponto xeeni ninrowa ahu othokorerya mwa yoosoma ela?

⁴ Sihaavo iponto siri mwa aRoma 12:2, sinireerela ahu othokorerya saana. (1) Xeeni vanitthuneya aya “orukunuxa mukhalelo ahu”? (2) Exeeni enihela muhina mutthu orukunuxa mukhalelo awe? nave (3) Ninrowa orukunuxa sai mukhalelo ahu? Nrowe nthokorerye makoho ala.

XEENI VANITTHUNEYA AYA ORUKUNUXA MAKHALELO AHU?

5. Masu ari mwa aRoma 12:2, Paulo aalepela atthu xeeni?

⁵ Masu a murummwa Paulo aalepenle awe aRoma, owo khahiyo aalepenle atthu oohaamini wala atthu otheene, masi aalepenle maKristau oowoottihiwa. (aRom. 1:7) Owo aahaalopola wira ‘ehitthareké mwettelo wa atthu a vathi’. Okathi wa maKristau a oRoma, eyaakha ya 56 E.C., ‘makhalelo a vathi’ wala eelapo, yaahela muhina malamulo, soolema miirelo itthu, ni mweettelo wa atthu a elapo ya oRoma. Paulo aahirumeela nuulumo noowi: ‘muhitthareke’, nto masu awo anooniherya wira akina nlelo yeettela itthu sa elapo ele. Itthu xeeni saawerya waahapuxa annihu ni arokorihu a okathi ole?

6, 7. Mmahiku a Paulo, moota xeeni soolema ni makhalelo a oRoma yaakumiherya aya muxankiho wa maKristau?

⁶ Olelo-va, alipa-anixukurya isidade, yaphiya oRoma aniweha paahi itemplo sa khalai, mahiye akhalai, ilatarato ni ixiri suulupale, mapuro yiitthaniwa arena, yaapakiwa iteatro, ni itthu sikina. Sikina mwa itthu iyo, saapakiwe khalaixa ehinatthi eseekulu yoopacerya. Vano itthu iyo sa khalai, sinniwooniherya atthu olelo-va, makhalelo ni itthu saakokhoreliwa khalai oRoma. Hiyo-tho pooti osoma muliivuruni myaha sa axooku ooRoma wa atthu yaawana ni inama soowali, otthimaka woovothana wa ikaaro, otthekula ni wiipa wa khula enamuna, inamuna sikina saari sowuuliha muru. Esidade ya oRoma yaari eseedi yoothaaciri ya anakoso; nto vanaakhweela atthu anceene ophwanya muhakhu.​—aRom. 6:21; 1 Ped. 4:3, 4.

⁷ Nnaamwi yaarina itemplo sa amuluku anceene, atthu a oRoma khiyaatepexa waamini okhala etthu yekeekhai amuluku yaakokhorela aya. Awosa, yoona wira amuluku annikokhoreliwa mwaha wa itthu sa vameekha aya paahi, ntoko oyariwa wa mwaana, ekasamento, ni okathi wa masikho, maana itthu iyo saari soolema saatumereriwa opaka. Nto vano nyuwo pooti woona muxankiho yaarina aya maKristau oRoma. Anamunceene yaari atthu yeettela soolema iye ehinatthi okhala maKristau, nto awo yaahaana orukunuxa mukhalelo aya wira ekhale maKristau ekeekhai; nto orukunuxa mukhalelo aya khiwaamalela nihiku na obatizo paahi.

8. Moota xeeni olumwenku ola onaaxankiha aya maKristau ekeekhai?

⁸ Ntoko siireya aya khalai oRoma, nave olelo-va olumwenku ola onnaaxankiha maKristau ekeekhai. Mwaha wa xeeni? Mwaha woowi munepa wa mulaponi onikhumelela mwa inamuna soovirikana. (Mmusome aÉfeso 2:2, 3; 1 Yohani 2:16.) Omakela woona wala wiiwa soophavela, muupuwelo, ni makhalelo a mulaponi khula nihiku, pooti onihapuxa nto khiyeettihiwa ni elapo. Ti maana aya vanitthuneya ahu wiiwelela yootumererya ya ‘ohitthara mwettelo wa atthu a vathi-va’ ni ophavela ‘orukunuxa mukhalelo ahu’. Nto nipake exeeni?

EXEENI ENITTHUNEYA ORUKUNUXIWA?

9. Ahinatthi obatiziwa, mirukunuxo xeeni anamunceene apanke aya?

⁹ Vaavo mutthu onimusoma awe Biibiliya ni weettela miruku sawe, owo onnipacerya orowa vahoolo omunepani. Vaavo mutthu onoona awe orowa nno vahoolo, nto owo onnipaka mirukunuxo mookumini mwawe attharihaka ele eniixutta awe. Vano mutthu onnihiya soowiira sa etiini ya khalai yowoottha ni mikhalelo sawe soohiloka sa okumi, nto khiyaphavela wunnuuherya mweettelo wooloka wa eKristau. (aÉf. 4:22-24) Ninnihakalala waaweha atthu ikonto imiya sinceene erowaka vahoolo khula mwaakha ni ephwanelaka obatiziwa ntoko ethoonyeryo ya wiivahererya waya wa Yehova Muluku. Tthiri ela ennimuhakalaliha Yehova. (Mir. 27:11) Ti vooloka wiikohaka so: Kiireke miyo kinitthuneya opaka mirukunuxo iyo?

10. Onivirikana sai orukunuxa makhalelo ni oreerihela etthu yahaalonke?

¹⁰ Masi, orukunuxa makhalelo khahiyo orowa vahoolo wala olokiherya etthu yoohikhalela paahi. Mwa ntakiheryo, etthu emosa enitumihiwa pooti olokiheriwa khutthikela olempwa so: ‘vano yoreera’; hata vari siiso, mutthu onnisuwela wira nlelo etthu yeele yahaalonke. Woonasa wene ereerihiwe vakhaani paahi, wala opuro oniheliwa aya toreerihiwe. Voohimya sa nuulumo nla na ‘orukunuxa makhalelo’, disionaario Vine’s Expository Dictionary, onihimya so: “aRoma 12:2, onihimya sa ovirikana okhanle wa mutthu onitthara makhalelo a elapo ela ni ole onirukunuxa mweettelo awe okhaliheriwaka ni Munepa Wootteela’. Tivonto marukunuxo muKristau anitthuneya awe opaka khahiyo ohiya itthu soohiloka paahi, itthu ntoko olavula woohiloka vamosa ni mweettelo weekhapa paahi. Maana atthu akina yaale ahinimusuwela Biibiliya anneererya okhootta itthu iyo. Nto marukunuxo xeeni maKristau anitthuneya aya opaka?

11. Itthu xeeni Paulo aalavunle awe sinooniherya otthuneya waya wiimananiha orukunuxa makhalelo?

¹¹ Paulo aahilepa ariki: ‘Murukunuxe mukhalelo anyu, mùlule osuwela wanyu’. Nuulumo nla noowi ‘osuwela wanyu’, ninvarihana ni owerya wahu wuupuwelela itthu. Masi ntoko sinirumeeliwa aya mBiibiliyani, onihela muhina ele enimakela ahu wuupuwela, soophavela sahu, ni moota onuupuwela ahu. Wanipacerya wa epaphelo awe wa aRoma, Paulo aahilavula sa atthu yaarina ‘[muupuwelo] wotakhala’. Atthu awo yaari oohixariya, otakhala murima, anamilili, oolimalela soonanara, ananrima, oowiiva, oowana, owootha, oolavi-lavi ni itthu sikina sootakhala. (aRom. 1:28-31) Ninniweha nthowa naya Paulo aalipiherya awe ale yaahuuwale eriyari ya atthu ale ootakhala, masi khukhala arumeyi a Muluku wira yahaana ‘orukunuxa makhalelo aya’ ni ‘wùlula osuwela waya’.

12. Mweettelo xeeni nyuwo munoona anyu wa atthu a vano, nto mweettelo owo oniwerya sai waaxankiha maKristau?

¹² Mooriipiha murima, olelo va noorukureriwa ni atthu anlikana ni okathi Paulo aalempe awe epaphelo ya aRoma. Atthu awo pooti woonaka wira khivanireerela weettela makhalelo ooloka. Alipa-oosomiha ni anamuyari anceene, annitumererya ni waahiyererya anamwane ‘yeettelaka murima aya’. Awo anuupuwela wira khula mutthu ohaana opakaka etthu enimusivela, ni wira khuta etthu ti yooloka. Hata ale aniihimya okhala anatiini, anoona wira khuuvo onimoova aya nto annipaka itthu sinaasivela, nnaamwi eyo etaphulelaka ohimwiiwelela Muluku wala malamulo awe. (Esal. 14:1) Mweettelo owo pooti waaxankiha maKristau ekeekhai. Ale ahirina ephoole, pooti woonaka siiso marehereryo a Muluku. Awo pooti ohiphavela weettela malakiheryo a muloko ni opacerya wiikhupanyiha wa khula etthu ehinaasivela. Awo pooti ohoveryaka miruku sa Biibiliya voohimya sa inamuna sa otthekula, orumeela Internet, ni orowa osoma universidade.

13. Xeeni vanireerela aya wiitokosa mmensihu?

¹³ Vanonto, wira hiyo nihihapuxiwe ni olumwenku ola, nihaana otokosa saana muupuwelo ahu ni murima wotheene voohimya sa mweettelo ahu soophavela sahu ni soolimalela sahu. Mikhalelo iyo, pooti ohooniwaka ni atthu akina. Akina pooti onileela wira mweettelo ahu ti wooloka. Hata vari siiso, hiyo aneene ninnisuwela akhala wira ninneemya wira ele exuntte ahu mBiibiliyani erukunuxe murima ahu mwa itthu soovila,ni ovikaniha oturuka muupuwelo ahu.​—Mmusome Yakobo 1:23-25.

MOOTA MUTTHU ONIRUKUNUXA AWE MUKHALELO AWE

14. Exeeni enrowa oniiriha owerya opaka mirukunuxo?

¹⁴ Wira nituruke mukhalelo ahu, vanitthuneya orukunuxa mikhalelo sa mmurimani mwahu, nto wira vaweryaneye, enitthuneya etthu eniwerya ovara murima ahu ohiya muupuwelo paahi. Exeeni enrowa onikhaliherya opaka eyo? Vaavo vaniixutta ahu ele Yehova ennivekela awe moovarihana ni soolakela sawe siri mBiibiliyani, nto moota nnoonela ahu ele enisoma ahu onnooniherya ophavela wahu opaka marukunuxo wira nikhaleke ntoko ‘sintthuna awe Muluku’.​—aRom. 12:2; aHéb. 4:12.

15. Onuupa wa Yehova onrowa okumiherya marukunuxo xeeni?

¹⁵ Mmusome Yesaya 64:8. Masu alempwale ni profeta Yesaya, ahaana oniirihaka ophavela otokosa. Moota xeeni Yehova, Mulipa Oowuupa onnuupa awe hiyo ninlikanyihiwa ni oloko? Ekeekhai wira Yehova khonnituruka ntoko siniirihiwa oloko, wira onipake vasya-tho nto khiyakhala ootepa oreera werutthuni. Yehova onninrukunuxa mwa enamuna ya omunepani ohiya werutthuni. Akhala wira ninneemererya Yehova onuupa, nto marukunuxo ahu anrowa okhala a vamurimani, niire so, omunepani; eyo enooniiriha woona ele enitthuneya ahu opaka wira nihihapuxiwe ni itthu sa mulaponi. Nto onuupa wawe Yehova oniireya sai?

16, 17. (a) Muhimye moota mulipa–owuupa miyaapu etthu oniiriha awe oloko wira uupe mwaapu wooreera. (b) Nuulumo na Muluku ninnikhaliherya sai orukunuxa mukhalelo ahu wira niphentiweke ni Yehova?

¹⁶ Mulipa-onuupa miyaapu wira opake mwaapu wooloka, owo ohaana orumeele oloko wootepa oreera. Nto sookhala itthu piili sinitthuneya awe opaka. Wanipacerya, ohaana orapiha saana oloko, ovenxa ikokhola ni maluku annanariha oloko owo. Nuumala-vo, oloko owo onnitakaaxeriwa maasi vakhaani khiyavottiwa wira nto opaceriweke wumpwa mwaapu oratteene.

¹⁷ Moone wira maasi annirumeeliwa wira orapihiwe oloko owo ni woolowihiwa wira wuupeyeke saana, nto sikhumeleke myaapu sooloka ni sootepa oreera. Ninnoona olikana waya moota nuulumo na Muluku nikhanle aya oonuupa? Nuulumo nlo ninninikhaliherya ohiya mweettelo ni muupuwelo wa khalai niira ahu nihimusuwenle Muluku, wira nirukunuxe mukhalelo ahu wira niphentiweke nuuwo. (aÉf. 5:26) Nkuupuwelani khula okathi moota onitumereriwa ahu omusomaka Biibiliya khula nihiku, ohicompela mithukumano sa eKristau opuro yoowo onthokoreriwa aya Masu a Muluku. Xeeni nintumereriwa ahu opaka itthu iya? Mwaha woowi opakaka eyo ori wiivahererya wa Yehova wira anuupe wala onirukunuxa.​—Esal. 1:2; Mit. 17:11; aHéb. 10:24, 25.

18. (a) Xeeni wuupuwelela saana orina aya efaita naphavela wira Nuulumo na Muluku nirukunuxe mukhalelo ahu? (b) Makoho xeeni akhanle oonikhaliherya?

¹⁸ Masi khivaniphiyerya paahi omusoma ni omwiixutta Biibiliya wira nirukunuxe mukhalelo ahu. Anamunceene annimusoma Biibiliya ikwaha sikina, akina khanliyala itthu siniixutta aya. Waaniheryasa nyuwo mootoko okumana mulaleeryaka atthu siiso. Hata akina anniwerya ohela mmuruni masu manceene ari mBiibiliyani enawerya oromola.a Hata vari siiso, eyo khenirukunuxa muupuwelo aya wala ekumi aya. Exeeni enaahalela? Wira nuulumo na Muluku nimurukunuxe mutthu owo ohaana weemya ele eniixutta awe wira emukele vamurimani. (aGal. 6:6) Tivonto, nihaana oviriha okathi nuupuwelelaka ele eniixutta ahu. Vanoreera wiikohaka so: ‘Kiireke kinnikupali ohiya okupaleela ntoko itthu sa muluku paahi? Kiireke koosuwela ela okhala ekeekhai? Ohiya-vo kinniweha moota woovarihela muteko ele eniixutta aka ohiya paahi oweha moota woowiixuttiha akina? Kinniweha wira Yehova onikileela miyo mmensawe?’ Wuupuwelela ni otthokelela saana makoho ala, anoonikhaliherya wunnuuherya vamurimani moota sinimoonela ahu Yehova. Omphenta wahu onrowa wunnuwaka. Akhala wira masu anoovara murima ahu, nnoowerya opaka marukunuxo.​—Mir. 4:23; Luka 6:45.

19, 20. Nihaana wiiwelela miruku xeeni wira niphwanye mareeliho?

¹⁹ Osoma khula nihiku Nuulumo na Muluku ni otthokelela, onoonikhaliherya ovikaniha opaka saana itthu sooreera saapaka ahu okhuma khalai. Biibiliya onihimya so: ‘Murule omutthu wa khalai ni miteko saya, nware omutthu wa nanano, [wira muululiwe mwaha wa osuwela wanyu]’. (aKol. 3:9, 10) Tthiri nnoowerya okhumela saana navikaniha wiiwexexa ele Nuulumo na Muluku enihimya aya. Opaka eyo enoonikhaliherya olokiheryaka ni okhapelela mukhalelo ahu wa eKristau wira nisyake miraakho sa Satana.

²⁰ Murummwa Pedru onninuupuxerya wira: ‘Ntoko anamwane òwìwelela, muhetteleké-tho makhalelo anyu òtakhala’. Ohiya vo, mukhaleke atthu òrera murima ni mwettelo anyu wothene. (1 Ped. 1:14, 15) Akhala wira nnimwiimananiha wira nihiye mweettelo ahu ni muupuwelo ahu woohiloka wa khalai, nto khurukunuxa makhalelo ahu, ninrowa ophwanya mareeliho, ntoko nirowa ahu oweha myaha sinttharelana.

[Enoota]

[Elatarato epaaxina 17]

[Ilatarato siri ipaaxina 18, 19]

Anamunceene anitthuneya okhuma mulaponi mwa Satana wira erukunuxe mukhalelo aya (Moone ettima 9)

[Eponto yuulupale ya epaaxina 19]

‘Murihele ottaiwene makhalelo othene òwawa, ònanariwa, òwali, òviruwa ni òruwana’.​—aÉf. 4:31

[Elatarato epaaxina 21]

Orukunuxa mukhalelo anyu onimookhaliheryani ophukaka mixankiho oratteene ovikana khalai (Moone ettima 18)